[422] 3 Sumuttike sumuttikā sādhumuttikamhi musalassa
ahiriko me chattakaṁ vāpi ukkhalikā me daliddabhāvāti 1 .
Rāgañca ahaṁ dosañca vicchindantī viharāmi
sā rukkhamūlamupagamma aho sukhanti sukhato jhāyāmi.
Aññatarā therībhikkhunī apaññātā.

[423] 4 Yāva kāsijanapado suṅko me tattako ahu
taṁ katvā nigamo 2 agghaṁ agghenagghaṁ ṭhapesi maṁ.
Atha nibbindahaṁ rūpe nibbindañca virajjahaṁ
mā puna jātisaṁsāraṁ sandhāveyyaṁ punappunaṁ
tisso vijjā sacchikatā kataṁ buddhassa sāsanaṁ.
Aḍḍhakāsī 3 .

[424] 5 Kiñcāpi khomhi kisikā gilānā bāḷhadubbalā
daṇḍamolubbha gacchāmi pabbataṁ abhirūhiya.
Saṅghāṭiṁ nikkhipitvāna pattakañca nikujjiya
sele khambhesiṁ attānaṁ tamokkhandhaṁ padāliya.
Cittā.

[425] 6 Kiñcāpi khomhi dukkhitā dubbalā gatayobbanā
daṇḍamolubbha gacchāmi pabbataṁ abhirūhiya.
Nikkhipitvāna saṅghāṭiṁ pattakañca nikujjiya
nisinnā camhi selamhi atha cittaṁ vimucci me
1 Ma. deḍḍubhaṁ vāti. 2 Po. Ma. negamo. 3 Po. Ma. aḍḍhakāsi.
Tisso vijjā anuppattā kataṁ buddhassa sāsanaṁ.
Mettikā.

[426] 7 Cātuddasī pañcadasī 1 yā ca pakkhassa aṭṭhamī
pāṭihārikapakkhañca aṭṭhaṅgasusamāgataṁ
uposathaṁ upagacchiṁ devakāyābhinandinī.
Sājja ekena bhattena muṇḍā saṅghāṭipārutā
devakāyaṁ na patthehaṁ vineyya hadaye daraṁ.
Mittā.

[427] 8 Uddhaṁ pādatalā amma adho ce 2 kesamatthakā
paccavekkhassumaṁ kāyaṁ asuciṁ pūtigandhikaṁ.
Evaṁ viharamānāya sabbo rāgo samūhato
pariḷāho samucchinno sītibhūtamhi nibbutā.
Abhayamātā.

[428] 9 Abhaye bhiduro kāyo yattha sattā puthujjanā
nikkhipissāmimaṁ dehaṁ sampajānā paṭīsatā 3 .
Bahūhi dukkhadhammehi appamādaratāya me
taṇhakkhayo anuppatto kataṁ buddhassa sāsanaṁ.
Abhayattherī.
1 Ma. cātuddasiṁ pañcadasiṁ. 2 Po. Ma. adho ve. 3 Ma. Yu. satīmatī.

[429] 10 Catukkhattuṁ pañcakkhattuṁ vihārā upanikkhamiṁ
aladdhā cetaso santiṁ citte avasavattinī.
Tassā me aṭṭhamī ratti yato taṇhā samūhatā
bahūhi dukkhadhammehi appamādaratāya me
taṇhakkhayo anuppatto kataṁ buddhassa sāsanaṁ.
Sāmā.
Dukanipāto samatto.
-------------
Therīgāthāya tikanipāto

[430] 1 Paṇṇavīsati vassāni yato pabbajitāya me
nābhijānāmi cittassa samaṁ laddhaṁ kudācanaṁ.
Aladdhā cetaso santiṁ citte avasavattinī
tato saṁvegamāpādiṁ saritvā jinasāsanaṁ.
Bahūhi dukkhadhammehi appamādaratāya me
taṇhakkhayo anuppatto kataṁ buddhassa sāsanaṁ
ajja me sattamī ratti yato taṇhā visositā.
Aññatarā sāmā.

[431] 2 Catukkhattuṁ pañcakkhattuṁ vihārā upanikkhamiṁ
aladdhā cetaso santiṁ citte avasavattinī.
Sā bhikkhuniṁ upāgacchiṁ yā me saddhāyikā ahu
sā me dhammamadesesi khandhāyatanadhātuyo.
Tassā dhammaṁ suṇitvāna yathā maṁ anusāsi sā
sattāhaṁ ekapallaṅke 1 nisīdiṁ pītisukhamappītā 2 .
Aṭṭhamiyā pāde pasāresiṁ [3]- tamokkhandhaṁ padāliya.
Uttamā.