[302] 5 Na ukkhipe no ca parikkhipe pare
na okkhipe pāragataṁ na eraye
1 yassindriyānītipi pāṭho.
Na cattavaṇṇaṁ parisāsu byāhare
anuddhato sammitabhāṇi subbato.
Susukhumanipuṇatthadassinā matikusalena nivātavuttinā
saṁsevitabuddhasīlinā nibbānaṁ na hi tena dullabhanti.
Visākho pañcālīputto thero.

[303] 6 Nadanti morā susikhā supekhuṇā
sunīlagīvā sumukhā sugajjino
susaddalā cāpi mahāmahī ayaṁ
subyāpitambu suvalāhakaṁ nabhaṁ.
Sukallarūpo sumanassa jhāyitaṁ
sunikkamo 1 sādhu subuddhasāsane
susukkasukkaṁ nipuṇaṁ sududdasaṁ
phusāhi taṁ uttamamaccutaṁ padanti.
Cūḷako thero.

[304] 7 Nandamānāgataṁ cittaṁ sūlamāthopamānakaṁ
tena teneva vajasi yena sūlaṁ kaliṅgaraṁ.
Tāhaṁ citta kaliṁ brūmi taṁ brūmi cittadubbhakaṁ
satthā te dullabho laddho mānatthe maṁ niyojayīti.
Anūpamo thero.
1 Yu. sunikkhamo.

[305] 8 Saṁsaraṁ dīghamaddhānaṁ gatīsu parivattisaṁ
apassaṁ ariyasaccāni andhabhūto puthujjano.
Tassa me appamattassa saṁsārā vinaḷīkatā
sabbā gatī samucchinnā natthidāni punabbhavoti.
Vajjito thero.

[306] 9 Assatthe haritobhāse saṁvirūḷhamhi pādape
ekaṁ buddhagataṁ saññaṁ alabhitthaṁ patissato.
Ekattiṁse ito kappe yaṁ saññaṁ alabhiṁ tadā
tassā saññāya vāhasā patto me āsavakkhayoti.
Sandhito thero.
Uddānaṁ
kumārakassapo thero dhammapālo ca brahmāli
mogharājā visākho ca cūḷako ca anūpamo
vajjito sandhito thero kilesarajavāhanoti.
Vaggo pañcamo.
Tathā dukanipātamhi navuti ceva aṭṭha ca
therā ekūnapaññāsaṁ bhāsitā nayakovidā.
Dukanipāto niṭṭhito.
-------------------
Theragāthāya tikanipāto

[307] 1 Ayonisuddhimanvesaṁ aggiṁ paricariṁ vane
suddhimaggaṁ ajānanto akāsiṁ aparaṁ 1 tapaṁ.
Taṁ sukhena sukhaṁ laddhaṁ passa dhammasudhammataṁ
tisso vijjā anuppattā kataṁ buddhassa sāsanaṁ.
Brahmabandhu pure āsiṁ idāni khomhi brāhmaṇo
tevijjo nhātako camhi sotthiyo camhi vedagūti.
Aṅgaṇikabhāradvājo thero.

[308] 2 Pañcāhāhaṁ pabbajito sekkho 2 appattamānaso
vihāraṁ me paviṭṭhassa cetaso paṇidhī ahū
nāsissaṁ na pivissāmi vihārato na nikkhame
na pi passaṁ nipātessaṁ taṇhāsalle anūhate.
Tassa mevaṁ viharato passa viriyaparakkamaṁ
tisso vijjā anuppattā kataṁ buddhassa sāsananti.
Paccayo thero.

[309] 3 Yo pubbe karaṇīyāni pacchā so kātumicchati
sukhā so dhaṁsate ṭhānā pacchā camanutappati.
Yañhi kayirā tañhi vade yaṁ na kayirā na taṁ vade
1 Yu. amaraṁ. 2 Ma. Yu. sekho.
Akarontaṁ bhāsamānaṁ parijānanti paṇḍitā.
Susukhaṁ vata nibbānaṁ sammāsambuddhadesitaṁ
asokaṁ virajaṁ khemaṁ yattha dukkhaṁ nirujjhatīti.
Bākulo thero.

[310] 4 Sukhañca jīvituṁ icche sāmaññasmiṁ apekkhavā
saṅghikaṁ nātimaññeyya cīvaraṁ pānabhojanaṁ.
Sukhañce jīvituṁ icche sāmaññasmiṁ apekkhavā
ahi musikasobbhaṁva sevetha sayanāsanaṁ.
Sukhañce jīvituṁ icche sāmaññasmiṁ apekkhavā
itarītarena tusseyya ekadhammañca bhāvayeti.
Dhaniyo thero.

[311] 5 Atisītaṁ atiuṇhaṁ atisāyamidaṁ ahu
iti visaṭṭhakammante khaṇā accenti māṇave.
Yo ca sītañca uṇhañca tiṇā bhiyyo na maññati
karaṁ purisakiccāni so sukhā na vihāyati.
Dabbaṁ kusaṁ poṭakilaṁ usīraṁ muñjapabbajaṁ
urasā panudahissāmi 1 vivekamanubrūhayanti.
Mātaṅgaputto thero.