[832] Sāvatthīnidānaṁ. Tena kho pana samayena chabbaggiyā
bhikkhū tahaṁ tahaṁ omasitvā piṇḍapātaṁ bhuñjanti .pe. Sapadānaṁ
piṇḍapātaṁ bhuñjissāmīti sikkhā karaṇīyā.
Sapadānaṁ piṇḍapāto bhuñjitabbo. Yo anādariyaṁ paṭicca
tahaṁ tahaṁ omasitvā piṇḍapātaṁ bhuñjati āpatti dukkaṭassa.
Anāpatti asañcicca asatiyā ajānantassa gilānassa
aññesaṁ dento omasati aññabhājane 1 ākiranto omasati
uttaribhaṅge āpadāsu ummattakassa ādikammikassāti.

[833] Sāvatthīnidānaṁ. Tena kho pana samayena chabbaggiyā
bhikkhū piṇḍapātaṁ bhuñjantā sūpaṁyeva bahuṁ bhuñjanti .pe. Samasūpakaṁ
piṇḍapātaṁ bhuñjissāmīti sikkhā karaṇīyā.
Sūpo nāma dve sūpā muggasūpo māsasūpo hatthahāriyo.
Samasūpako piṇḍapāto bhuñjitabbo. Yo anādariyaṁ paṭicca sūpaṁyeva
bahuṁ bhuñjati āpatti dukkaṭassa.
Anāpatti asañcicca asatiyā ajānantassa gilānassa
1 Ma. aññassa bhājane.
Rasarase ñātakānaṁ pavāritānaṁ aññassatthāya attano dhanena
āpadāsu ummattakassa ādikammikassāti.

[834] Sāvatthīnidānaṁ. Tena kho pana samayena chabbaggiyā
bhikkhū thūpato omadditvā piṇḍapātaṁ bhuñjanti .pe. Na thūpato
omadditvā piṇḍapātaṁ bhuñjissāmīti sikkhā karaṇīyā.
Na thūpato omadditvā piṇḍapāto bhuñjitabbo. Yo
anādariyaṁ paṭicca thūpato omadditvā piṇḍapātaṁ bhuñjati āpatti
dukkaṭassa.
Anāpatti asañcicca asatiyā ajānantassa gilānassa
parittake sese ekato saṅkaḍḍhitvā omadditvā bhuñjati āpadāsu
ummattakassa ādikammikassāti.

[835] Sāvatthīnidānaṁ. Tena kho pana samayena chabbaggiyā
bhikkhū sūpaṁpi byañjanaṁpi odanena paṭicchādenti bhiyyokamyataṁ upādāya
.pe. Na sūpaṁ vā byañjanaṁ vā odanena paṭicchādessāmi
bhiyyokamyataṁ upādāyāti sikkhā karaṇīyā.
Na sūpaṁ vā byañjanaṁ vā odanena paṭicchādetabbaṁ bhiyyokamyataṁ
upādāya. Yo anādariyaṁ paṭicca sūpaṁ vā byañjanaṁ vā odanena
paṭicchādeti bhiyyokamyataṁ upādāya āpatti dukkaṭassa.
Anāpatti asañcicca asatiyā ajānantassa sāmikā
paṭicchādetvā denti na bhiyyokamyataṁ upādāya āpadāsu
Ummattakassa ādikammikassāti.

