[152] 5 Pañca chinde pañca jahe pañca cuttari bhāvaye
pañcasaṅgātigo bhikkhu oghatiṇṇoti vuccatīti.
Kuṇḍadhāno thero.

[153] 6 Yathāpi bhaddo ājañño naṅgalāvattanī sikhī
gacchati appakasirena evaṁ rattindivā mama
gacchanti appakasirena sukhe laddhe nirāmiseti.
Belaṭṭhasīso thero.

[154] 7 Middhī yadā hoti mahagghaso ca
niddāyitā samparivattasāyī
mahāvarāhova nivāpapuṭṭho
punappunaṁ gabbhamupeti mandoti.
Dāsako thero.

[155] 8 Ahu 1 buddhassa dāyādo bhikkhu bhesakaḷāvane
kevalaṁ aṭṭhisaññāya aphari paṭhaviṁ imaṁ
maññehaṁ kāmarāgaṁ so khippameva pahīyatīti.
Siṅgālapitā thero.

[156] 9 Udakaṁ hi nayanti nettikā usukārā namayanti tejanaṁ
1 Yu. ahū.
Dāruṁ namayanti tacchakā attānaṁ damayanti subbatāti.
Kuḷo thero.

[157] 10 Maraṇe me bhayaṁ natthi nikanti natthi jīvite
sandehaṁ nikkhipissāmi sampajāno patissatoti.
Ajito thero.
Uddānaṁ
cūḷavaccho mahāvaccho vanavaccho ca sīvako
kuṇḍadhāno ca belaṭṭhi dāsako ca tato paraṁ
siṅgālapitiko thero kuḷo ca ajito dasāti.
Vaggo dutiyo.
----------------
Theragāthāya ekanipātassa tatiyavaggo

[158] 1 Nāhaṁ bhayassa bhāyāmi satthā no amatassa kovido
yattha bhayaṁ nāvatiṭṭhati tena maggena vajanti bhikkhavoti.
Nigrodho thero.

[159] 2 Nīlā sugīvā sikhino morā kāraviyaṁ 1 abhinadanti
te sītavātakalitā 2 suttaṁ jhānaṁ 3 nibodhentīti
cittako thero.
1 Yu. kāraṁviyaṁ. Ma. kārambhiyaṁ. 2 Ma. sītavātakīlitā. 3 Ma. Yu. jhāyaṁ.

[160] 3 Ahaṁ kho veḷugumbasmiṁ bhutvāna madhupāyāsaṁ
padakkhiṇaṁ sammasanto khandhānaṁ udayabbayaṁ
sānuṁ paṭiggamissāmi vivekamanubrūhayanti.
Gosālo thero.

[161] 4 Anuvassiko pabbajito passa dhammasudhammataṁ
tisso vijjā anuppattā kataṁ buddhassa sāsananti.
Sugandho thero.