[117] Aṭṭhime bhikkhave mahāsamudde acchariyā abbhūtadhammā
ye disvā disvā asurā mahāsamudde abhiramanti katame aṭṭha
1 mahāsamuddo bhikkhave anupubbaninno anupubbapoṇo
anupubbapabbhāro nāyatakeneva 4 papāto yaṁ 5 bhikkhave mahāsamuddo
anupubbaninno anupubbapoṇo anupubbapabbhāro nāyatakeneva papāto
ayaṁ bhikkhave mahāsamudde paṭhamo acchariyo abbhūtadhammo yaṁ
disvā disvā asurā mahāsamudde abhiramanti.
1 Ma. āgamessatīti. 2 Po. Ma. Yu. tumhevadāni. 3 Yu. ayaṁ pāṭho natthi.
4 Po. Ma. sabbattha āyanakenevāti dissati 5 Po. ayampi. Ma. Yu. yampi.
2 Puna ca paraṁ bhikkhave mahāsamuddo ṭhitadhammo velaṁ nātivattati
yaṁ bhikkhave mahāsamuddo ṭhitadhammo velaṁ nātivattati ayampi 1
bhikkhave mahāsamudde dutiyo acchariyo abbhūtadhammo yaṁ disvā
disvā asurā mahāsamudde abhiramanti.
3 Puna ca paraṁ bhikkhave mahāsamuddo na matena kuṇapena saṁvasati
yaṁ hoti mahāsamudde mataṁ kuṇapaṁ taṁ khippameva tīraṁ vāheti
thalaṁ ussādeti yampi bhikkhave mahāsamuddo na matena kuṇapena
saṁvasati yaṁ [2]- mahāsamudde mataṁ kuṇapaṁ taṁ khippameva tīraṁ vāheti
thalaṁ ussādeti ayampi bhikkhave mahāsamudde tatiyo acchariyo
abbhūtadhammo yaṁ disvā disvā asurā mahāsamudde abhiramanti.
4 Puna ca paraṁ bhikkhave yā kāci mahānadiyo seyyathīdaṁ gaṅgā
yamunā aciravatī sarabhū mahī tā mahāsamuddaṁ pattā 3 jahanti purimāni
nāmagottāni mahāsamuddo tveva saṅkhyaṁ gacchanti yaṁ bhikkhave
yā kāci mahānadiyo seyyathīdaṁ gaṅgā yamunā aciravatī sarabhū mahī
tā mahāsamuddaṁ pattā jahanti purimāni nāmagottāni mahāsamuddo
tveva saṅkhyaṁ gacchanti ayampi bhikkhave mahāsamudde
catuttho acchariyo abbhūtadhammo yaṁ disvā disvā asurā mahāsamudde
abhiramanti.
5 Puna ca paraṁ bhikkhave yā 4 loke savantiyo mahāsamudde 5
appenti yā ca antalikkhā dhārā papatanti 6 na tena mahāsamuddassa
1 Po. ayampi kho. 2 Ma. hoti. 3 Ma. patvā. 4 Po. yākāci.
Ma. Yu. yā ca. 5 Ma. Yu. mahāsamuddaṁ. 6 Po. pavattanti.
Ūnattaṁ vā pūrattaṁ vā paññāyati yampi bhikkhave yā
ca loke savantiyo mahāsamudde appenti yā ca antalikkhā
dhārā papatanti na tena mahāsamuddassa ūnattaṁ vā pūrattaṁ vā
paññāyati ayampi bhikkhave mahāsamudde pañcamo acchariyo
abbhūtadhammo yaṁ disvā disvā asurā mahāsamudde abhiramanti.
6 Puna ca paraṁ bhikkhave mahāsamuddo ekaraso loṇaraso
yampi bhikkhave mahāsamuddo ekaraso loṇaraso ayampi bhikkhave
mahāsamudde chaṭṭho acchariyo abbhūtadhammo yaṁ disvā disvā
asurā mahāsamudde abhiramanti.
7 Puna ca paraṁ bhikkhave mahāsamuddo bahuratano anekaratano
tatrīmāni ratanāni seyyathīdaṁ muttā maṇi veḷuriyo saṅkho silā
pavāḷaṁ rajataṁ jātarūpaṁ lohitaṅgo masāragallo 1 yaṁ bhikkhave
mahāsamuddo bahuratano anekaratano tatrīmāni ratanāni seyyathīdaṁ
muttā maṇi veḷuriyo saṅkho silā pavāḷaṁ rajataṁ jātarūpaṁ lohitaṅgo
masāragallo ayampi bhikkhave mahāsamudde sattamo acchariyo
abbhūtadhammo yaṁ disvā disvā asurā mahāsamudde abhiramanti.
