[212] 5 Sādhu suvahitānaṁ 1 dassanaṁ kaṅkhā chijjati buddhi vaḍḍhati
bālampi karonti paṇḍitaṁ tasmā sādhu sataṁ samāgamoti.
Susārado thero.

[213] 6 Uppatantesu nipate nipatantesu uppate
vase avasamānesu ramamānesu no rameti.
Piyañjaho thero.

[214] 7 Idaṁ pure cittamacāri cārikaṁ
yenicchakaṁ yatthakāmaṁ yathāsukhaṁ
tadajjahaṁ niggahissāmi yoniso
hatthiṁ pabhinnaṁ viya aṅkusaggāhoti.
Hatthārohaputto thero
1 Ma. Yu. suvihitā.

[215] 8 Anekajātisaṁsāraṁ sandhāvissaṁ anibbisaṁ
tassa me dukkhajātassa dukkhakkhandho paraddhatoti 1 .
Meṇḍasiro thero.

[216] 9 Sabbo rāgo pahīno me sabbo doso samūhato
sabbo me vigato moho sītibhūtosmi nibbutoti 1 .
Rakkhito thero.

[217] 10 Yaṁ mayā pakataṁ kammaṁ appaṁ vā yadi vā bahuṁ
sabbametaṁ parikkhīṇaṁ natthidāni punabbhavoti.
Uggo thero.
Uddānaṁ
vacchapālo ca yo thero ātumo māṇavo isi
suyāmano susārado thero yo ca piyañjaho
ārohaputto meṇḍasiro rakkhito uggasavhayoti.
Vaggo aṭṭhamo.
----------------
Theragāthāya ekanipātassa navamavaggo

[218] 1 Yaṁ mayā pakataṁ pāpaṁ pubbe aññāsu jātisu
idheva taṁ vedaniyaṁ vatthu aññaṁ na vijjatīti.
Samitigutto thero.
1 Ma. Yu. aparaddho.

[219] 2 Yena yena subhikkhāni sivāni abhayāni ca
tena puttaka gacchassu mā sokā pahato bhavāti.
Kassapo thero.

[220] 3 Sīhappamatto vihara rattindivamatandito
bhāvehi kusalaṁ dhammaṁ jaha sīghaṁ samussayanti.
Sīho thero.

[221] 4 Sabbarattiṁ supitvāna divā saṅgaṇike rato
kudāssu nāma dummedho dukkhassantaṁ karissatīti.
Nīto thero.