[222] 5 Cittanimittassa kovido pavivekarasaṁ vijāniya
jhāyaṁ nipako patissato adhigaccheyya sukhaṁ nirāmisanti.
Sunāgo thero.

[223] 6 Ito bahiddhā puthuaññavādinaṁ
maggo na nibbānagamo yathā ayaṁ
itissu saṅghaṁ bhagavānusāsati
satthā sayaṁ pāṇitaleva dassayanti.
Nāgito thero.

[224] 7 Khandhā diṭṭhā yathābhūtaṁ bhavā sabbe padālitā
vikkhīṇo jātisaṁsāro natthidāni punabbhavoti.
Paviṭṭho 1 thero.
1 Po. saviṭṭho.

[225] 8 Asakkhiṁ vata attānaṁ uddhātuṁ udakā thalaṁ
vuyhamāno mahoghova 1 saccāni paṭivijjhahanti
ajjuno thero.

[226] 9 Uttiṇṇā paṅkā palipā pātālā parivajjitā
mutto oghā ca ganthā ca sabbe mānā visaṁhatāti.
Devasabho thero.

[227] 10 Pañcakkhandhā pariññātā tiṭṭhanti chinnamūlakā
vikkhīṇo jātisaṁsāro natthidāni punabbhavoti.
Sāmidatto thero.
Uddānaṁ
thero samitigutto ca kassapo sīhasavhayo
nīto sunāgo nāgito paviṭṭho ajjuno isi
devasabho ca yo thero sāmidatto mahabbaloti.
Vaggo navamo.
----------------
Theragāthāya ekanipātassa dasamavaggo

[228] 1 Na tathāmataṁ satarasaṁ sudhannaṁ yaṁ mayajja paribhuttaṁ
aparimitadassinā gotamena buddhena desito dhammoti.
Paripuṇṇako thero.
1 Ma. Yu. mahogheva.

[229] 2 Yassāsavā parikkhīṇā āhāre ca anissito
suññato animitto ca vimokkho yassa gocaro
ākāseva sakuntānaṁ padantassa duranvayanti.
Vijayo thero.

[230] 3 Dukkhā kāmā eraka na sukhā kāmā eraka
yo kāme kāmayati dukkhaṁ so kāmayati eraka
yo kāme na kāmayati dukkhaṁ so na kāmayati erakāti.
Erako thero.

[231] 4 Namo hi tassa bhagavato sakyaputtassa sirīmato
tenāyaṁ aggaputtena 1 aggadhammo sudesitoti.
Mettaji thero.