[20] Sā bhikkhunīti yā sā ukkhittānuvattikā bhikkhunī. Bhikkhunīhīti
aññāhi bhikkhunīhi. Yā passanti yā suṇanti tāhi vattabbā
eso kho ayye bhikkhu samaggena saṅghena ukkhitto dhammena vinayena
satthusāsanena anādaro appaṭikāro akatasahāyo māyye etaṁ
1-2-3 marammayuropiyapotthakesu ime pāṭhā tatiyāvibhattivasena katā.
4 Ma. Yu. gaṇaṁ vā. 5 so yaṁdiṭṭhikoti evaṁ kammena bhavitabbaṁ.
Bhikkhuṁ anuvattīti. Dutiyampi vattabbā tatiyampi vattabbā. Sace
paṭinissajjati iccetaṁ kusalaṁ no ce paṭinissajjati āpatti
dukkaṭassa. Sutvā na vadanti āpatti dukkaṭassa. Sā bhikkhunī
saṅghamajjhaṁpi ākaḍḍhitvā vattabbā eso kho ayye bhikkhu
samaggena saṅghena ukkhitto dhammena vinayena satthusāsanena anādaro
appaṭikāro akatasahāyo māyye etaṁ bhikkhuṁ anuvattīti. Dutiyampi
vattabbā tatiyampi vattabbā. Sace paṭinissajjati iccetaṁ kusalaṁ
no ce paṭinissajjati āpatti dukkaṭassa.

[21] Sā bhikkhunī samanubhāsitabbā. Evañca pana bhikkhave
samanubhāsitabbā. Byattāya bhikkhuniyā paṭibalāya saṅgho ñāpetabbo
suṇātu me ayye saṅgho ayaṁ itthannāmā bhikkhunī samaggena saṅghena
ukkhittaṁ bhikkhuṁ dhammena vinayena satthusāsanena anādaraṁ appaṭikāraṁ
akatasahāyaṁ tamanuvattati sā taṁ vatthuṁ nappaṭinissajjati. Yadi saṅghassa
pattakaslaṁ saṅgho itthannāmaṁ bhikkhuniṁ samanubhāseyya tassa vatthussa
paṭinissaggāya. Esā ñatti. Suṇātu me ayye saṅgho ayaṁ
itthannāmā bhikkhunī samaggena saṅghena ukkhittaṁ bhikkhuṁ dhammena vinayena
satthusāsanena anādaraṁ appaṭikāraṁ akatasahāyaṁ tamanuvattati sā taṁ
vatthuṁ nappaṭinissajjati. Saṅgho itthannāmaṁ bhikkhuniṁ samanubhāsati tassa
vatthussa paṭinissaggāya. Yassā ayyāya khamati itthannāmāya
bhikkhuniyā samanubhāsanā tassa vatthussa paṭinissaggāya sā tuṇhassa
Yassā nakkhamati sā bhāseyya. Dutiyampi etamatthaṁ vadāmi
.pe. Tatiyampi etamatthaṁ vadāmi .pe. Samanubhaṭṭhā saṅghena
itthannāmā bhikkhunī tassa vatthussa paṭinissaggāya. Khamati saṅghassa
tasmā tuṇhī. Evametaṁ dhārayāmīti.

[22] Ñattiyā dukkaṭaṁ dvīhi kammavācāhi thullaccayā
kammavācāpariyosāne āpatti pārājikassa.

[23] Ayampīti purimāyo upādāya vuccati. Pārājikā hotīti
seyyathāpi nāma puthusilā dvedhā bhinnā appaṭisandhikā hoti
evameva bhikkhunī yāvatatiyaṁ samanubhāsiyamānā appaṭinissajjantī
assamaṇī hoti asakyadhītā tena vuccati pārājikā hotīti.
Asaṁvāsāti saṁvāso nāma ekakammaṁ ekuddeso samasikkhātā eso
saṁvāso nāma so tāya saddhiṁ natthi tena vuccati asaṁvāsāti.

[24] Dhammakamme dhammakammasaññā nappaṭinissajjati āpatti
pārājikassa. Dhammakamme vematikā nappaṭinissajjati āpatti
pārājikassa. Dhammakamme adhammakammasaññā nappaṭinissajjati
āpatti pārājikassa. Adhammakamme dhammakammasaññā āpatti
dukkaṭassa. Adhammakamme vematikā āpatti dukkaṭassa. Adhammakamme
adhammakammasaññā āpatti dukkaṭassa.

[25] Anāpatti asamanubhāsantiyā paṭinissajjantiyā ummattikāya
ādikammikāyāti.
Tatiyapārājikaṁ niṭṭhitaṁ.
Catutthapārājikaṁ

