[852] Sāvatthīnidānaṁ. Tena kho pana samayena chabbaggiyā
bhikkhū hatthanillehakaṁ bhuñjanti .pe. Na hatthanillehakaṁ bhuñjissāmīti
sikkhā karaṇīyā.
Na hatthanillehakaṁ bhuñjitabbaṁ. Yo anādariyaṁ paṭicca
hatthanillehakaṁ bhuñjati āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[853] Sāvatthīnidānaṁ. Tena kho pana samayena chabbaggiyā bhikkhū
pattanillehakaṁ bhuñjanti .pe. Na pattanillehakaṁ bhuñjissāmīti
sikkhā karaṇīyā.
Na pattanillehakaṁ bhuñjitabbaṁ. Yo anādariyaṁ paṭicca
pattanillehakaṁ bhuñjati āpatti dukkaṭassa.
Anāpatti asañcicca asatiyā ajānantassa gilānassa
parittake sese ekato saṅkaḍḍhitvā nillehitvā bhuñjati āpadāsu
ummattakassa ādikammikassāti.

[854] Sāvatthīnidānaṁ. Tena kho pana samayena chabbaggiyā bhikkhū
oṭṭhanillehakaṁ bhuñjanti .pe. Na oṭṭhanillehakaṁ bhuñjissāmīti
sikkhā karaṇīyā.
Na oṭṭhanillehakaṁ bhuñjitabbaṁ. Yo anādariyaṁ paṭicca
oṭṭhanillehakaṁ bhuñjati āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[855] Tena samayena buddho bhagavā bhaggesu viharati suṁsumāragire 1
1 Ma. Yu. susumāragire. evamuparipi.
Bhesakaḷāvane migadāye. Tena kho pana samayena bhikkhū kokanade
pāsāde sāmisena hatthena pānīyathālakaṁ paṭiggaṇhanti. Manussā
ujjhāyanti khīyanti vipācenti kathaṁ hi nāma samaṇā sakyaputtiyā
sāmisena hatthena pānīyathālakaṁ paṭiggahessanti seyyathāpi gihī
kāmabhoginoti. Assosuṁ kho bhikkhū tesaṁ manussānaṁ ujjhāyantānaṁ
khīyantānaṁ vipācentānaṁ. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma bhikkhū sāmisena
hatthena pānīyathālakaṁ paṭiggahessantīti .pe. Saccaṁ kira bhikkhave
bhikkhū sāmisena hatthena pānīyathālakaṁ paṭiggaṇhantīti. Saccaṁ
bhagavāti. Vigarahi buddho bhagavā kathaṁ hi nāma te bhikkhave
moghapurisā sāmisena hatthena pānīyathālakaṁ paṭiggahessanti netaṁ
bhikkhave appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha na
sāmisena hatthena pānīyathālakaṁ paṭiggahessāmīti sikkhā karaṇīyā.
Na sāmisena hatthena pānīyathālako paṭiggahetabbo. Yo
anādariyaṁ paṭicca sāmisena hatthena pānīyathālakaṁ paṭiggaṇhāti
āpatti dukkaṭassa.
Anāpatti asañcicca asatiyā ajānantassa gilānassa
dhovissāmīti vā dhovāpessāmīti vā paṭiggaṇhāti āpadāsu
ummattakassa ādikammikassāti.

[856] Tena samayena buddho bhagavā bhaggesu viharati suṁsumāragire
bhesakaḷāvane migadāye. Tena kho pana samayena bhikkhū kokanade
pāsāde sasitthakaṁ pattadhovanaṁ antaraghare chaḍḍenti. Manussā
ujjhāyanti khīyanti vipācenti kathaṁ hi nāma samaṇā sakyaputtiyā
sasitthakaṁ pattadhovanaṁ antaraghare chaḍḍessanti seyyathāpi gihī
kāmabhoginoti. Assosuṁ kho bhikkhū tesaṁ manussānaṁ ujjhāyantānaṁ
khīyantānaṁ vipācentānaṁ. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma bhikkhū sasitthakaṁ
pattadhovanaṁ antaraghare chaḍḍessantīti. Saccaṁ kira bhikkhave
bhikkhū sasitthakaṁ pattadhovanaṁ antaghare chaḍḍentīti. Saccaṁ bhagavāti.
Vigarahi buddho bhagavā kathaṁ hi nāma te bhikkhave moghapurisā
sasitthakaṁ pattadhovanaṁ antaraghare chaḍḍessanti netaṁ bhikkhave
appasannānaṁ vā pasādāya pasannānaṁ vā bhiyyobhāvāya .pe.
Evañca pana bhikkhave imaṁ sikkhāpadaṁ uddiseyyātha na sasitthakaṁ
pattadhovanaṁ antaraghare chaḍḍessāmīti sikkhā karaṇīyā.
Na sasitthakaṁ pattadhovanaṁ antaraghare chaḍḍetabbaṁ. Yo anādariyaṁ
paṭicca sasitthakaṁ pattadhovanaṁ antaraghare chaḍḍeti āpatti dukkaṭassa.
Anāpatti asañcicca asatiyā ajānantassa gilānassa
udridhatvā vā bhinditvā vā paṭiggahe vā nīharitvā chaḍḍeti
āpadāsu ummattakassa ādikammikassāti.
Soḷasa dhammadesanāpaṭisaṁyuttā 1

