[192] 5 Āsandikuṭikaṁ katvā ogayha añjanāvanaṁ
tisso vijjā anuppattā kataṁ buddhassa sāsananti.
Añjanāvaniyo thero.

[193] 6 Ko kuṭikāyaṁ bhikkhu kuṭikāyaṁ vītarāgo susamāhitacitto.
Evaṁ jānāhi āvuso amoghā te kuṭikā katāti.
Kuṭivihārī thero.

[194] 7 Ayamāhu purāṇiyā kuṭikā 1 aññaṁ patthayase navaṁ kuṭiṁ
āsaṁ kuṭiyā virājaya dukkhā bhikkhu puna navā kuṭīti.
Kuṭivihārī 2 thero.

[195] 8 Ramaṇīyā me kuṭikā saddhādeyyā manoramā
na me attho kumārīhi yesaṁ attho tahiṁ gacchatha nāriyoti.
Ramaṇīyakuṭiko thero.

[196] 9 Saddhāyāhaṁ pabbajito araññe me kuṭikā katā
appamatto ca ātāpī sampajāno patissatoti.
Kosallavihārī thero.

[197] 10 Te me ijjhiṁsu saṅkappā yadattho pāvisiṁ kuṭiṁ
vijjāvimuttiṁ paccessaṁ mānānusayamujjahanti.
Sīvalī thero.
1 Ma. Yu. kuṭi. 2 Ma. dutiyakuṭivihārī.
Uddānaṁ
godhiko ca subāhu ca valliyo uttiyo isi
añjanāvaniyo thero duve kuṭivihārino
ramaṇīyakuṭiko thero kosallavhayasīvalīti.
Vaggo chaṭṭho.
---------------
Theragāthāya ekanipātassa sattamavaggo

[198] 1 Passati passo passantaṁ apassantañca passati
apassanto apassantaṁ passantañca na passatīti.
Vappo thero.

[199] 2 Ekakā mayaṁ araññe viharāma
apaviddhaṁva vanasmiṁ dārukaṁ
tassa me bahukā pihayanti
nerayikā viya saggagāminanti.
Vajjiputtako 1 thero.

[200] 3 Cutā patanti patitā giddhā ca punarāgatā
katakiccaṁ ratarammaṁ sukhenanvāgataṁ sukhanti.
Pakkho thero.

[201] 4 Dumavhayāya uppanno jāto paṇḍaraketunā
1 mu. Yu. vajjiputto.
Ketuhā ketunā yeva mahāketuṁ padhaṁsayīti.
Vimalakoṇḍañño thero.