[50] Dhammakamme dhammakammasaññā osāreti āpatti
saṅghādisesassa. Dhammakamme vematikā osāreti āpatti saṅghādisesassa.
Dhammakamme adhammakammasaññā osāreti āpatti
saṅghādisesassa. Adhammakamme dhammakammasaññā āpatti dukkaṭassa.
Adhammakamme vematikā āpatti dukkaṭassa. Adhammakamme adhammakammasaññā
āpatti dukkaṭassa.

[51] Anāpatti kammakārakasaṅghaṁ apaloketvā osāreti gaṇassa
chandaṁ jānitvā osāreti vatte vattantiṁ osāreti asante
kammakārakasaṅghe osāreti ummattikāya ādikammikāyāti.
------
Pañcamasaṅghādisesaṁ

[52] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena sundarīnandā
bhikkhunī abhirūpā hoti dassanīyā pāsādikā. Manussā bhattagge
Sundarīnandaṁ bhikkhuniṁ passitvā avassutā avassutāya sundarīnandāya
bhikkhuniyā aggamaggāni bhojanāni denti. Sundarīnandā bhikkhunī yāvadatthaṁ
bhuñjati. Aññā bhikkhuniyo na cittarūpaṁ labhanti. Yā tā bhikkhuniyo
appicchā .pe. Tā ujjhāyanti khīyanti vipācenti kathaṁ hi
nāma ayyā sundarīnandā avassutā avassutassa purisapuggalassa
hatthato khādanīyaṁ 1 bhojanīyaṁ sahatthā paṭiggahetvā khādissati
bhuñjissatīti .pe. Saccaṁ kira bhikkhave sundarīnandā bhikkhunī avassutā
avassutassa purisapuggalassa hatthato khādanīyaṁ 2 bhojanīyaṁ sahatthā
paṭiggahetvā khādati bhuñjatīti. Saccaṁ bhagavāti. Vigarahi buddho
bhagavā kathaṁ hi nāma bhikkhave sundarīnandā bhikkhunī avassutā
avassutassa parisapuggalassa hatthato khādanīyaṁ 3 bhojanīyaṁ sahatthā
paṭiggahetvā khādissati bhuñjissati netaṁ bhikkhave appasannānaṁ
vā pasādāya .pe. Evañca pana bhikkhave bhikkhuniyo imaṁ
sikkhāpadaṁ uddisantu yā pana bhikkhunī avassutā avassutassa purisapuggalassa
hatthato khādanīyaṁ vā bhojanīyaṁ vā sahatthā paṭiggahetvā
khādeyya vā bhuñjeyya vā ayampi bhikkhunī paṭhamāpattikaṁ dhammaṁ
āpannā nissāraṇīyaṁ saṅghādisesanti.

[53] Yā panāti yā yādisā .pe. Bhikkhunīti .pe. Ayaṁ imasmiṁ
atthe adhippetā bhikkhunīti. Avassutā nāma sārattā apekkhavatī 4
paṭibaddhacittā. Avassuto nāma sāratto apekkhavā paṭibaddhacitto.
1-2 Ma. khādanīyaṁ vā bhojanīyaṁ vā. 3 Ma. Yu. khādanīyaṁ vā bhojanīyaṁ vā.
4 Ma. Yu. apekkhavā.
Purisapuggalo nāma manussapuriso na yakkho na peto na tiracchānagato
viññū paṭibalo sārajjituṁ. Khādanīyaṁ nāma pañca bhojanāni
udakadantapoṇaṁ ṭhapetvā avasesaṁ khādanīyaṁ nāma. Bhojanīyaṁ nāma
pañca bhojanāni odano kummāso sattu maccho maṁsaṁ. Khādissāmi
bhuñjissāmīti paṭiggaṇhāti āpatti thullaccayassa ajjhohāre
ajjhohāre āpatti saṅghādisesassa.

[54] Ayampīti purimāyo upādāya vuccati. Paṭhamāpattikanti
saha vatthujjhācārā āpajjati asamanubhāsanāya. Nissāraṇīyanti
saṅghamhā nissāriyati. Saṅghādisesoti .pe. Tenapi vuccati
saṅghādisesoti. Udakadantapoṇaṁ paṭiggaṇhāti āpatti dukkaṭassa.

[55] Ekato avassute khādissāmi bhuñjissāmīti paṭiggaṇhāti
āpatti dukkaṭassa ajjhohāre ajjhohāre āpatti thullaccayassa.
Udakadantapoṇaṁ paṭiggaṇhāti āpatti dukkaṭassa. Ubhato avassute
yakkhassa vā petassa vā paṇḍakassa vā tiracchānagatamanussaviggahassa
vā hatthato khādissāmi bhuñjissāmīti paṭiggaṇhāti āpatti
dukkaṭassa ajjhohāre ajjhohāre āpatti thullaccayassa.
Udakadantapoṇaṁ paṭiggaṇhāti āpatti dukkaṭassa. Ekato
avassute khādissāmi bhuñjissāmīti paṭiggaṇhāti āpatti
dukkaṭassa ajjhohāre ajjhohāre āpatti dukkaṭassa.
Udakadantapoṇaṁ paṭiggaṇhāti āpatti dukkaṭassa.

