[167] Udetayañcakkhumā ekarājā
harissavaṇṇo paṭhavippabhāso
taṁ taṁ namassāmi harissavaṇṇaṁ paṭhavippabhāsaṁ
tayajja guttā viharemu divasaṁ
ye brāhmaṇā vedagu sabbadhamme
te me namo te ca maṁ pālayantu
namatthu buddhānaṁ namatthu bodhiyā
namo vimuttānaṁ namo vimuttiyā
imaṁ so parittaṁ katvā moro carati esanā.
1 Ma. mātimaññiṭṭho. 2 Ma. suhanūsaha. 3 Ma. suhanūpi. 4 Ma. asatā asanti.
[168] Apetayañcakkhumā ekarājā
harissavaṇṇo paṭhavippabhāso
taṁ taṁ namassāmi harissavaṇṇaṁ paṭhavippabhāsaṁ
tayajja guttā viharemu rattiṁ
ye brāhmaṇā vedagu sabbadhamme
te me namo te ca maṁ pālayantu
namatthu buddhānaṁ namatthu bodhiyā
namo vimuttānaṁ namo vimuttiyā
imaṁ so parittaṁ katvā moro vāsamakappayīti.
Morajātakaṁ navamaṁ.
---------
10 Vinīlakajātakaṁ
[169] Evameva nūna rājānaṁ vedehaṁ mithilaggahaṁ
assā vahanti ājaññā yathā haṁsā vinīlakaṁ.
[170] Vinīla duggaṁ bhajati abhūmiṁ tāta sevasi
gāmantakāni sevassu etaṁ mātālayaṁ tuvanti 1 .
Vinīlakajātakaṁ dasamaṁ.
Daḷhavaggo paṭhamo.
--------
1 Ma. tavāti.
Tassuddānaṁ
varaballika daddara sūkarako
uraguttama pañcamabhaggavaro
mahatīcamuyāva sigālavaro
suhanuttama mora vinīlaṁ dasa.
--------
2 Santhavavaggo
1 indasamānagottajātakaṁ
[171] Na santhavaṁ kāpurisena kayirā
ariyonariyena pajānamatthaṁ
cirānuvuṭṭhopi karoti pāpaṁ
gajo yathā indasamānagottaṁ.
[172] Yadeva 1 jaññā sadiso mamanti
sīlena paññāya sutena cāpi
teneva mettiṁ kayirātha saddhiṁ
sukho have 2 sappurisena saṅgamoti.
Indasamānagottajātakaṁ paṭhamaṁ.
---------
1 Ma. yaṁ tveva. 2 Sī. Ma. sukhāvaho.
2 Santhavajātakaṁ
[173] Na santhavasmā paramatthi pāpiyo
yo santhavo kāpurisena hoti
santappito sappinā pāyāsena
kicchā kataṁ paṇṇakuṭiṁ adaḍḍhahi 1 .
[174] Na santhavasmā paramatthi seyyo
yo santhavo sappurisena hoti
sīhassa bayagghassa ca dīpino ca
sāmā mukhaṁ lehati santhavenāti.
Santhavajātakaṁ dutiyaṁ.
--------
3 Susīmajātakaṁ
[175] Kāḷā migā setadantā tavīme
parosataṁ hemajālābhichannā
te te dadāmīti susīma brūsi
anussaraṁ pettipitāmahānaṁ.
[176] Kāḷā migā setadantā mamīme
parosataṁ hemajālābhichannā
te te dadāmīti vadāmi māṇava
1 Ma. adayhi. Yu. adaṭṭhahi.
Anussaraṁ pettipitāmahānanti.
Susīmajātakaṁ tatiyaṁ.
---------
4 Gijjhajātakaṁ