8 Puna ca paraṁ bhikkhave mahāsamuddo mahataṁ bhūtānaṁ āvāso
tatrīme bhūtā timi timiṅgalo timitimiṅgalo 2 asurā nāgā gandhabbā
santi mahāsamudde yojanasatikāpi attabhāvā dviyojanasatikāpi
attabhāvā tiyojanasatikāpi attabhāvā catuyojanasatikāpi attabhāvā
1 Ma. masāragallaṁ. 2 Po. timitimiṅgalā. Ma. timiramiṅgalā. Yu. timirapiṅgalo.
Pañcayojanasatikāpi attabhāvā yampi bhikkhave mahāsamuddo mahataṁ
bhūtānaṁ āvāso tatrīme bhūtā timi timiṅgalo timitimiṅgalo
asurā nāgā gandhabbā santi mahāsamudde yojanasatikāpi attabhāvā
dviyojanasatikāpi attabhāvā tiyojanasatikāpi attabhāvā catuyojanasatikāpi
attabhāvā pañcayojanasatikāpi attabhāvā ayampi bhikkhave
mahāsamudde aṭṭhamo acchariyo abbhūtadhammo yaṁ disvā disvā
asurā mahāsamudde abhiramanti. Ime kho bhikkhave [1]- mahāsamudde
aṭṭha acchariyā abbhūtadhammā ye disvā disvā asurā mahāsamudde
abhiramanti.

[118] Evameva kho bhikkhave imasmiṁ dhammavinaye aṭṭha acchariyā
abbhūtadhammā ye disvā disvā bhikkhū [2]- dhammavinaye abhiramanti
katame aṭṭha
1 seyyathāpi bhikkhave mahāsamuddo anupubbaninno anupubbapoṇo
anupubbapabbhāro nāyatakeneva papāto evameva kho
bhikkhave imasmiṁ dhammavinaye anupubbasikkhā anupubbakiriyā anupubbapaṭipadā
nāyatakeneva aññāpaṭivedho yaṁ bhikkhave imasmiṁ dhammavinaye
anupubbasikkhā anupubbakiriyā anupubbapaṭipadā nāyatakeneva
aññāpaṭivedho ayaṁ bhikkhave imasmiṁ dhammavinaye paṭhamo acchariyo
abbhūtadhammo yaṁ disvā disvā bhikkhū imasmiṁ dhammavinaye abhiramanti.
2 Seyyathāpi bhikkhave mahāsamuddo ṭhitadhammo velaṁ nātivattati
1 Ma. aṭṭha. 2 Ma. imismiṁ.
Evameva kho bhikkhave yaṁ mayā sāvakānaṁ sikkhāpadaṁ paññattaṁ taṁ
mama sāvakā jīvitahetupi nātikkamanti yampi bhikkhave mama
sāvakānaṁ sikkhāpadaṁ paññattaṁ taṁ mama sāvakā jīvitahetupi
nātikkamanti ayampi bhikkhave imasmiṁ dhammavinaye dutiyo acchariyo
abbhūtadhammo yaṁ disvā disvā bhikkhū imasmiṁ dhammavinaye
abhiramanti.
3 Seyyathāpi bhikkhave mahāsamuddo na matena kuṇapena saṁvasati
yaṁ hoti mahāsamudde mataṁ kuṇapaṁ taṁ khippameva tīraṁ vāheti thalaṁ
ussādeti evameva kho bhikkhave yo so puggalo dussīlo pāpadhammo
asucisaṅkassarasamācāro paṭicchannakammanto assamaṇo samaṇapaṭiñño
abrahmacārī brahmacāripaṭiñño antopūti avassuto
kasambukajāto na tena saṅgho saṁvasati atha kho [1]- khippameva
sannipatitvā ukkhipati kiñcāpi so hoti majjhe bhikkhusaṅghassa
nisinno atha kho so ārakā ca saṅghamhā saṅgho ca tena
yampi bhikkhave yo so puggalo dussīlo pāpadhammo asucisaṅkassarasamācāro
paṭicchannakammanto assamaṇo samaṇapaṭiñño abrahmacārī
brahmacāripaṭiñño antopūti avassuto kasambukajāto na
tena saṅgho saṁvasati atha kho khippameva sannipatitvā ukkhipati
kiñcāpi so hoti majjhe bhikkhusaṅghassa nisinno atha kho so
ārakā ca saṅghamhā saṅgho ca tena ayampi bhikkhave imasmiṁ
1 Ma. Yu. naṁ.
Dhammavinaye tatiyo acchariyo abbhūtadhammo yaṁ disvā disvā bhikkhū
imasmiṁ dhammavinaye abhiramanti.
