[347] Evaṁ sabbehi ñāṇehi yesaṁ dhammā ajānitā
te ve dhammesu kaṅkhanti kiṁsukasmiṁva bhātaroti.
Kiṁsukopamajātakaṁ aṭṭhamaṁ.
---------
9 Sālakajātakaṁ

[348] Ekaputtako bhavissasi
tvañca no hessasi issaro kule
oroha dumasmā sālaka
ehi dāni gharakaṁ vajemase.

[349] Nanu maṁ suhadayoti 2 maññasi
yañca maṁ hanasi veḷuyaṭṭhiyā
pakkambavane ramāmase
gaccha tvaṁ gharakaṁ yathāsukhanti.
Sālakajātakaṁ navamaṁ.
1 Ma. sārathī. 2 Sī. Yu. nanu maṁ hadayeti.
10 Kapijātakaṁ

[350] Ayaṁ isi upasamasaññame rato
sa tiṭṭhati sisirabhayena addhito 1
handa ayaṁ pavisatumaṁ agārakaṁ
vinetu sītaṁ darathañca kevalaṁ.

[351] Nāyaṁ isi 2 upasamasaññame rato
kapi ayaṁ dumbarasākhagocaro 3
so dūsako rosako cāpi jammo
sace vaje imampi dūsaye gharanti 4 .
Kapijātakaṁ dasamaṁ.
Sigālavaggo dasamo.
-------
Tassuddānaṁ
atha rājā sigālavaro sunakho
tathā kosiya icchati kālaghaso
atha dānavaroṭṭhapi sārathinā
punampavanañca sisirakapi dasa.
-----------
1 Ma. aṭṭito. 2 Ma. isī. 3 Sī. Ma. dumavarasākhagocaro. 4 Ma. sace vajemampi
dūseyya gharanti.
Vagguddānaṁ.
Daḷhañca vaggaṁ aparena santhavaṁ
kalyāṇavaggāsadiso ca ruhakaṁ
nataṁdaḷhaṁ bīraṇatthambhakā puna
kāsāvupāhanasigālakena dasāti.
Dukanipātaṁ niṭṭhitaṁ.
-------
Tikanipātajātakaṁ
1 saṅkappavaggo
1 saṅkapparāgajātakaṁ

[352] Saṅkapparāgadhotena vitakkanisitena ca
nevālaṅkatabhadrena 1 (na) usukārakatena ca.

[353] Na kaṇṇāyatamuttena napi 2 morupasevinā
tenamhi hadaye viddho sabbaṅgaparidāhinā.

[354] Āvedhañca na passāmi yato ruhiramassave
yāva ayoniso cittaṁ sayaṁ me dukkhamābhatanti.
Saṅkapparāgajātakaṁ paṭhamaṁ.
---------
2 Tilamuṭṭhijātakaṁ

[355] Ajjāpi me taṁ manasi yaṁ maṁ tvaṁ tilamuṭṭhiyā
bāhāyaṁ maṁ gahetvāna laṭṭhiyā anutālayi.

[356] Nanu jīvite na ramasi yenāsi brāhmaṇāgato
yaṁ maṁ bāhā gahetvāna tikkhattuṁ anutālayi.