[462] 1 Bhikkhunī sīlasampannā indriyesu susaṁvutā
adhigacche padaṁ santaṁ asecanakamojjavaṁ 1 .
Tāvatiṁsā ca yāmā ca tusitā cāpi devatā
nimmānaratino devā ye devā vasavattino
tattha cittaṁ paṇidhehi yattha te vusitaṁ pure.
Tāvatiṁsā ca yāmā ca tusitā cāpi devatā
nimmānaratino devā ye devā vasavattino
kālaṁ kālaṁ bhavā bhavaṁ sakkāyasmiṁ purakkhatā
avītivattā sakkāyaṁ jātimaraṇasārino.
Sabbo ādīpito loko sabbo loko paridīpito 2
sabbo pajjalito loko sabbo loko pakampito.
Akampitaṁ atuliyaṁ aputhujjanasevitaṁ
buddho dhammaṁ me desesi tattha me nirato mano.
Tassāhaṁ vacanaṁ sutvā vihariṁ sāsane ratā
tisso vijjā anuppattā kataṁ buddhassa sāsanaṁ.
Sabbattha vihatā nandi tamokkhandho padālito
evaṁ jānāhi pāpima nihato tvamasi antaka.
Sīsūpacālā.
Aṭṭhakanipāto samatto.
---------------
1 Po. Ma. Yu. mojavaṁ. 2 Ma. padīpito.

[463] 1 Mā su te vaḍḍha lokamhi vanatho ahu kudācanaṁ
mā puttaka punappunaṁ ahu dukkhassa bhāgimā.
Sukhaṁ hi vaḍḍha munayo anejā chinnasaṁsayā
sītibhūtā damappattā viharanti anāsavā.
Tehānuciṇṇaṁ isībhi maggaṁ dassanapattiyā
dukkhassantakiriyāya tvaṁ vaḍḍha anubrūhaya.
Visāradāva bhaṇasi etamatthaṁ janetti me
maññāmi nūna māmike vanatho te na vijjati.
Ye keci vaḍḍha saṅkhārā hīnaukkaṭṭhamajjhimā
aṇupi aṇumattopi vanatho me na vijjati.
Sabbe me āsavā khīṇā appamattassa jhāyato
tisso vijjā anuppattā kataṁ buddhassa sāsanaṁ.
Uḷāraṁ vata me mātā patodaṁ samavassari
paramatthasañhitā gāthā yathāpi anukampikā.
Tassāhaṁ vacanaṁ sutvā anusiṭṭhiṁ janettiyā
dhammasaṁvegamāpādiṁ yogakkhemassa pattiyā.
Sohaṁ padhānapahitatto rattindivamatandito
mātarā codito santo aphusiṁ santimuttamaṁ.
Vaḍḍhamātā.
Navakanipāto samatto.
--------------
Therīgāthāya ekādasakanipāto

[464] 1 Kalyāṇamittatā muninā lokaṁ ādissa vaṇṇitā
kalyāṇamitte bhajamāno api bālo paṇḍito assa.
Bhajitabbā sappurisā paññā tathāpi 1 vaḍḍhati
bhajantānaṁ bhajamāno yo 2 koci khattiyādiko
sappurise sabbehipi dukkhehi ceva mocaye
dukkhañceva vijāneyya dukkhassa ca samudayaṁ
nirodhaṭṭhaṅgikamaggaṁ cattāri ariyasaccāni ca 3 .
Dukkho itthibhāvo akkhāto purisadammasārathinā.
Sapattikampi hi dukkhaṁ appekaccā sakiṁ vijātāyo
galake 4 apakantanti 5 sukhumāliniyo visāni khādanti
janamārakamajjhagatā ubhopi byasanāni anubhonti
upavijaññā gacchantī addasāhaṁ patiṁ mataṁ
panthe vijāyitvāna appattāhaṁ sakaṁ gehaṁ.
Dve puttā kālakatā pati ca panthe mato kapaṇikāya
mātā pitā ca bhātā ca ḍayhanti ekacitakāyaṁ.
Khīṇakulamhi 6 kapaṇe anubhūtaṁ te dukkhaṁ aparimāṇaṁ
assu ca te pavattaṁ hi 7 bahūni jātisahassāni.