[56] Anāpatti ubhato anavassutā honti anavassutoti
jānantī paṭiggaṇhāti ummattikāya ādikammikāyāti.
------
Chaṭṭhasaṅghādisesaṁ

[57] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena sundarīnandā
bhikkhunī abhirūpā hoti dassanīyā pāsādikā. Manussā bhattagge
sundarīnandaṁ bhikkhuniṁ passitvā avassutā sundarīnandāya bhikkhuniyā
aggamaggāni bhojanāni denti. Sundarīnandā bhikkhunī kukkuccāyantī
nappaṭiggaṇhāti. Anantarikā bhikkhunī sundarīnandaṁ bhikkhuniṁ etadavoca
kissa tvaṁ ayye nappaṭiggaṇhāsīti. Avassuto ayyeti. Tvaṁ
pana ayye avassutāti. Nāhaṁ ayye 1 avassutāti. Kinte
ayye eso purisapuggalo karissati avassuto vā anavassuto vā
yato tvaṁ anavassutā iṅghayye yante eso purisapuggalo deti
khādanīyaṁ vā bhojanīyaṁ vā taṁ tvaṁ sahatthā paṭiggahetvā khāda vā
bhuñja vāti. Yā tā bhikkhuniyo appicchā .pe. Tā ujjhāyanti
khīyanti vipācenti kathaṁ hi nāma bhikkhunī evaṁ vakkhati kinte ayye
eso purisapuggalo karissati avassuto vā anavassuto vā yato
tvaṁ anavassutā iṅghayye yante eso purisapuggalo deti khādanīyaṁ
1 Ma. Yu. ayaṁ pāṭho natthi.
Vā bhojanīyaṁ vā taṁ tvaṁ sahatthā paṭiggahetvā khāda vā bhuñja
vāti .pe. Saccaṁ kira bhikkhave bhikkhunī evaṁ vadeti kinte
ayye eso purisapuggalo karissati avassuto vā anavassuto vā
yato tvaṁ anavassutā iṅghayye yante eso purisapuggalo deti
khādanīyaṁ vā bhojanīyaṁ vā taṁ tvaṁ sahatthā paṭiggahetvā khāda
vā bhuñja vāti. Saccaṁ bhagavāti. Vigarahi buddho bhagavā kathaṁ
hi nāma bhikkhave bhikkhunī evaṁ vakkhati kinte ayye eso
purisapuggalo karissati avassuto vā anavassuto vā yato tvaṁ
anavassutā iṅghayye yante eso purisapuggalo deti khādanīyaṁ vā
bhojanīyaṁ vā taṁ tvaṁ sahatthā paṭiggahetvā khāda vā bhuñja vāti
netaṁ bhikkhave appasannānaṁ vā pasādāya .pe. Evañca pana
bhikkhave bhikkhuniyo imaṁ sikkhāpadaṁ uddisantu yā pana bhikkhunī
evaṁ vadeyya kinte ayye eso purisapuggalo karissati avassuto
vā anavassuto vā yato tvaṁ anavassutā iṅghayye yante
eso purisapuggalo deti khādanīyaṁ vā bhojanīyaṁ vā taṁ tvaṁ
sahatthā paṭiggahetvā khāda vā bhuñja vāti ayampi bhikkhunī
paṭhamāpattikaṁ dhammaṁ āpannā nissāraṇīyaṁ saṅghādisesanti.

[58] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Evaṁ vadeyyāti kinte ayye
eso purisapuggalo karissati avassuto vā anavassuto vā yato
Tvaṁ anavassutā iṅghayye yante eso purisapuggalo deti khādanīyaṁ
vā bhojanīyaṁ vā taṁ tvaṁ sahatthā paṭiggahetvā khāda vā bhuñja
vāti uyyojeti āpatti dukkaṭassa tassā vacanena khādissāmi
bhuñjissāmīti paṭiggaṇhāti āpatti dukkaṭassa ajjhohāre
ajjhohāre āpatti thullaccayassa bhojanapariyosāne āpatti
saṅghādisesassa. Ayampīti purimāyo upādāya vuccati.
Paṭhamāpattikanti saha vatthujjhācārā āpajjati asamanubhāsanāya.
Nissāraṇīyanti saṅghamhā nissāriyati. Saṅghādisesoti .pe.
Tena vuccati saṅghādisesoti. Udakadantapoṇaṁ paṭiggaṇhāti
uyyojeti āpatti dukkaṭassa. Tassā vacanena khādissāmi
bhuñjissāmīti paṭiggaṇhāti āpatti dukkaṭassa.

[59] Ekato avassute yakkhassa vā petassa vā paṇḍakassa
vā tiracchānagatamanussaviggahassa vā hatthato khādanīyaṁ vā bhojanīyaṁ vā
khāda vā bhuñja vāti uyyojeti āpatti dukkaṭassa tassā
vacanena khādissāmi bhuñjissāmīti paṭiggaṇhāti āpatti
dukkaṭassa ajjhohāre ajjhohāre āpatti dukkaṭassa bhojanapariyosāne
āpatti thullaccayassa. Udakadantapoṇaṁ paṭiggaṇhāti
uyyojeti āpatti dukkaṭassa tassā vacanena khādissāmi
bhuñjissāmīti paṭiggaṇhāti āpatti dukkaṭassa.