[22] 5 Nīlā pītā ca kāḷā ca mañjiṭṭhā atha lohitā
uccāvacānaṁ vaṇṇānaṁ kiñjakkhaparivāritā
mandāravānaṁ pupphānaṁ mālaṁ dhāresi muddhani
nayime aññesu kāyesu rukkhā santi sumedhase
kena kāyaṁ upapannā tāvatiṁsaṁ yasassinī
devate pucchitācikkha kissa kammassidaṁ phalaṁ (iti).
Bhadditthikāti maṁ aññiṁsu kimbilāyaṁ upāsikā
saddhāsīlena sampannā saṁvibhāgaratā sadā
acchādanañca bhattañca senāsanaṁ padīpiyaṁ
adāsiṁ ujubhūtesu vippasannena cetasā
Cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca aṭṭhaṅgasusamāgataṁ
uposathaṁ upavasiṁ sadā sīle susaṁvutā
pāṇātipātā viratā musāvādā ca saññatā
theyyā ca aticārā ca majjapānā ca ārakā
pañcasikkhāpade ratā ariyasaccāna kovidā
upāsikā cakkhumato appamādavihārinī
katāvakāsā katakusalā tato cutā
sayampabhā anuvicarāmi nandanaṁ
bhikkhū cāhaṁ paramahitānukampake
abhojayiṁ tapassiyugaṁ mahāmuniṁ
katāvakāsā katakusalā tato cutā
sayampabhā anuvicarāmi nandanaṁ
aṭṭhaṅgikaṁ aparimitaṁ sukhāvahaṁ
uposathaṁ sattatamupāvasiṁ ahaṁ
katāvakāsā katakusalā tato cutā
sayampabhā anuvicarāmi nandananti.
Bhadditthikāvimānaṁ pañcamaṁ.

[23] 6 Abhikkantena vaṇṇena yā tvaṁ tiṭṭhasi devate
obhāsentī disā sabbā osadhī viya tārakā
Kena tetādiso vaṇṇo kena te idhamijjhati
uppajjanti ca te bhogā ye keci manaso piyā
pucchāmi taṁ devi mahānubhāve
manussabhūtā kimakāsi puññaṁ
kenāsi evañjalitānubhāvā
vaṇṇo ca te sabbadisā pabhāsatīti.
Sā devatā attamanā moggallānena pucchitā
pañhaṁ puṭṭhā viyākāsi yassa kammassidaṁ phalaṁ
soṇadinnāti maṁ aññiṁsu nālandāyaṁ upāsikā
saddhāsīlena sampannā saṁvibhāgaratā sadā
acchādanañca bhattañca senāsanaṁ padīpiyaṁ
adāsiṁ ujubhūtesu vippasannena cetasā
cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca aṭṭhaṅgasusamāgataṁ
uposathaṁ upavasiṁ sadā sīle susaṁvutā
pāṇātipātā viratā musāvādā ca 1 saññatā 2
theyyā ca aticārā ca majjapānā ca ārakā
pañcasikkhāpade ratā ariyasaccāna kovidā
upāsikā cakkhumato gotamassa yasassino
tena metādiso vaṇṇo ... Pe ...
1 Po. Yu. casaddo natthi. 2 Po. Yu. susaññatā.
Vaṇṇo ca me sabbadisā pabhāsatīti.
Soṇadinnāvimānaṁ chaṭṭhaṁ.

