[452] 2 Puttasokenahaṁ aṭṭā khittacittā visaññinī
naggā pakiṇṇakesī ca rodaṁ 3 tena vicārihaṁ.
Vīthisaṅkārakūṭesu susāne rathiyāsu ca
acariṁ tīṇi vassāni khuppipāsāsamappitā.
Athaddasāmi sugataṁ nagaraṁ mithilaṁ gataṁ
adantānaṁ dametāraṁ sambuddhaṁ akutobhayaṁ.
1 Po. Ma. nānuññāto. 2 Yu. abbuhi. 3 Po. Ma. tena.
Saṁ cittaṁ paṭiladdhāna vanditvāna upāvisiṁ
so me dhammamadesesi anukampāya gotamo.
Tassa dhammaṁ suṇitvāna pabbajiṁ anagāriyaṁ
yuñjantī satthu vacane sacchākāsiṁ padaṁ sivaṁ.
Sabbe sokā samucchinnā pahīnā etadantikā
pariññātā hi me vatthū yato sokāna sambhavo.
Vāsiṭṭhī.

[453] 3 Daharā tuvaṁ rūpavatī ahaṁpi daharo yuvā
pañcaṅgikena turiyena ehi kheme ramāmase.
Iminā pūtikāyena āturena pabhaṅgunā
aṭṭiyāmi harāyāmi kāmataṇhā samūhatā.
Sattisūlūpamā kāmā khandhāsaṁ adhikuṭṭanā
yaṁ tvaṁ kāmaratiṁ brūsi arati dāni sā mamaṁ.
Sabbattha vihatā nandi tamokkhandho padālito
evaṁ jānāhi pāpima nihato tvamasi antaka.
Nakkhattāni namassantā aggiṁ paricaraṁ vane
yathābhuccamajānantā bālā suddhiṁ amaññatha.
Ahañca kho namassantī sambuddhaṁ purisuttamaṁ
parimuttā 1 sabbadukkhehi satthusāsanakārikā.
Khemā.
1 Po. Ma. pamuttā.

[454] 4 Alaṅkatā suvasanā mālinī candanokkhitā
sabbābharaṇasañchannā dāsīgaṇapurakkhatā.
Annaṁ pānaṁ ca ādāya khajjaṁ bhojjaṁ anappakaṁ
gehato nikkhamitvāna uyyānamabhihārayiṁ.
Tattha ramitvā kīḷitvā āgacchantī sakaṁ gharaṁ
vihāraṁ dakkhiṁ pāvisiṁ sākete añjanaṁ vanaṁ.
Disvāna lokapajjotaṁ vanditvāna upāvisiṁ
so me dhammamadesesi anukampāya cakkhumā.
Sutvā ca kho mahesissa saccaṁ sampaṭivijjhahaṁ
tattheva virajaṁ dhammaṁ phusayiṁ amataṁ padaṁ.
Tato viññātasaddhammā pabbajiṁ anagāriyaṁ
tisso vijjā anuppattā amoghaṁ buddhasāsanaṁ.
Sujātā.

[455] 5 Ucce kule ahaṁ jātā bahuvitte mahaddhane
vaṇṇarūpena sampannā dhītā meghissa 1 atrajā.
Patthitā rājaputtehi seṭṭhiputtehi gijjhitā
pitu me pesayi dūtaṁ detha mayhaṁ anopamaṁ.
Yattakaṁ tulitā esā tuyhaṁ dhitā anopamā
tato aṭṭhaguṇaṁ dassaṁ hiraññaṁ ratanāni ca.
1 Ma. Yu. majjhassa.
Sāhaṁ disvāna sambuddhaṁ lokajeṭṭhaṁ anuttaraṁ
tassa pādāni vanditvā ekamantaṁ upāvisiṁ.
So me dhammamadesesi anukampāya gotamo
nisinnā āsane tasmiṁ phusayiṁ tatiyaṁ phalaṁ.
Tato kesāni chetvāna pabbajiṁ anagāriyaṁ
sājja 1 me sattamī ratti yato taṇhā visositā.
Anopamā.

[456] 6 Buddha vīra namo tayatthu sabbasattānamuttama
yo maṁ dukkhā pamocesi aññañca bahukaṁ janaṁ.
Sabbadukkhaṁ pariññātaṁ hetutaṇhā visositā
bhāvitaṭṭhaṅgiko 2 maggo nirodho phusito mayā.
Mātā putto pitā bhātā ayyikā ca pure ahuṁ
yathābhuccaṁ ajānantī saṁsarihaṁ anibbisaṁ.
Diṭṭho hi me so bhagavā antimoyaṁ samussayo
vikkhīṇo jātisaṁsāro natthidāni punabbhavo.
Āraddhaviriye pahitatte niccaṁ daḷhaparakkame
samagge sāvake passa esā buddhāna vandanā.
Bahūnaṁ vata atthāya māyā janayi gotamaṁ
byādhimaraṇatunnānaṁ dukkhakkhandhaṁ byapānudi.
Mahāpajāpatī gotamī.
1 Ma. ajja me. 2 Ma. bhāvito aṭṭhaṅgiko. Yu. ariyaṭṭhaṅgiko.