Passiṁ taṁ susānamajjhe 8 athopi khāditāni puttamaṁsāni
1 Yu. tathā pavaḍḍhati. 2 Ma. ayaṁ gāthāya pādo na dissati. 3 Ma. Yu. casaddo
natthi. 4 Yu. gale. 5 Ma. api kantanti. 6 khīṇakulīne. 7 Ma. Yu. hisaddo
natthi. 8 Ma. vasitā susānamajjhe.
Hatakulikā sabbagarahitā matapatikā amataṁ adhigacchiṁ.
Bhāvito me ayaṁ maggo ariyoṭṭhaṅgiko amatagāmī
nibbānaṁpi sacchikataṁ dhammādāsaṁ avekkhihaṁ 1 .
Ahamhi kantasallā ohitabhārā kataṁ 2 me karaṇīyaṁ
kīsāgotamī therī suvimuttacittā imaṁ bhaṇīti.
Kīsāgotamī.
Ekādasakanipāto samatto.
------------------
Therīgāthāya dvādasakanipāto

[465] 1 Ubho mātā ca dhītā ca mayaṁ āsuṁ sapattiyo
tassā me ahu saṁvego abbhūto 3 lomahaṁsano.
Dhiratthu kāmā asucī duggandhā bahukaṇṭakā
yattha mātā ca dhītā ca sabhariyā mayaṁ ahuṁ.
Kāmesvādīnavaṁ disvā nekkhammaṁ daṭṭhu khemato
sā pabbajiṁ rājagahe agārasmā anagāriyaṁ.
Pubbenivāsaṁ jānāmi dibbacakkhuṁ visodhitaṁ
cetopariyañāṇañca 4 sotadhātu visodhitā.
Iddhipi me sacchikatā patto me āsavakkhayo
cha me 5 abhiññā sacchikatā kataṁ buddhassa sāsanaṁ.
1 Yu. apekkhihaṁ. 2 Ma. kataṁ hi. 3 Ma. Yu. abbhuto. 4 Ma. ceto pariccañāṇañca.
5 Ma. chaḷabhiññā.
Iddhiyā abhinimmitvā caturassaṁ rathaṁ ahaṁ
buddhassa pāde vanditvā lokanāthassa sirīmato 1 .
Supupphitaggaṁ upagamma pādapaṁ
ekā tuvaṁ tiṭṭhasi rukkhamūle
na cāpi te dutiyo atthi koci
na tvaṁ bāle bhāyasi dhuttakānaṁ.
Sataṁ sahassānaṁpi 2 dhuttakānaṁ
samāgatā edisakā bhaveyyuṁ.
Lomaṁ na iñje napi sampavedhe
kiṁ me tuvaṁ māra karissaseko.
Esā antaradhāyāmi kucchiṁ vā pavisāmi te
bhamukantarepi tiṭṭhāmi tiṭṭhantiṁ maṁ na dakkhasi.
Cittamhi vasībhūtāhaṁ iddhipādā subhāvitā
cha mebhiññā 3 sacchikatā kataṁ buddhassa sāsanaṁ.
Sattisūlūpamā kāmā khandhāsaṁ adhikuṭṭanā
yaṁ tvaṁ kāmaratiṁ brūsi arati dāni sā mama.
Sabbattha vihatā nandi tamokkhandho padālito
evaṁ jānāhi pāpima nihato tvamasi antakāti.
Uppalavaṇṇā.
Dvādasakanipāto samatto.
-----------------
1 Ma. tādino. 2 Ma. sahassāni. 3 Ma. chaḷabhiññā.
Therīgāthāya soḷasakanipāto

[466] 1 Udakahārī 1 ahaṁ sīte sadā udakamotariṁ
ayyānaṁ daṇḍabhayabhītā vācādosabhayaṭṭitā.
Kassa brāhmaṇa tvaṁ bhīto sadā udakamotari
vedhamānehi gattehi sītaṁ vedayase bhusaṁ.
Jānantī ca tuvaṁ bhoti puṇṇike paripucchasi
karontaṁ kusalaṁ kammaṁ rundhantaṁ kammapāpakaṁ.
