[90] Dhammakamme dhammakammasaññā nappaṭinissajjati āpatti
Saṅghādisesassa. Dhammakamme vematikā nappaṭinissajjati āpatti
saṅghādisesassa. Dhammakamme adhammakammasaññā nappaṭinissajjati
āpatti saṅghādisesassa. Adhammakamme dhammakammasaññā āpatti
dukkaṭassa. Adhammakamme vematikā āpatti dukkaṭassa.
Adhammakamme adhammakammasaññā āpatti dukkaṭassa.

[91] Anāpatti asamanubhāsantiyā paṭinissajjantiyā ummattikāya
ādikammikāyāti.

[92] Uddiṭṭhā kho ayyāyo sattarasa saṅghādisesā dhammā
nava paṭhamāpattikā aṭṭha yāvatatiyakā yesaṁ bhikkhunī aññataraṁ
vā aññataraṁ vā āpajjati tāya bhikkhuniyā ubhatosaṅghe pakkhamānattaṁ
caritabbaṁ ciṇṇamānattāya bhikkhuniyā yattha siyā vīsatigaṇo
bhikkhunīsaṅgho tattha sā bhikkhunī abbhetabbā ekāyapi ce ūno 2
vīsatigaṇo bhikkhunīsaṅgho taṁ bhikkhuniṁ abbheyya sā ca bhikkhunī
anabbhitā tā ca bhikkhuniyo gārayhā. Ayaṁ tattha sāmīci.
Tatthayyāyo pucchāmi kaccittha parisuddhā. Dutiyampi pucchāmi
kaccittha parisuddhā. Tatiyampi pucchāmi kaccittha parisuddhā.
Parisuddhetthayyāyo tasmā tuṇhī. Evametaṁ dhārayāmīti.
Sattarasakaṇḍaṁ niṭṭhitaṁ.
---------
1 Yu. ciṇṇamānattā bhikkhunī. taṁ susodhitaṁ ciṇṇamānatto bhikkhūti pāliyā
2 Yu. ūnavīsatigaṇo.
Nissaggiyakaṇḍaṁ
ime kho panayyāyo tiṁsa nissaggiyā pācittiyā dhammā uddesaṁ
āgacchanti.
Pattavaggassa paṭhamasikkhāpadaṁ

[93] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhuniyo bahupatte 1 sannicayaṁ karonti. Manussā vihāracārikaṁ
āhiṇḍantā passitvā ujjhāyanti khīyanti vipācenti kathaṁ hi
nāma bhikkhuniyo bahupatte sannicayaṁ karissanti pattavaṇijjaṁ 2 vā
bhikkhuniyo karissanti āmattikāpaṇaṁ vā pasāressantīti. Assosuṁ
kho bhikkhuniyo tesaṁ manussānaṁ ujjhāyantānaṁ khīyantānaṁ vipācentānaṁ.
Yā tā bhikkhuniyo appicchā .pe. Tā ujjhāyanti khīyanti
vipācenti kathaṁ hi nāma chabbaggiyā bhikkhuniyo pattasannicayaṁ
karissantīti .pe. Saccaṁ kira bhikkhave chabbaggiyā bhikkhuniyo pattasannicayaṁ
karontīti. Saccaṁ bhagavāti. Vigarahi buddho bhagavā kathaṁ hi
nāma bhikkhave chabbaggiyā bhikkhuniyo pattasannicayaṁ karissanti netaṁ
bhikkhave appasannānaṁ vā pasādāya .pe. Evañca pana bhikkhave
bhikkhuniyo imaṁ sikkhāpadaṁ uddisantu yā pana bhikkhunī pattasannicayaṁ
1 Ma. bahūpatte 2 Ma. pattavāṇijjaṁ.
Kareyya nissaggiyaṁ pācittiyanti.

[94] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Patto nāma dve pattā
ayopatto mattikāpatto. Tayo pattassa vaṇṇā ukkaṭṭho
patto majjhimo patto omako patto. Ukkaṭṭho nāma patto
aḍḍhāḷhakodanaṁ gaṇhāti catubhāgaṁ khādanīyaṁ 1 tadūpiyaṁ byañjanaṁ.
Majjhimo nāma patto nāḷikodanaṁ gaṇhāti catubhāgaṁ khādanīyaṁ
tadūpiyaṁ byañjanaṁ. Omako nāma patto patthodanaṁ gaṇhāti
catubhāgaṁ khādanīyaṁ tadūpiyaṁ byañjanaṁ. Tato ukkaṭṭho apatto
omako apatto. Sannicayaṁ kareyyāti anadhiṭṭhito avikappito.
Nissaggiyo hoti 2 saha aruṇuggamanā nissaggiyo hoti nissajjitabbo
saṅghassa vā gaṇassa vā ekabhikkhuniyā vā. Evañca pana bhikkhave
nissajjitabbo.

