[332] 10 Dhammo have rakkhati dhammacāriṁ
dhammo suciṇṇo sukhamāvahāti
esānisaṁso dhamme suciṇṇe
na duggatiṁ gacchati dhammacārī.
Na hi dhammo adhammo ca ubho samavipākino
1 Po. Ma. jālapacchannā.
Adhammo nirayaṁ neti dhammo pāpeti sugatiṁ 1 .
Tasmā hi dhammesu kareyya chandaṁ
iti modamāno sugatena tādinā
dhamme ṭhitā sugatavarassa sāvakā
niyyanti dhīrā saraṇavaraggagāmino.
Vipphoṭito gaṇḍamūlo taṇhājālo samūhato.
So khīṇasaṁsāro na catthi kiñcanaṁ
cando yathā dosināpuṇṇamāsiyāti 2 .
Dhammiko thero.

[333] 11 Yadā balākā sucipaṇḍaracchadā
kāḷassa meghassa bhayena tajjitā
palehiti ālayamālayesinī
tadā nadī ajakaraṇī rameti maṁ.
Yadā balākā suvisuddhapaṇḍarā
kāḷassa meghassa bhayena tajjitā
pariyesati leṇamaleṇadassinī
tadā nadī ajakaraṇī rameti maṁ.
Kannu tattha na ramenti jambuyo ubhato tahiṁ
sobhenti āpagākūlaṁ mahāleṇassa 3 pacchato.
Tāmatamadasaṅghasuppahīnā
1 Ma. Yu. suggatiṁ. 2 Ma. ...siyanti. 3 Ma. mama leṇassa.
Bhekā mandavatī panādayanti.
Nājja girinadīhi vippavāsasamayo
khemā ajakaraṇī sivā surammāti.
Sappako thero.

[334] 12 Pabbajiṁ jīvikatthohaṁ laddhāna upasampadaṁ
tato saddhaṁ paṭilabhiṁ daḷhaviriyo parakkamiṁ.
Kāmaṁ bhijjatuyaṁ kāyo maṁsapesī visīyaruṁ
ubho jannukasandhīhi jaṅghāyo papatantu me.
Nāsissaṁ na pivissāmi vihārā ca na nikkhame
napi passaṁ nipātessaṁ taṇhāsalle anūhate.
Tassa mevaṁ viharato passa viriyaparakkamaṁ
tisso vijjā anuppattā kataṁ buddhassa sāsananti.
Mudito thero.
Uddānaṁ
nāgasamālo bhagu ca sabhiyo nandakopi ca
jambuko senako thero sambhūto rāhulopi ca
bhavati candano thero dasete buddhasāvakā.
Dhammiko sappako thero mudito cāpi te tayo
gāthāyo dve ca paññāsa therā sabbepi terasāti.
Catukkanipāto niṭṭhito.
---------------
Theragāthāya pañcakanipāto

[335] 1 Bhikkhu sīvathikaṁ gantvā addasa 1 itthimujjhitaṁ
apaviddhaṁ susānasmiṁ khajjantiṁ kimihī phuṭaṁ.
Yaṁ hi eke jigucchanti mataṁ disvāna pāpakaṁ
kāmarāgo pāturahu andhova savatī ahu 2 .
Oraṁ odanapākamhā tamhā ṭhānā apakkamiṁ
satimā sampajānohaṁ ekamantaṁ upāvisiṁ.
Tato me manasīkāro yoniso udapajjatha
ādīnavo pāturahu nibbidā samatiṭṭhatha.
Tato cittaṁ vimucci me passa dhammasudhammataṁ
tisso vijjā anuppattā kataṁ buddhassa sāsananti.
Rājadatto thero.

[336] 2 Ayoge yuñjamattānaṁ puriso kiccamicchako 3
caraṁ ce nādhigaccheyya taṁ ve 4 dubbhagalakkhaṇaṁ.
Abbūḷhaṁ aghatajīvitaṁ 5
ekañce ossajjeyya kalīva siyā
sabbānipi ce ossajjeyya andhova siyā
samavisamassa adassanato.
1 Yu. addasaṁ. 2 Ma. Yu. ahuṁ. 3 Sī. Yu. kiccamicchato. 4 Ma. Yu. me.
5 Ma. aghagataṁ vijitaṁ. Yu. aghataṁ vijitaṁ.
Yañhi kayirā tañhi vade yaṁ na kayirā na taṁ vade
akarontaṁ bhāsamānaṁ parijānanti paṇḍitā.
Yathāpi ruciraṁ pupphaṁ vaṇṇavantaṁ agandhakaṁ
evaṁ subhāsitā vācā aphalā hoti akubbato.
Yathāpi ruciraṁ pupphaṁ vaṇṇavantaṁ sagandhakaṁ 1
evaṁ subhāsitā vācā saphalā hoti sukubbatoti 2
subhūto thero.

