[72] 8 Alaṅkato mālyadharo suvattho
sukuṇḍalī kappitakesamassu
āmuttahatthābharaṇo yasassī
1 Po. Yu. adāsiṁ. 2 Po. Yu. kummāsaṁ.
Dibbe vimānamhi yathāpi candimā
dibbā ca vīṇā pavadanti vaggū
aṭṭhaṭṭhakā sikkhitā sādhurūpā
dibbā ca kaññā tidasacarā uḷārā
naccanti gāyanti pamodayanti
deviddhipattosi mahānubhāvo
manussabhūto kimakāsi puññaṁ
kenāsi evañjalitānubhāvo
vaṇṇo ca te sabbadisā pabhāsatīti.
So devaputto attamano moggallānena pucchito
... Pe ... Yassa kammassidaṁ phalaṁ
ahaṁ manussesu manussabhūto
disvāna samaṇe sīlavante
sampannavijjācaraṇe yasassī
bahussute taṇhakkhayūpapanne
annañca pānañca pasannacitto
sakkacca dānaṁ vipulaṁ adāsiṁ
tena metādiso vaṇṇo ... Pe ...
Vaṇṇo ca me sabbadisā pabhāsatīti.
Kuṇḍalīvimānaṁ aṭṭhamaṁ.

[73] 9 Alaṅkato mālyadharo suvattho
sukuṇḍalī kappitakesamassu
āmuttahatthābharaṇo yasassī
dibbe vimānamhi yathāpi candimā
dibbā ca vīṇā pavadanti vaggū
aṭṭhaṭṭhakā sikkhitā sādhurūpā
dibbā ca kaññā tidasacarā uḷārā
naccanti gāyanti pamodayanti
deviddhipattosi mahānubhāvo
manussabhūto kimakāsi puññaṁ
kenāsi evañjalitānubhāvo
vaṇṇo ca te sabbadisā pabhāsatīti.
So devaputto attamano moggallānena pucchito
... Pe ... Yassa kammassidaṁ phalaṁ
ahaṁ manussesu manussabhūto
disvāna samaṇe sādhurūpe 1
sampannavijjācaraṇe yasassī
bahussute sīlavante 2 pasanne
annañca pānañca pasannacitto
1 Yu. sāravante. 2 Yu. taṇhakkhayūpapanne.
Sakkacca dānaṁ vipulaṁ adāsiṁ
tena metādiso vaṇṇo ... Pe ...
Vaṇṇo ca me sabbadisā pabhāsatīti.
Dutiyakuṇḍalīvimānaṁ navamaṁ.

[74] 10 Yā devarājassa sabhā sudhammā
yatthacchasi 1 devasaṅgho samaggo
tathūpamaṁ tuyhamidaṁ vimānaṁ
obhāsayaṁ tiṭṭhati antalikkhe
deviddhipattosi mahānubhāvo
manussabhūto kimakāsi puññaṁ
kenāsi evañjalitānubhāvo
vaṇṇo ca te sabbadisā pabhāsatīti.
So devaputto attamano moggallānena pucchito
... Pe ... Yassa kammassidaṁ phalaṁ
ahaṁ manussesu manussabhūto
rañño pāyāsissa ahosi māṇavo
laddhā dhanaṁ saṁvibhāgaṁ akāsiṁ
piyā ca me sīlavanto ahesuṁ
annañca pānañca pasannacitto
1 Po. Yu. yatthacchati.
Sakkacca dānaṁ vipulaṁ adāsiṁ
tena metādiso vaṇṇo ... Pe ...
Vaṇṇo ca me sabbadisā pabhāsatīti.
Uttaravimānaṁ dasamaṁ.
Uddānaṁ
dve agārino phaladāyī dve upassayadāyī
bhikkhāya dāyī yavapālako ceva dve kuṇḍalino pāyāsīti.
Vaggo chaṭṭho.
---------------
Sattamo sunikkhittavaggo

[75] 1 Yathā vanaṁ cittalataṁ pabhāsati
uyyānaseṭṭhaṁ tidasānamuttamaṁ
tathūpamaṁ tuyhamidaṁ vimānaṁ
obhāsayaṁ tiṭṭhati antalikkhe
deviddhipattosi mahānubhāvo
manussabhūto kimakāsi puññaṁ
kenāsi evañjalitānubhāvo
vaṇṇo ca te sabbadisā pabhāsatīti.
So devaputto attamano moggallānena pucchito
... Pe ... Yassa kammassidaṁ phalaṁ
ahaṁ manussesu manussabhūto
daliddo atāṇo kapaṇo kammakaro ahosiṁ
jiṇṇe ca mātāpitaro abhariṁ
piyā ca me sīlavanto ahesuṁ
annañca pānañca pasannacitto
sakkacca dānaṁ vipulaṁ adāsiṁ
tena metādiso vaṇṇo ... Pe ...
Vaṇṇo ca me sabbadisā pabhāsatīti.
Cittalatāvimānaṁ paṭhamaṁ.

