[202] 5 Ukkhepakaṭavacchassa saṅkalitaṁ bahūhi vassehi
taṁ bhāsati gahaṭṭhānaṁ sunisinno uḷārapāmojjoti.
Ukkhepakaṭavaccho thero.

[203] 6 Anusāsi mahāvīro sabbadhammāna pāragū
tassāhaṁ dhammaṁ sutvāna vihāsiṁ santike rato 1
tisso vijjā anuppattā kataṁ buddhassa sāsananti.
Meghiyo thero.

[204] 7 Kilesā jhāpitā mayhaṁ bhavā sabbe samūhatā
vikkhīṇo jātisaṁsāro natthidāni punabbhavoti.
Ekadhammasavaniyo thero.

[205] 8 Adhicetaso appamajjato munino monapathesu sikkhato
sobhā na bhavanti tādino upasantassa sadā satīmatoti.
Ekudāniyo thero.

[206] 9 Sutvāna dhammaṁ mahato mahārasaṁ
sabbaññutaññāṇavarena desitaṁ
maggaṁ papajjiṁ amatassa pattiyā
so yogakkhemassa pathassa kovidoti.
Channo thero.
1 Po. Ma. sato.

[207] 10 Sīlameva idha aggaṁ paññavā pana uttamo
manussesu ca devesu sīlapaññāṇato jayanti.
Puṇṇo thero.
Uddānaṁ
vappo ca vajjiputto ca pakkho vimalakoṇḍañño
ukkhepakaṭavaccho ca meghiyo ekadhammiko
ekudāniyachanno 1 ca puṇṇatthero mahabbaloti.
Vaggo sattamo.
----------------
Theragāthāya ekanipātassa aṭṭhamavaggo

[208] 1 Susukhumanipuṇatthadassinā
matikusalena nivātavuttinā
saṁsevitabuddhasīlinā
nibbānaṁ na hi tena dullabhanti.
Vacchapālo thero.

[209] 2 Yathā kalīro susu vaḍḍhitaggo
dunnikkhaso 2 hoti pasākhajāto
evaṁ ahaṁ bhariyāyānītāya
1 Ma. ekudāniyachannā. 2 Ma. Yu. dunnikkhamo.
Anumañña maṁ pabbajitomhidānīti.
Ātumo thero.

[210] 3 Jiṇṇañca disvā dukkhitañca byādhitaṁ
matañca disvā gatamāyusaṅkhayaṁ
tato ahaṁ nikkhamitūna pabbajiṁ
pahāya kāmāni manoramānīti.
Māṇavo thero.

[211] 4 Kāmachando ca byāpādo thīnamiddhañca bhikkhuno
uddhaccaṁ vicikicchā ca sabbasova na vijjatīti.
Suyāmano thero.