[337] 3 Vassati devo yathā sugītaṁ
channā me kuṭikā sukhā nivātā
tassaṁ viharāmi vūpasanto
atha ce patthayasi pavassa deva.
Vassati devo yathā sugītaṁ
channā me kuṭikā sukhā nivātā
tassaṁ viharāmi santacitto
atha ce patthayasi pavassa deva.
.pe.
Tassaṁ viharāmi vītarāgo
.pe.
Tassaṁ viharāmi vītadoso
.pe.
1 Po. Ma. sugandhakaṁ. 2 Sī. Yu. sakubbatoti. Ma. kubbatoti.
Tassaṁ viharāmi vītamoho
atha ce patthayasi pavassa devāti.
Girimānando thero.

[338] 4 Yaṁ patthayamāno 1 dhammesu upajjhāyo anuggahi
amataṁ abhikaṅkhantaṁ kataṁ kattabbakaṁ mayā.
Anuppatto sacchikato sayaṁ dhammo anītiho
visuddhañāṇo 2 nikkaṅkho byākaromi tavantike.
Pubbenivāsaṁ jānāmi dibbacakkhuṁ visodhitaṁ
sadattho me anuppatto kataṁ buddhassa sāsanaṁ.
Appamattassa me sikkhā sussutā tava sāsane
sabbe me āsavā khīṇā natthidāni punabbhavo.
Anusāsi maṁ ariyavatā anukampī anuggahi
amogho tumhamovādo 3 antevāsimhi sikkhitoti.
Sumano thero.

[339] 5 Sādhu hi kira me mātā patodaṁ upadaṁsayi
yassāhaṁ vacanaṁ sutvā anusiṭṭho janettiyā
āraddhavirayo pahitatto patto sambodhimuttamaṁ.
Arahā dakkhiṇeyyomhi tevijjo amataddaso
jetvā 4 namucino senaṁ viharāmi anāsavo.
1 Ma. Yu. patthayāno. 2 Ma. visuddhiñāṇo. 3 Ma. Yu. tuyhamovādo.
4 Yu. jitvā.
Ajjhattañca bahiddhā ca ye me vijjiṁsu āsavā
sabbe asesā ucchinnā na ca uppajjare puna.
Visāradā kho bhaginī etamatthaṁ abhāsayi
api hā nūna mayipi vanatho te na vijjati.
Pariyantakataṁ dukkhaṁ antimoyaṁ samussayo
jātimaraṇasaṁsāro natthidāni punabbhavoti.
Vaḍḍho thero.

[340] 6 Atthāya vata me buddho nadiṁ nerañjaraṁ agā
yassāhaṁ dhammaṁ sutvāna micchādiṭṭhiṁ vivajjayiṁ.
Yajiṁ uccāvace yaññe aggihutaṁ juhiṁ ahaṁ
esā suddhīti maññanto andhabhūto puthujjano.
Diṭṭhigahaṇapakkhanno parāmāsena mohito
asuddhiṁ maññisaṁ suddhiṁ andhabhūto aviddasu.
Micchādiṭṭhi pahīnā me bhavā sabbe padālitā 1
juhāmi dakkhiṇeyyaggiṁ namassāmi tathāgataṁ.
Mohā sabbe pahīnā me bhavataṇhā padālitā
vikkhīṇo jātisaṁsāro natthidāni punabbhavoti.
Nadīkassapo thero.

[341] 7 Pāto majjhantikaṁ sāyaṁ tikkhattuṁ divasassahaṁ
otariṁ udakaṁ sohaṁ 2 gayāya gayaphagguyā.
1 Ma. Yu. vidālitā. 2 Yu. sotaṁ.
Yaṁ mayā pakataṁ pāpaṁ pubbe aññāsu jātisu
tandānīdha pavāhemi evaṁdiṭṭhi pure ahu 1 .
Sutvā subhāsitaṁ vācaṁ dhammatthasahitaṁ padaṁ
tathaṁ yāthāvataṁ 2 atthaṁ yoniso paccavekkhisaṁ.
Ninhātasabbapāpomhi nimmalo payato suci
suddho buddhassa 3 dāyādo putto buddhassa oraso.
Ogayhaṭṭhaṅgikaṁ sotaṁ sabbaṁ pāpaṁ pavāhayiṁ
tisso vijjā ajjhagamiṁ kataṁ buddhassa sāsananti.
Gayākassapo thero.