[76] 2 Yathā vanaṁ 1 cittalataṁ pabhāsati
uyyānaseṭṭhaṁ tidasānamuttamaṁ
tathūpamaṁ tuyhamidaṁ vimānaṁ
obhāsayaṁ tiṭṭhati antalikkhe
deviddhipattosi mahānubhāvo
manussabhūto kimakāsi puññaṁ
kenāsi evañjalitānubhāvo
vaṇṇo ca te sabbadisā pabhāsatīti.
So devaputto attamano moggallānena pucchito
1 Yu. nandanaṁ.
... Pe ... Yassa kammassidaṁ phalaṁ
ahaṁ manussesu manussabhūto
daliddo atāṇo kapaṇo kammakaro ahosiṁ
jiṇṇe ca mātāpitaro abhariṁ
piyā ca me sīlavanto ahesuṁ
annañca pānañca pasannacitto
sakkacca dānaṁ vipulaṁ adāsiṁ
tena metādiso vaṇṇo ... Pe ...
Vaṇṇo ca me sabbadisā pabhāsatīti.
Nandanavimānaṁ dutiyaṁ.

[77] 3 Uccamidaṁ maṇithūṇaṁ vimānaṁ
samantato dvādasa yojanāni
kūṭāgārā sattasatā urāḷā
veḷuriyatthambhā ruciratthatā subhā
tatthacchasi pivasi khādasi ca
dibbā ca vīṇā pavadanti vaggū
dibbā rasā kāmaguṇettha pañca
nāriyo ca naccanti suvaṇṇachannā
kena tetādiso vaṇṇo ... Pe ...
Vaṇṇo ca te sabbadisā pabhāsatīti.
So devaputto attamano moggallānena pucchito
... Pe ... Yassa kammassidaṁ phalaṁ
ahaṁ manussesu manussabhūto
vivane pathe caṅkamaṁ akāsiṁ
ārāmarukkhāni ca ropayissaṁ
piyā ca me sīlavanto ahesuṁ
annañca pānañca pasannacitto
sakkacca dānaṁ vipulaṁ adāsiṁ
tena metādiso vaṇṇo ... Pe ...
Vaṇṇo ca me sabbadisā pabhāsatīti.
Maṇithūṇavimānaṁ tatiyaṁ.

[78] 4 Sovaṇṇamaye pabbatasmiṁ vimānaṁ sabbato pabhaṁ
hemajālapaṭicchannaṁ kiṁkaṇikajālakappitaṁ
aṭṭhaṁsā sukatā thambhā sabbe veḷuriyāmayā
ekamekāya aṁsiyā ratanā satta nimmitā
veḷuriyasuvaṇṇassa phalikārūpiyassa ca
masāragallamuttāhi lohitaṅgamaṇīhi ca
citrā manoramā bhūmi na tatthuddhaṁsate rajo
gopāṇase 1 gaṇāpītā kūṭaṁ dhārenti nimmitā
sopāṇāni ca cattāri nimmitā caturo disā
1 Po. Ma. Yu. gopāṇasī.
Nānāratanagabbhehi ādiccova virocati
vedikā 1 catasso tattha vibhattā bhāgaso mitā
daddallamānā ābhenti 2 samantā caturo disā
tasmiṁ vimāne pavare devaputtā mahappabhā
atirocasi vaṇṇena udayantova bhāṇumā
dānassa te idaṁ phalaṁ atho sīlassa vā pana
atho añjalikammassa taṁ me akkhāhi pucchitoti.
So devaputto attamano moggallānena pucchito
pañhaṁ puṭṭho viyākāsi yassa kammassidaṁ phalaṁ
ahaṁ andhakavindasmiṁ buddhassādiccabandhuno
vihāraṁ satthuno 3 kāresiṁ pasanno sakehi pāṇihi
tattha gandhañca mālañca paccayañca vilepanaṁ
vihāraṁ satthunodāsiṁ 4 vippasannena cetasā
tena mayhaṁ idaṁ laddhaṁ vasaṁ vattemi nandane
nandane pavare ramme nānādijagaṇāyute
ramāmi naccagītehi accharāhi purakkhitoti.
Suvaṇṇavimānaṁ catutthaṁ.

