[10] Ubbhakkhakaṁ adhojānumaṇḍalaṁ kāyena kāyaṁ āmasati
āpatti dukkaṭassa. Kāyena kāyapaṭibaddhaṁ āmasati āpatti
dukkaṭassa. Kāyapaṭibaddhena kāyaṁ āmasati āpatti dukkaṭassa.
Kāyapaṭibaddhena kāyapaṭibaddhaṁ āmasati āpatti dukkaṭassa.
Nissaggiyena kāyaṁ āmasati āpatti dukkaṭassa. Nissaggiyena
Kāyapaṭibaddhaṁ āmasati āpatti dukkaṭassa. Nissaggiyena nissaggiyaṁ
āmasati āpatti dukkaṭassa.

[11] Anāpatti asañcicca asatiyā ajānantiyā asādiyantiyā
ummattikāya khittacittāya vedanaṭṭāya ādikammikāyāti.
Paṭhamapārājikaṁ niṭṭhitaṁ.
----------
Dutiyapārājikaṁ

[12] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena sundarīnandā
bhikkhunī sāḷhena migāranattunā gabbhinī hoti. Yāva gabbho taruṇo
ahosi tāva chādesi. Paripakke gabbhe vibbhamitvā vijāyi. Bhikkhuniyo
thullanandaṁ bhikkhuniṁ etadavocuṁ sundarīnandā kho ayye aciravibbhantā
vijātā kacci no sā bhikkhunīyeva samānā gabbhinīti.
Evaṁ ayyeti. Kissa pana tvaṁ ayye jānaṁ pārājikaṁ dhammaṁ
ajjhāpannaṁ bhikkhuniṁ neva attanā paṭicodesi na gaṇassa ārocesīti.
Yo etissā avaṇṇo mayheso avaṇṇo yā etissā
akitti mayhesā akitti yo etissā ayaso mayheso
ayaso yo etissā alābho mayheso alābho kyāhaṁ ayye
attano avaṇṇaṁ attano akittiṁ attano ayasaṁ attano alābhaṁ
paresaṁ ārocessāmīti. Yā tā bhikkhuniyo appicchā .pe.
Tā ujjhāyanti khīyanti vipācenti kathaṁ hi nāma ayyā thullanandā
jānaṁ pārājikaṁ dhammaṁ ajjhāpannaṁ bhikkhuniṁ neva attanā
paṭicodessati na gaṇassa ārocessatīti. Athakho tā bhikkhuniyo
bhikkhūnaṁ etamatthaṁ ārocesuṁ. Bhikkhū bhagavato etamatthaṁ ārocesuṁ.
Athakho bhagavā etasmiṁ nidāne etasmiṁ pakaraṇe bhikkhusaṅghaṁ
Sannipātāpetvā dhammiṁ kathaṁ katvā bhikkhū paṭipucchi saccaṁ kira bhikkhave
thullanandā bhikkhunī jānaṁ pārājikaṁ dhammaṁ ajjhāpannaṁ bhikkhuniṁ neva
attanā paṭicodeti 1 na gaṇassa ārocetīti 2 . Saccaṁ bhagavāti.
Vigarahi buddho bhagavā kathaṁ hi nāma bhikkhave thullanandā bhikkhunī
jānaṁ pārājikaṁ dhammaṁ ajjhāpannaṁ bhikkhuniṁ neva attanā
paṭicodessati na gaṇassa ārocessati netaṁ bhikkhave appasannānaṁ vā
pasādāya pasannānaṁ vā bhiyyobhāvāya athakhvetaṁ 3 bhikkhave
appasannānañceva appasādāya pasannānañca ekaccānaṁ aññathattāyāti
.pe. Evañca pana bhikkhave bhikkhuniyo imaṁ sikkhāpadaṁ
uddisantu yā pana bhikkhunī jānaṁ pārājikaṁ dhammaṁ ajjhāpannaṁ
bhikkhuniṁ neva attanā paṭicodeyya na gaṇassa āroceyya yadā
ca sā ṭhitā vā assa cutā vā nāsitā vā avasaṭā 4 vā sā
pacchā evaṁ vadeyya pubbe vāhaṁ ayye saññāsiṁ etaṁ bhikkhuniṁ
evarūpā ca evarūpā ca sā bhaginīti no ca kho attanā
paṭicodessaṁ na gaṇassa ārocessanti ayampi pārājikā
hoti asaṁvāsā vajjapaṭicchādikāti 5 .

[13] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Jānāti nāma sāmaṁ vā jānāti
1 Ma. Yu. paṭicodesi. 2 Ma. Yu. ārocesīti. 3 Ma. athakho taṁ. 4 Ma.
avassaṭā. 5 vajjappaṭicchādikāti amhākaṁ mati.
Aññe vā tassā ārocenti sā vā āroceti. Pārājikaṁ dhammaṁ
ajjhāpannanti aṭṭhannaṁ pārājikānaṁ aññataraṁ pārājikaṁ ajjhāpannaṁ.
Neva attanā paṭicodeyyāti na sayaṁ codeyya. Na gaṇassa
āroceyyāti na aññāsaṁ bhikkhunīnaṁ āroceyya.

[14] Yadā 1 ca sā ṭhitā vā assāti ṭhitā nāma saliṅge
ṭhitā vuccati. Cutā nāma kālakatā 2 vuccati. Nāsitā nāma
sayaṁ vā vibbhantā hoti aññehi 3 vā nāsitā. Avasaṭā nāma
titthāyatanaṁ saṅkantā vuccati.

