[357] Ariyo anariyaṁ kubbaṁ 3 yo daṇḍena nisedhati
sāsanaṁ taṁ 4 na taṁ veraṁ iti naṁ paṇḍitā vidūti.
Tilamuṭṭhijātakaṁ dutiyaṁ.
1 Ma. nālaṅkatena bhadrena. 2 Ma. nāpi. 3 Ma. kubbantaṁ. Sī. Yu. kubbānaṁ.
4 Sī. sāsanatthaṁ.
3 Maṇikaṇṭhajātakaṁ

[358] Mamannapānaṁ vipulaṁ uḷāraṁ
uppajjatīmassa maṇissa hetu
tante na dassaṁ atiyācakosi
na cāpi te assamamāgamissaṁ.

[359] Susū yathā sakkharadhotapāṇī
tāsesimaṁ selaṁ yācamāno
tante na dassaṁ atiyācakosi
na cāpi te assamamāgamissaṁ.

[360] Na taṁ yāce yassa piyaṁ jigiṁse 1
desso hoti atiyācanāya
nāgo maṇiṁ yācito brāhmaṇena
adassanaṁyeva tadajjhagamāti.
Maṇikaṇṭhajātakaṁ tatiyaṁ.
--------
4 Kuṇḍakakucchisindhavajātakaṁ

[361] Bhutvā tiṇaparighāsaṁ bhutvā ācāmakuṇḍakaṁ
etaṁ te bhojanaṁ āsi kasmādāni na bhuñjasi.

[362] Yattha posaṁ na jānanti jātiyā vinayena vā
pahuṁ 2 tattha mahābrahme api ācāmakuṇḍakaṁ.
1 Ma. gigīse. 2 Ma. bahuṁ. Sī. Yu. bahū.

[363] Tvañca kho maṁ pajānāsi yādisāyaṁ hayuttamo
jānanto jānamāgamma na te bhakkhāmi kuṇḍakanti.
Kuṇḍakakucchisindhavajātakaṁ catutthaṁ.
----------
5 Sukajātakaṁ

[364] Yāva so mattamaññāsi bhojanasmiṁ vihaṅgamo
tāva addhānamāpādi mātarañca aposayi.

[365] Yato ca kho so 1 bahutaraṁ bhojanaṁ ajjhavāhari 2
tato tattheva saṁsīdi amattaññū hi so ahu.

[366] Tasmā mattaññutā sādhu bhojanasmiṁ agiddhitā 3
amattaññū hi sīdanti mattaññūva 4 na sīdareti.
Sukajātakaṁ pañcamaṁ.
----------
6 Jarūdapānajātakaṁ