[180] Harite haritasaññā chaḍḍeti vā chaḍḍāpeti vā āpatti
pācittiyassa. Harite vematikā chaḍḍeti vā chaḍḍāpeti vā
āpatti pācittiyassa. Harite aharitasaññā chaḍḍeti vā chaḍḍāpeti
vā āpatti pācittiyassa. Aharite haritasaññā āpatti
dukkaṭassa. Aharite vematikā āpatti dukkaṭassa. Aharite
aharitasaññā anāpatti.

[181] Anāpatti oloketvā chaḍḍeti khettamariyāde chaḍḍeti
sāmike āpucchā 1 apaloketvā chaḍḍeti ummattikāya ādikammikāyāti.
--------
Lasuṇavaggassa dasamasikkhāpadaṁ

[182] Tena samayena buddho bhagavā rājagahe viharati veḷuvane
kalandakanivāpe. Tena kho pana samayena rājagahe giraggasamajjo
hoti. Chabbaggiyā bhikkhuniyo giraggasamajjaṁ dassanāya agamaṁsu.
Manussā ujjhāyanti khīyanti vipācenti kathaṁ hi nāma bhikkhuniyo
naccaṁpi gītaṁpi vāditaṁpi dassanāya gacchissanti 2 seyyathāpi gihiniyo
kāmabhoginiyoti. Assosuṁ kho bhikkhuniyo tesaṁ manussānaṁ ujjhāyantānaṁ
1 Ma. Yu. āpucchitvā. 2 Ma. Yu. āgacchissanti.
Khīyantānaṁ vipācentānaṁ. Yā tā bhikkhuniyo appicchā .pe. Tā
ujjhāyanti khīyanti vipācenti kathaṁ hi nāma chabbaggiyā bhikkhuniyo
naccaṁpi gītaṁpi vāditaṁpi dassanāya gacchissantīti .pe. Saccaṁ kira
bhikkhave chabbaggiyā bhikkhuniyo naccaṁpi gītaṁpi vāditaṁpi dassanāya
gacchantīti. Saccaṁ bhagavāti. Vigarahi buddho bhagavā kathaṁ hi
nāma bhikkhave chabbaggiyā bhikkhuniyo naccaṁpi gītaṁpi vāditaṁpi dassanāya
gacchissanti netaṁ bhikkhave appasannānaṁ vā pasādāya .pe.
Evañca pana bhikkhave bhikkhuniyo imaṁ sikkhāpadaṁ uddisantu yā
pana bhikkhunī naccaṁ vā gītaṁ vā vāditaṁ vā dassanāya gaccheyya
pācittayanti.

[183] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Naccaṁ nāma yaṅkiñci naccaṁ.
Gītaṁ nāma yaṅkiñci gītaṁ. Vāditaṁ nāma yaṅkiñci vāditaṁ. Dassanāya
gacchati āpatti dukkaṭassa yattha ṭhitā passati vā suṇāti
vā āpatti pācittiyassa. Dassanupacāraṁ vijahitvā punappunaṁ
passati vā suṇāti vā āpatti pācittiyassa. Ekamekaṁ dassanāya
gacchati āpatti dukkaṭassa yattha ṭhitā passati vā suṇāti
vā āpatti pācittiyassa. Dassanupacāraṁ vijahitvā punappunaṁ
passati vā suṇāti vā āpatti pācittiyassa.

[184] Anāpatti ārāme ṭhitā passati vā suṇāti vā
Bhikkhuniyā ṭhitokāsaṁ vā nisinnokāsaṁ vā nipannokāsaṁ vā āgantvā
naccanti vā gāyanti vā vādenti vā paṭipathaṁ gacchantī passati
vā suṇāti vā sati karaṇīye gantvā passati vā suṇāti vā
āpadāsu ummattikāya ādikammikāyāti.
Lasuṇavaggo paṭhamo.
----------
Andhakāravaggassa paṭhamasikkhāpadaṁ

