[77] Usabhā rukkhā gāviyo gavā ca
asso kaṁso sigālī 1 ca kumbho
pokkharaṇī ca apākacandanaṁ
lāvūni sīdanti silā plavanti
maṇḍūkiyo kaṇhasappe gilanti
kākaṁ suvaṇṇā parivārayanti
1 Ma. siṅgālī.
Tasā vakā eḷakānaṁ bhayā hi
vipariyāyo vattati nayidhamatthīti.
Mahāsupinajātakaṁ sattamaṁ.
----------
8 Illīsajātakaṁ

[78] Ubho khañjā ubho kuṇī ubho visamacakkhukā
ubhinnaṁ piḷakā jātā nāhaṁ passāmi illisanti.
Illīsajātakaṁ aṭṭhamaṁ.
---------
9 Kharassarajātakaṁ

[79] Yato viluttā ca hatā ca gāvo
daḍḍhāni gehāni jano ca nīto
athāgamā puttahatāya putto
kharassaraṁ deṇḍimaṁ 1 vādayantoti.
Kharassarajātakaṁ navamaṁ.
--------
10 Bhīmasenajātakaṁ

[80] Yante pavikatthitaṁ pure
atha te pūtisarā sajanti pacchā
1 Ma. ḍiṇḍimaṁ.
Ubhayaṁ na sameti bhīmasena
yuddhakathā ca idañca te vihaññanti.
Bhīmasenajātakaṁ dasamaṁ.
Varuṇavaggo aṭṭhamo.
---------
Tassuddānaṁ
varuṇā akataññūvare tu saccavaraṁ
savanappatinā ca abhitthanaya
karuṇāya silāpalva illisato
puna dindima pūtisarena dasa.
---------
9 Apāyimhavaggo
1 surāpānajātakaṁ

[81] Apāyimha anaccimha agāyimha rudimha ca
visaññikaraṇiṁ pitvā diṭṭhā nāhumha vānarāti.
Surāpānajātakaṁ paṭhamaṁ.
----------
2 Mittavindajātakaṁ 1

[82] Atikkamma ramaṇakaṁ sadāmattañca dūbhakaṁ
1 Ma. mittavindajātakaṁ.
Svāsi pāsāṇamāsīno yasmā jīvaṁ na mokkhasīti.
Mittavindajātakaṁ dutiyaṁ.
----------
3 Kāḷakaṇṇijātakaṁ

[83] Mitto have sattapadena hoti
sahāyo pana dvādasakena hoti
māsaḍḍhamāsena ca ñāti hoti
tatuttariṁ attasamopi hoti
sohaṁ kathaṁ attasukhassa hetu
cirasanthutaṁ 1 kāḷakaṇṇiṁ jaheyyanti.
Kāḷakaṇṇijātakaṁ tatiyaṁ.
---------
4 Atthassadvārajātakaṁ

[84] Ārogyamicche paramañca lābhaṁ
sīlañca buddhānumataṁ sutañca
dhammānuvattī ca alīnatā ca
atthassa dvārā pamukhā chaḷeteti.
Atthassadvārajātakaṁ catutthaṁ.
----------
1 Yu. cirasatthu naṁ.
5 Kimpakkajātakaṁ

[85] Āyatiṁ dosaṁ nāññāya yo kāme paṭisevati
vipākante hanantī 1 naṁ kimpakkamiva bhakkhitanti.
Kimpakkajātakaṁ pañcamaṁ.
----------
6 Sīlavīmaṁsanajātakaṁ

[86] Sīlaṁ kireva kalyāṇaṁ sīlaṁ loke anuttaraṁ
passa ghoraviso nāgo sīlavāti na haññatīti.
Sīlavīmaṁsanajātakaṁ chaṭṭhaṁ.
----------
7 Maṅgalajātakaṁ