[80] Tā bhikkhuniyo samanubhāsitabbā. Evañca pana bhikkhave
samanubhāsitabbā byattāya bhikkhuniyā paṭibalāya saṅgho ñāpetabbo
1 Ma. Yu. kariyamāne.
Suṇātu me ayye saṅgho itthannāmā ca itthannāmā ca bhikkhuniyo
saṁsaṭṭhā viharanti pāpācārā pāpasaddā pāpasilokā bhikkhunīsaṅghassa
vihesikā aññamaññissā vajjapaṭicchādikā. Tā taṁ vatthuṁ
nappaṭinissajjanti. Yadi saṅghassa pattakallaṁ saṅgho itthannāmañca
itthannāmañca bhikkhuniyo samanubhāseyya tassa vatthussa paṭinissaggāya.
Esā ñatti. Suṇātu me ayye saṅgho itthannāmā ca itthannāmā
ca bhikkhuniyo saṁsaṭṭhā viharanti pāpācārā pāpasaddā pāpasilokā
bhikkhunīsaṅghassa vihesikā aññamaññissā vajjapaṭicchādikā. Tā taṁ
vatthuṁ nappaṭinissajjanti. Saṅgho itthannāmañca itthannāmañca
bhikkhuniyo samanubhāsati tassa vatthussa paṭinissaggāya. Yassā ayyāya
khamati itthannāmāya ca itthannāmāya ca bhikkhunīnaṁ samanubhāsanā tassa
vatthussa paṭinissaggāya sā tuṇhassa yassā nakkhamati sā
bhāseyya. Dutiyampi etamatthaṁ vadāmi .pe. Tatiyampi etamatthaṁ
vadāmi .pe. Samanubhaṭṭhā saṅghena itthannāmā ca itthannāmā
ca bhikkhuniyo tassa vatthussa paṭinissaggāya. Khamati saṅghassa
tasmā tuṇhī. Evametaṁ dhārayāmīti.

[81] Ñattiyā dukkaṭaṁ dvīhi kammavācāhi thullaccayā
kammavācāpariyosāne āpatti saṅghādisesassa. Saṅghādisesaṁ
ajjhāpajjantīnaṁ ñattiyā dukkaṭaṁ dvīhi kammavācāhi thullaccayā
paṭippassambhanti. Dve tisso ekato samanubhāsitabbā taduttari 1
1 Ma. yu tatuttari.
Na samanubhāsitabbā.

[82] Imāpi bhikkhuniyoti purimāyo upādāya vuccanti.
Yāvatatiyakanti yāvatatiyaṁ samanubhāsanāya āpajjanti na saha
vatthujjhācārā. Nissāraṇīyanti saṅghamhā nissāriyati.
Saṅghādisesoti .pe. Tenapi vuccati saṅghādisesoti.

[83] Dhammakamme dhammakammasaññā nappaṭinissajjanti āpatti
saṅghādisesassa. Dhammakamme vematikā nappaṭinissajjanti āpatti
saṅghādisesassa. Dhammakamme adhammakammasaññā nappaṭinissajjanti
āpatti saṅghādisesassa. Adhammakamme dhammakammasaññā āpatti
dukkaṭassa. Adhammakamme vematikā āpatti dukkaṭassa.
Adhammakamme adhammakammasaññā āpatti dukkaṭassa.

[84] Anāpatti asamanubhāsantīnaṁ paṭinissajjantīnaṁ ummattikānaṁ
khittacittānaṁ vedanaṭṭānaṁ 1 ādikammikānanti.
------
Dasamasaṅghādisesaṁ

