[190] Anāpatti yā kāci 2 viññū dutiyā 3 hoti arahopekkhā
aññāvihitā santiṭṭhati vā sallapati vā ummattikāya
ādikammikāyāti.
--------
Andhakāravaggassa tatiyasikkhāpadaṁ

[191] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhaddāya
1 Ma. Yu. koṭṭhaḷiyā. 2 Ma. Yu. yo koci. 3 dutiyo.
Kāpilāniyā antevāsiniyā bhikkhuniyā ñātako puriso gāmakā
sāvatthiṁ agamāsi kenacideva karaṇīyena. Athakho sā bhikkhunī
bhagavatā paṭikkhittaṁ paṭicchanne okāse purisena saddhiṁ ekenekā
santiṭṭhituṁ sallapitunti teneva purisena saddhiṁ ajjhokāse ekenekā
santiṭṭhatipi sallapatipi. Yā tā bhikkhuniyo appicchā .pe.
Tā ujjhāyanti khīyanti vipācenti kathaṁ hi nāma bhikkhunī ajjhokāse
purisena saddhiṁ ekenekā santiṭṭhissatipi sallapissatipīti .pe.
Saccaṁ kira bhikkhave bhikkhunī ajjhokāse purisena saddhiṁ ekenekā
santiṭṭhatipi sallapatipīti. Saccaṁ bhagavāti. Vigarahi buddho bhagavā
kathaṁ hi nāma bhikkhave bhikkhunī ajjhokāse purisena saddhiṁ ekenekā
santiṭṭhissatipi sallapissatipi netaṁ bhikkhave appasannānaṁ
vā pasādāya .pe. Evañca pana bhikkhave bhikkhuniyo imaṁ sikkhāpadaṁ
uddisantu yā pana bhikkhunī ajjhokāse purisena saddhiṁ
ekenekā santiṭṭheyya vā sallapeyya vā pācittiyanti.

[192] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Ajjhokāso nāma
appaṭicchanno hoti kuḍḍena vā kavāṭena vā kilañjena vā
sāṇipākārena vā rukkhena vā thambhena vā koṭṭhaḷikāya vā yena kenaci
appaṭicchanno hoti. Puriso nāma manussapuriso na yakkho na
peto na tiracchānagato viññū paṭibalo santiṭṭhituṁ sallapituṁ.
Saddhinti ekato. Ekenekāti puriso ceva hoti bhikkhunī ca.
Santiṭṭheyya vāti purisassa hatthapāse tiṭṭhati āpatti
pācittiyassa. Sallapeyya vāti purisassa hatthapāse ṭhitā sallapati
āpatti pācittiyassa. Hatthapāsaṁ vijahitvā santiṭṭhati vā
sallapati vā āpatti dukkaṭassa. Yakkhena vā petena vā
paṇḍakena vā tiracchānagatamanussaviggahena vā saddhiṁ santiṭṭhati vā
sallapati vā āpatti dukkaṭassa.

[193] Anāpatti yā kāci 1 viññū dutiyā 2 hoti arahopekkhā
aññāvihitā santiṭṭhati vā sallapati vā ummattikāya
ādikammikāyāti.
--------
Andhakāravaggassa catutthasikkhāpadaṁ

[194] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā
bhikkhunī rathiyāyapi byūhepi siṅghāṭakepi purisena saddhiṁ ekenekā
santiṭṭhatipi sallapatipi nikaṇṇikaṁpi jappeti dutiyikaṁpi bhikkhuniṁ
uyyojeti. Yā tā bhikkhuniyo appicchā .pe. Tā ujjhāyanti
khīyanti vipācenti kathaṁ hi nāma ayyā thullanandā rathiyāyapi byūhepi
siṅghāṭakepi purisena saddhiṁ ekenekā santiṭṭhissatipi sallapissatipi
nikaṇṇikaṁpi jappissati dutiyikaṁpi bhikkhuniṁ uyyojessatīti .pe.
1 Ma. Yu. yo koci. 2 dutiyo.
Saccaṁ kira bhikkhave thullanandā bhikkhunī rathiyāyapi byūhepi siṅghāṭakepi
purisena saddhiṁ ekenekā santiṭṭhatipi sallapatipi nikaṇṇikaṁpi
jappeti dutiyikaṁpi bhikkhuniṁ uyyojetīti. Saccaṁ bhagavāti. Vigarahi
buddho bhagavā kathaṁ hi nāma bhikkhave thullanandā bhikkhunī rathiyāyapi
byūhepi siṅghāṭakepi purisena saddhiṁ ekenekā santiṭṭhissatipi
sallapissatipi nikaṇṇikaṁpi jappissati dutiyikaṁpi bhikkhuniṁ uyyojessati
netaṁ bhikkhave appasannānaṁ vā pasādāya .pe. Evañca pana
bhikkhave bhikkhuniyo imaṁ sikkhāpadaṁ uddisantu yā pana bhikkhunī
rathiyāya vā byūhe vā siṅghāṭake vā purisena saddhiṁ ekenekā
santiṭṭheyya vā sallapeyya vā nikaṇṇikaṁ vā jappeyya dutiyikaṁ
vā bhikkhuniṁ uyyojeyya pācittiyanti.