Yo ca vuḍḍho [2]- daharo vā pāpakammaṁ pakubbati
udakābhisecanā 3 sopi pāpakammā pamuccati.
Ko nu te idamakkhāsi ajānantassa ajānako
udakābhisecanā 3 nāma pāpakammā pamuccati
saggaṁ nūna gamissanti sabbe maṇḍūkakacchapā
nāgā ca suṁsumārā ca ye caññe udake carā.
Orabbhikā sūkarikā macchikā migabandhakā
corā ca vajjhaghātā ca ye caññe pāpakammino
udakābhisecanā 3 tepi pāpakammā pamuccare.
Sace imā nadiyo te pāpaṁ pubbe kataṁ vaheyyuṁ 4
1 Ma. udahārī. [2] Po. Yu. vā. 3 Ma. dakābhisecanā. 4 Ma. bahuṁ.
Puññaṁpimā vaheyyuṁ te 1 tena tvaṁ paribāhiro assa 2 .
Yassa brāhmaṇa tvaṁ bhīto sadā udakamotari
tameva brahme mākāsi mā te sītaṁ chaviṁ hane.
Kumaggapaṭipannaṁ maṁ ariyamaggaṁ samānayi
udakābhisecanaṁ 3 bhoti imaṁ sāṭakaṁ dadāmi te.
Tuyheva sāṭako hotu nāhamicchāmi sāṭakaṁ.
Sace bhāyasi dukkhassa sace te dukkhamappiyaṁ
mākāsi pāpakaṁ kammaṁ āvi vā yadi vā raho.
Sace ca pāpakaṁ kammaṁ karissasi karosi vā
na te dukkhā pamutyatthi upeccāpi palāyato.
Sace bhāyasi dukkhassa sace te dukkhamappiyaṁ
upehi buddhaṁ saraṇaṁ dhammaṁ saṅghañca tādinaṁ
samādiyāhi sīlāni tante mokkhāya 4 hessati.
Brahmabandhu pure āsiṁ ajjamhi sacca brāhmaṇo
tevijjo vedasampanno sotthiyo camhi nhātako.
Puṇṇikā 5 .
Soḷasakanipāto samatto.
------------------
1 Yu. ayaṁ pāṭho natthi. 2 Ma. ayaṁ pāṭho natthi. 3 Ma. dakābhisecanā.
4 Ma. Yu. atthāya hehiti. 5 Ma. puṇṇā.
Therīgāthāya vīsatinipāto

[467] 1 Kāḷakā bhamaravaṇṇasadisā
vellitaggā mama muddhajā ahuṁ
te jarāya sāṇavākasadisā
saccavādivacanaṁ anaññathā.
Vāsitova surabhikaraṇḍako
pupphapūraṁ mama uttamaṅgabhūto 1
taṁ jarāyatha salomagandhikaṁ
saccavādivacanaṁ anaññathā.
Kānanaṁva sahitaṁ suropitaṁ
kocchasūcivicittaggasobhitaṁ
taṁ jarāya viraḷaṁ tahiṁ tahiṁ
saccavādivacanaṁ anaññathā.
Saṇhagandhakasuvaṇṇamaṇḍitaṁ 2
sobhate su veṇīhi alaṅkataṁ
taṁ jarāya khalitaṁ siraṁ kataṁ
saccavādivacanaṁ anaññathā.
Cittakārasukatāva lekhitā
sobhate 3 su bhamukā pure mama
1 Ma. uttamaṅgajo. 2 Ma. kaṇhakhandhaka .... 3 Ma. sobhare.
Tā jarāya valīhi palambitā
saccavādivacanaṁ anaññathā.
Bhassarā surucirā yathā maṇi
nettāhesuṁ abhinīlamāyatā
te jarāyabhihatā na sobhate 1
saccavādivacanaṁ anaññathā.
Saṇhatuṅgasadisī ca nāsikā
sobhate su abhiyobbanaṁ pati
sā jarāya upakūlitā viya
saccavādivacanaṁ anaññathā.
Kaṅkaṇaṁva sukataṁ suniṭṭhitaṁ
sobhate 1 su mama kaṇṇapāḷiyo pure 2
tā jarāya valīhi palambitā
saccavādivacanaṁ anaññathā.
