[30] Uddiṭṭhā kho ayyāyo aṭṭha pārājikā dhammā yesaṁ
bhikkhunī aññataraṁ vā aññataraṁ vā āpajjitvā na labhati bhikkhunīhi
saddhiṁ saṁvāsaṁ yathā pure tathā pacchā pārājikā hoti
asaṁvāsā. Tatthayyāyo pucchāmi kaccittha parisuddhā. Dutiyampi
pucchāmi kaccittha parisuddhā. Tatiyampi pucchāmi kaccittha
parisuddhā. Parisuddhetthayyāyo tasmā tuṇhī. Evametaṁ
dhārayāmīti.
Pārājikakaṇḍaṁ niṭṭhitaṁ.
Sattarasakaṇḍaṁ
ime kho panayyāyo sattarasa saṅghādisesā dhammā uddesaṁ āgacchanti.
Paṭhamasaṅghādisesaṁ

[31] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññataro
upāsako bhikkhunīsaṅghassa uddositaṁ datvā kālakato hoti. Tassa
dve puttā honti eko assaddho appasanno eko saddho
pasanno. Te pettikaṁ sāpateyyaṁ vibhajiṁsu. Athakho so assaddho
appasanno taṁ saddhaṁ pasannaṁ etadavoca amhākaṁ uddosito taṁ
bhājemāti 1 . Evaṁ vutte so saddho pasanno taṁ assaddhaṁ appasannaṁ
etadavoca māyyo evaṁ avaca amhākaṁ pitunā bhikkhunīsaṅghassa
dinnoti. Dutiyampi kho assaddho appasanno taṁ saddhaṁ pasannaṁ
etadavoca amhākaṁ uddosito taṁ bhājemāti. Athakho so
saddho pasanno taṁ assaddhaṁ appasannaṁ etadavoca māyyo evaṁ
avaca amhākaṁ pitunā bhikkhunīsaṅghassa dinnoti. Tatiyampi kho
so assaddho appasanno taṁ saddhaṁ pasannaṁ etadavoca amhākaṁ
uddosito taṁ bhājemāti. Athakho so saddho pasanno sace
1 Ma. Yu. bhājāmāti.
Mayhaṁ bhavissati ahaṁpi bhikkhunīsaṅghassa dassāmīti taṁ assaddhaṁ
appasannaṁ etadavoca bhājemāti. Athakho so uddosito tehi
bhājiyamāno tassa assaddhassa appasannassa pāpuṇi 1 . Athakho so
assaddho appasanno bhikkhuniyo upasaṅkamitvā etadavoca nikkhamathayye
amhākaṁ uddositoti. Evaṁ vutte thullanandā bhikkhunī
taṁ purisaṁ etadavoca māyyo evaṁ avaca tumhākaṁ pitunā bhikkhunīsaṅghassa
dinnoti. Dinno na dinnoti vohārike mahāmatte
pucchiṁsu. Mahāmattā evamāhaṁsu ko ayye jānāti bhikkhunīsaṅghassa
dinnoti. Evaṁ vutte thullanandā bhikkhunī te mahāmatte
etadavoca apinvayyā 2 tumhehi diṭṭhaṁ vā sutaṁ vā sakkhiṁ ṭhapayitvā
dānaṁ dīyamānanti. Athakho te mahāmattā saccaṁ kho ayyā
āhāti taṁ uddositaṁ bhikkhunīsaṅghassa akaṁsu. Athakho so puriso
parājito ujjhāyati khīyati vipāceti assamaṇiyo imā muṇḍā
bandhakiniyo kathaṁ hi nāma amhākaṁ uddositaṁ acchinnāpessantīti.
Thullanandā bhikkhunī mahāmattānaṁ etamatthaṁ ārocesi. Mahāmattā
taṁ purisaṁ daṇḍāpesuṁ. Athakho so puriso daṇḍito 3
bhikkhunūpassayassa avidūre ājīvakaseyyaṁ kārāpetvā ājīvake uyyojesi
etā bhikkhuniyo accāvadathāti. Thullanandā bhikkhunī mahāmattānaṁ
etamatthaṁ ārocesi. Mahāmattā taṁ purisaṁ bandhāpesuṁ. Manussā
1 Ma. Yu. pāpuṇāti. 2 Ma. Yu. apinayyo. 3 Ma. Yu. daṇḍiko.
Ujjhāyanti khīyanti vipācenti paṭhamaṁ 1 hi nāma bhikkhuniyo uddositaṁ
acchindāpesuṁ dutiyampi daṇḍāpesuṁ tatiyampi bandhāpesuṁ idāni
ghātāpessantīti. Assosuṁ kho bhikkhuniyo tesaṁ manussānaṁ ujjhāyantānaṁ
khīyantānaṁ vipācentānaṁ. Yā tā bhikkhuniyo appicchā
.pe. Tā ujjhāyanti khīyanti vipācenti kathaṁ hi nāma ayyā
thullanandā usuyyavādikā viharissatīti. Athakho tā bhikkhuniyo
bhikkhūnaṁ etamatthaṁ ārocesuṁ .pe. Saccaṁ kira bhikkhave thullanandā
bhikkhunī usuyyavādikā viharatīti. Saccaṁ bhagavāti. Vigarahi buddho
bhagavā kathaṁ hi nāma bhikkhave thullanandā bhikkhunī usuyyavādikā
viharissati netaṁ bhikkhave appasannānaṁ vā pasādāya .pe. Evañca
pana bhikkhave bhikkhuniyo imaṁ sikkhāpadaṁ uddisantu yā pana
bhikkhunī usuyyavādikā vihareyya gahapatinā vā gahapatiputtena vā
dāsena vā kammakarena 2 vā antamaso samaṇaparibbājakenāpi
ayaṁ bhikkhunī paṭhamāpattikaṁ dhammaṁ āpannā nissāraṇīyaṁ
saṅghādisesanti.