[24] 7 Abhikkantena vaṇṇena yā tvaṁ tiṭṭhasi devate
obhāsentī disā sabbā osadhī viya tārakā
kena tetādiso vaṇṇo ... Pe ...
Vaṇṇo ca te sabbadisā pabhāsatīti.
Sā devatā attamanā moggallānena pucchitā
... Pe ... Yassa kammassidaṁ phalaṁ
uposathāti maṁ aññiṁsu sāketāyaṁ upāsikā
saddhāsīlena sampannā saṁvibhāgaratā sadā
acchādanañca bhattañca senāsanaṁ padīpiyaṁ
adāsiṁ ujubhūtesu vippasannena cetasā
cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca aṭṭhaṅgasusamāgataṁ
uposathaṁ upavasiṁ sadā sīle susaṁvutā
pāṇātipātā viratā musāvādā ca saññatā
theyyā ca aticārā ca majjapānā ca ārakā
pañcasikkhāpade ratā ariyasaccāna kovidā
upāsikā cakkhumato gotamassa yasassino
tena metādiso vaṇṇo ... Pe ...
Vaṇṇo ca me sabbadisā pabhāsatīti.
Abhikkhaṇaṁ nandanaṁ sutvā chando me upapajjatha
tattha cittaṁ paṇidhāya upapannamhi nandanaṁ
nākāsiṁ satthu vacanaṁ buddhassādiccabandhuno
hīne cittaṁ paṇidhāya samhi pacchānutāpinī
kīvaciraṁ vimānasmiṁ idha vassasuposathe
devate pucchitācikkha yadi jānāsi āyu no (iti).
Saṭṭhivassasahassāni [1]- idha ṭhatvā mahāmuni
ito cutā gamissāmi manussānaṁ sahabyatanti.
Mā tvaṁ uposathe bhayi sambuddhenāsi byākatā
sotāpannā visesayi pahīnā tava duggatīti.
Uposathavimānaṁ sattamaṁ.

[25] 8 Abhikkantena vaṇṇena yā tvaṁ tiṭṭhasi devate
obhāsentī disā sabbā osadhī viya tārakā
kena tetādiso vaṇṇo ... Pe ...
Vaṇṇo ca te sabbadisā pabhāsatīti.
Sā devatā attamanā moggallānena pucchitā
... Pe ... Yassa kammassidaṁ phalaṁ
suniddāti maṁ aññiṁsa rājagahasmiṁ upāsikā
saddhāsīlena sampannā saṁvibhāgaratā sadā
1 Ma. Yu. tisso ca vassakoṭiyo.
Acchādanañca bhattañca senāsanaṁ padīpiyaṁ
adāsiṁ ujubhūtesu vippasannena cetasā
cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca aṭṭhaṅgasusamāgataṁ
uposathaṁ upavasiṁ sadā sīle susaṁvutā
pāṇātipātā viratā musāvādā ca saññatā
theyyā ca aticārā ca majjapānā ca ārakā
pañcasikkhāpade ratā ariyasaccāna kovidā
upāsikā cakkhumato gotamassa yasassino
tena metādiso vaṇṇo ... Pe ...
Vaṇṇo ca me sabbadisā pabhāsatīti.
Suniddāvimānaṁ aṭṭhamaṁ.

[26] 9 Abhikkantena vaṇṇena yā tvaṁ tiṭṭhasi devate
obhāsentī disā sabbā osadhī viya tārakā
kena tetādiso vaṇṇo ... Pe ...
Vaṇṇo ca te sabbadisā pabhāsatīti.
Sā devatā attamanā moggallānena pucchitā
... Pe ... Yassa kammassidaṁ phalaṁ
sudinnāti maṁ aññiṁsu rājagahasmiṁ upāsikā
saddhāsīlena sampannā saṁvibhāgaratā sadā
Acchādanañca bhattañca senāsanaṁ padīpiyaṁ
adāsiṁ ujubhūtesu vippasannena cetasā
cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca aṭṭhaṅgasusamāgataṁ
uposathaṁ upavasiṁ sadā sīle susaṁvutā
pāṇātipātā viratā musāvādā ca saññatā
theyyā ca aticārā ca majjapānā ca ārakā
pañcasikkhāpade ratā ariyasaccāna kovidā
upāsikā cakkhumato gotamassa yasassino
tena metādiso vaṇṇo ... Pe ...
Vaṇṇo ca me sabbadisā pabhāsatīti.
Sudinnāvimānaṁ navamaṁ.