Pattalimakulavaṇṇasadisā
sobhate su dantā pure mama
te jarāya khaṇḍā yavapītakā
saccavādivacanaṁ anaññathā.
Kānanasmiṁ vanasaṇḍacāriṇī
1 Ma. sobhare. 2 Ma. ayaṁ pāṭho natthi.
Kokilāva madhuraṁ nikūjitaṁ 1
taṁ jarāya khalitaṁ tahiṁ tahiṁ
saccavādivacanaṁ anaññathā.
Saṇṭhakammudīva 2 suppamajjitā
sobhate su gīvā pure mama
sā jarāya bhaggā vināmitā 3
saccavādivacanaṁ anaññathā.
Vaṭṭapalighasadisopamā ubho
sobhate su bāhā pure mama
tā jarāya yathā pāṭalippalitā 4
saccavādivacanaṁ anaññathā.
Saṇhamuddikāsuvaṇṇamaṇḍitā
sobhate su hatthā pure mama
te jarāya yathā mūlamūlikā
saccavādivacanaṁ anaññathā.
Pīnavaṭṭasahituggatā ubhopi 5
sobhate su thanakā pure mama
therīti va 6 lambantenodakā
1 Ma. nikūjihaṁ. 2 Ma. saṇhakamburiva. 3 Yu. vināsitā. 4 Ma. pāṭalibbalitā.
5 Ma. Yu. pisaddo natthi. 6 Ma. thevikīva lambanti nodakā.
Saccavādivacanaṁ anaññathā.
Kañcanassa phalakaṁva sumaṭṭhaṁ 1
sobhate su kāyo pure mama
so valīhi sukhumāhi otato
saccavādivacanaṁ anaññathā.
Nāgabhogasadisopamā ubho
sobhate su ūrū pure mama
tā 2 jarāya yathā veḷunāḷiyo
saccavādivacanaṁ anaññathā.
Saṇhanūpurasuvaṇṇamaṇḍitā
sobhate su jaṅghā pure mama
tā jarāya tiladaṇḍakāriva
saccavādivacanaṁ anaññathā.
Tūlapuṇṇasadisopamā ubho
sobhate su pādā pure mama
te jarāya phuṭikā valīmatā
saccavādivacanaṁ anaññathā.
Ediso ahu ayaṁ samussayo
jajjaro bahudukkhānamālayo
sopalepapatito jarāgharo
1 Ma. sammaṭṭhaṁ. 2 Po. Ma. Yu. te.
Saccavādivacanaṁ anaññātha.
Ambapālī.

[468] 2 Samaṇāti bhoti maṁ 1 vipassi samaṇāti paṭibujjhasi
samaṇānameva kittesi samaṇī nūna bhavissasi.
Vipulaṁ annañca pānañca samaṇānaṁ pavecchasi
rohiṇi dāni pucchāmi kena te samaṇā piyā.
Akammakāmā alasā paradattūpajīvino 2
āsaṁsukā sādhukāmā kena te samaṇā piyā.
Cirassaṁ vata maṁ tāta samaṇānaṁ paripucchasi
tesante kittayissāmi paññāsīlaparakkamaṁ.
Kammakāmā analasā kammaseṭṭhassa kārakā
rāgadosaṁ pajahanti tena me samaṇā piyā.
Tīṇi pāpassa mūlāni dhunanti sucikārino
sabbapāpaṁ pahīnesaṁ tena me samaṇā piyā.
Kāyakammaṁ suci nesaṁ vacīkammañca tādisaṁ
manokammaṁ suci nesaṁ tena me samaṇā piyā.
Vimalā saṅkhamuttāva suddhā santarabāhirā
puṇṇā sukkehi dhammehi 3 tena me samaṇā piyā.
Bahussutā dhammadharā ariyā dhammajīvino
atthaṁ dhammañca desenti tena me samaṇā piyā.
1 Ma. bhoti supi. 2 Po. Yu. paradatto .... 3 Ma. Yu. sukkāna dhammānaṁ.
Bahussutā dhammadharā ariyā dhammajīvino
ekaggacittā satimanto tena me samaṇā piyā.