[195] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Rathiyā nāma racchā vuccati.
Byūhaṁ nāma yeneva pavisanti teneva nikkhamanti. Siṅghāṭako nāma
caccaraṁ vuccati. Puriso nāma manussapuriso na yakkho na peto
na tiracchānagato viññū paṭibalo santiṭṭhituṁ sallapituṁ. Saddhinti
ekato. Ekenekāti puriso ceva hoti bhikkhunī ca. Santiṭṭheyya
vāti purisassa hatthapāse tiṭṭhati āpatti pācittiyassa.
Sallapeyya vāti purisassa hatthapāse ṭhitā sallapati āpatti
pācittiyassa. Nikaṇṇikaṁ vā jappeyyāti purisassa upakaṇṇake
Āroceti āpatti pācittiyassa. Dutiyikaṁ vā bhikkhuniṁ uyyojeyyāti
anācāraṁ ācaritukāmā dutiyikaṁ 1 bhikkhuniṁ uyyojeti āpatti
dukkaṭassa. Dassanūpacāraṁ vā savanūpacāraṁ vā vijahantiyā āpatti
dukkaṭassa vijahite āpatti pācittiyassa. Hatthapāsaṁ vijahitvā
santiṭṭhati vā sallapati vā āpatti dukkaṭassa. Yakkhena vā
petena vā paṇḍakena vā tiracchānagatamanussaviggahena vā saddhiṁ
santiṭṭhati vā sallapati vā āpatti dukkaṭassa.

[196] Anāpatti yā kāci 2 viññū dutiyā 3 hoti arahopekkhā
aññāvihitā santiṭṭhati vā sallapati vā na anācāraṁ ācaritukāmā
sati karaṇīye dutiyikaṁ bhikkhuniṁ uyyojeti ummattikāya
ādikammikāyāti.
--------
Andhakāravaggassa pañcamasikkhāpadaṁ

[197] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarā
bhikkhunī aññatarassa kulassa kulupikā hoti niccabhattikā. Athakho
sā bhikkhunī pubbaṇhasamayaṁ nivāsetvā pattacīvaramādāya 4 yena taṁ
kulaṁ tenupasaṅkami upasaṅkamitvā āsane nisīditvā sāmike
anāpucchā pakkāmi. Tassa kulassa dāsī gharaṁ sammajjantī taṁ āsanaṁ
bhājanantarikāya pakkhipi. Manussā taṁ āsanaṁ apassantā taṁ bhikkhuniṁ
1 Ma. Yu. dutiyikaṁpi. 2 Ma. yo koci. 3 dutiyo. 4 Ma. Yu. pattacīvaraṁ ādāya.
Etadavocuṁ kahantaṁ ayye āsananti. Nāhantaṁ āvuso āsanaṁ
passāmīti. Dehayye 1 taṁ āsananti paribhāsitvā niccabhattaṁ pacchindiṁsu.
Athakho te manussā gharaṁ sodhentā taṁ āsanaṁ bhājanantarikāya passitvā
taṁ bhikkhuniṁ khamāpetvā niccabhattaṁ paṭṭhapesuṁ. Athakho sā bhikkhunī
bhikkhunīnaṁ etamatthaṁ ārocesi. Yā tā bhikkhuniyo appicchā .pe.
Tā ujjhāyanti khīyanti vipācenti kathaṁ hi nāma bhikkhunī
purebhattaṁ kulāni upasaṅkamitvā āsane nisīditvā sāmike anāpucchā
pakkamissatīti .pe. Saccaṁ kira bhikkhave bhikkhunī purebhattaṁ kulāni
upasaṅkamitvā āsane nisīditvā sāmike anāpucchā pakkamatīti 2 .
Saccaṁ bhagavāti. Vigarahi buddho bhagavā kathaṁ hi nāma bhikkhave
bhikkhunī purebhattaṁ kulāni upasaṅkamitvā āsane nisīditvā sāmike
anāpucchā pakkamissati netaṁ bhikkhave appasannānaṁ vā pasādāya
.pe. Evañca pana bhikkhave bhikkhuniyo imaṁ sikkhāpadaṁ uddisantu
yā pana bhikkhunī purebhattaṁ kulāni upasaṅkamitvā āsane nisīditvā
sāmike anāpucchā pakkameyya pācittiyanti.

[198] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Purebhattaṁ nāma aruṇuggamanaṁ 3
upādāya yāva majjhantikā. Kulaṁ nāma cattāri kulāni khattiyakulaṁ
brāhmaṇakulaṁ vessakulaṁ suddakulaṁ. Upasaṅkamitvāti tattha gantvā.
1 Ma. Yu. dethayye 2 Ma. Yu. pakkāmīti. 3 Yu. aruṇuggaṁ.
Āsanaṁ nāma pallaṅkassa okāso vuccati. Nisīditvāti tasmiṁ
nisīditvā. Sāmike anāpucchā pakkameyyāti yo tasmiṁ kule
manusso sāmiko dātuṁ 1 taṁ anāpucchā. Anovassikaṁ 2 atikkamantiyā 3
āpatti pācittiyassa. Ajjhokāse upacāraṁ atikkamantiyā āpatti
pācittiyassa.

[199] Anāpucchite anāpucchitasaññā pakkamati āpatti
pācittiyassa. Anāpucchite vematikā pakkamati āpatti pācittiyassa.
Anāpucchite āpucchitasaññā pakkamati āpatti pācittiyassa.
Pallaṅkassa anokāse āpatti dukkaṭassa. Āpucchite
anāpucchitasaññā āpatti dukkaṭassa. Āpucchite vematikā
āpatti dukkaṭassa. Āpucchite āpucchitasaññā anāpatti.