[312] 6 Ye cittakathī bahussutā samaṇā pātaliputtavāsino
tesaññataroyamāyuvā dvāre tiṭṭhati khujjasobhito.
1 Ma. panudissāni.
Ye cittakathī bahussutā samaṇā pātaliputtavāsino
tesaññataroyamāyuvā dvāre tiṭṭhati māluterito.
Suyuddhena suyiṭṭhena saṅgāmavijayena ca
brahmacariyānuciṇṇena evāyaṁ sukhamedhatīti.
Khujjasobhito thero.

[313] 7 Yodha koci manussesu parapāṇāni hiṁsati
asmā lokā paramhā ca ubhayā dhaṁsate naro.
Yo ca mettena cittena sabbapāṇānukampati
bahuṁ hi so pasavati puññaṁ tādisako naro.
Subhāsitassa sikkhetha samaṇupāsanassa ca
ekāsanassa ca raho cittavūpasamassa cāti.
Vāraṇo thero.

[314] 8 Ekopi saddho medhāvī assaddhānaṁ ca 1 ñātinaṁ
dhammaṭṭho sīlasampanno hoti atthāya bandhunaṁ.
Niggayha anukampāya coditā ñātayo mayā
ñātibandhavapemena kāraṁ katvāna bhikkhusu.
Te abbhatītā kālakatā pattā te tidivaṁ sukhaṁ
bhātaro mayhaṁ mātā ca modanti kāmakāminoti.
Passiko thero.

[315] 9 Kālāpabbaṅgasaṅkāso kīso 2 dhamanisaṇṭhito
1 Ma. Yu. assaddhānidha. 2 Ma. Yu. dhamanisantato.
Mattaññū annapānasmiṁ alīnamanaso 1 naro.
Phuṭṭho ḍaṁsehi makasehi araññasmiṁ brahāvane
nāgo saṅgāmasīseva sato tatrādhivāsaye.
Yathā brahmā tathā eko yathā devo tathā duve
yathā gāmo tathā tayo kolāhalaṁ tatuttarinti.
Yasojo thero.

[316] 10 Ahu tuyhaṁ pure saddhā sā te ajja na vijjati
yaṁ tuyhaṁ tuyhamevetaṁ natthi duccaritaṁ mama.
Aniccā hi calā saddhā evaṁ diṭṭhā hi sā mayā
rajjantipi virajjanti tattha kiṁ jiyyate muni.
Paccati munino bhattaṁ thokaṁ thokaṁ kule kule
piṇḍikāya carissāmi atthi jaṅghabalaṁ mamāti.
Sāṭimattiyo thero.

[317] 11 Saddhāya abhinikkhamma navapabbajito navo
mitte bhajeyya kalyāṇe suddhājīve atandite.
Saddhāya abhinikkhamma navapabbajito navo
saṅghasmiṁ viharaṁ bhikkhu sikkhetha vinayaṁ budho.
Saddhāya abhinikkhamma navapabbajito navo
kappākappesu kusalo careyya apurakkhatoti.
Upāli thero.
1 Ma. Yu. adīnamanaso.

[318] 12 Paṇḍitaṁ vata maṁ santaṁ alamatthavicintakaṁ
pañca kāmaguṇā loke sammohā pātayiṁsu maṁ.
Pakkhanno māravisaye daḷhasallasamappito
asakkhiṁ maccurājassa ahaṁ pāsā pamuccituṁ.
Sabbe kāmā pahīnā me bhavā sabbe padālitā
vikkhīṇo jātisaṁsāro natthidāni punabbhavoti.
Uttarapālo thero.

[319] 13 Suṇātha ñātayo sabbe yāvantettha samāgatā
dhammaṁ vo desayissāmi dukkhā jāti punappunaṁ.
Ārabhatha 1 nikkhamatha yuñjatha buddhasāsane
dhunātha maccuno senaṁ naḷāgāraṁva kuñjaro.
Yo imasmiṁ dhammavinaye appamatto vihessati
pahāya jātisaṁsāraṁ dukkhassantaṁ karissatīti.
Abhibhūto thero.

[320] 14 Saṁsaraṁ hi nirayaṁ agacchisaṁ
petalokamagamaṁ punappunaṁ
dukkhamamhipi tiracchānayoniyā
nekadhā hi vusitaṁ ciraṁ mayā.
Mānusopi ca bhavobhirādhito
saggakāyamagamaṁ sakiṁ sakiṁ
1 Po. Ma. ārambhatha.
Rūpadhātūsu arūpadhātūsu
nevasaññīsu asaññīsuṭṭhitaṁ.
Sambhavā suviditā asārakā
saṅkhatā pacalitā saderitā
taṁ viditvā mahamattasambhavaṁ
santimeva satimā samajjhaganti.
Gotamo thero.

[321] 15 Yo pubbe karaṇīyāni pacchā so kātumicchati
sukhā so dhaṁsate ṭhānā pacchā camanutappati.
Yañhi kayirā tañhi vade yaṁ na kayirā na taṁ vade
akarontaṁ bhāsamānaṁ parijānanti paṇḍitā.
Susukhaṁ vata nibbānaṁ sammāsambuddhadesitaṁ
asokaṁ virajaṁ khemaṁ yattha dukkhaṁ nirujjhatīti.
Hārito thero.