Dūraṅgamā satimanto mantabhāṇī anuddhatā
dukkhassantaṁ pajānanti tena me samaṇā piyā.
Yamhā gāmā pakkamanti na vilokenti kiñcanaṁ
anapekkhāva gacchanti tena me samaṇā piyā.
Na te saṁ koṭṭhe osenti 1 na kumbhiṁ na kaḷopiyaṁ
pariniṭṭhitamesānā tena me samaṇā piyā.
Na te hiraññaṁ gaṇhanti na suvaṇṇaṁ na rūpiyaṁ
paccuppannena yāpenti tena me samaṇā piyā.
Nānākulā pabbajitā nānājanapadehi ca
aññamaññaṁ piyāyanti tena me samaṇā piyā.
Atthāya vata no bhoti kule jātāsi rohiṇi 2
saddhā buddhe ca dhamme ca saṅghe ca tibbagāravā.
Tuvaṁ hetaṁ pajānāsi puññakkhettaṁ anuttaraṁ
amhaṁpi ete samaṇā paṭiggaṇhanti dakkhiṇaṁ
patiṭṭhito hettha yañño vipulo no bhavissati.
Sace bhāyasi dukkhassa sace te dukkhamappiyaṁ
upehi buddhaṁ 3 saraṇaṁ dhammaṁ saṅghañca tādinaṁ
samādiyāhi sīlāni tante atthāya hehiti.
1 Po. Ma. openti. 2 Ma. rohiṇī. 3 Ma. upehi saraṇaṁ baddhaṁ.
Upemi buddhaṁ 1 saraṇaṁ dhammaṁ saṅghañca tādinaṁ
samādiyāmi sīlāni taṁ me atthāya hehiti.
Brahmabandhu pure āsiṁ so idānimhi brāhmaṇo
tevijjo sotthiyo camhi vedagū camhi nhātako.
Rohiṇī.

[469] 3 Laṭṭhihattho pure āsiṁ so dāni migaluddako
āsāya palipā ghorā nāsakkhiṁ pārametase 2 .
Sumattaṁ maṁ maññamānā cāpā puttamatosayi
cāpāya bandhanaṁ chetvā pabbajissaṁ pure 3 ahaṁ.
Mā me kujjha mahāvīra mā me kujjha mahāmuni
na hi kodhaparetassa suddhi atthi kuto tapo.
Pakkamissañca nālāto kodha nālāya vacchati
bandhantī itthirūpena samaṇe dhammajīvino.
Ehi kāḷa nivattassu bhuñja kāme yathā pure
ahaṁ ca te vasīkatā ye ca me santi ñātakā.
Etto ceva catubbhāgaṁ yathā bhāsasi taṁ cāpe 4
tayi rattassa posassa uḷāraṁ vata taṁ siyā.
Kāḷaṅginiṁva takkāriṁ pupphitaṁ girimuddhani
phullaṁ dālimalaṭṭhiṁva antodīpeva pāṭaliṁ
haricandanalittaṅgiṁ kāsikuttamadhāriniṁ
1 Ma. upemi saraṇaṁ buddhaṁ. 2 Ma. pārametave. 3 Ma. Yu. puno mahaṁ. 4 Ma. etto
cāpe catubbhāgaṁ yathā bhāsasi tvaṁ ca me.
Taṁ maṁ rūpavatiṁ santiṁ kassa ohāya gacchasi.
Sākuṇikova sakuṇaṁ 1 yathā bandhitumicchati
āharimena rūpena na maṁ tvaṁ bādhayissasi.
Imañca me puttaphalaṁ kāḷa uppāditaṁ tayā
taṁ maṁ puttavatiṁ santiṁ kassa ohāya gacchasi.
Jahanti putte sappaññā tato ñātī tato dhanaṁ
pabbajanti mahāvīrā nāgo chetvāva bandhanaṁ.
Idāni te imaṁ puttaṁ daṇḍena churikāya vā
bhūmiyaṁ va nisumbheyyaṁ 2 puttasokā na gacchasi.
Sace puttaṁpi sigālānaṁ kukkurānaṁ padāhisi
na maṁ puttakate jammi punarāvattayissasi.
