[442] 4 Āturaṁ asuciṁ pūtiṁ passa nande samussayaṁ
asubhāya cittaṁ bhāvehi ekaggaṁ susamāhitaṁ.
Yathā idaṁ tathā etaṁ yathā etaṁ tathā idaṁ
duggandhaṁ pūtikaṁ vāti bālānaṁ abhinanditaṁ.
Evametaṁ avekkhantī rattindivamatanditā
tato sakāya paññāya abhinibbijja dakkhisaṁ.
Tassā me appamattāya vicinantiyā yoniso
yathābhūtaṁ ayaṁ kāyo diṭṭho santarabāhiro.
Atha nibbindahaṁ kāye ajjhattañca virajjahaṁ
appamattā visaṁyuttā upasantamhi nibbutā.
Nandā 1 .

[443] 5 Aggiṁ candañca suriyañca 2 devatā ca namassihaṁ
nadītitthāni gantvāna udakaṁ oruhāmihaṁ.
1 Ma. sundrīnandā. 3 Ma. Yu. sūriyañca.
Bahūvatasamādānā aḍḍhaṁ sīsassa olikhiṁ
chamāya seyyaṁ kappemi rattibhattaṁ na bhuñjihaṁ.
Vibhūsamaṇḍanaratā nhāpanacchādanehi ca
upakāsiṁ imaṁ kāyaṁ kāmarāgena addhitā 1 .
Tato saddhaṁ labhitvāna pabbajiṁ anagāriyaṁ
disvā kāyaṁ yathābhūtaṁ kāmarāgo samūhato.
Sabbe bhavā samucchinnā icchā ca patthanā pi ca
sabbayogavisaṁyuttā santiṁ pāpuṇiṁ cetaso.
Nanduttarā therī.

[444] 6 Saddhāya pabbajitvāna agārasmā anagāriyaṁ
vicarihaṁ tena tena lābhasakkāraussukā.
Riñcitvā paramaṁ atthaṁ hīnamatthaṁ asevihaṁ
kilesānaṁ vasaṁ gantvā sāmaññatthaṁ nirajjihaṁ 2 .
Tassā me ahu saṁvego nisinnāya vihārake
ummaggapaṭipannamhi taṇhāya vasamāgatā.
Appakaṁ jīvitaṁ mayhaṁ jarā byādhi ca maddati
purāyaṁ bhijjati kāyo na me kālo pamajjituṁ.
Yathābhūtamavekkhantī khandhānaṁ udayabbayaṁ
vimuttacittā uṭṭhāsiṁ kataṁ buddhassa sāsanaṁ.
Mittakālī 3 .
1 Ma. aṭṭitā. Yu. additā. 2 Ma. na bujjhihaṁ. 3 Ma. mittākāḷī.

[445] 7 Agārasmiṁ vasantīhaṁ dhammaṁ sutvāna bhikkhuno
addasaṁ virajaṁ dhammaṁ nibbānaṁ padamaccutaṁ.
Sāhaṁ puttaṁ dhītarañca dhanadhaññañca chaḍḍiya
kese chedāpayitvāna pabbajiṁ anagāriyaṁ.
Sikkhamānā ahaṁ santī bhāventī maggamañjasaṁ
pahāsiṁ rāgadosañca tadekaṭṭhe ca āsave.
Bhikkhunī upasampajja pubbajātimanussariṁ
dibbacakkhuṁ visodhitaṁ vimalaṁ sādhubhāvitaṁ.
Saṅkhāre parato disvā hetujāte palokine
pahāsiṁ āsave sabbe sītibhūtamhi nibbutā.
Sakulā.

[446] 8 Dasa putte vijāyitvā asmiṁ rūpasamussaye
tatohaṁ dubbalā jiṇṇā bhikkhuniṁ upasaṅkamiṁ.
Sā me dhammamadesesi khandhāyatanadhātuyo
tassā dhammaṁ suṇitvāna kese chetvāna pabbajiṁ.
Tassā me sikkhamānāya dibbacakkhuṁ visodhitaṁ
pubbenivāsaṁ jānāmi yattha me vusitaṁ pure.
Animittañca bhāvemi ekaggā susamāhitā
anantarāvimokkhāsiṁ anupādāya nibbutā.
Pañcakkhandhā pariññātā tiṭṭhanti chinnamūlakā
Dhi tavatthu jare jamme natthidāni punabbhavo.
Soṇā.

[447] 9 Lūnakesī paṅkadharī ekasāṭī pure cariṁ
avajje vajjamatinī vajje cāvajjadassinī
divāvihārā nikkhamma gijjhakūṭamhi pabbate
addasaṁ virajaṁ buddhaṁ bhikkhusaṅghapurakkhataṁ
nihacca jānuṁ vanditvā sammukhā añjalī 1 ahaṁ.
Ehi bhaddeti avaca sā me āsūpasampadā.
Ciṇṇā aṅgā ca magadhā vajjī kāsī ca kosalā
anaṇā paṇṇāsavassāni raṭṭhapiṇḍaṁ abhuñjihaṁ.
Puññaṁ ca pasavi 2 bahuṁ sappaññoyaṁ 3 upāsako
yo bhaddāya cīvaramadāsi muttāya 4 sabbaganthehi.
Bhaddā kuṇḍalā 5 .

