[862] Sāvatthīnidānaṁ. Tena kho pana samayena chabbaggiyā
bhikkhū pādukārūḷhassa dhammaṁ desenti .pe. Na pādukārūḷhassa
agilānassa dhammaṁ desessāmīti sikkhā karaṇīyā.
Na pādukārūḷhassa agilānassa dhammo desetabbo. Yo
anādariyaṁ paṭicca akkantassa vā paṭimukkassa vā omukkassa vā
agilānassa dhammaṁ deseti āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[863] Sāvatthīnidānaṁ. Tena kho pana samayena chabbaggiyā
bhikkhū upāhanārūḷhassa dhammaṁ desenti .pe. Na upāhanārūḷhassa
agilānassa dhammaṁ desessāmīti sikkhā karaṇīyā.
Na upāhanārūḷhassa agilānassa dhammo desetabbo. Yo
anādariyaṁ paṭicca akkantassa vā paṭimukkassa vā omukkassa vā
agilānassa dhammaṁ deseti āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[864] Sāvatthīnidānaṁ. Tena kho pana samayena chabbaggiyā
bhikkhū yānagatassa dhammaṁ desenti .pe. Na yānagatassa agilānassa
dhammaṁ desessāmīti sikkhā karaṇīyā.
Yānaṁ nāma vayhaṁ ratho sakaṭaṁ sandamānikā sivikā pāṭaṅkī.
Na yānagatassa agilānassa dhammo desetabbo. Yo anādariyaṁ
paṭicca yānagatassa agilānassa dhammaṁ deseti āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[865] Sāvatthīnidānaṁ. Tena kho pana samayena chabbaggiyā
bhikkhū sayanagatassa dhammaṁ desenti .pe. Na sayanagatassa agilānassa
dhammaṁ desessāmīti sikkhā karaṇīyā.
Na sayanagatassa agilānassa dhammo desetabbo. Yo anādariyaṁ
paṭicca antamaso chamāyaṁpi 1 nipannassa agilānassa dhammaṁ deseti
āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[866] Sāvatthīnidānaṁ. Tena kho pana samayena chabbaggiyā
bhikkhū pallatthikāya nisinnassa dhammaṁ desenti .pe. Na pallatthikāya
nisinnassa agilānassa dhammaṁ desessāmīti sikkhā karaṇīyā.
Na pallatthikāya nisinnassa agilānassa dhammo desetabbo.
Yo anādariyaṁ paṭicca hatthapallatthikāya vā dussapallatthikāya vā
nisinnassa agilānassa dhammaṁ deseti āpatti dukkaṭassa.
1 Yu. chamāyapi.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[867] Sāvatthīnidānaṁ. Tena kho pana samayena chabbaggiyā bhikkhū
veṭhitasīsassa dhammaṁ desenti .pe. Na veṭhitasīsassa agilānassa
dhammaṁ desessāmīti sikkhā karaṇīyā.
Veṭhitasīso nāma kesantaṁ na dassāpetvā veṭhito hoti.
Na veṭhitasīsassa agilānassa dhammo desetabbo. Yo anādariyaṁ
paṭicca veṭhitasīsassa agilānassa dhammaṁ deseti āpatti dukkaṭassa.
Anāpatti asañcicca asatiyā ajānantassa gilānassa
kesantaṁ vivarāpetvā deseti āpadāsu ummattakassa
ādikammikassāti.

[868] Sāvatthīnidānaṁ. Tena kho pana samayena chabbaggiyā
bhikkhū oguṇṭhitasīsassa dhammaṁ desenti .pe. Na oguṇṭhitasīsassa
agilānassa dhammaṁ desessāmīti sikkhā karaṇīyā.
Oguṇṭhitasīso nāma sasīsaṁ pāruto vuccati. Na oguṇṭhitasīsassa
agilānassa dhammo desetabbo. Yo anādariyaṁ paṭicca oguṇṭhitasīsassa
agilānassa dhammaṁ deseti āpatti dukkaṭassa.
Anāpatti asañcicca asatiyā ajānantassa gilānassa sīsaṁ
vivarāpetvā deseti āpadāsu ummattakassa ādikammikassāti.