Handa kho dāni bhadante kuhiṁ kāḷa gamissasi
katamaṁ gāmaṁ nigamaṁ nagaraṁ rājadhāniyo.
Ahumha pubbe gaṇino asamaṇā samaṇamānino
gāmena gāmaṁ vicarimha nagare rājadhāniyo.
Eso hi bhagavā buddho nadiṁ nerañjaraṁ pati
sabbadukkhappahānāya dhammaṁ desesi pāṇinaṁ
tassāhaṁ santike 3 gacchaṁ so me satthā bhavissati.
Vandanaṁ dāni vajjāsi 4 lokanāthaṁ anuttaraṁ
1 Ma. Yu. sākuntikova sakuṇiṁ. 2 Ma. bhūmiyaṁ vā nisumbhissaṁ. 3 Ma. santikaṁ.
4 Yu. vandanaṁ dāni me vajjāsi.
Padakkhiṇañca katvāna ādiseyyāsi dakkhiṇaṁ.
Etaṁ kho labbhamamhehi yathā bhāsasi taṁ cāpe 1
vandanaṁ dāni te vajjaṁ lokanāthaṁ anuttaraṁ
padakkhiṇañca katvāna ādisissāmi dakkhiṇaṁ.
Tato ca kāḷo pakkāmi nadiṁ nerañjaraṁ pati
so addasāsi sambuddhaṁ desentaṁ amataṁpadaṁ
dukkhaṁ dukkhasamuppādaṁ dukkhassa ca atikkamaṁ
ariyaṭṭhaṅgikaṁ maggaṁ dukkhūpasamagāminaṁ.
Tassa pādāni vanditvā katvāna naṁ padakkhiṇaṁ
cāpāya ādisitvāna pabbaji anagāriyaṁ.
Tisso vijjā anuppattā kataṁ buddhassa sāsanaṁ.
Cāpā.

[470] 4 Petāni bhoti puttāni khādamānā tuvaṁ pure
tuvaṁ divā ca ratto ca atīva paritappasi.
Sājja sabbāni khāditvā satta puttāni brāhmaṇi
vāsiṭṭhi 2 kena vaṇṇena na bāḷhaṁ paritappasi
bahūni me 3 puttasatāni ñātisaṅghasatāni ca
khāditāni atītaṁse mama tuyhañca brāhmaṇa.
Sāhaṁ nissaraṇaṁ ñatvā jātiyā maraṇassa ca
1 Ma. bhāsasi tvañca me. 2 Yu. vāseṭṭhi. 3 Ma. mesaddo natthi.
Na socāmi na rodāmi na cāhaṁ paritappāmi 1 .
Abbhūtaṁ vata vāsiṭṭhi 2 vācaṁ bhāsasi edisiṁ
kassa tvaṁ dhammamaññāya giraṁ bhāsasi edisiṁ.
Esa brāhmaṇa sambuddho nagaraṁ mithilaṁ pati
sabbadukkhappahānāya dhammaṁ desesi pāṇinaṁ.
Tassāhaṁ brāhmaṇa arahato dhammaṁ sutvā nirūpadhiṁ
tattha viññātasaddhammā puttasokaṁ byapānudiṁ.
So ahaṁpi gamissāmi nagaraṁ mithilaṁ pati
appeva maṁ so bhagavā sabbadukkhā pamocaye.
Addasa brāhmaṇo buddhaṁ vippamuttaṁ nirūpadhiṁ
tassa dhammamadesesi muni dukkhassa pāragū
dukkhaṁ dukkhasamuppādaṁ dukkhassa ca atikkamaṁ
ariyaṭṭhaṅgikaṁ maggaṁ dukkhūpasamagāminaṁ.
Tattha viññātasaddhammo pabbajjaṁ samarocayi
sujāto tīhi rattīhi tisso vijjā aphassayi.
Ehi sārathi gacchāhi rathaṁ nīyādayāhimaṁ
ārogyaṁ brāhmaṇiṁ vajja pabbajito 3 dāni brāhmaṇo
sujāto tīhi rattīhi tisso vijjā aphassayi.
