[177] Yannu gijjho yojanasataṁ kuṇapāni avekkhati
kasmā jālañca pāsañca āsajjāpi na bujjhasi.

[178] Yadā parābhavo hoti poso jīvitasaṅkhaye
atha jālañca pāsañca āsajjāpi na bujjhatīti.
Gijjhajātakaṁ catutthaṁ.
-------
5 Nakulajātakaṁ

[179] Sandhiṁ katvā amittena aṇḍajena jalābuja
vivariya dāṭhaṁ sayasi 1 kuto te bhayamāgataṁ.

[180] Saṅketheva amittasmiṁ mittasmimpi na vissase
abhayā bhayamuppannaṁ api mūlāni kantatīti.
Nakulajātakaṁ pañcamaṁ.
-------
6 Upasāḷhakajātakaṁ

[181] Upasāḷhakanāmānaṁ 2 sahassāni catuddasa
asmiṁ padese daḍḍhāni natthi loke anāmataṁ.
1 Ma. sesi. 2 Ma. upaḷāḷhakanāmāni.

[182] Yamhi saccañca dhammo ca ahiṁsā saññamo damo
etadariyā sevanti etaṁ loke anāmatanti.
Upasāḷhakajātakaṁ chaṭṭhaṁ.
---------
7 Samiddhijātakaṁ

[183] Abhutvā bhikkhasi bhikkhu na hi bhutvāna bhikkhasi
bhutvāna bhikkhu bhikkhassu mā taṁ kālo upaccagā.

[184] Kālaṁ vohaṁ na jānāmi channo kālo na dissati
tasmā abhutvā bhikkhāmi mā maṁ kālo upaccagāti.
Samiddhijātakaṁ sattamaṁ.
--------
8 Sakuṇagghijātakaṁ

[185] Seno balasā patamāno lāpaṁ gocaraṭṭhāyinaṁ
sahasā ajjhapattova maraṇaṁ tenupāgami.

[186] Sohaṁ nayena sampanno pettike gocare rato
apetasattu modāmi sampassaṁ atthamattanoti.
Sakuṇagghijātakaṁ aṭṭhamaṁ.
---------
9 Arakajātakaṁ