[52] 2 Cirappavāsiṁ purisaṁ dūrato sotthimāgataṁ
ñātī mittā suhajjā ca abhinandanti āgataṁ
tatheva katapuññaṁpi asmā lokā paraṁ gataṁ
puññāni paṭiggaṇhanti piyaṁ ñātīva āgataṁ
uṭṭhehi revate supāpadhamme
apārutaṁ dvāraṁ adānasīle
nessāma taṁ yattha thunanti duggatā
samappitā nerayikā dukkhenāti
iccevaṁ vatvāna yamassa dūtā
te dve yakkhā lohitakkhā brahantā
paccekabāhāsu gahetvā revatiṁ
pakkāmayiṁsu devagaṇassa santike
ādiccavaṇṇaṁ ruciraṁ pabhassaraṁ
byamhaṁ subhaṁ kañcanajālachannaṁ
Kassetaṁ ākiṇṇajanaṁ vimānaṁ
suriyassa raṁsīriva jotamānaṁ
nārīgaṇā candanasārānulittā 1
ubhato vimānaṁ upasobhayanti
tandissati suriyasamānavaṇṇaṁ
ko modati saggappatto vimāneti.
Bārāṇasiyaṁ nandiyo nāmāsi upāsako
amaccharī dānapatī vadaññū
tassetaṁ ākiṇṇajanaṁ vimānaṁ
suriyassa raṁsīriva jotamānaṁ
nārīgaṇā candanasārānulittā 2
ubhato vimānaṁ upasobhayanti
tandissati suriyasamānavaṇṇaṁ
so modati saggappatto vimāne
nandiyassāhaṁ bhariyā
agārinī sabbakulassa issarā
bhattuvimāne ramissāmi dānihaṁ
na patthaye nirayaṁ dassanāya
eseva te nirayo supāpadhamme
1-2 Yu. candanasāralittā.
Puññaṁ tayā akataṁ jīvaloke
na hi macchariyo rosako pāpadhammo
saggūpagānaṁ labhati sahabyataṁ
kiṁ nu gūthañca muttañca asuci paṭidissati
duggandhaṁ kimidaṁ miḷhaṁ kimetaṁ upavāyati
esa saṁsavako nāma nirayo 1 gambhīro sataporiso
yattha vassasahassāni tuvaṁ paccasi revateti.
Kiṁ nu kāyena vācāya manasā dukkaṭaṁ kataṁ
kena saṁsavako laddho nirayo 1 gambhīro sataporiso (iti).
Samaṇe brāhmaṇe cāpi aññe cāpi 2 vaṇibbake
musāvādena vañcesi taṁ pāpaṁ pakataṁ tayā
tena saṁsavako laddho nirayo 1 gambhīro sataporiso
tattha vassasahassāni tuvaṁ paccasi revate
hatthepi chindanti athopi pāde
kaṇṇepi chindanti athopi nāsaṁ
athopi kākolagaṇā samecca
saṅgamma khādanti viphandamānanti.
Sādhu kho maṁ paṭinetha kāhāmi kusalaṁ bahuṁ
dānena samacariyāya saññamena damena ca
yaṁ katvā sukhitā honti na ca pacchānutappareti.
1 Ma. Yu. ayaṁ pāṭho natthi. 2 Ma. Yu. vāpi.
Pure tvaṁ pamajjitvā idāni paridevasi
sayaṁ katānaṁ kammānaṁ vipākaṁ anubhossasi
ko devalokato manussalokaṁ
gantvāna puṭṭho me evaṁ vadeyya
nikkhittadaṇḍesu dadātha dānaṁ
acchādanaṁ sayanamathannapānaṁ 1
na hi macchariyo rosako pāpadhammo
saggūpagānaṁ labhati sahabyataṁ (iti).
Sāhaṁ nūna ito gantvā yoniṁ laddhāna mānusiṁ
vadaññū sīlasampannā kāhāmi kusalaṁ bahuṁ
dānena samacariyāya saññamena damena ca
ārāmāni ca ropissaṁ dugge saṅkamanāni ca
papañca udapānañca vippasannena cetasā
cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca aṭṭhaṅgasusamāgataṁ
uposathaṁ upavasissaṁ sadā sīlesu saṁvutā
na ca dāne pamajjissaṁ sāmaṁ diṭṭhamidaṁ mayāti.
Iccevaṁ vilapantiñca 2 phandamānaṁ tato tato
khipiṁsu niraye ghore uddhapādaṁ avaṁsiraṁ
ahaṁ pure maccharinī ahosiṁ
1 Ma. seyyamathannapānaṁ. 2 Ma. Yu. vippalapantiṁ. Po. vippalapantiñca.
Paribhāsikā samaṇabrāhmaṇānaṁ
vitathena ca sāmikaṁ vañcayitvā
paccāmahaṁ niraye ghorarūpeti.
Revativimānaṁ dutiyaṁ.