(tato ca rathamādāya sahassañcāpi sārathi
1 Po. Ma. na cāpi paritappayiṁ. 2 Yu. vāseṭṭhi. 3 Ma. pabbaji dāni brāhmaṇo.
Ārogyaṁ brāhmaṇiṁ avoca pabbajito dāni brāhmaṇo
sujāto tīhi rattīhi tisso vijjā aphassayi .) 1
etañcāhaṁ assarathaṁ sahassañcāpi sārathi
tevijjaṁ brāhmaṇaṁ sutvā puṇṇapattaṁ dadāmi te.
Tumheva hotu assaratho sahassañcāpi brāhmaṇi
ahaṁpi pabbajissāmi varapaññassa santike.
Hatthigavassaṁ maṇikuṇḍalañca
phītañcimaṁ gehavigataṁ pahāya
pitā pabbajito tuyhaṁ bhuñja bhogāni sundari
tuvaṁ dāyādikā kule.
Hatthigavassaṁ maṇikuṇḍalañca
rammañcimaṁ gehavigataṁ pahāya
pitā pabbajito mayhaṁ puttasokena addhito 2
ahaṁpi pabbajissāmi bhātusokena addhitā 3
so te ijjhatu saṅkappo yaṁ tvaṁ patthesi sundari
uttiṭṭhapiṇḍo uñcho ca paṁsukūlañca cīvaraṁ
etāni abhisambhontī paraloke anāsavā.
Sikkhamānāya me ayye dibbacakkhuṁ visodhitaṁ
pubbenivāsaṁ jānāmi yattha me vusitaṁ pure.
1 Yu. ime pāṭhā na dissanti. 2 Yu. addito. 3 Yu. additā.
Tuvaṁ nissāya kalyāṇi 1 therī saṅghassa sobhaṇe
tisso vijjā anuppattā kataṁ buddhassa sāsanaṁ.
Anujānāhi me ayye icche sāvatthiṁ gantave
sīhanādaṁ nadissāmi buddhaseṭṭhassa santike.
Passa sundari satthāraṁ hemavaṇṇaṁ harittacaṁ
adantānaṁ dametāraṁ sambuddhamakutobhayaṁ.
Passa sundarimāyantiṁ vippamuttaṁ nirūpadhiṁ
vītarāgaṁ visaṁyuttaṁ katakiccamanāsavaṁ.
Bārāṇasīto nikkhamma tava santikamāgatā
sāvikā te mahāvīra pāde vandati sundarī.
Tuvaṁ buddho tuvaṁ satthā tuyhaṁ dhītamhi brāhmaṇa
orasā mukhato jātā katakiccā anāsavā.
Tassā te svāgataṁ bhadde tato te adurāgataṁ
evaṁ hi dantā āyanti satthu pādāni vandikā
vītarāgā visaṁyuttā katakiccā anāsavā.
Sundarī.

[471] 5 Daharāhaṁ suddhavasanā yaṁ pure dhammamassuṇiṁ
tassā me appamattāya saccābhisamayo ahu.
Tatohaṁ sabbakāmesu bhusaṁ aratimajjhagaṁ
sakkāyasmiṁ bhayaṁ disvā nekkhammasseva 2 pihaye.
1 Ma. kalyāṇī. 2 Yu. nekkhammaṁyeva.
Hitvānāhaṁ ñātigaṇaṁ dāsakammakarāni ca
gāmakhettāni phītāni ramaṇīye pamodite
pahāyāhaṁ pabbajitā sāpateyyaṁ anappakaṁ.
Evaṁ saddhāya nikkhamma saddhamme suppavedite
na me 1 taṁ assa paṭirūpaṁ ākiñcaññaṁ hi patthaye
yā 2 jātarūparajataṁ ṭhapetvā 3 punarāgame.
Rajataṁ jātarūpaṁ vā natthetassapi santiyā 4
na etaṁ samaṇasāruppaṁ na etaṁ ariyadhanaṁ.
Lobhanaṁ madanaṁ cetaṁ samohanaṁ 5 rajabandhanaṁ 6
sāsaṅkaṁ bahuāyāsaṁ natthi cettha dhuvaṁ ṭhiti.
Ettāvatā 7 pamattā ca saṅkiliṭṭhamanā narā
aññamaññena byāruddhā puthu kubbanti medhagaṁ.