[32] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Usuyyavādikā nāma aṭṭakārikā
vuccati. Gahapati nāma yo koci agāraṁ ajjhāvasati. Gahapatiputto
nāma ye keci 3 puttabhātaro. Dāso nāma antojāto dhanakkīto
1 Yu. kathaṁ. Ma. paṭhmaṁ bhikkhuniyo ... dutiyaṁ ... tatiyaṁ ....
2 Ma. Yu. kammakārena. 3 Ma. Yu. yo koci.
Karamarānīto. Kammakaro 1 nāma bhaṭako āhaṭako. Samaṇaparibbājako
nāma bhikkhuñca bhikkhuniñca sikkhamānañca sāmaṇerañca sāmaṇeriñca
ṭhapetvā yo koci paribbājakasamāpanno. Aṭṭaṁ karissāmīti dutiyaṁ
vā pariyesati gacchati vā āpatti dukkaṭassa ekassa āroceti
āpatti dukkaṭassa dutiyassa āroceti āpatti thullaccayassa
aṭṭapariyosāne āpatti saṅghādisesassa.

[33] Paṭhamāpattikanti saha vatthujjhācārā āpajjati
asamanubhāsanāya. Nissāraṇīyanti saṅghamhā nissāriyati. Saṅghādisesoti 2
saṅgho va tassā āpattiyā mānattaṁ deti mūlāya paṭikassati abbheti
na sambahulā bhikkhuniyo 3 na ekā bhikkhunī tena vuccati
saṅghādisesoti. Tasseva āpattinikāyassa nāma kammaṁ adhivacanaṁ
tenapi vuccati saṅghādisesoti.

[34] Anāpatti manussehi ākaḍḍhiyamānā gacchati ārakkhaṁ
yācati anodissa ācikkhati ummattikāya ādikammikāyāti.
Dutiyasaṅghādisesaṁ

[35] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena vesāliyaṁ
aññatarassa licchavissa pajāpatī aticārinī hoti. Athakho so
1 Ma. Yu. kammakāro. 2 Ma. Yu. saṅghādisesanti. 3 Ma. Yu. bhikkhuniyoti na
dissati.
Licchavī taṁ itthiṁ etadavoca sādhu viramāhi anatthaṁ kho te
karissāmīti 1 . Evaṁpi 2 sā vuccamānā na ādiyi. Tena kho pana
samayena vesāliyaṁ 3 licchavigaṇo sannipatito hoti kenacideva karaṇīyena.
Athakho so licchavī te licchavino etadavoca ekaṁ me ayyā 4
itthiṁ anujānāthāti. Kā nāma sāti. Mayhaṁ pajāpatī aticarati
taṁ ghātessāmīti. Jānāhīti. Assosi kho sā itthī sāmiko
kira maṁ ghātetukāmoti varabhaṇḍaṁ ādāya sāvatthiṁ gantvā titthiye
upasaṅkamitvā pabbajjaṁ yāci. Titthiyā na icchiṁsu pabbājetuṁ.
Bhikkhuniyo upasaṅkamitvā pabbajjaṁ yāci. Bhikkhuniyopi na icchiṁsu
pabbājetuṁ. Thullanandaṁ bhikkhuniṁ upasaṅkamitvā bhaṇḍakaṁ dassetvā
pabbajjaṁ yāci. Thullanandā bhikkhunī bhaṇḍakaṁ gahetvā pabbājesi.
Athakho so licchavī taṁ itthiṁ gavesanto sāvatthiṁ gantvā bhikkhunīsu
pabbajitaṁ disvā 5 yena rājā pasenadi kosalo tenupasaṅkami
upasaṅkamitvā rājānaṁ pasenadiṁ kosalaṁ etadavoca pajāpatī me
deva varabhaṇḍaṁ ādāya sāvatthiṁ anuppattā taṁ devo anujānātūti.
Tenahi bhaṇe vicinitvā ācikkhāti. Diṭṭhā deva bhikkhunīsu
pabbajitāti. Sace bhaṇe bhikkhunīsu pabbajitā na sā labbhā
kiñci kātuṁ svākkhāto [6]- dhammo caratu brahmacariyaṁ sammā
dukkhassa antakiriyāyāti. Athakho so licchavī ujjhāyati khīyati
1 Ma. Yu. karissāmāti. 2 Ma. Yu. evaṁ-pi vuccamānā nādiyi. 3 Ma. Yu. vesāliyā.
4 Ma. Yu. ayyo. 5 Ma. Yu. disvāna. 6 Ma. Yu. bhagavatā.
Vipāceti kathaṁ hi nāma bhikkhuniyo coriṁ pabbājessantīti. Assosuṁ
kho bhikkhuniyo tassa licchavissa ujjhāyantassa khīyantassa
vipācentassa. Yā tā bhikkhuniyo appicchā .pe. Tā ujjhāyanti
khīyanti vipācenti kathaṁ hi nāma ayyā thullanandā coriṁ
pabbājessatīti. Athakho tā bhikkhuniyo bhikkhūnaṁ etamatthaṁ ārocesuṁ
.pe. Saccaṁ kira bhikkhave thullanandā bhikkhunī coriṁ pabbājetīti 1 .
Saccaṁ bhagavāti. Vigarahi buddho bhagavā kathaṁ hi nāma bhikkhave
thullanandā bhikkhunī coriṁ pabbājessati netaṁ bhikkhave appasannānaṁ
vā pasādāya .pe. Evañca pana bhikkhave bhikkhuniyo imaṁ sikkhāpadaṁ
uddisantu yā pana bhikkhunī jānaṁ coriṁ vajjhaviditaṁ 2 anapaloketvā
rājānaṁ vā saṅghaṁ vā gaṇaṁ vā pūgaṁ vā seṇiṁ vā aññatra kappā
vuṭṭhāpeyya ayampi bhikkhunī paṭhamāpattikaṁ dhammaṁ āpannā
nissāraṇīyaṁ saṅghādisesanti.

