[412] 11 Sumuttā sādhumuttamhi tīhi khujjehi muttiyā
udukkhalena musalena patinā khujjakena ca
1 Ma. Yu. ārādhayāhi.
Muttamhi jātimaraṇā bhavanetti samūhatā.
Muttā.

[413] 12 Chandajātā avasāyī 1 manasā ca phuṭṭhā 2 siyā
kāmesu appaṭibaddhacittā uddhaṁsotāti vuccati.
Dhammadinnā.

[414] 13 Karotha buddhasāsanaṁ yaṁ katvā nānutappati
khippaṁ pādāni dhovitvā ekamante nisīdatha.
Visākhā.

[415] 14 Dhātuyo dukkhato disvā mā jāti punarāgami
bhave chandaṁ virājetvā upasantā carissasi.
Sumanā.

[416] 15 Kāyena saṁvutā āsiṁ vācāya uda cetasā
samūlaṁ taṇhaṁ abbuyha sītibhūtamhi nibbutā.
Uttarā.

[417] 16 Sukhaṁ tvaṁ vuḍḍhike sehi katvā coḷena pārutā
upasanto hi te rāgo sītibhūtāsi nibbutā.
Sumanā vuḍḍhapabbajitā.

[418] 17 Piṇḍapātaṁ caritvāna daṇḍamādāya 3 dubbalā
vedhamānehi gattehi tattheva nipatiṁ chamā
1 Yu. avasāye. 2 Ma. Yu. phuṭā. 3 Ma. Yu. daṇḍamolubbha.
Disvā ādīnavaṁ kāye atha cittaṁ vimucci me.
Dhammā.

[419] 18 Hitvā ghare pabbajitvā hitvā puttaṁ pasuṁ piyaṁ
hitvā rāgañca dosañca avijjañca virājiya
samūlaṁ taṇhaṁ abbuyha upasantamhi nibbutā.
Saṅghā.
Ekikā 1 theriyo samattā.
------------------
Therīgāthāya dukanipāto

[420] 1 Āturaṁ asuciṁ pūtiṁ passa nande samussayaṁ
asubhāya cittaṁ bhāvehi ekaggaṁ susamāhitaṁ.
Animittañca bhāvehi mānānusayamujjaha
tato mānābhisamayā upasantā carissasi.
Itthaṁ sudaṁ bhagavā nandaṁ sikkhamānaṁ imāhi gāthāhi abhiṇhaṁ
ovadati.

[421] 2 Ye ime satta bojjhaṅgā maggā nibbānapattiyā
bhāvitā te mayā sabbe yathā buddhena desitā.
Diṭṭho hi me so bhagavā antimoyaṁ samussayo
vikkhīṇo jātisaṁsāro natthidāni punabbhavo.
Jantā 2 .
1 Ma. ekakanipāto niṭṭhito. sabbattha īdisapāṭho dissati. 2 Yu. jentī.