[237] 10 Vuttaṁ hetaṁ bhagavatā vuttamarahatāti me sutaṁ tīhi
bhikkhave dhammehi samannāgato bhikkhu atikkamma māradheyyaṁ ādiccova
virocati katamehi tīhi idha bhikkhave bhikkhu asekkhena sīlakkhandhena
samannāgato hoti asekkhena samādhikkhandhena samannāgato hoti
asekkhena paññākkhandhena samannāgato hoti. Imehi kho bhikkhave
tīhi dhammehi samannāgato bhikkhu atikkamma māradheyyaṁ ādiccova
virocatīti. Etamatthaṁ bhagavā avoca. Tatthetaṁ iti vuccati
sīlasamādhipaññā 1 ca yassa ete subhāvitā
atikkamma māradheyyaṁ ādiccova virocatīti.
Ayampi attho vutto bhagavatā iti me sutanti. Dasamaṁ.
Vaggo paṭhamo.
Tassuddānaṁ
mūladhātu atha vedanā duve
esanā ca duve āsavā duve
taṇhāto [2]- atha māradheyyato
vaggamāhu paṭhamanti muttamanti.
-------------
1 Ma. Yu. sīlaṁ samādhi paññā ca. 2 Po. Ma. Yu. ca.
Itivuttake tikanipātassa dutiyavaggo

[238] 1 Vuttaṁ hetaṁ bhagavatā vuttamarahatāti me sutaṁ tīṇīmāni
bhikkhave puññakiriyāvatthūni katamāni tīṇi dānamayaṁ puññakiriyāvatthu
sīlamayaṁ puññakiriyāvatthu bhāvanāmayaṁ puññakiriyāvatthu.
Imāni kho bhikkhave tīṇi puññakiriyāvatthūnīti. Etamatthaṁ bhagavā
avoca. Tatthetaṁ iti vuccati
puññameva so sikkheyya āyataggaṁ sukhindriyaṁ 1
dānañca samacariyañca mettacittañca bhāvaye
ete dhamme bhāvayitvā tayo sukhasamuddaye
abyāpajjhaṁ sukhaṁ lokaṁ paṇḍito upapajjatīti.
Ayampi attho vutto bhagavatā iti me sutanti. Paṭhamaṁ.

[239] 2 Vuttaṁ hetaṁ bhagavatā vuttamarahatāti me sutaṁ tīṇīmāni
bhikkhave cakkhūni katamāni tīṇi maṁsacakkhu dibbacakkhu paññācakkhu.
Imāni kho bhikkhave tīṇi cakkhūnīti. Etamatthaṁ bhagavā
avoca. Tatthetaṁ iti vuccati
maṁsacakkhu 2 dibbacakkhu paññācakkhu anuttaraṁ
etāni tīṇi cakkhūni akkhāsi purisuttamo
maṁsacakkhussa uppādo maggo dibbassa cakkhuno
yato ñāṇaṁ udapādi paññācakkhu anuttaraṁ
1 Ma. sukhuddariyaṁ. 2 Po. maṁsacakkhuṁ dibbacakkhuṁ paññācakkhuṁ.
Yassa cakkhussa paṭilābhā sabbadukkhā vimuccatīti.
Ayampi attho vutto bhagavatā iti me sutanti. Dutiyaṁ.

[240] 3 Vuttaṁ hetaṁ bhagavatā vuttamarahatāti me sutaṁ tīṇīmāni
bhikkhave indriyāni katamāni tīṇi anaññataññassāmītindriyaṁ 1
aññindriyaṁ aññātāvindriyaṁ. Imāni kho bhikkhave
tīṇi indriyānīti. Etamatthaṁ bhagavā avoca. Tatthetaṁ iti
vuccati
sekkhassa sikkhamānassa ujumaggānusārino
khayasmiṁ paṭhamaṁ ñāṇaṁ tato aññā anantarā
tato aññā vimuttassa ñāṇaṁ ve hoti tādino
akuppā me vimuttīti bhavasaṁyojanakkhayā
sace 2 indriyasampanno santo santipade rato
dhāreti antimaṁ dehaṁ jetvā māraṁ savāhananti.
Ayampi attho vutto bhagavatā iti me sutanti. Tatiyaṁ.

[241] 4 Vuttaṁ hetaṁ bhagavatā vuttamarahatāti me sutaṁ tayome
bhikkhave addhā katame tayo atīto addhā anāgato addhā
paccuppanno addhā ime kho bhikkhave tayo addhāti. Etamatthaṁ
bhagavā avoca. Tatthetaṁ iti vuccati
akkheyyasaññino sattā akkheyyasmiṁ patiṭṭhitā
akkheyyaṁ apariññāya yogamāyanti maccuno
1 Ma. Yu. anaññātaññassāmītindriyaṁ. 2 Ma. Yu. sa se.
Akkheyyaṁ ca pariññāya akkhātāraṁ na maññati
phuṭṭho vimokkho manasā santipadamanuttaraṁ
sa ve akkheyyasampanno santo santipade rato
saṅkhāya sevī dhammaṭṭho saṅkhyaṁ 1 nopeti vedagūti.
Ayampi attho vutto bhagavatā iti me sutanti. Catutthaṁ.