[36] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Jānāti nāma sāmaṁ vā
jānāti aññe vā tassā ārocenti sā vā āroceti.
Coro 3 nāma yā pañcamāsakaṁ vā atirekapañcamāsakaṁ vā agghanakaṁ
adinnaṁ theyyasaṅkhātaṁ ādiyati esā corī nāma. Vajjhā nāma yaṁ
katvā vajjhappattā hoti. Viditā nāma aññehi manussehi ñātā
1 Yu. pabbājesīti. 2 Ma. Yu. vajjhaṁ viditaṁ. 3 Ma. Yu. corī.
Hoti vajjhā esāti. Anapaloketvāti anāpucchā. Rājā
nāma yattha rājā anusāsati rājā apaloketabbo. Saṅgho
nāma bhikkhunīsaṅgho vuccati bhikkhunīsaṅgho apaloketabbo. Gaṇo
nāma yattha gaṇo anusāsati gaṇo apaloketabbo. Pūgo
nāma yattha pūgo anusāsati pūgo apaloketabbo. Seṇi
nāma yattha seṇi anusāsati seṇi apaloketabbo. Aññatra
kappāti ṭhapetvā kappaṁ. Kappaṁ nāma dve kappāni titthiyesu
vā pabbajitā hoti aññāsu vā bhikkhunīsu pabbajitā. Aññatra
kappā vuṭṭhāpessāmīti gaṇaṁ vā ācariniṁ vā pattaṁ vā cīvaraṁ
vā pariyesati sīmaṁ vā sammannati āpatti dukkaṭassa ñattiyā
dukkaṭaṁ dvīhi kammavācāhi thullaccayā kammavācāpariyosāne
upajjhāyāya āpatti saṅghādisesassa gaṇassa ca ācariniyā ca
āpatti dukkaṭassa.

[37] Ayampīti purimaṁ upādāya vuccati. Paṭhamāpattikanti
saha vatthujjhācārā āpajjati asamanubhāsanāya. Nissāraṇīyanti
saṅghamhā nissāriyati. Saṅghādisesoti .pe. Tenapi vuccati
saṅghādisesoti 1 .

[38] Coriyā corīsaññā aññatra kappā vuṭṭhāpeti
āpatti saṅghādisesassa. Coriyā vematikā aññatra kappā
vuṭṭhāpeti āpatti dukkaṭassa. Coriyā acorīsaññā aññatra
1 Ma. Yu. saṅghādisesanti.
Kappā vuṭṭhāpeti anāpatti. Acoriyā corīsaññā āpatti
dukkaṭassa. Acoriyā vematikā āpatti dukkaṭassa. Acoriyā
acorīsaññā anāpatti.

[39] Anāpatti ajānantī vuṭṭhāpeti apaloketvā vuṭṭhāpeti
kappakataṁ vuṭṭhāpeti ummattikāya ādikammikāyāti.
-------
Tatiyasaṅghādisesaṁ