[79] 5 Uccamidaṁ maṇithūṇaṁ vimānaṁ
samantato dvādasa yojanāni
1 Po. Ma. vediyā. 2 Ma. Yu. ābhanti. 3 Yu. satthu. 4 Yu. satthu pādāsiṁ.
Kūṭāgārā sattasatā uḷārā
veḷuriyatthambhā ruciratthatā subhā
tatthacchasi pivasi khādasi ca
dibbā ca vīṇā pavadanti vaggū
dibbā rasā kāmaguṇettha pañca
nāriyo ca naccanti suvaṇṇachannā
kena tetādiso vaṇṇo ... Pe ...
Vaṇṇo ca te sabbadisā pabhāsatīti.
So devaputto attamano moggallānena pucchito
... Pe ... Yassa kammassidaṁ phalaṁ
gimhānaṁ pacchime māse patāpante divaṅkare
paresaṁ bhatako poso ambārāmaṁ asiñcahaṁ
atha tenāgamā bhikkhu sārīputtoti vissuto
kilantarūpo kāyena akilantopi cetasā
tañca disvāna āyantaṁ avoca ambasiñcako
sādhu taṁ bhante nhāpeyyaṁ yaṁ mamassa sukhāvahaṁ
tassa me anukampāya nikkhipi pattacīvaraṁ
nisīdi rukkhamūlasmiṁ chāyāya ekacīvaro
tañca acchena vārinā pasannamānaso theraṁ
nhāpayiṁ rukkhamūlasmiṁ chāyāya ekacīvaraṁ
Ambo ca sitto samaṇo nahāpito
mayā ca puññaṁ pasutaṁ anappakaṁ
iti so pītiyā kāyaṁ sabbaṁ pharati attano
tadeva ettakaṁ kammaṁ akāsiṁ tāya jātiyā
pahāya mānusaṁ dehaṁ upapannomhi nandanaṁ
nandane pavare 1 ramme nānādijagaṇāyute
ramāmi naccagītehi accharāhi purakkhitoti.
Ambavimānaṁ pañcamaṁ.

[80] 6 Disvāna devaṁ paṭipucchi bhikkhu
ucce vimānamhi ciraṭṭhitike
āmuttahatthābharaṇo yasassī [2]-
dibbe vimānamhi yathāpi candimā
dibbā ca vīṇā pavadanti vaggū
aṭṭhaṭṭhakā sikkhitā sādhurūpā
dibbā ca kaññā tidasacarā 3 uḷārā
naccanti gāyanti pamodayanti
deviddhipattosi mahānubhāvo
manussabhūto kimakāsi puññaṁ
kenāsi evañjalitānubhāvo
vaṇṇo ca te sabbadisā pabhāsatīti.
1 Po. Yu. pavane. Ma. ca vane. 2 Ma. Yu. dibbe vimānamhi yathāpi candimā
alaṅkato māladhāri suvattho sukuṇḍalī kappitakesamassu āmuttahatthābharaṇo yasassī.
3 Po. Yu. tidasavarā.
So devaputto attamano moggallānena pucchito
... Pe ... Yassa kammassidaṁ phalaṁ
ahaṁ manussesu manussabhūto
saṅgamma rakkhissaṁ paresaṁ dhenuyo
tato ca āgā samaṇo mama 1 santike
gāvo ca māse agamaṁsu khādituṁ
dvayajjakiccaṁ ubhayañca kārissaṁ 2
iccevahaṁ bhante tadā vicintayaṁ 3
tato ca saññaṁ paṭiladdhayoniso
adāsi 4 bhanteti khipiṁ anantakaṁ
so māsakhettaṁ turito avāsariṁ
purāyaṁ bhañjati yassidaṁ dhanaṁ
tato ca kaṇho urago mahāviso
aḍaṁsi pāde turitassa me sato
svāhaṁ aṭṭomhi dukkhena pīḷito
bhikkhu ca taṁ muñcitvā 5 anantakaṁ
adāsi 6 kummāsaṁ mamānukampāya
tato cuto kālamakatomhi devatā
1 Ma. Yu. mamantike. 2 Ma. Yu. kāriyaṁ. 3 Po. Ma. Yu. vicintayiṁ.
4 Yu. dadāhi. Ma. dadāmi. 5 Yu. sāmaṁ ... bhuñji canantakaṁ.
Ma. sāmaṁ ... nantakaṁ. 6 Po. Yu. ahosi. Ma. ahāsi.
Tadeva kammaṁ kusalaṁ kataṁ mayā
sukhañca kammaṁ anubhomi attanā
tayā hi bhante anukampito bhusaṁ
kataññutāya abhivādayāmi taṁ
sadevake loke samārake ca
añño muni natthi tayānukampako
tayā hi bhante anukampito bhusaṁ
kataññutāya abhivādayāmi taṁ
imasmiṁ loke parasmiṁ vā pana
añño muni natthi tayānukampako
tayā hi bhante anukampito bhusaṁ
kataññutāya abhivādayāmi tanti.
Gopālavimānaṁ chaṭṭhaṁ.

