[822] Sāvatthīnidānaṁ. Tena kho pana samayena chabbaggiyā
bhikkhū sasīsaṁ pārupitvā antaraghare gacchanti .pe. Na oguṇṭhito
antaraghare gamissāmīti sikkhā karaṇīyā.
Na oguṇṭhitena antaraghare gantabbaṁ. Yo anādariyaṁ paṭicca
sasīsaṁ pārupitvā antaraghare gacchati āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[823] Sāvatthīnidānaṁ. Tena kho pana samayena chabbaggiyā
bhikkhū sasīsaṁ pārupitvā antaraghare nisīdanti .pe. Na oguṇṭhito
antaraghare nisīdissāmīti sikkhā karaṇīyā.
Na oguṇṭhitena antaraghare nisīditabbaṁ. Yo anādariyaṁ paṭicca
sasīsaṁ pārupitvā antaraghare nisīdati āpatti dukkaṭassa.
Anāpatti asañcicca asatiyā ajānantassa gilānassa
vāsūpagatassa āpadāsu ummattakassa ādikammikassāti.

[824] Sāvatthīnidānaṁ. Tena kho pana samayena chabbaggiyā
bhikkhū ukkuṭikāya antaraghare gacchanti .pe. Na ukkuṭikāya antaraghare
gamissāmīti sikkhā karaṇīyā.
Na ukkuṭikāya antaraghare gantabbaṁ. Yo anādariyaṁ paṭicca
ukkuṭikāya antaraghare gacchati āpatti dukkaṭassa.
Anāpatti asañcicca asatiyā ajānantassa gilānassa
vāsūpagatassa āpadāsu ummattakassa ādikammikassāti.

[825] Sāvatthīnidānaṁ. Tena kho pana samayena chabbaggiyā
bhikkhū pallatthikāya antaraghare nisīdanti .pe. Na pallatthikāya
antaraghare nisīdissāmīti sikkhā karaṇīyā.
Na pallatthikāya antaraghare nisīditabbaṁ. Yo anādariyaṁ paṭicca
hatthapallatthikāya vā dussapallatthikāya vā antaraghare nisīdati
āpatti dukkaṭassa.
Anāpatti asañcicca asatiyā ajānantassa gilānassa
vāsūpagatassa āpadāsu ummattakassa ādikammikassāti.
Samattiṁsa bhojanappaṭisaṁyuttā 1

[826] Sāvatthīnidānaṁ. Tena kho pana samayena chabbaggiyā
bhikkhū asakkaccaṁ piṇḍapātaṁ paṭiggaṇhanti chaḍḍetukāmā viya .pe.
Sakkaccaṁ piṇḍapātaṁ paṭiggahessāmīti sikkhā karaṇīyā.
Sakkaccaṁ piṇḍapāto paṭiggahetabbo. Yo anādariyaṁ paṭicca
asakkaccaṁ piṇḍapātaṁ paṭiggaṇhāti chaḍḍetukāmo viya āpatti
dukkaṭassa.
1 Ma. idaṁ pāṭhadvayaṁ natthi.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[827] Sāvatthīnidānaṁ. Tena kho pana samayena chabbaggiyā
bhikkhū tahaṁ tahaṁ olokentā piṇḍapātaṁ paṭiggaṇhanti ākirantepi
atikkantepi na jānanti .pe. Pattasaññī piṇḍapātaṁ
paṭiggahessāmīti sikkhā karaṇīyā.
Pattasaññinā piṇḍapāto paṭiggahetabbo. Yo anādariyaṁ
paṭicca tahaṁ tahaṁ olokento piṇḍapātaṁ paṭiggaṇhāti āpatti
dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[828] Sāvatthīnidānaṁ. Tena kho pana samayena chabbaggiyā
bhikkhū piṇḍapātaṁ paṭiggaṇhantā sūpaṁyeva bahuṁ paṭiggaṇhanti .pe.
Samasūpakaṁ piṇḍapātaṁ paṭiggahessāmīti sikkhā karaṇīyā.
Sūpo nāma dve sūpā muggasūpo māsasūpo hatthahāriyo.
Samasūpako piṇḍapāto paṭiggahetabbo. Yo anādariyaṁ paṭicca
sūpaṁyeva bahuṁ paṭiggaṇhāti āpatti dukkaṭassa.
Anāpatti asañcicca asatiyā ajānantassa gilānassa
rasarase ñātakānaṁ pavāritānaṁ aññassatthāya attano dhanena
āpadāsu ummattakassa ādikammikassāti.

[829] Sāvatthīnidānaṁ. Tena kho pana samayena chabbaggiyā
bhikkhū thūpīkataṁ piṇḍapātaṁ paṭiggaṇhanti .pe. Samatittikaṁ piṇḍapātaṁ
paṭiggahessāmīti sikkhā karaṇīyā.
Samatittiko piṇḍapāto paṭiggahetabbo. Yo anādariyaṁ
paṭicca thūpīkataṁ piṇḍapātaṁ paṭiggaṇhāti āpatti dukkaṭassa.
Anāpatti asañcicca asatiyā ajānantassa āpadāsu
ummattakassa ādikammikassāti.
Khambhakatavaggo tatiyo.
--------
Sakkaccavaggo

[830] Sāvatthīnidānaṁ. Tena kho pana samayena chabbaggiyā
bhikkhū asakkaccaṁ piṇḍapātaṁ bhuñjanti abhuñjitukāmā viya .pe.
Sakkaccaṁ piṇḍapātaṁ bhuñjissāmīti sikkhā karaṇīyā.
Sakkaccaṁ piṇḍapāto bhuñjitabbo. Yo anādariyaṁ paṭicca
asakkaccaṁ piṇḍapātaṁ bhuñjati abhuñjitukāmo viya āpatti
dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.

[831] Sāvatthīnidānaṁ. Tena kho pana samayena chabbaggiyā bhikkhū tahaṁ
tahaṁ olokentā piṇḍapātaṁ bhuñjanti ākirantepi atikkantepi na
Jānanti .pe. Pattasaññī piṇḍapātaṁ bhuñjissāmīti sikkhā karaṇīyā.
Pattasaññinā piṇḍapāto bhuñjitabbo. Yo anādariyaṁ paṭicca
tahaṁ tahaṁ olokento piṇḍapātaṁ bhuñjati āpatti dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.