[27] 10 Abhikkantena vaṇṇena yā tvaṁ tiṭṭhasi devate
obhāsentī disā sabbā osadhī viya tārakā
kena tetādiso vaṇṇo ... Pe ...
Vaṇṇo ca te sabbadisā pabhāsatīti.
Sā devatā attamanā moggallānena pucchitā
... Pe ... Yassa kammassidaṁ phalaṁ
ahaṁ manussesu manussabhūtā
purimāya jātiyā masussaloke
Addasaṁ virajaṁ buddhaṁ vippasannamanāvilaṁ
tassa adāsihaṁ bhikkhaṁ pasannā sakehi pāṇihi
tena metādiso vaṇṇo ... Pe ...
Vaṇṇo ca me sabbadisā pabhāsatīti.
Bhikkhādāyikavimānaṁ dasamaṁ.

[28] 11 Abhikkantena vaṇṇena yā tvaṁ tiṭṭhasi devate
obhāsentī disā sabbā osadhī viya tārakā
kena tetādiso vaṇṇo ... Pe ...
Vaṇṇo ca te sabbadisā pabhāsatīti.
Sā devatā attamanā moggallānena pucchitā
... Pe ... Yassa kammassidaṁ phalaṁ
ahaṁ manussesu manussabhūtā
purimāya jātiyā manussaloke
addasaṁ virajaṁ buddhaṁ vippasannamanāvilaṁ
tassa adāsihaṁ bhikkhaṁ pasannā sakehi pāṇihi
tena metādiso vaṇṇo ... Pe ...
Vaṇṇo ca me sabbadisā pabhāsatīti.
Dutiyabhikkhādāyikavimānaṁ ekādasamaṁ.
Uddānaṁ
dāsī ceva lakhumā ca atha ācāmadāyikā
Caṇḍālī bhadditthikā ceva soṇadinnā uposathā
niddā ceva sudinnā ca dve ca bhikkhāyadāyikā
vaggo tena pavuccatīti.
Itthivimāne dutiyo vaggo.
Bhāṇavāraṁ paṭhamaṁ.
------------
Tatiyo pārichattakavaggo

[29] 1 Uḷāro te yaso vaṇṇo sabbā obhāsate disā
nāriyo naccanti gāyanti devaputtā alaṅkatā
modanti parivārenti tava pūjāya devate
sovaṇṇāni vimānāni tavimāni sudassane
tuvaṁpi issarā tesaṁ sabbakāmasamiddhinaṁ
abhijātā mahantāsi devakāye pamodasi
devate pucchitācikkha yassa kammassidaṁ phalanti.
Ahaṁ manussesu manussabhūtā
dussīle kule suṇisā ahosiṁ
assaddhesu kadariyesu saddhāsīlena sampannā
[1]-
Piṇḍāya caramānassa apūvaṁ te adāsihaṁ
tassa adāsihaṁ 2 pūvaṁ pasannā sakehi pāṇihi
1 Po. Ma. Yu. tadāhaṁ sassuyācikkhiṁ samaṇo āgato idha. 2 Ma. Yu. adāsahaṁ.
Itissā sassu paribhāsi avinītā tvaṁ vadhū
na maṁ sampucchituṁ icchi samaṇassa dadāmahaṁ
tato me sassu kupitā pahāsi musalena maṁ
kuṭaṅgañchi avadhi maṁ nāsakkhiṁ jīvituṁ ciraṁ
sāhaṁ kāyassa bhedā ca vippamuttā tato cutā
tāvatiṁsānaṁ devānaṁ upapannā sahabyataṁ
tena metādiso vaṇṇo ... Pe ...
Vaṇṇo ca me sabbadisā pabhāsatīti.
Uḷāravimānaṁ paṭhamaṁ.