[857] Sāvatthīnidānaṁ. Tena kho pana samayena chabbaggiyā
bhikkhū chattapāṇissa dhammaṁ desenti. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma chabbaggiyā bhikkhū chattapāṇissa
dhammaṁ desessantīti .pe. Saccaṁ kira tumhe bhikkhave chattapāṇissa
dhammaṁ desethāti. Saccaṁ bhagavāti. Vigarahi buddho bhagavā
kathaṁ hi nāma tumhe moghapurisā chattapāṇissa dhammaṁ desessatha netaṁ
moghapurisā appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha na
chattapāṇissa dhammaṁ desessāmīti 2 sikkhā karaṇīyā. Evañcidaṁ
bhagavatā bhikkhūnaṁ sikkhāpadaṁ paññattaṁ hoti.

[858] Tena kho pana samayena bhikkhū chattapāṇissa gilānassa
dhammaṁ desetuṁ kukkuccāyanti. Manussā ujjhāyanti khīyanti
vipācenti kathaṁ hi nāma samaṇā sakyaputtiyā chattapāṇissa
gilānassa dhammaṁ na desessantīti. Assosuṁ kho bhikkhū tesaṁ
manussānaṁ ujjhāyantānaṁ khīyantānaṁ vipācentānaṁ. Athakho te
bhikkhū bhagavato etamatthaṁ ārocesuṁ. Athakho bhagavā etasmiṁ
nidāne etasmiṁ pakaraṇe dhammiṁ kathaṁ katvā bhikkhū āmantesi
anujānāmi bhikkhave chattapāṇissa gilānassa dhammaṁ desetuṁ evañca
1 Ma. idaṁ pāṭhadvayaṁ natthi. 2 yebhuyyena desissāmīti paṭhanti. evaṁ sabbattha
ñātabbaṁ.
Pana bhikkhave imaṁ sikkhāpadaṁ uddiseyyātha na chattapāṇissa
agilānassa dhammaṁ desessāmīti sikkhā karaṇīyā.
Chattaṁ nāma tīṇi chattāni setacchattaṁ kilañjacchattaṁ paṇṇacchattaṁ
maṇḍalabaddhaṁ salākabaddhaṁ. Dhammo nāma buddhabhāsito sāvakabhāsito
isibhāsito devatābhāsito atthupasañhito dhammupasañhito.
Deseyyāti 1 padena deseti pade pade āpatti dukkaṭassa.
Akkharāya deseti akkharakkharāya āpatti dukkaṭassa. Na
chattapāṇissa agilānassa dhammo desetabbo. Yo anādariyaṁ
paṭicca chattapāṇissa agilānassa dhammaṁ deseti āpatti
dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[859] Sāvatthīnidānaṁ. Tena kho pana samayena chabbaggiyā
bhikkhū daṇḍapāṇissa dhammaṁ desenti .pe. Na daṇḍapāṇissa
agilānassa dhammaṁ desessāmīti sikkhā karaṇīyā.
Daṇḍo nāma majjhimassa purisassa catuhattho daṇḍo. Tato
ukkaṭṭho adaṇḍo omako adaṇḍo. Na daṇḍapāṇissa
agilānassa dhammo desetabbo. Yo anādariyaṁ paṭicca daṇḍapāṇissa
agilānassa dhammaṁ deseti āpatti dukkaṭassa.
1 ayaṁ pāṭho vicāretabbo mātikāyaṁ avijjamānattā.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[860] Sāvatthīnidānaṁ. Tena kho pana samayena chabbaggiyā
bhikkhū satthapāṇissa dhammaṁ desenti .pe. Na satthapāṇissa
agilānassa dhammaṁ desessāmīti sikkhā karaṇīyā.
Satthaṁ nāma ekatodhāraṁ ubhatodhāraṁ paharaṇi. Na satthapāṇissa
agilānassa dhammo desetabbo. Yo anādariyaṁ paṭicca
satthapāṇissa agilānassa dhammaṁ deseti āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[861] Sāvatthīnidānaṁ. Tena kho pana samayena chabbaggiyā
bhikkhū āvudhapāṇissa dhammaṁ desenti .pe. Na āvudhapāṇissa
agilānassa dhammaṁ desessāmīti sikkhā karaṇīyā.
Āvudhaṁ nāma cāpo kodaṇḍo. Na āvudhapāṇissa agilānassa
dhammo desetabbo. Yo anādariyaṁ paṭicca āvudhapāṇissa agilānassa
dhammaṁ deseti āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.
Surusuruvaggo chaṭṭho.
-------
1 Ma. Yu. paharaṇaṁ.
Pādukāvaggo