[185] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhaddāya
kāpilāniyā antevāsiniyā bhikkhuniyā 1 ñātako puriso gāmakā
sāvatthiṁ agamāsi kenacideva karaṇīyena. Athakho sā bhikkhunī tena
purisena saddhiṁ rattandhakāre appadīpe ekenekā santiṭṭhatipi
sallapatipi. Yā tā bhikkhuniyo appicchā .pe. Tā ujjhāyanti
khīyanti vipācenti kathaṁ hi nāma bhikkhunī rattandhakāre appadīpe
purisena saddhiṁ ekenekā santiṭṭhissatipi sallapissatipīti .pe.
Saccaṁ kira bhikkhave bhikkhunī rattandhakāre appadīpe purisena saddhiṁ
ekenekā santiṭṭhatipi sallapatipīti. Saccaṁ bhagavāti. Vigarahi
buddho bhagavā kathaṁ hi nāma bhikkhave bhikkhunī rattandhakāre appadīpe
purisena saddhiṁ ekenekā santiṭṭhissatipi sallapissatipi netaṁ bhikkhave
1 Ma. Yu. antevāsibhikkhuniyā.
Appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī rattandhakāre appadīpe
purisena saddhiṁ ekenekā santiṭṭheyya vā sallapeyya vā
pācittiyanti.

[186] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Rattandhakāreti oggate suriye.
Appadīpeti anāloke. Puriso nāma manussapuriso na yakkho
na peto na tiracchānagato viññū paṭibalo santiṭṭhituṁ sallapituṁ.
Saddhinti ekato. Ekenekāti puriso ceva hoti bhikkhunī ca.
Santiṭṭheyya vāti purisassa hatthapāse tiṭṭhati āpatti
pācittiyassa. Sallapeyya vāti purisassa hatthapāse ṭhitā sallapati
āpatti pācittiyassa. Hatthapāsaṁ vijahitvā santiṭṭhati vā sallapati
vā āpatti dukkaṭassa. Yakkhena vā petena vā paṇḍakena
vā tiracchānagatamanussaviggahena vā saddhiṁ santiṭṭhati vā sallapati vā
āpatti dukkaṭassa.

[187] Anāpatti yā kāci 1 viññū dutiyā 2 hoti arahopekkhā
aññāvihitā santiṭṭhati vā sallapati vā ummattikāya
ādikammikāyāti
1 Ma. Yu. yo koci. 2 dutiyo.
Andhakāravaggassa dutiyasikkhāpadaṁ

[188] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhaddāya
kāpilāniyā antevāsiniyā bhikkhuniyā 1 ñātako puriso gāmakā sāvatthiṁ
agamāsi kenacideva karaṇīyena. Athakho sā bhikkhunī bhagavatā
paṭikkhittaṁ rattandhakāre appadīpe purisena saddhiṁ ekenekā santiṭṭhituṁ
sallapitunti teneva purisena saddhiṁ paṭicchanne okāse ekenekā
santiṭṭhatipi sallapatipi. Yā tā bhikkhuniyo appicchā .pe.
Tā ujjhāyanti khīyanti vipācenti kathaṁ hi nāma bhikkhunī paṭicchanne
okāse purisena saddhiṁ ekenekā santiṭṭhissatipi sallapissatipīti
.pe. Saccaṁ kira bhikkhave bhikkhunī paṭicchanne okāse purisena
saddhiṁ ekenekā santiṭṭhatipi sallapatipīti. Saccaṁ bhagavāti. Vigarahi
buddho bhagavā kathaṁ hi nāma bhikkhave bhikkhunī paṭicchanne okāse
purisena saddhiṁ ekenekā santiṭṭhissatipi sallapissatipi netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī paṭicchanne okāse
purisena saddhiṁ ekenekā santiṭṭheyya vā sallapeyya vā
pācittiyanti.

[189] Yā panāti yā yādisā .pe. Bhikkhunīti .pe. Ayaṁ
1 Ma. Yu. antevāsibhikkhuniyā.
Imasmiṁ atthe adhippetā bhikkhunīti. Paṭicchanno nāma okāso
kuḍḍena vā kavāṭena vā kilañjena vā sāṇipākārena vā
rukkhena vā thambhena vā koṭṭhaḷikāya 1 vā yena kenaci paṭicchanno
hoti. Puriso nāma manussapuriso na yakkho na peto na
tiracchānagato viññū paṭibalo santiṭṭhituṁ sallapituṁ. Saddhinti
ekato. Ekenekāti puriso ceva hoti bhikkhunī ca. Santiṭṭheyya
vāti purisassa hatthapāse tiṭṭhati āpatti pācittiyassa. Sallapeyya
vāti purisassa hatthapāse ṭhitā sallapati āpatti pācittiyassa.
Hatthapāsaṁ vijahitvā santiṭṭhati vā sallapati vā āpatti
dukkaṭassa. Yakkhena vā petena vā paṇḍakena vā tiracchānagatamanussaviggahena
vā saddhiṁ santiṭṭhati vā sallapati vā āpatti
dukkaṭassa.