[30] 2 Obhāsayitvā paṭhaviṁ sadevakaṁ
atirocasi candimasuriyā viya
siriyā ca vaṇṇena yasena tejasā
brahmāva devi tidase sahindake
pucchāmi taṁ uppalamāladhārini
āveḷini kañcanasannibhattace
alaṅkate uttamavatthadhārini
kā tvaṁ subhe devate vandase mamaṁ
kiṁ tvaṁ pure kammaṁ akāsi attanā
manussabhūtā purimāya jātiyā
dānaṁ suciṇṇaṁ atha sīlasaññamaṁ
Kenūpapannā sugatiṁ yasassinī
devate pucchitācikkha kissa kammassidaṁ phalanti.
Idāni bhante imameva gāmaṁ
piṇḍāya amhākaṁ gharaṁ upāgami
tato te ucchussa adāsiṁ khaṇḍikaṁ
pasannacittā atulāya pītiyā
sassū ca pacchā anuyuñjate mamaṁ
kahannu ucchuṁ vadhuke avākari
na chaḍḍitaṁ na ca khāditaṁ mayā
santassa bhikkhussa sayaṁ adāsihaṁ
tuyhaṁ idaṁ issariyaṁ atho mamaṁ
itissā sassu paribhāsate mamaṁ
pīṭhaṁ gahetvā pahāraṁ adāsi me
tato cutā kālakatamhi devatā
tadeva kammaṁ kusalaṁ kataṁ mayā
sukhañca kammaṁ anubhomi attanā
devehi saddhiṁ paricāriyāmahaṁ
modāmahaṁ kāmaguṇehi pañcahi
tadeva kammaṁ kusalaṁ kataṁ mayā
sukhañca kammaṁ anubhomi attanā
Devindaguttā tidasehi rakkhitā
samappitā kāmaguṇehi pañcahi
etādisaṁ puññaphalaṁ anappakaṁ
mahāvipākā mama ucchudakkhiṇā
devehi saddhiṁ paricāriyāmahaṁ
modāmahaṁ kāmaguṇehi pañcahi
etādisaṁ puññaphalaṁ anappakaṁ
mahājutikā mama ucchudakkhiṇā
devindaguttā tidasehi rakkhitā
sahassanettoriva nandane vane
tuvañca bhante anukampakaṁ viduṁ
upecca vandiṁ kusalañca pucchiyā
tato te ucchussa adāsiṁ khaṇḍikaṁ
pasannacittā atulāya pītiyāti.
Ucchuvimānaṁ dutiyaṁ.

[31] 3 Pallaṅkaseṭṭhe maṇisovaṇṇacitte
pupphābhikiṇṇe sayane uḷāre
tatthacchasi devi mahānubhāve
uccāvacā iddhivikubbamānā
imā ca te accharāyo samantato
Naccanti gāyanti pamodayanti
deviddhipattāsi mahānubhāve
manussabhūtā kimakāsi puññaṁ
kenāsi evañjalitānubhāvā
vaṇṇo ca te sabbadisā pabhāsatita.
Ahaṁ manussesu manussabhūtā
aḍḍhe kule suṇisā ahosiṁ
akkodhanā bhattu vasānuvattinī
appamattā uposathe
manussabhūtā daharā apāpikā
pasannacittā patimābhirādhayiṁ
divā ca ratto ca manāpacārinī
ahaṁ pure sīlavatī ahosiṁ
pāṇātipātā viratā acoriyā
saṁsuddhakāyā sucibrahmacārinī
amajjapānā ca musā abhāṇī
sikkhāpadesu paripūrakārinī
cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca pasannamānasā ahaṁ
aṭṭhaṅgupetaṁ anudhammacārinī
Uposathaṁ pītimanā upāvasiṁ
imañca ariyaṁ aṭṭhaṅgavarehupetaṁ
samādayitvā kusalaṁ sukhudrayaṁ
patimhi kalyāṇavasānuvattinī
ahosiṁ pubbe sugatassa sāvikā
etādisaṁ kusalaṁ jīvaloke
kammaṁ karitvāna visesabhāginī
kāyassa bhedā abhisamparāyaṁ
deviddhipattā sugatimhi āgatā
vimānapāsādavare manorame
parivāritā accharāsaṅgaṇena
sayampabhā devagaṇā ramanti maṁ
dīghāyukiṁ devavimānamāgatanti.
Pallaṅkavimānaṁ tatiyaṁ.