[26] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhuniyo [1]- avassutassa purisapuggalassa hatthagahaṇaṁpi sādiyanti
saṅghāṭikaṇṇagahaṇaṁpi sādiyanti santiṭṭhantipi sallapantipi saṅketaṁpi
gacchanti purisassapi abbhāgamanaṁ sādiyanti channaṁpi anupavisanti kāyaṁpi
tadatthāya upasaṁharanti etassa asaddhammassa paṭisevanatthāya.
Yā tā bhikkhuniyo appicchā .pe. Tā ujjhāyanti khīyanti
vipācenti kathaṁ hi nāma chabbaggiyā bhikkhuniyo avassutā avassutassa
purisapuggalassa hatthagahaṇaṁpi sādiyissanti saṅghāṭikaṇṇagahaṇaṁpi
sādiyissanti santiṭṭhissantipi 2 sallapissantipi saṅketaṁpi gacchissanti
purisassapi abbhāgamanaṁ sādiyissanti channaṁpi anupavisissanti kāyaṁpi
tadatthāya upasaṁharissanti etassa asaddhammassa paṭisevanatthāyāti
.pe. Saccaṁ kira bhikkhave chabbaggiyā bhikkhuniyo avassutā
avassutassa purisapuggalassa hatthagahaṇaṁpi sādiyanti saṅghāṭikaṇṇagahaṇaṁpi
sādiyanti santiṭṭhantipi sallapantipi saṅketaṁpi gacchanti purisassapi
abbhāgamanaṁ sādiyanti channaṁpi anupavisanti kāyaṁpi tadatthāya
upasaṁharanti etassa asaddhammassa paṭisevanatthāyāti. Saccaṁ bhagavāti.
1 Ma. avassutā. 2 saṇṭhassantipīti amhākaṁ mati.
Vigarahi buddho bhagavā kathaṁ hi nāma bhikkhave chabbaggiyā bhikkhuniyo
avassutā avassutassa purisapuggalassa hatthagahaṇaṁpi sādiyissanti
saṅghāṭikaṇṇagahaṇaṁpi sādiyissanti santiṭṭhissantipi sallapissantipi
saṅketaṁpi gacchanti purisassapi abbhāgamanaṁ sādiyissanti channaṁpi
anupavisissanti kāyaṁpi tadatthāya upasaṁharissanti etassa asaddhammassa
paṭisevanatthāya netaṁ bhikkhave appasannānaṁ vā pasādāya .pe.
Evañca pana bhikkhave bhikkhuniyo imaṁ sikkhāpadaṁ uddisantu yā
pana bhikkhunī avassutā avassutassa purisapuggalassa hatthagahaṇaṁ vā
sādiyeyya saṅghāṭikaṇṇagahaṇaṁ vā sādiyeyya santiṭṭheyya vā
sallapeyya vā saṅketaṁ vā gaccheyya purisassa vā abbhāgamanaṁ
sādiyeyya channaṁ vā anupaviseyya kāyaṁ vā tadatthāya upasaṁhareyya
etassa asaddhammassa paṭisevanatthāya ayampi pārājikā hoti
asaṁvāsā aṭṭhavatthukāti.

[27] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Avassutā nāma sārattā
apekkhavatī 1 paṭibaddhacittā. Avassuto nāma sāratto apekkhavā
paṭibaddhacitto. Purisapuggalo nāma manussapuriso na yakkho na
peto na tiracchānagato viññū paṭibalo kāyasaṁsaggaṁ samāpajjituṁ.
1 Ma. Yu. apekkhavā.
Hatthagahaṇaṁ vā sādiyeyyāti hattho nāma kappuraṁ upādāya yāva
agganakhā. Etassa asaddhammassa paṭisevanatthāya ubbhakkhakaṁ
adhojānumaṇḍalaṁ gahaṇaṁ sādiyati āpatti thullaccayassa. Saṅghāṭikaṇṇagahaṇaṁ
vā sādiyeyyāti etassa asaddhammassa paṭisevanatthāya
nivatthaṁ vā pārutaṁ vā gahaṇaṁ sādiyati āpatti thullaccayassa.
Santiṭṭheyya vāti etassa asaddhammassa paṭisevanatthāya
purisassa hatthapāse tiṭṭhati āpatti thullaccayassa. Sallapeyya
vāti etassa asaddhammassa paṭisevanatthāya purisassa hatthapāse
ṭhitā sallapati āpatti thullaccayassa. Saṅketaṁ vā gaccheyyāti
etassa asaddhammassa paṭisevanatthāya purisena itthannāmaṁ okāsaṁ
āgacchāti vuttā gacchati pade pade āpatti dukkaṭassa
purisassa hatthapāsaṁ okkantamatte āpatti thullaccayassa. Purisassa
vā abbhāgamanaṁ sādiyeyyāti etassa asaddhammassa paṭisevanatthāya
purisassa abbhāgamanaṁ sādiyati āpatti dukkaṭassa hatthapāsaṁ
okkantamatte āpatti thullaccayassa. Channaṁ vā anupaviseyyāti
etassa asaddhammassa paṭisevanatthāya yena kenaci paṭicchannaṁ
okāsaṁ paviṭṭhamatte āpatti thullaccayassa. Kāyaṁ vā tadatthāya
upasaṁhareyyāti etassa asaddhammassa paṭisevanatthāya purisassa hatthapāse
ṭhitā kāyaṁ upasaṁharati āpatti thullaccayassa.

[28] Ayampīti purimāyo upādāya vuccati. Pārājikā hotīti
Seyyathāpi nāma tālo matthakacchinno abhabbo punaviruḷhiyā evameva
bhikkhunī aṭṭhamaṁ vatthuṁ paripūrentī assamaṇī hoti asakyadhītā tena
vuccati pārājikā hotīti. Asaṁvāsāti saṁvāso nāma ekakammaṁ
ekuddeso samasikkhātā eso saṁvāso nāma so tāya saddhiṁ
natthi tena vuccati asaṁvāsāti.

[29] Anāpatti asañcicca asatiyā ajānantiyā asādiyantiyā
ummattikāya khittacittāya vedanaṭṭāya ādikammikāyāti.
Catutthapārājikaṁ niṭṭhitaṁ.
---------