[85] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā
bhikkhunī saṅghena samanubhaṭṭhā bhikkhuniyo evaṁ vadeti saṁsaṭṭhā va
ayye tumhe viharatha mā tumhe nānā viharittha santi saṅghe
aññāpi bhikkhuniyo evācārā evaṁsaddā evaṁsilokā bhikkhunīsaṅghassa
1 Ma. Yu. khittacittānaṁ vedanaṭṭānanti pāṭhadvayaṁ na dissati.
Vihesikā aññamaññissā vajjapaṭicchādikā tā saṅgho
na kiñci āha tumheyeva saṅgho uññāya paribhavena akkhantiyā
vebhassā 1 dubbalyā evamāha bhaginiyo kho saṁsaṭṭhā viharanti
pāpācārā pāpasaddā pāpasilokā bhikkhunīsaṅghassa vihesikā
aññamaññissā vajjapaṭicchādikā viviccathayye vivekaññeva bhaginīnaṁ
saṅgho vaṇṇetīti. Yā tā bhikkhuniyo appicchā .pe. Tā
ujjhāyanti khīyanti vipācenti kathaṁ hi nāma ayyā thullanandā [2]-
saṅghena samanubhaṭṭhā bhikkhuniyo evaṁ vakkhati saṁsaṭṭhā va ayye
tumhe viharatha mā tumhe nānā viharittha .pe. Viviccathayye
vivekaññeva bhaginīnaṁ saṅgho vaṇṇetīti .pe. Saccaṁ kira bhikkhave
thullanandā bhikkhunī saṅghena samanubhaṭṭhā bhikkhuniyo evaṁ vadeti
saṁsaṭṭhā va ayye tumhe viharatha mā tumhe nānā viharittha
.pe. Viviccathayye vivekaññeva bhaginīnaṁ saṅgho vaṇṇetīti.
Saccaṁ bhagavāti. Vigarahi buddho bhagavā kathaṁ hi nāma bhikkhave
thullanandā bhikkhunī saṅghena samanubhaṭṭhā bhikkhuniyo evaṁ vakkhati
saṁsaṭṭhā va ayye tumhe viharatha mā tumhe nānā viharittha
.pe. Viviccathayye vivekaññeva bhaginīnaṁ saṅgho vaṇṇetīti netaṁ
bhikkhave appasannānaṁ vā pasādāya .pe. Evañca pana bhikkhave
bhikkhuniyo imaṁ sikkhāpadaṁ uddisantu yā pana bhikkhunī evaṁ
1 Ma. Yu. vebhassiyā. evaṁ sabbattha ñātabbaṁ. 2 Ma. bhikkhunī.
Vadeyya saṁsaṭṭhā va ayye tumhe viharatha mā tumhe nānā
viharittha santi saṅghe aññāpi bhikkhuniyo evācārā evaṁsaddā
evaṁsilokā bhikkhunīsaṅghassa vihesikā aññamaññissā vajjapaṭicchādikā
tā saṅgho na kiñci āha tumheyeva saṅgho uññāya paribhavena
akkhantiyā vebhassā 1 dubbalyā evamāha bhaginiyo kho saṁsaṭṭhā
viharanti pāpācārā pāpasaddā pāpasilokā bhikkhunīsaṅghassa vihesikā
aññamaññissā vajjapaṭicchādikā viviccathayye vivekaññeva
bhaginīnaṁ saṅgho vaṇṇetīti. Sā bhikkhunī bhikkhunīhi evamassa vacanīyā
māyye evaṁ avaca saṁsaṭṭhā va ayye tumhe viharatha mā tumhe
nānā viharittha santi saṅghe aññāpi bhikkhuniyo evācārā evaṁsaddā
evaṁsilokā bhikkhunīsaṅghassa vihesikā aññamaññissā vajjapaṭicchādikā
tā saṅgho na kiñci āha tumheyeva saṅgho uññāya
paribhavena akkhantiyā vebhassā dubbalyā evamāha bhaginiyo kho
saṁsaṭṭhā viharanti pāpācārā pāpasaddā pāpasilokā bhikkhunīsaṅghassa
vihesikā aññamaññissā vajjapaṭicchādikā viviccathayye vivekaññeva
bhaginīnaṁ saṅgho vaṇṇetīti. Evañca sā bhikkhunī bhikkhunīhi
vuccamānā tatheva paggaṇheyya sā bhikkhunī bhikkhunīhi yāvatatiyaṁ
samanubhāsitabbā tassa paṭinissaggāya. Yāvatatiyañce samanubhāsiyamānā
taṁ paṭinissajjeyya iccetaṁ kusalaṁ no ce paṭinissajjeyya ayampi
bhikkhunī yāvatatiyakaṁ dhammaṁ āpannā nissāraṇīyaṁ saṅghādisesanti.
1 Ma. Yu. vebhassiyā. evaṁ sabbattha ñātabbaṁ.

[86] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Evaṁ vadeyyāti saṁsaṭṭhā va
ayye tumhe viharatha mā tumhe nānā viharittha santi saṅghe
aññāpi bhikkhuniyo evācārā evaṁsaddā evaṁsilokā bhikkhunīsaṅghassa
vihesikā aññamaññissā vajjapaṭicchādikā tā saṅgho na kiñci
āha tumheyeva saṅgho uññāyāti avaññāya. Paribhavenāti
paribhabyatā 1 . Akkhantiyāti kopena. Vebhassāti vibhassīkatā.
Dubbalyāti apakkhatā. Evamāha bhaginiyo kho saṁsaṭṭhā viharanti
pāpācārā pāpasaddā pāpasilokā bhikkhunīsaṅghassa vihesikā
aññamaññissā vajjapaṭicchādikā viviccathayye vivekaññeva bhaginīnaṁ
saṅgho vaṇṇetīti. Sā bhikkhunīti yā sā evaṁvādinī bhikkhunī.
Bhikkhunīhīti aññāhi bhikkhunīhi. Yā passanti yā suṇanti tāhi
vattabbā māyye evaṁ avaca saṁsaṭṭhā va ayye tumhe viharatha
mā tumhe nānā viharittha .pe. Viviccathayye vivekaññeva
bhaginīnaṁ saṅgho vaṇṇetīti. Dutiyampi vattabbā tatiyampi vattabbā.
Sace paṭinissajjati iccetaṁ kusalaṁ no ce paṭinissajjati āpatti
dukkaṭassa. Sutvā na vadanti āpatti dukkaṭassa. Sā
bhikkhunī saṅghamajjhaṁpi ākaḍḍhitvā vattabbā māyye evaṁ avaca
saṁsaṭṭhā va ayye tumhe viharatha mā tumhe nānā viharittha
.pe. Viviccathayye vivekaññeva bhaginīnaṁ saṅgho vaṇṇetīti.
1 Ma. Yu. pāribhabyatā.
Dutiyampi vattabbā tatiyampi vattabbā. Sace paṭinissajjati
iccetaṁ kusalaṁ no ce paṭinissajjati āpatti dukkaṭassa.

