[457] Mā sālukassa pihayi āturannāni bhuñjati
appossukko bhusaṁ khāda etaṁ dīghāyulakkhaṇaṁ.

[458] Idāni so idhāgantvā atithi 2 yuttasevako
atha dakkhasi sālukaṁ sayantaṁ mūsaluttaraṁ.
1 Sī. Yu. yāva yāva nighaṁsāma. 2 Ma. atithī.

[459] Vikantaṁ sūkaraṁ disvā sayantaṁ mūsaluttaraṁ
jaraggavā acintesuṁ varamhākaṁ bhusāmivāti.
Sālukajātakaṁ chaṭṭhaṁ.
-------
7 Lābhagarahikajātakaṁ 1

[460] Nānummatto nāpisuṇo nānaṭo nākutūhalo
muḷhesu labhate lābhaṁ esā te anusāsanī.

[461] Dhiratthu taṁ yasalābhaṁ dhanalābhañca brāhmaṇa
yā vutti vinipātena adhammacariyāya 2 vā.

[462] Api ce pattamādāya anāgāro paribbaje
esāva jīvikā seyyo 3 yā cādhammena esanāti.
Lābhagarahikajātakaṁ sattamaṁ.
---------
8 Macchadānajātakaṁ 4

[463] Agghanti macchā adhikaṁ sahassaṁ
na so atthi yo imaṁ saddaheyya
mayhañca assū idha satta māsā
ahampi taṁ macchadānaṁ 5 kiṇeyyaṁ.

[464] Macchānaṁ bhojanaṁ datvā mama dakkhiṇamādisi
taṁ dakkhiṇaṁ sarantiyā kataṁ apacitiṁ tayā.
1 Sī. ... lābhagarahajātakaṁ. 2 Ma. adhammacaraṇena. 3 Sī. Yu. seyyā.
4 Ma. macchuddānajātakaṁ. 5 Ma. macchuddānaṁ.

[465] Paduṭṭhacittassa na phāti hoti
na cāpi naṁ devatā pūjayanti
yo bhātaraṁ pettikaṁ sāpateyyaṁ
avañcayī dukkaṭakammakārīti.
Macchadānajātakaṁ aṭṭhamaṁ.
---------
9 Nānāchandajātakaṁ

[466] Nānāchandā mahārāja ekāgāre vasāmase
ahaṁ gāmavaraṁ icche brāhmaṇī ca gavaṁ sataṁ.