[457] 7 Gutte yadatthaṁ pabbajjā hitvā puttaṁ samussayaṁ 1
tameva anubrūhehi mā cittassa vasaṁ gami.
Cittena vañcitā sattā mārassa visaye ratā
anekajātisaṁsāraṁ sandhāvanti aviddasū.
Kāmacchandañca byāpādaṁ sakkāyadiṭṭhimeva ca
sīlabbataparāmāsaṁ vicikicchañca pañcamaṁ.
Saṁyojanāni etāni pajahitvāna bhikkhunī
orambhāgamanīyāni nayidaṁ punarehisi.
Rāgaṁ mānaṁ avijjañca uddhaccañca vivajjiya
saṁyojanāni chetvāna dukkhassantaṁ karissasi.
Khepetvā jātisaṁsāraṁ pariññāya punabbhavaṁ
diṭṭhe 2 dhammeva nicchātā upasantā carissasi.
Guttā.

[458] 8 Catukkhattuṁ pañcakkhattuṁ vihārā upanikkhamiṁ
aladdhā cetaso santiṁ citte avasavattinī.
Bhikkhuniṁ upasaṅkamma sakkaccaṁ paripucchahaṁ
sā me dhammamadesesi dhātuāyatanāni ca
cattāri ariyasaccāni indriyāni balāni ca
bojjhaṅgaṭṭhaṅgikaṁ maggaṁ uttamatthassa pattiyā.
1 Ma. hitvā puttaṁ visuṁ piyaṁ. 2 Ma. diṭṭheva dhamme.
Tassāhaṁ vacanaṁ sutvā karontī anusāsaniṁ
rattiyā purime yāme pubbajātimanussariṁ
rattiyā majjhime yāme dibbacakkhuṁ visodhayiṁ
rattiyā pacchime yāme tamokkhandhaṁ padālayiṁ
pītisukhena ca kāyaṁ pharitvā vihariṁ tadā
sattamiyā pāde pasāresiṁ 1 tamokkhandhaṁ padāliya.
Vijayā.
Chakkanipāto samatto.
----------------
Therīgāthāya sattakanipāto

[459] 1 Musalāni gahetvāna dhaññaṁ koṭṭenti māṇavā
puttadārāni posentā dhanaṁ vindanti māṇavā.
Ghaṭetha buddhasāsane yaṁ katvā nānutappati
khippaṁ pādāni dhovitvā ekamantaṁ nisīdatha.
Cittaṁ upaṭṭhapetvāna ekaggaṁ susamāhitaṁ
paccavekkhatha saṅkhāre parato no ca attato.
Tassāhaṁ vacanaṁ sutvā paṭācārānusāsaniṁ
pāde pakkhālayitvāna ekamante upāvisiṁ.
1 Yu. pasāremi.
Rattiyā purime yāme pubbajātimanussariṁ
rattiyā majjhime yāme dibbacakkhuṁ visodhayiṁ.
Rattiyā pacchime yāme tamokkhandhaṁ padālayiṁ
tevijjā atha vuṭṭhāmi 1 katā te anusāsanī.
Sakkaṁva devā tidasā saṅgāme aparājitaṁ
purakkhitvā viharāmi 2 tevijjamhi anāsavā.
Uttarā.

[460] 2 Satiṁ upaṭṭhapetvāna bhikkhunī bhāvitindriyā
paṭivijjhiṁ padaṁ santaṁ saṅkhārūpasamaṁ sukhaṁ.
Kiṁ 3 nu uddissa muṇḍāsi samaṇī viya dissasi
na ca rocesi pāsaṇḍe kimidaṁ carasi momuhā.
Ito bahiddhā pāsaṇḍā diṭṭhiyo upanissitā
na te dhammaṁ vijānanti na te dhammassa kovidā.
Atthi sakyakule jāto buddho appaṭipuggalo
so me dhammamadesesi diṭṭhīnaṁ samatikkamaṁ
dukkhaṁ dukkhasamuppādaṁ dukkhassa ca atikkamaṁ
ariyaṭṭhaṅgikaṁ maggaṁ dukkhūpasamagāminaṁ.
Tassāhaṁ vacanaṁ sutvā vihariṁ sāsane ratā
tisso vijjā anuppattā kataṁ buddhassa sāsanaṁ.
1 Ma. vuṭṭhāsi. 2 Ma. vihassāmi. Yu. vihissāmi. 3 Ma. kaṁ.
Sabbattha vihatā nandi tamokkhandho padālito
evaṁ jānāhi pāpima nihato tvamasi antaka.
Cālā.

[461] 3 Satīmatī cakkhumatī bhikkhunī bhāvitindriyā
paṭivijjhiṁ padaṁ santaṁ akāpurisasevitaṁ.
Kiṁ nu jātiṁ na rocesi jāto kāmāni bhuñjati
bhuñjāhi kāmaratiyo māhu pacchānutāpinī.
Jātassa maraṇaṁ hoti hatthapādāna chedanaṁ
vadhabandhaparikkhepaṁ 1 jāto dukkhaṁ nigacchati.
Atthi sakyakule jāto sambuddho aparājito
so me dhammamadesesi jātiyā samatikkamaṁ
dukkhaṁ dukkhasamuppādaṁ dukkhassa ca atikkamaṁ
ariyaṭṭhaṅgikaṁ maggaṁ dukkhūpasamagāminaṁ.
Tassāhaṁ vacanaṁ sutvā vihariṁ sāsane ratā
tisso vijjā anuppattā kataṁ buddhassa sāsanaṁ.
Sabbattha vihatā nandi tamokkhandho padālito
evaṁ jānāhi pāpima nihato tvamasi antaka.
Upacālā.
Sattakanipāto samatto.
-----------------
1 Yu. vadhabandhapariklesaṁ.
Therīgāthāya aṭṭhakanipāto