[87] Sā bhikkhunī samanubhāsitabbā. Evañca pana bhikkhave
samanubhāsitabbā byattāya bhikkhuniyā paṭibalāya saṅgho ñāpetabbo
suṇātu me ayye saṅgho ayaṁ itthannāmā bhikkhunī saṅghena samanubhaṭṭhā
bhikkhuniyo evaṁ vadeti saṁsaṭṭhā va ayye tumhe viharatha mā
tumhe nānā viharittha santi saṅghe aññāpi bhikkhuniyo evācārā
evaṁsaddā evaṁsilokā bhikkhunīsaṅghassa vihesikā aññamaññissā
vajjapaṭicchādikā tā saṅgho na kiñci āha tumheyeva saṅgho
uññāya paribhavena akkhantiyā vebhassā dubbalyā evamāha bhaginiyo
kho saṁsaṭṭhā viharanti .pe. Viviccathayye vivekaññeva bhaginīnaṁ
saṅgho vaṇṇetīti. Sā taṁ vatthuṁ nappaṭinissajjati. Yadi saṅghassa
pattakallaṁ saṅgho itthannāmaṁ bhikkhuniṁ samanubhāseyya tassa vatthussa
paṭinissaggāya. Esā ñatti. Suṇātu me ayye saṅgho ayaṁ
itthannāmā bhikkhunī saṅghena samanubhaṭṭhā bhikkhuniyo evaṁ vadeti
saṁsaṭṭhā va ayye tumhe viharatha mā tumhe nānā viharittha
santi saṅghe aññāpi bhikkhuniyo evācārā evaṁsaddā evaṁsilokā
bhikkhunīsaṅghassa vihesikā aññamaññissā vajjapaṭicchādikā tā
saṅgho na kiñci āha tumheyeva saṅgho uññāya paribhavena
akkhantiyā vebhassā dubbalyā evamāha bhaginiyo kho saṁsaṭṭhā viharanti
Pāpācārā pāpasaddā pāpasilokā bhikkhunīsaṅghassa vihesikā
aññamaññissā vajjapaṭicchādikā viviccathayye vivekaññeva bhaginīnaṁ
saṅgho vaṇṇetīti. Sā taṁ vatthuṁ nappaṭinissajjati. Saṅgho
itthannāmaṁ bhikkhuniṁ samanubhāsati tassa vatthussa paṭinissaggāya. Yassā
ayyāya khamati itthannāmāya bhikkhuniyā samanubhāsanā tassa vatthussa
paṭinissaggāya sā tuṇhassa yassā nakkhamati sā bhāseyya.
Dutiyampi etamatthaṁ vadāmi .pe. Tatiyampi etamatthaṁ vadāmi .pe.
Samanubhaṭṭhā saṅghena itthannāmā bhikkhunī tassa vatthussa paṭinissaggāya.
Khamati saṅghassa tasmā tuṇhī. Evametaṁ dhārayāmīti.

[88] Ñattiyā dukkaṭaṁ dvīhi kammavācāhi thullaccayā
kammavācāpariyosāne āpatti saṅghādisesassa. Saṅghādisesaṁ
ajjhāpajjantiyā ñattiyā dukkaṭaṁ dvīhi kammavācāhi thullaccayā
paṭippassambhanti.

[89] Ayampīti purimāyo upādāya vuccati. Yāvatatiyakanti
yāvatatiyaṁ samanubhāsanāya āpajjati na saha vatthujjhācārā.
Nissāraṇīyanti saṅghamhā nissāriyati. Saṅghādisesoti saṅgho va tassā
āpattiyā mānattaṁ deti mūlāya paṭikassati abbheti na sambahulā
na ekā bhikkhunī tena vuccati saṅghādisesoti. Tasseva āpattinikāyassa
nāma kammaṁ adhivacanaṁ tenapi vuccati saṅghādisesoti.