[627] Tasmā paṇḍitajātiyo suṇeyya itarassapi
ubhinnaṁ vacanaṁ sutvā yathā dhammo tathā kare.

[628] Alaso gihī kāmabhogī na sādhu
asaññato pabbajito na sādhu
rājā na sādhu anisammakārī
yo paṇḍito kodhano taṁ na sādhu.

[629] Nisamma khattiyo kayirā nānisamma disampati
nisammakārino rañño 3 yaso kittī ca vaḍḍhatīti.
Rathalaṭṭhijātakaṁ dutiyaṁ.
---------
3 Godhajātakaṁ 4

[630] Tadeva me tvaṁ vidito vanamajjhe rathesabho 5
yassa te khaggabandhassa 6 sannaddhassa tirīṭino
assatthadumasākhāya pakkā godhā palāyatha.

[631] Name namantassa bhaje bhajantaṁ
kiccānukubbassa kareyya kiccaṁ
nānatthakāmassa kareyya atthaṁ
asambhajantampi na sambhajeyya.
1 Ma. pubbavakkhāyino. 2 Sī. Yu. ekadatthu. Ma. aññadatthu. 3 Sī. Ma.
rāja. 4 Ma. pakkagodhajātakaṁ. 5 Ma. rathesabha. 6 Ma. khaggabaddhassa.

[632] Caje cajantaṁ vanathaṁ na kayirā
apetacittena na sambhajeyya
dijo dumaṁ khīṇaphalaṁva 1 ñatvā
aññaṁ samekkheyya mahā hi loko.

[633] So te karissāmi yathānubhāvaṁ
kataññutaṁ khattiyo 2 pekkhamā no
sabbañca te issariyaṁ dadāmi
yassicchasī tassa tuvaṁ dadāmīti.
Godhajātakaṁ tatiyaṁ.
--------
4 Rājovādajātakaṁ

[634] Gavañce taramānānaṁ jimhaṁ gacchati puṅgavo
sabbā gāvī jimhaṁ yanti 3 nette jimhaṁ gate sati.

[635] Evameva manussesu yo hoti seṭṭhasammato
so ce adhammaṁ carati pageva itarā pajā
sabbaṁ raṭṭhaṁ dukkhaṁ seti rājā ce hoti adhammiko.

[636] Gavañce taramānānaṁ ujuṁ gacchati puṅgavo
sabbā gāvī ujuṁ yanti 4 nette ujuṁ gate sati.