[448] 10 Naṅgalehi kasaṁ khettaṁ bījāni pavapaṁ chamā
puttadārāni posentā dhanaṁ vindanti māṇavā.
Kimahaṁ sīlasampannā satthu sāsanakārikā
nibbānaṁ nādhigacchāmi akusītā anuddhatā.
Pāde pakkhālayitvāna udakesu karomahaṁ
1 Ma. añjaliṁ. Yu. pañjalī. 2 Yu. pasaviṁ. 3 Po. Ma. vatāyaṁ upāsako.
Yu. sappañño vatāyamupāsako. 4 Ma. vippamuttāya. 5 Ma. bhaddā kuṇḍalakesā.
Pādodakañca disvāna thalato ninnamāgataṁ
tato cittaṁ samādhesiṁ 1 asso 2 bhadrova jāniyo.
Tato dīpaṁ gahetvāna vihāraṁ pāvisiṁ ahaṁ
seyyaṁ olokayitvāna mañcakamhi upāvisiṁ.
Tato sūciṁ gahetvāna vaṭṭiṁ okassayāmahaṁ
pajjotasseva 3 nibbānaṁ vimokkho ahu cetaso.
Paṭācārā.

[449] 11 Musalāni gahetvāna dhaññaṁ koṭṭenti māṇavā
puttadārāni posentā dhanaṁ vindanti māṇavā.
Karotha buddhasāsanaṁ yaṁ katvā nānutappati
khippaṁ pādāni dhovitvā ekamante nisīdatha
cetosamathamanuyuttā karotha buddhasāsanaṁ.
Tassā tā vacanaṁ sutvā paṭācārāya sāsanaṁ
pāde pakkhālayitvāna ekamantaṁ upāvisuṁ
cetosamathamanuyuttā akaṁsu buddhasāsanaṁ.
Rattiyā purime yāme pubbajātimanussaruṁ
rattiyā majjhime yāme dibbacakkhuṁ visodhayuṁ
rattiyā pacchime yāme tamokkhandhaṁ padālayuṁ.
Uṭṭhāya pāde vandiṁsu katā te anusāsanī
1 Yu. samādhemi. 2 Ma. Yu. assaṁ bhadraṁvajāniyaṁ. 3 Yu. padīpasseva.
Indaṁva devā tidasā saṅgāme aparājitaṁ
purakkhitvā viharissāma 1 tevijjamhā anāsavā.
Itthaṁ sudaṁ tiṁsamattā therī bhikkhuniyo paṭācārāya
santike aññaṁ byākariṁsu.

[450] 12 Duggatāhaṁ pure āsiṁ vidhavā ca aputtikā
vinā mittehi ñātīhi bhattacolassa nādhigaṁ.
Pattaṁ daṇḍaṁ ca gaṇhitvā bhikkhamānā kulā kulaṁ
sītuṇhena ca ḍayhantī satta vassāni cārihaṁ.
Bhikkhuniṁ puna disvāna annapānassa lābhiniṁ
upasaṅkamma avocaṁ pabbajiṁ anagāriyaṁ.
Sā ca maṁ anukampāya pabbājesi paṭācārā
tato maṁ ovaditvāna paramatthe niyojayi.
Tassāhaṁ vacanaṁ sutvā akāsiṁ anusāsaniṁ
amogho ayyāya ovādo tevijjamhi anāsavā.
Candā.
Pañcakanipāto samatto.
-------------
Therīgāthāya chakkanipāto

[451] 1 Yassa maggaṁ na jānāsi āgatassa gatassa vā
1 Yu. vihissāma.
Taṁ kuto āgataṁ puttaṁ mama puttoti rodasi.
Maggañca khossa jānāsi āgatassa gatassa vā
na naṁ samanusocesi evaṁ dhammā hi pāṇino.
Ayācito tatogacchi ananuññāto 1 ito gato
kutopi nūna āgantvā vasitvā katipāhakaṁ.
Itopi aññenāgato tato aññena gacchati
peto manussarūpena saṁsaranto gamissati
yathāgato tathā gato kā tattha paridevanā.
Abbuyhi 2 vata me sallaṁ duddasaṁ hadayanissitaṁ
yā me sokaparetāya puttasokaṁ byapānudi.
Sājja abbūḷhasallāhaṁ nicchātā parinibbutā
buddhaṁ dhammañca saṅghañca upemi saraṇaṁ muniṁ.
Pañcasatā paṭācārā.