[872] Tadāpi me bhikkhave amanāpā nīce āsane nisīditvā
ucce āsane nisinnassa mantaṁ vācetuṁ kimaṅgaṁ pana etarahi na
amanāpā bhavissati nīce āsane nisīditvā ucce āsane nisinnassa
dhammaṁ desetuṁ netaṁ bhikkhave appasannānaṁ vā pasādāya pasannānaṁ
vā bhiyyobhāvāya .pe. Evañca pana bhikkhave imaṁ sikkhāpadaṁ
uddiseyyātha na nīce āsane nisīditvā ucce āsane nisinnassa
agilānassa dhammaṁ desessāmīti sikkhā karaṇīyā.
Na nīce āsane nisīditvā ucce āsane nisinnassa agilānassa
dhammo desetabbo. Yo anādariyaṁ paṭicca nīce āsane nisīditvā
ucce āsane nisinnassa agilānassa dhammaṁ deseti āpatti
dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[873] Sāvatthīnidānaṁ. Tena kho pana samayena chabbaggiyā
bhikkhū ṭhitā nisinnassa dhammaṁ desenti .pe. Na ṭhito nisinnassa
agilānassa dhammaṁ desessāmīti sikkhā karaṇīyā.
Na ṭhitena nisinnassa agilānassa dhammo desetabbo. Yo
anādariyaṁ paṭicca ṭhito nisinnassa agilānassa dhammaṁ deseti āpatti
dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[874] Sāvatthīnidānaṁ. Tena kho pana samayena chabbaggiyā
bhikkhū pacchato gacchantā purato gacchantassa dhammaṁ desenti .pe.
Na pacchato gacchanto purato gacchantassa agilānassa dhammaṁ
desessāmīti sikkhā karaṇīyā.
Na pacchato gacchantena purato gacchantassa agilānassa dhammo
desetabbo. Yo anādariyaṁ paṭicca pacchato gacchanto purato
gacchantassa agilānassa dhammaṁ deseti āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[875] Sāvatthīnidānaṁ. Tena kho pana samayena chabbaggiyā
bhikkhū uppathena gacchantā pathena gacchantassa dhammaṁ desenti .pe.
Na uppathena gacchanto pathena gacchantassa agilānassa dhammaṁ
desessāmīti sikkhā karaṇīyā.
Na uppathena gacchantena pathena gacchantassa agilānassa dhammo
desetabbo. Yo anādariyaṁ paṭicca uppathena gacchanto pathena
Gacchantassa agilānassa dhammaṁ deseti āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.
Tayo pakiṇṇakā 1

[876] Sāvatthīnidānaṁ. Tena kho pana samayena chabbaggiyā
bhikkhū ṭhitā uccārampi passāvampi karonti .pe. Na ṭhito
agilāno uccāraṁ vā passāvaṁ vā karissāmīti sikkhā karaṇīyā.
Na ṭhitena agilānena uccāro vā passāvo vā kātabbo.
Yo anādariyaṁ paṭicca ṭhito agilāno uccāraṁ vā passāvaṁ vā karoti
āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[877] Sāvatthīnidānaṁ. Tena kho pana samayena chabbaggiyā
bhikkhū harite uccārampi passāvampi kheḷampi karonti .pe.
Na harite agilāno uccāraṁ vā passāvaṁ vā kheḷaṁ vā karissāmīti
sikkhā karaṇīyā.
Na harite agilānena uccāro vā passāvo vā kheḷo vā
kātabbo. Yo anādariyaṁ paṭicca harite agilāno uccāraṁ vā
passāvaṁ vā kheḷaṁ vā karoti āpatti dukkaṭassa.
1 Ma. idaṁ pāṭhadvayaṁ natthi.
Anāpatti asañcicca asatiyā ajānantassa gilānassa
appaharite kato haritaṁ ottharati āpadāsu ummattakassa
ādikammikassāti.