Vadho bandho parikleso jāni sokapariddavo
kāmesu adhipannānaṁ dissate byasanaṁ bahuṁ.
Taṁ maṁñātī amittāva kiṁ maṁ 8 kāmesu yuñjatha
jānātha maṁ pabbajitaṁ kāmesu bhayadassiniṁ.
Na hiraññasuvaṇṇena parikkhīyanti āsavā
amittā vadhakā kāmā sapattā sallabandhanā.
1 Ma. netaṁ assa. 2 Ma. yo. 3 Ma. chaḍḍetvā. 4 Ma. Yu. na bodhāya
na santaye. 5 Yu. mohanaṁ. 6 Yu. rajavaḍḍhanaṁ. 7 Yu. ettha rattā.
8 Ma. kiṁ vo.
Taṁ maṁ ñātī amittāva kiṁ maṁ kāmesu yuñjatha
jānātha maṁ pabbajitaṁ muṇḍaṁ saṅghāṭipārutaṁ.
Uttiṭṭhapiṇḍo uñcho ca paṁsukūlañca cīvaraṁ
etaṁ kho mama sāruppaṁ anagārūpanissayo.
Vantā mahesīhi 1 kāmā ye dibbā ye ca mānusā
khemaṭṭhāne vimuttā te pattā te acalaṁ sukhaṁ.
Māhaṁ kāmehi saṅgacchiṁ yesu tāṇaṁ na vijjati
amittā vadhakā kāmā aggikhandhūpamā dukhā.
Aparisuddho 2 eso sabhayo savighāto sakaṇṭako
gedho suvisamo ceso mahanto mohanāmukho.
Upasaggo bhīmarūpo ca kāmā sappasirūpamā
ye bālā abhinandanti andhabhūtā puthujjanā.
Kāmasaṁsaggasattā 3 hi janā bahū loke avindiṁsu 4
pariyantaṁ nābhijānanti jātiyā maraṇassa ca.
Duggatigamanaṁ maggaṁ manussā kāmahetukaṁ
bahuṁ ve paṭipajjanti attano rogamāvahaṁ.
Evaṁ amittajananā tāpanā saṅkilesikā
lokāmisā bandhanīyā kāmā maraṇabandhanā.
1 Yu. mahesinā. 2 Yu. paripantho. 3 Ma. Yu. kāmapaṅkena sattā.
4 Ma. Yu. aviddasū.
Ummādanā ullapanā kāmā cittappamādino 1
sattānaṁ saṅkilesāya khippaṁ mārena oḍḍitaṁ.
Anantādīnavā kāmā bahudukkhā mahāvisā
appassādā raṇakarā sukkapakkhavisosanā.
Sāhaṁ etādisaṁ hitvā 2 byasanaṁ kāmahetukaṁ
na taṁ paccāgamissāmi nibbānābhiratā sadā.
Raṇaṁ karitvā kāmānaṁ sītibhāvābhikaṅkhinī
appamattā viharissāmi 3 ratā 4 saṁyojanakkhaye.
Asokaṁ virajaṁ khemaṁ ariyaṭṭhaṅgikaṁ ujuṁ
taṁ maggaṁ anugacchāmi yena tiṇṇā mahesino.
Imaṁ passatha dhammaṭṭhaṁ subhaṁ kammāradhītaraṁ
anejaṁ upasampajja rukkhamūlamhi jhāyati.
Ajjaṭṭhamī pabbajitā saddhā saddhammasobhaṇā
vinītā uppalavaṇṇāya tevijjā maccuhāyinī.
Sāyaṁ bhujissā anaṇā bhikkhunī bhāvitindriyā
sabbayogavisaṁyuttā katakiccā anāsavā.
Taṁ sakko devasaṅghena upasaṅgamma iddhiyā
namassati bhūtapati subhaṁ kammāradhītaranti.
Subhā kammāradhītā.
Vīsatinipāto samatto.
----------------
1 Ma. pamaddino. Yu. pamāthino. 2 Ma. Yu. katvā. 3 Ma. vihassāmi.
Yu. vihissāmi. 4 Ma. sabbasaṁyojanakkhaye. 5 Yu. tesaṁ.
Therīgāthāya tiṁsanipāto