[869] Sāvatthīnidānaṁ. Tena kho pana samayena chabbaggiyā
Bhikkhū chamāyaṁ nisīditvā āsane nisinnassa dhammaṁ desenti .pe.
Na chamāyaṁ 1 nisīditvā āsane nisinnassa agilānassa dhammaṁ
desessāmīti sikkhā karaṇīyā.
Na chamāyaṁ nisīditvā āsane nisinnassa agilānassa dhammo
desetabbo. Yo anādariyaṁ paṭicca chamāyaṁ nisīditvā āsane
nisinassa agilānassa dhammaṁ deseti āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[870] Sāvatthīnidānaṁ. Tena kho pana samayena chabbaggiyā
bhikkhū nīce āsane nisīditvā ucce āsane nisinnassa dhammaṁ
desenti. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma chabbaggiyā bhikkhū nīce āsane
nisīditvā ucce āsane nisinnassa dhammaṁ desessantīti .pe.
Saccaṁ kira tumhe bhikkhave nīce āsane nisīditvā ucce āsane
nisinnassa dhammaṁ desethāti. Saccaṁ bhagavāti. Vigarahi buddho
bhagavā kathaṁ hi nāma tumhe moghapurisā nīce āsane nisīditvā
ucce āsane nisinnassa dhammaṁ desessatha netaṁ moghapurisā
appasannānaṁ vā pasādāya pasannānaṁ vā bhiyyobhāvāya .pe.
Vigarahitvā dhammiṁ kathaṁ katvā bhikkhū āmantesi.
1 Yu. chamāya.

[871] Bhūtapubbaṁ bhikkhave bārāṇasiyaṁ aññatarassa chavakassa 1
pajāpati gabbhinī ahosi. Athakho bhikkhave sā chavakī 2 taṁ chavakaṁ
etadavoca gabbhinimhi ayyaputta icchāmi ambaṁ khāditunti. Natthi
ambo 3 akālo ambassāti. Sace na labhissāmi marissāmīti.
Tena kho pana samayena rañño ambo dhuvaphalo hoti. Athakho
bhikkhave so chavako yena so ambo tenupasaṅkami upasaṅkamitvā
taṁ ambaṁ abhirūhitvā nilīno acchi. Athakho bhikkhave rājā purohitena
brāhmaṇena saddhiṁ yena so ambo tenupasaṅkami upasaṅkamitvā
ucce āsane nisīditvā mantaṁ pariyāpuṇāti. Athakho bhikkhave
tassa chavakassa etadahosi yāva adhammiko ayaṁ rājā yatra
hi nāma ucce āsane nisīditvā mantaṁ pariyāpuṇissati ayañca
brāhmaṇo adhammiko yatra hi nāma nīce āsane nisīditvā
ucce āsane nisinnassa mantaṁ vācessati ahañcamhi adhammiko
yohaṁ itthiyā kāraṇā rañño ambaṁ avaharāmi sabbamidaṁ ca 4
parigatanti 5 . Tattheva paripati.
Ubho atthaṁ na jānanti ubho dhammaṁ na passare
yo cāyaṁ mantaṁ vāceti yo cādhammena dhīyati.
Sālīnaṁ odano bhutto sucimaṁsūpasecano
tasmā dhamme na vattāmi dhammo ariyebhi vaṇṇito.
1 Ma. Yu. chapakassa. 2 Ma. Yu. chapakī. evamuparipi. 3 Ma. Yu. ambaṁ.
4 Ma. Yu. carimaṁ. 5 Ma. Yu. katanti.
Dhiratthu taṁ dhanalābhaṁ yasalābhañca brāhmaṇa
yā vutti vinipātena adhammacaraṇena vā.
Paribbaja mahābrahme pacantaññepi pāṇino.
Mā taṁ adhammo ācarito asmā kumbhamivābhidāti.