[878] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū udake uccārampi passāvampi kheḷampi karonti. Manussā
ujjhāyanti khīyanti vipācenti kathaṁ hi nāma samaṇā sakyaputtiyā
udake uccārampi passāvampi kheḷampi karissanti seyyathāpi gihī
kāmabhoginoti. Assosuṁ kho bhikkhū tesaṁ manussānaṁ ujjhāyantānaṁ
khīyantānaṁ vipācentānaṁ. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma chabbaggiyā bhikkhū
udake uccārampi passāvampi kheḷampi karissantīti .pe. Saccaṁ
kira tumhe bhikkhave udake uccārampi passāvampi kheḷampi karothāti.
Saccaṁ bhagavāti. Vigarahi buddho bhagavā kathaṁ hi nāma tumhe
moghapurisā udake uccārampi passāvampi kheḷampi karissatha netaṁ
moghapurisā appasannānaṁ vā pasādāya pasannānaṁ vā bhiyyobhāvāya .pe.
Evañca pana bhikkhave imaṁ sikkhāpadaṁ uddiseyyātha na udake
uccāraṁ vā passāvaṁ vā kheḷaṁ vā karissāmīti sikkhā karaṇīyā.
Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[879] Tena kho pana samayena gilānā bhikkhū udake uccārampi
Passāvampi kheḷampi kātuṁ kukkuccāyanti. Bhagavato etamatthaṁ
ārocesuṁ. Athakho bhagavā etasmiṁ nidāne etasmiṁ pakaraṇe
dhammiṁ kathaṁ katvā bhikkhū āmantesi anujānāmi bhikkhave gilānena
bhikkhunā udake uccārampi passāvampi kheḷampi kātuṁ evañca
pana bhikkhave imaṁ sikkhāpadaṁ uddiseyyātha na udake agilāno
uccāraṁ vā passāvaṁ vā kheḷaṁ vā karissāmīti sikkhā karaṇīyā.
Na udake agilānena uccāro vā passāvo vā kheḷo vā
kātabbo. Yo anādariyaṁ paṭicca udake agilāno uccāraṁ vā
passāvaṁ vā kheḷaṁ vā karoti āpatti dukkaṭassa.
Anāpatti asañcicca asatiyā ajānantassa gilānassa thale
kato udakaṁ ottharati āpadāsu ummattakassa ādikammikassāti.
Pādukāvaggo sattamo.
---------
Uddiṭṭhā kho āyasmanto sekhiyā dhammā. Tatthāyasmante
pucchāmi kaccittha parisuddhā dutiyampi pucchāmi kaccittha parisuddhā
tatiyampi pucchāmi kaccittha parisuddhā parisuddhetthāyasmanto
tasmā tuṇhī. Evametaṁ dhārayāmīti.
[1]-
Sekhiyakaṇḍaṁ niṭṭhitaṁ.
-------
1 Ma. sekhiyā niṭṭhitā.
Adhikaraṇasamathā dhammā

[880] Ime kho panāyasmanto satta adhikaraṇasamathā dhammā
uddesaṁ āgacchanti. Uppannuppannānaṁ adhikaraṇānaṁ samathāya vūpasamāya
sammukhāvinayo dātabbo sativinayo dātabbo amūḷhavinayo dātabbo
paṭiññāya kāretabbaṁ yebhuyyasikā tassa pāpiyasikā tiṇavatthārakoti.
Uddiṭṭhā kho āyasmanto satta adhikaraṇasamathā dhammā.
Tatthāyasmante pucchāmi kaccittha parisuddhā dutiyampi pucchāmi
kaccittha parisuddhā tatiyampi pucchāmi kaccittha parisuddhā
parisuddhetthāyasmanto tasmā tuṇhī. Evametaṁ dhārayāmīti.
Adhikaraṇasamathā dhammā 1 niṭṭhitā.
----------

[881] Uddiṭṭhaṁ kho āyasmanto nidānaṁ uddiṭṭhā cattāro
pārājikā dhammā uddiṭṭhā terasa saṅghādisesā dhammā uddiṭṭhā
dve aniyatā dhammā uddiṭṭhā tiṁsa nissaggiyā pācittiyā dhammā
uddiṭṭhā dvenavuti pācittiyā dhammā uddiṭṭhā cattāro
pāṭidesanīyā dhammā uddiṭṭhā sekhiyā dhammā uddiṭṭhā satta
adhikaraṇasamathā dhammā. Ettakaṁ tassa bhagavato suttāgataṁ
suttapariyāpannaṁ anvaḍḍhamāsaṁ uddesaṁ āgacchati. Tattha sabbeheva
samaggehi sammodamānehi avivadamānehi sikkhitabbanti.
Mahāvibhaṅgo niṭṭhito.
--------
1 Ma. ayaṁ pāṭho natthi.