[836] Sāvatthīnidānaṁ. Tena kho pana samayena chabbaggiyā bhikkhū
sūpaṁpi odanaṁpi attano atthāya viññāpetvā bhuñjanti. Manussā
ujjhāyanti khīyanti vipācenti kathaṁ hi nāma samaṇā sakyaputtiyā
sūpaṁpi odanaṁpi attano atthāya viññāpetvā bhuñjissanti kassa
sampannaṁ na manāpaṁ kassa sāduṁ na ruccatīti. Assosuṁ kho
bhikkhū tesaṁ manussānaṁ ujjhāyantānaṁ khīyantānaṁ vipācentānaṁ. Ye
te bhikkhū appicchā .pe. Te ujjhāyanti khīyanti vipācenti
kathaṁ hi nāma chabbaggiyā bhikkhū sūpaṁpi odanaṁpi attano atthāya
viññāpetvā bhuñjissantīti .pe. Saccaṁ kira tumhe bhikkhave
sūpaṁpi odanaṁpi attano atthāya viññāpetvā bhuñjathāti. Saccaṁ
bhagavāti. Vigarahi buddho bhagavā kathaṁ hi nāma tumhe moghapurisā
sūpaṁpi odanaṁpi attano atthāya viññāpetvā bhuñjissatha netaṁ
moghapurisā appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha na sūpaṁ
vā odanaṁ vā attano atthāya viññāpetvā bhuñjissāmīti sikkhā
karaṇīyā. Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[837] Tena kho pana samayena bhikkhū gilānā honti.
Gilānapucchakā bhikkhū gilāne bhikkhū etadavocuṁ kaccāvuso khamanīyaṁ
kacci yāpanīyanti. Pubbe mayaṁ āvuso sūpaṁpi odanaṁpi attano
Atthāya viññāpetvā bhuñjāma tena no phāsu hoti idāni
pana bhagavatā paṭikkhittanti kukkuccāyantā na viññāpema tena
no na phāsu hotīti. Bhagavato etamatthaṁ ārocesuṁ. Athakho
bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū
āmantesi anujānāmi bhikkhave gilānena bhikkhunā sūpaṁpi odanaṁpi
attano atthāya viññāpetvā bhuñjituṁ evañca pana bhikkhave
imaṁ sikkhāpadaṁ uddiseyyātha na sūpaṁ vā odanaṁ vā agilāno
attano atthāya viññāpetvā bhuñjissāmīti sikkhā karaṇīyā.
Na sūpaṁ vā odanaṁ vā agilānena attano atthāya viññāpetvā
bhuñjitabbaṁ. Yo anādariyaṁ paṭicca sūpaṁ vā odanaṁ vā agilāno
attano atthāya viññāpetvā bhuñjati āpatti dukkaṭassa.
Anāpatti asañcicca asatiyā ajānantassa gilānassa
ñātakānaṁ pavāritānaṁ aññassatthāya attano dhanena āpadāsu
ummattakassa ādikammikassāti.

[838] Sāvatthīnidānaṁ. Tena kho pana samayena chabbaggiyā bhikkhū
ujjhānasaññī paresaṁ pattaṁ olokenti .pe. Na ujjhānasaññī
paresaṁ pattaṁ olokessāmīti sikkhā karaṇīyā.
Na ujjhānasaññinā paresaṁ patto oloketabbo. Yo anādariyaṁ
paṭicca ujjhānasaññī paresaṁ pattaṁ oloketi āpatti dukkaṭassa.
Anāpatti asañcicca asatiyā ajānantassa dassāmīti
Vā dāpessāmīti vā oloketi naujjhānasaññissa āpadāsu
ummattakassa ādikammikassāti.

[839] Sāvatthīnidānaṁ. Tena kho pana samayena chabbaggiyā
bhikkhū mahantaṁ kabaḷaṁ karonti .pe. Nātimahantaṁ kabaḷaṁ karissāmīti
sikkhā karaṇīyā.
Nātimahanto kabaḷo kātabbo. Yo anādariyaṁ paṭicca mahantaṁ
kabaḷaṁ karoti āpatti dukkaṭassa.
Anāpatti asañcicca asatiyā ajānantassa gilānassa
khajjake phalāphale uttaribhaṅge āpadāsu ummattakassa
ādikammikassāti.

[840] Sāvatthīnidānaṁ. Tena kho pana samayena chabbaggiyā
bhikkhū dīghaṁ ālopaṁ karontā bhuñjanti .pe. Parimaṇḍalaṁ ālopaṁ
karissāmīti sikkhā karaṇīyā.
Parimaṇḍalo ālopo kātabbo. Yo anādariyaṁ paṭicca
dīghaṁ ālopaṁ karoti āpatti dukkaṭassa.
Anāpatti asañcicca asatiyā ajānantassa gilānassa
khajjake phalāphale uttaribhaṅge āpadāsu ummattakassa
ādikammikassāti.
Sakkaccavaggo catuttho.
--------
Kabaḷavaggo

[841] Sāvatthīnidānaṁ. Tena kho pana samayena chabbaggiyā
bhikkhū anāhaṭe kabaḷe mukhadvāraṁ vivaranti .pe. Na anāhaṭe
kabaḷe mukhadvāraṁ vivarissāmīti sikkhā karaṇīyā.
Na anāhaṭe kabaḷe mukhadvāraṁ vivaritabbaṁ. Yo anādariyaṁ
paṭicca anāhaṭe kabaḷe mukhadvāraṁ vivarati āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.