[787] Yo appaduṭṭhassa narassa dussati
suddhassa posassa anaṅgaṇassa
tameva bālaṁ pacceti pāpaṁ
sukhumo rajo paṭivātaṁva khittoti.
Sāliyajātakaṁ sattamaṁ.
--------
8 Tacasārajātakaṁ

[788] Amittahatthatthagatā tacasārasamappitā
pasannamukhavaṇṇāttha kasmā tumhe na socatha.

[789] Na socanāya paridevanāya
attho ca labbhā 1 api appakopi
socantamenaṁ dukhitaṁ viditvā
paccatthikā attamanā bhavanti.

[790] Yato ca kho paṇḍito āpadāsu
na vedhati atthavinicchayaññū
paccatthikāssa dukhitā bhavanti
disvā mukhaṁ avikāraṁ purāṇaṁ.

[791] Jappena mantena subhāsitena
anuppadānena paveṇiyā vā
1 Ma. atthova labbho.
Yathā yathā yattha labhetha atthaṁ
tathā tathā tattha parakkameyya.

[792] Yato ca jāneyya alabbhaneyyo
mayā vā aññena vā esa attho
asocamāno adhivāsayeyya
kammaṁ daḷhaṁ kinti karomidānīti.
Tacasārajātakaṁ aṭṭhamaṁ.
---------
9 Mittavindukajātakaṁ

[793] Kyāhaṁ devānamakaraṁ kiṁ pāpaṁ pakataṁ mayā
yaṁ me sirasmiṁ ohacca cakkaṁ bhamati matthake.

[794] Atikkamma ramaṇakaṁ sadāmattañca dūbhakaṁ
brahmatarañca pāsādaṁ kenatthena idhāgato.

[795] Ito bahutarā bhogā atra maññe bhavissare
iti etāya saññāya passa maṁ byasanaṁ gataṁ.

[796] Catubbhi aṭṭhajjhagamā aṭṭhābhi cāpi 1 soḷasa
soḷasābhi ca dvattiṁsa atricchaṁ cakkamāsado
icchāhatassa posassa cakkaṁ bhamati matthake.