[81] 7 Puṇṇamāye 1 yathā cando nakkhattaparivārito
samantā anupariyāti tārakādhipati sasī
tathūpamaṁ idaṁ byamhaṁ dibbaṁ devapuramhi ca
atirocati vaṇṇena udayantova raṁsimā
veḷuriyasuvaṇṇassa phalikārūpiyassa ca
masāragallamuttāhi lohitaṅgamaṇīhi ca
citrā manoramā bhūmi veḷuriyassa santhatā 2
1 Po. puṇṇamāyo. Ma. puṇṇamāse. 2 Po. Yu. santhitā.
Kūṭāgārā subhā rammā pāsādo te sumāpito
rammā ca te pokkharaṇī puthulā macchasevitā 1
acchodakā vippasannā sovaṇṇavālukasanthatā
nānāpadumasañchannā puṇḍarīkasamogatā
surabhi sampavāyanti manuññā māluteritā
tassā te ubhato passe vanagumbā sumāpitā
upetā puppharukkhehi phalarukkhehi cūbhayaṁ
sovaṇṇapāde pallaṅke muduke goṇasanthate
nisinnaṁ devarājaṁva upatiṭṭhanti accharā
sabbābharaṇasañchannā nānāmālāvibhūsitā
ramenti taṁ mahiddhikaṁ vasavattīva modasi
bherisaṅkhamudiṅgāhi vīṇāhi paṇavehi ca
ramasi ratisampanno naccagītesu vādite
dibbā te vividhā rūpā dibbā saddā atho rasā
gandhā ca te adhippetā phoṭṭhabbā ca manoramā
tasmiṁ vimāne pavare devaputtā mahappabhā
abhirocasi vaṇṇena udayantova bhāṇumā
dānassa te idaṁ phalaṁ atho sīlassa vā pana
atho añjalikammassa taṁ me akkhāhi pucchitoti.
1 Yu. puthulomanisevitātipi dissati.
So devaputto attamano moggallānena pucchito
... Pe ... Yassa kammassidaṁ phalaṁ
ahaṁ kapilavatthusmiṁ sākiyānaṁ puruttame
suddhodanassa puttassa kaṇṭhako sahajo ahuṁ
yadā so aḍḍharattāyaṁ sambodhāya abhinikkhami
so maṁ mudūhi pāṇīhi jālitambanakhehi ca
saṭṭhiṁ ākoṭayitvāna vaha sammātimabravi
ahaṁ lokaṁ tārayissaṁ patto sambodhimuttamaṁ
taṁ me giraṁ suṇantassa hāso me vipulo ahu
udaggacitto sumano abhisiṁsiṁ tadā ahaṁ
abhirūḷhañca maṁ ñatvā sākyaputtaṁ mahāyasaṁ
udaggacitto mudito vāhissaṁ purisuttamaṁ
paresaṁ vijitaṁ gantvā uggatasmiṁ divaṅkare 1
mamaṁ channañca ohāya anāpekkho apakkami
tassa tambanakhe pāde jivhāya parilehisaṁ 2
gacchantañca mahāvīraṁ rudamāno udikkhissaṁ
adassanenahaṁ tassa sākyaputtassa sirīmato
alatthaṁ garukābādhaṁ khippaṁ me maraṇaṁ ahu
tasseva ānubhāvena vimānaṁ āvasāmidaṁ 3
1 Po. Ma. Yu. divākare. 2 Po. Ma. parilehasiṁ. 3 Po. āvasamihaṁ. Ma. āvasāmahaṁ.
Sabbakāmaguṇūpetaṁ dibbaṁ devapuramhi ca
yañca me ahu vāhāso saddaṁ sutvāna bodhiyā
teneva kusalamūlena phusissaṁ āsavakkhayaṁ
sace hi bhante gaccheyyāsi satthu buddhassa santike
mamāpi taṁ vacanena sirasā vajjāsi vandanaṁ
ahampi daṭṭhuṁ gacchissaṁ jinaṁ appaṭipuggalaṁ
dullabhaṁ dassanaṁ hoti lokanāthāna tādinanti.
So ca kataññū katavedī satthāraṁ upasaṅkami
sutvā giraṁ cakkhumato dhammacakkhuṁ visodhayi
visodhayitvā diṭṭhigataṁ vicikicchā vatāni ca
vanditvā satthuno pāde tatthevantaradhāyathāti.
Kaṇṭhakavimānaṁ sattamaṁ.