[15] Sā pacchā evaṁ vadeyya pubbe vāhaṁ ayye aññāsiṁ
etaṁ bhikkhuniṁ evarūpā ca evarūpā ca sā bhaginīti. No ca kho
attanā paṭicodessanti 4 na sayaṁ codessaṁ. Na gaṇassa ārocessanti 5
na aññāsaṁ bhikkhunīnaṁ ārocessaṁ 6 .

[16] Ayampīti purimāyo upādāya vuccati. Pārājikā hotīti
seyyathāpi nāma paṇḍupalāso bandhanā pamutto abhabbo
haritattāya evameva bhikkhunī jānaṁ pārājikaṁ dhammaṁ ajjhāpannaṁ
bhikkhuniṁ neva attanā paṭicodessāmi na gaṇassa ārocessāmīti
dhuraṁ nikkhittamatte assamaṇī hoti asakyadhītā tena vuccati
1 Ma. Yu. yadā ca sā ṭhitā vā assa cutā vāti ṭhitā nāma. 2 Ma. Yu. kālaṁkatā.
3 aññāhīti amhākaṁ khanti. 4 Ma. Yu. paṭicodeyyanti sayaṁ vā na codeyyaṁ.
5 Ma. Yu. āroceyyanti. 6 Ma. Yu. āroceyyaṁ.
Pārājikā hotīti. Asaṁvāsāti saṁvāso nāma ekakammaṁ ekuddeso
samasikkhātā eso saṁvāso nāma so tāya saddhiṁ natthi tena
vuccati asaṁvāsāti.

[17] Anāpatti saṅghassa bhaṇḍanaṁ vā kalaho vā viggaho vā
vivādo vā bhavissatīti nāroceti saṅghabhedo vā saṅgharāji vā
bhavissatīti nāroceti ayaṁ kakkhalā pharusā jīvitantarāyaṁ vā
brahmacariyantarāyaṁ vā karissatīti nāroceti aññā paṭirūpā
bhikkhuniyo apassantī nāroceti na chādetukāmā nāroceti
paññāyissati sakena kammenāti nāroceti ummattikāya
ādikammikāyāti.
Dutiyapārājikaṁ niṭṭhitaṁ.
--------
Tatiyapārājikaṁ

[18] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā bhikkhunī
samaggena saṅghena ukkhittaṁ ariṭṭhaṁ bhikkhuṁ gandhabādhipubbaṁ 1 anuvattati.
Yā tā bhikkhuniyo appicchā .pe. Tā ujjhāyanti khīyanti
vipācenti kathaṁ hi nāma ayyā thullanandā samaggena saṅghena
ukkhittaṁ ariṭṭhaṁ bhikkhuṁ gandhabādhipubbaṁ anuvattissatīti .pe.
Saccaṁ kira bhikkhave thullanandā bhikkhunī samaggena saṅghena ukkhittaṁ
ariṭṭhaṁ gandhabādhipubbaṁ anuvattatīti. Saccaṁ bhagavāti. Vigarahi
buddho bhagavā kathaṁ hi nāma bhikkhave thullanandā bhikkhunī samaggena
saṅghena ukkhittaṁ ariṭṭhaṁ gandhabādhipubbaṁ anuvattissati netaṁ bhikkhave
appasannānaṁ vā pasādāya .pe. Evañca pana bhikkhave
bhikkhuniyo imaṁ sikkhāpadaṁ uddisantu yā pana bhikkhunī samaggena
saṅghena ukkhittaṁ bhikkhuṁ dhammena vinayena satthusāsanena anādaraṁ
appaṭikāraṁ akatasahāyaṁ tamanuvatteyya sā bhikkhunī bhikkhunīhi
evamassa vacanīyā eso kho ayye bhikkhu samaggena saṅghena
ukkhitto dhammena vinayena satthusāsanena anādaro appaṭikāro
akatasahāyo māyye etaṁ bhikkhuṁ anuvattīti evañca sā bhikkhunī
bhikkhunīhi vuccamānā tatheva paggaṇheyya sā bhikkhunī bhikkhunīhi
1 Ma. Yu. gaddhabādhipubbaṁ. sabbattha evaṁ ñātabbaṁ.
Yāvatatiyaṁ samanubhāsitabbā tassa paṭinissaggāya yāvatatiyañce
samanubhāsiyamānā taṁ paṭinissajjeyya iccetaṁ kusalaṁ no ce
paṭinissajjeyya ayampi pārājikā hoti asaṁvāsā ukkhittānuvattikāti.

[19] Yā panāti yā yādisā .pe. Ayaṁ imasmiṁ atthe
adhippetā bhikkhunīti. Samaggo nāma saṅgho samānasaṁvāsako samānasīmāyaṁ
ṭhito. Ukkhitto nāma āpattiyā adassane 1 vā appaṭikamme 2
vā appaṭinissagge 3 vā ukkhitto. Dhammena vinayenāti
yena dhammena yena vinayena. Satthusāsanenāti jinasāsanena buddhasāsanena.
Anādaro nāma saṅghaṁ vā [4]- puggalaṁ vā kammaṁ vā nādiyati.
Appaṭikāro nāma ukkhitto anosārito. Akatasahāyo nāma
samānasaṁvāsakā bhikkhū vuccanti sahāyā so tehi saddhiṁ natthi
tena vuccati akatasahāyoti. Tamanuvatteyyāti yaṁdiṭṭhiko so 5
hoti yaṁkhantiko yaṁruciko sāpi taṁdiṭṭhikā hoti taṁkhantikā taṁrucikā.