[242] 5 Vuttaṁ hetaṁ bhagavatā vuttamarahatāti me sutaṁ tīṇīmāni
bhikkhave duccaritāni katamāni tīṇi kāyaduccaritaṁ vacīduccaritaṁ
manoduccaritaṁ. Imāni kho bhikkhave tīṇi duccaritānīti. Etamatthaṁ
bhagavā avoca. Tatthetaṁ iti vuccati
kāyaduccaritaṁ katvā vacīduccaritāni ca
manoduccaritaṁ katvā yañcaññaṁ dosasañhitaṁ
akatvā kusalaṁ kammaṁ katvānākusalaṁ bahuṁ
kāyassa bhedā duppañño nirayaṁ so upapajjatīti.
Ayampi attho vutto bhagavatā iti me sutanti. Pañcamaṁ.

[243] 6 Vuttaṁ hetaṁ bhagavatā vuttamarahatāti me sutaṁ tīṇīmāni
bhikkhave sucaritāni katamāni tīṇi kāyasucaritaṁ vacīsucaritaṁ
manosucaritaṁ. Imāni kho bhikkhave tīṇi sucaritānīti. Etamatthaṁ
bhagavā avoca. Tatthetaṁ iti vuccati
kāyaduccaritaṁ hitvā vacīduccaritāni ca
manoduccaritaṁ hitvā yañcaññaṁ dosasañhitaṁ
1 Po. saṅkhaṁ na upeti vedagū.
Akatvākusalaṁ 1 kammaṁ katvāna kusalaṁ bahuṁ
kāyassa bhedā sappañño saggaṁ so upapajjatīti.
Ayampi attho vutto bhagavatā iti me sutanti. Chaṭṭhaṁ.

[244] 7 Vuttaṁ hetaṁ bhagavatā vuttamarahatāti me sutaṁ
tīṇimāni bhikkhave soceyyāni katamāni tīṇi kāyasoceyyaṁ
vacīsoceyyaṁ manosoceyyaṁ. Imāni kho bhikkhave tīṇi soceyyānīti.
Etamatthaṁ bhagavā avoca. Tatthetaṁ iti vuccati
kāyasuciṁ vācāsuciṁ 2 cetosucimanāsavaṁ
suciṁ soceyyasampannaṁ āhu sabbapahāyinanti.
Ayampi attho vutto bhagavatā iti me sutanti. Sattamaṁ.

[245] 8 Vuttaṁ hetaṁ bhagavatā vuttamarahatāti me sutaṁ
tīṇimāni bhikkhave moneyyāni katamāni tīṇi kāyamoneyyaṁ
vacīmoneyyaṁ manomoneyyaṁ. Imāni kho bhikkhave tīṇi moneyyānīti.
Etamatthaṁ bhagavā avoca. Tatthetaṁ iti vuccati
kāyamuniṁ vācāmuniṁ 3 manomunimanāsavaṁ
muniṁ moneyyasampannaṁ āhu ninhātapāpakanti 4 .
Ayampi attho vutto bhagavatā iti me sutanti. Aṭṭhamaṁ.

[246] 9 Vuttaṁ hetaṁ bhagavatā vuttamarahatāti me sutaṁ yassa
kassaci bhikkhave rāgo appahīno doso appahīno moho
appahīno ayaṁ vuccati bhikkhave bandho 5 mārassa paṭimukkassa
1 Po. akatvā akusalaṁ. 2 Ma. vacīsuciṁ. 3 Ma. vacīmuniṁ. 4 Po. niddhotapāpakaṁ.
5 Ma. baddho.
Mārapāso yathākāmakaraṇīyo ca 1 pāpimato. Yassa kassaci bhikkhave
rāgo pahīno doso pahīno moho pahīno ayaṁ vuccati bhikkhave abandho
mārassa omukkassa mārapāso na yathākāmakaraṇīyo ca pāpimatoti.
Etamatthaṁ bhagavā avoca. Tatthetaṁ iti vuccati
yassa rāgo ca doso ca avijjā ca virājitā
taṁ bhāvitattaññataraṁ brahmabhūtaṁ tathāgataṁ
buddhaṁ verabhayātītaṁ āhu sabbapahāyinanti.
Ayampi attho vutto bhagavatā iti me sutanti. Navamaṁ.