[447] Idaṁ vatvā mahārājā kaṁso bārāṇasiggaho
dhanuṁ tuṇḍiñca 4 nikkhippa saññamaṁ ajjhupāgamīti.
Seyyajātakaṁ dutiyaṁ.
1 Sī. Yu. tvañca. 2 Sī. Yu. cāsi. 3 Ma. ekato. 4 Ma. kaṇḍañca.
3 Vaḍḍhakīsūkarajātakaṁ

[448] Varaṁ varaṁ tvaṁ nihanaṁ pure cari
asmiṁ padese abhibhuyya sūkare
sodāni eko byaggha pagamma jhāyasi
balannu te byaggha na cajja vijjati.

[449] Imassutā 1 yanti disodisaṁ pure
bhayaddhitā 2 leṇagavesino puthū
tedāni saṅgamma vasanti ekato
yatthaṭṭhitā duppasahajjime mayā.

[450] Namatthu saṅghāna samāgatānaṁ
disvā sayaṁ saṁkhya vadāmi abbhutaṁ
byagghaṁ migā yattha jiniṁsu dāṭhino
sāmaggiyā dāṭhabalesu muccareti.
Vaḍḍhakīsūkarajātakaṁ tatiyaṁ.
---------
4 Sirijātakaṁ

[451] Yaṁ ussukkā saṅgharanti alakkhikā bahuṁ dhanaṁ
sippavanto asippā vā lakkhikā tāni bhuñjare 3 .
1 Sī. Ma. ime sudaṁ. 2 Ma. bhayaṭṭitā. 3 Sī. lakkhīva tāni bhuñjati. Ma. lakkhivā
tāni bhuñjati.

[452] Sabbattha katapuññassa aticcaññeva pāṇino
uppajjanti bahū bhogā api nāyatanesupi.

[453] Kukkuṭo maṇayo daṇḍo thiyo ca puññalakkhaṇā
uppajjanti apāpassa katapuññassa jantunoti.
Sirijātakaṁ catutthaṁ.
-------
5 Maṇisūkarajātakaṁ

[454] Dariyā satta vassāni tiṁsamattā vasāmase
haññāma maṇino ābhaṁ iti no mantitaṁ ahu.

[455] Yāvatā maṇi ghaṁsāma 1 bhiyyo vodāyate maṇi
idañcidāni pucchāma kiṁ kiccaṁ idha maññasi.

[456] Ayaṁ maṇi veḷuriyo akāco vimalo subho
nāssa sakkā siriṁ hantuṁ apakkamatha sūkarāti.
Maṇisūkarajātakaṁ pañcamaṁ.
---------
6 Sālukajātakaṁ