[587] Veluvaṁ patitaṁ sutvā duddubhanti saso javi
sasassa vacanaṁ sutvā santattā migavāhinī.

[588] Appatvā padaviññāṇaṁ paraghosānusārino
pamādaparamā 1 bālā te honti parapattiyā.

[589] Ye ca sīlena sampannā paññāyūpasame ratā
ārakā viratā dhīrā na honti parapattiyāti.
Duddubhāyajātakaṁ 2 dutiyaṁ.
-----------
3 Brahmadattajātakaṁ

[590] Dvayaṁ yācanako rāja brahmadatta nigacchati
alābhaṁ dhanalābhaṁ vā evaṁdhammā hi yācanā.

[591] Yācanaṁ rodanaṁ āhu pañcālānaṁ rathesabha
yo yācanaṁ paccakkhāti tamāhu paṭirodanaṁ.

[592] Maṁ māddasaṁsu 3 rodantaṁ pañcālā susamāgatā
tuvaṁ vā paṭirodantaṁ tasmā icchāmahaṁ raho.

[593] Dadāmi te brāhmaṇa rohiṇīnaṁ
gavaṁ sahassaṁ saha puṅgavena
ariyo hi ariyassa kathaṁ na dajjā
sutvāna gāthā tava dhammayuttāti.
Brahmadattajātakaṁ tatiyaṁ.
1 Ma. panādaparamā. 2 Sī. Yu. daddabha-jātakaṁ. 3 Ma. māmaddasaṁsu.
4 Cammasāṭakajātakaṁ

[594] Kalyāṇarūpo vatāyaṁ catuppado
subhaddako ceva supesalo ca
yo brāhmaṇaṁ jātimantūpapannaṁ
apacāyati meṇḍavaro yasassī.

[595] Mā brāhmaṇa ittaradassanena
vissāsamāpajji catuppadassa
daḷhappahāraṁ abhikattukāmo 1
avasakkati 2 dassati suppahāraṁ.

[596] Uruṭṭhī bhaggā patito 3 khāribhāro
sabbaṁ bhaṇḍaṁ brāhmaṇasseva 4 bhinnaṁ
ubhopi bāhā paggayheva 5 kandati
abhidhāvataṁ haññati brahmacāriṁ 6 .