[322] 16 Pāpamitte vivajjetvā bhajeyyuttamapuggale 1
ovāde cassa tiṭṭheyya patthento acalaṁ sukhaṁ.
Parittaṁ dārumāruyha yathā sīde mahaṇṇave
evaṁ kusītamāgamma sādhujīvīpi sīdati.
Tasmā taṁ parivajjeyya kusītaṁ hīnavīriyaṁ.
Pavivittehi ariyehi pahitattehi jhāyihi
1 Po. Ma. bhajeyyuttamapuggalaṁ.
Niccaṁ āraddhaviriyehi paṇḍitehi sahāvaseti.
Vimalo thero.
Uddānaṁ
aṅgaṇiko bhāradvājo paccayo bākulo isi
dhaniyo mātaṅgaputto ca sobhito vāraṇo isi
passiko ca yasojo ca sāṭimattiyupāli ca
uttarapālo abhibhūto gotamo hāritopi ca
thero tikanipātamhi nibbāne vimalo kato
aṭṭhatāḷīsa gāthāyo therā soḷasa kittitāti.
Tikanipāto niṭṭhito.
---------------
Theragāthāya catukkanipāto

[323] 1 Alaṅkatā suvasanā mālinī candanussadā
majjhe mahāpathe nārī turiye naccati naṭṭakī.
Piṇḍikāya paviṭṭhohaṁ gacchanto naṁ udikkhisaṁ
alaṅkataṁ suvasanaṁ maccupāsaṁva oḍḍitaṁ.
Tato me manasīkāro yoniso udapajjatha
ādīnavo pāturahu nibbidā samatiṭṭhatha 1 .
Tato cittaṁ vimucci me passa dhammasudhammataṁ
1 Yu. samatiṭṭhati.
Tisso vijjā anuppattā kataṁ buddhassa sāsananti.
Nāgasamālo thero.

[324] 2 Ahaṁ middhena pakato vihārā upanikkhamiṁ
caṅkamaṁ abhirūhanto tattheva papatiṁ chamā.
Gattāni parimajjitvā puna pāruyha caṅkamaṁ
caṅkamiṁ caṅkame 1 sohaṁ ajjhattaṁ susamāhito.
Tato me manasīkāro yoniso udapajjatha
ādīnavo pāturahu nibbidā samatiṭṭhatha.
Tato cittaṁ vimucci me passa dhammasudhammataṁ
tisso vijjā anuppattā kataṁ buddhassa sāsananti.
Bhagu thero.

[325] 3 Pare ca na vijānanti mayamettha yamāmhase 2
ye ca tattha vijānanti tato sammanti medhagā.
Yadā ca avijānantā iriyantyamarā viya 3
vijānanti ca ye dhammaṁ āturesu anāturā.
Yaṅkiñci sithilaṁ kammaṁ saṅkiliṭṭhañca yaṁ vataṁ
saṅkassaraṁ brahmacariyaṁ na taṁ hoti mahapphalaṁ.
Yassa sabrahmacārīsu gāravo nūpalabbhati
ārakā hoti saddhammā nabhaṁ paṭhaviyā yathāti.
Sabhiyo thero.
1 Ma. Yu. caṅkame caṅkamiṁ. 2 Ma. Yu. yamāmase. 3 Yu. viyā.

[326] 4 Dhiratthu pūre duggandhe mārapakkhe avassute
nava sotāni te kāye yāni sandanti sabbadā.
Mā purāṇaṁ amaññittho māsādesi tathāgate
saggepi te na rajjanti kimaṅgaṁ pana mānuse.
Ye ca kho bālā dummedhā dummantī mohapārutā
tādisā tattha rajjanti mārakhittasmi bandhane.
Yesaṁ rāgo ca doso ca avijjā ca virājitā
tādī tattha na rajjanti chinnasuttā abandhanāti.
Nandako thero.

[327] 5 Pañcapaññāsa vassāni rajojallamadhārayiṁ
bhuñjanto māsikabhattaṁ kesamassuṁ alocayiṁ.
Ekapādena aṭṭhāsiṁ āsanaṁ parivajjayiṁ
sukkhagūthāni ca khādiṁ uddesañca na sādiyiṁ.
Etādisaṁ karitvāna bahuṁ duggatigāminaṁ
vuyhamāno mahoghena buddhaṁ saraṇamāgamaṁ.
Saraṇagamanaṁ passa passa dhammasudhammataṁ
tisso vijjā anuppattā kataṁ buddhassa sāsananti.
Jambuko thero.

[328] 6 Svāgataṁ vata me āsi gayāyaṁ gayaphagguyā
yaṁ addasāsiṁ sambuddhaṁ desentaṁ dhammamuttamaṁ
Mahappabhaṁ gaṇācariyaṁ aggappattaṁ vināyakaṁ
sadevakassa lokassa jinaṁ atuladassanaṁ
mahānāgaṁ mahāvīraṁ mahājutimanāsavaṁ
sabbāsavaparikkhīṇaṁ satthāramakutobhayaṁ.
Cirasaṅkiliṭṭhaṁ vata maṁ diṭṭhisandānasandhitaṁ 1
vimocayi so bhagavā sabbaganthehi senakanti.
Senako thero.

[329] 7 Yo dandhakāle tarati taraṇīye ca dandhaye
ayonisosaṁvidhānena bālo dukkhaṁ nigacchati.
Tassatthā parihāyanti kāḷapakkheva candimā
āyasakyañca pappoti mittehi ca virujjhati.
Yo dandhakāle dandheti taraṇīye ca tāraye
yonisosaṁvidhānena sukhaṁ pappoti paṇḍito.
Tassatthā paripūrenti sukkapakkheva candimā
yaso kittiñca pappoti mittehi na virujjhatīti.
Sambhūto thero.

[330] 8 Ubhayeneva sampanno rāhulabhaddoti maṁ vidū
yañcamhi putto buddhassa yañca dhammesu cakkhumā.
Yañca me āsavā khīṇā yañca natthi punabbhavo
1 Yu. ...sanditaṁ. Ma. ...bandhitaṁ.
Arahā dakkhiṇeyyomhi tevijjo amataddaso.
Kāmandhā jālasañchannā 1 taṇhāchadanachāditā
pamattabandhunā baddhā macchāva kumināmukhe.
Taṁ kāmaṁ ahamujjhitvā chetvā mārassa bandhanaṁ
samūlaṁ taṇhaṁ abbuyha sītibhūtosmi nibbutoti.
Rāhulo thero.

[331] 9 Jātarūpena sañchannā dāsīgaṇapurakkhatā
aṅkena puttamādāya bhariyā maṁ upāgami.
Tañca disvāna āyantiṁ sakaputtassa mātaraṁ
alaṅkataṁ suvasanaṁ maccupāsaṁva oḍḍitaṁ.
Tato me manasīkāro yoniso udapajjatha
ādīnavo pāturahu nibbidā samatiṭṭhatha.
Tato cittaṁ vimucci me passa dhammasudhammataṁ
tisso vijjā anuppattā kataṁ buddhassa sāsananti.
Candano thero.