[95] Tāya bhikkhuniyā saṅghaṁ upasaṅkamitvā ekaṁsaṁ uttarāsaṅgaṁ
karitvā vuḍḍhānaṁ bhikkhunīnaṁ pāde vanditvā ukkuṭikaṁ nisīditvā
añjaliṁ paggahetvā evamassa vacanīyo ayaṁ me ayye patto
rattātikkanto nissaggiyo imāhaṁ saṅghassa nissajjāmīti.
1 Ma. Yu. khādanaṁ. 2 ito paraṁ sabbattha itisaddo dissati so atirekoti veditabbo
īdisānaṁ pāṭhānaṁ mātikāyaṁ anāgatattā.
Nissajjitvā āpatti desetabbā. Byattāya bhikkhuniyā paṭibalāya
āpatti paṭiggahetabbā. Nissaṭṭhapatto dātabbo suṇātu me ayye
saṅgho ayaṁ patto itthannāmāya bhikkhuniyā nissaggiyo saṅghassa
nissaṭṭho. Yadi saṅghassa pattakallaṁ saṅgho imaṁ pattaṁ
itthannāmāya bhikkhuniyā dadeyyāti.

[96] Tāya bhikkhuniyā sambahulā bhikkhuniyo upasaṅkamitvā
ekaṁsaṁ uttarāsaṅgaṁ karitvā vuḍḍhānaṁ bhikkhunīnaṁ pāde vanditvā
ukkuṭikaṁ nisīditvā añjaliṁ paggahetvā evamassu vacanīyā ayaṁ
me ayyāyo patto rattātikkanto nissaggiyo imāhaṁ ayyānaṁ
nissajjāmīti. Nissajjitvā āpatti desetabbā. Byattāya
bhikkhuniyā paṭibalāya āpatti paṭiggahetabbā. Nissaṭṭhapatto
dātabbo suṇantu me ayyāyo ayaṁ patto itthannāmāya
bhikkhuniyā nissaggiyo ayyānaṁ nissaṭṭho. Yadi ayyānaṁ pattakallaṁ
ayyāyo imaṁ pattaṁ itthannāmāya bhikkhuniyā dadeyyunti.

[97] Tāya bhikkhuniyā ekaṁ bhikkhuniṁ upasaṅkamitvā ekaṁsaṁ
uttarāsaṅgaṁ karitvā ukkuṭikaṁ nisīditvā añjaliṁ paggahetvā
evamassa vacanīyā ayaṁ me ayye patto rattātikkanto nissaggiyo
imāhaṁ ayyāya nissajjāmīti. Nissajjitvā āpatti desetabbā.
Tāya bhikkhuniyā āpatti paṭiggahetabbā. Nissaṭṭhapatto dātabbo
imaṁ pattaṁ ayyāya dammīti.

[98] Rattātikkante atikkantasaññā nissaggiyaṁ pācittiyaṁ.
Rattātikkante vematikā nissaggiyaṁ pācittiyaṁ. Rattātikkante
anatikkantasaññā nissaggiyaṁ pācittiyaṁ. Anadhiṭṭhite adhiṭṭhitasaññā
nissaggiyaṁ pācittiyaṁ. Avikappite vikappitasaññā
nissaggiyaṁ pācittiyaṁ. Avissajjite vissajjitasaññā nissaggiyaṁ
pācittiyaṁ. Anaṭṭhe naṭṭhasaññā ... Avinaṭṭhe vinaṭṭhasaññā ...
Abhinne bhinnasaññā ... Avilutte viluttasaññā nissaggiyaṁ
pācittiyaṁ.

[99] Nissaggiyaṁ 1 pattaṁ anissajjitvā paribhuñjati āpatti
dukkaṭassa. Rattānatikkante 2 atikkantasaññā āpatti
dukkaṭassa. Rattānatikkante vematikā āpatti dukkaṭassa.
Rattānatikkante anatikkantasaññā anāpatti.