[162] 5 Obhāsajātaṁ phalagaṁ cittaṁ yassa abhiṇhaso
tādisaṁ bhikkhumāsajja kaṇha dukkhaṁ nigacchasīti.
Nandiyo thero.

[163] 6 Sutvā subhāsitaṁ vācaṁ buddhassādiccabandhuno
paccabyādhiṁ hi nipuṇaṁ vālaggaṁ usunā yathāti.
Abhayo thero.

[164] 7 Dabbaṁ kusaṁ poṭakilaṁ usīraṁ muñjapabbajaṁ
urasā panudahissāmi vivekamanubrūhayanti.
Lomasakaṅgiyo thero.

[165] 8 Kacci no vatthapasuto kacci no bhūsanārato
kacci sīlamayaṁ gandhaṁ tvaṁ vāsi 1 netarā pajāti.
Jambugāmikaputto thero.

[166] 9 Samunnamayamattānaṁ usukārova tejanaṁ
1 Ma. kiṁ tvaṁ vāyasi.
Cittaṁ ujuṁ karitvāna avijjaṁ bhinda 1 hāritāti.
Hārito thero.

[167] 10 Ābādhe me samuppanne sati me upapajjatha
ābādho me samuppanno kālo me nappamajjitunti.
Uttiyo thero.
Uddānaṁ
nigrodho cittako thero gosālatthero sugandho
nandiyo abhayo thero thero lomasakaṅgiyo
jambugāmikaputto ca hārito uttiyo isīti.
Vaggo tatiyo.
----------------
Theragāthāya ekanipātassa catutthavaggo

[168] 1 Phuṭṭho ḍaṁsehi makasehi araññasmiṁ brahāvane
nāgo saṅgāmasīseva sato tatrādhivāsayeti.
Gahuratīriyo thero 2 .

[169] 2 Ajaraṁ jīramānena tappamānena nibbutiṁ
nirāmisaṁ 3 paramaṁ santiṁ yogakkhemaṁ anuttaranti.
Suppiyo thero.
1 Yu. chinda. 2 Ma. Yu. gahavaratīriyo bhikkhu. 3 Ma. nimiyaṁ. Yu. nimmissaṁ.

[170] 3 Yathāpi ekaputtasmiṁ piyasmiṁ kusalī siyā
evaṁ sabbesu pāṇesu sabbattha kusalo siyāti.
Sopāko thero

[171] 4 Anāsannavarā etā niccameva vijānatā
gāmā araññamāgamma tato gehaṁ upāvisiṁ
tato uṭṭhāya pakkāmiṁ anāmantetvā posiyoti.
Posiyo thero.