4 Seyyathāpi bhikkhave yā kāci mahānadiyo seyyathīdaṁ gaṅgā
yamunā aciravatī sarabhū mahī tā mahāsamuddaṁ pattā jahanti purimāni
nāmagottāni mahāsamuddo tveva saṅkhyaṁ gacchanti evameva
kho bhikkhave cattāro vaṇṇā khattiyā brāhmaṇā vessā
suddā te tathāgatappavedite dhammavinaye agārasmā anagāriyaṁ
pabbajitvā jahanti purimāni nāmagottāni samaṇā sakyaputtiyā
tveva saṅkhyaṁ 1 gacchanti yampi bhikkhave cattāro vaṇṇā khattiyā
brāhmaṇā vessā suddā te tathāgatappavedite dhammavinaye
agārasmā anagāriyaṁ pabbajitvā jahanti purimāni nāmagottāni
samaṇā sakyaputtiyā tveva saṅkhyaṁ gacchanti ayampi bhikkhave
imasmiṁ dhammavinaye catuttho acchariyo abbhūtadhammo yaṁ disvā
disvā bhikkhū imasmiṁ dhammavinaye abhiramanti.
5 Seyyathāpi bhikkhave yā ca loke savantiyo mahāsamuddaṁ
appenti yā ca antalikkhā dhārā papatanti na tena mahāsamuddassa
ūnattaṁ vā pūrattaṁ vā paññāyati evameva kho bhikkhave bahūpi 2
bhikkhū anupādisesāya nibbānadhātuyā parinibbāyanti na tena
nibbānadhātuyā ūnattaṁ vā pūrattaṁ vā paññāyati yampi bhikkhave
bhikkhū anupādisesāya nibbānadhātuyā parinibbāyanti na tena
1 Ma. Yu. sabbattha saṅkhanti dissati. 2 Ma. Yu. bahū cepi.
Nibbānadhātuyā ūnattaṁ vā pūrattaṁ vā paññāyati ayampi bhikkhave
imasmiṁ dhammavinaye pañcamo accariyo abbhūtadhammo yaṁ disvā
disvā bhikkhū imasmiṁ dhammavinaye abhiramanti.
6 Seyyathāpi bhikkhave mahāsamuddo ekaraso loṇaraso evameva
kho bhikkhave ayaṁ dhammavinayo ekaraso vimuttiraso yampi bhikkhave
ayaṁ dhammavinayo ekaraso vimuttiraso ayampi bhikkhave imasmiṁ
dhammavinaye chaṭṭho acchariyo abbhūtadhammo yaṁ disvā disvā
bhikkhū imasmiṁ dhammavinaye abhiramanti.
7 Seyyathāpi bhikkhave mahāsamuddo bahuratano anekaratano
tatrīmāni ratanāni seyyathīdaṁ muttā maṇi veḷuriyo saṅkho silā
pavāḷaṁ rajataṁ jātarūpaṁ lohitaṅgo masāragallo evameva kho bhikkhave
ayaṁ dhammavinayo bahuratano anekaratano tatrīmāni ratanāni
seyyathīdaṁ cattāro satipaṭṭhānā cattāro sammappadhānā cattāro
iddhippādā pañcindriyāni pañca balāni satta bojjhaṅgā
ariyo aṭṭhaṅgiko maggo yampi bhikkhave ayaṁ dhammavinayo bahuratano
anekaratano tatrīmāni ratanāni seyyathīdaṁ cattāro satipaṭṭhānā
cattāro sammappadhānā cattāro iddhippādā
pañcindriyāni pañca balāni satta bojjhaṅgā ariyo aṭṭhaṅgiko
maggo ayampi bhikkhave imasmiṁ dhammavinaye sattamo acchariyo
abbhūtadhammo yaṁ disvā disvā bhikkhū imasmiṁ dhammavinaye abhiramanti.
8 Seyyathāpi bhikkhave mahāsamuddo mahataṁ bhūtānaṁ āvāso
tatrīme bhūtā timi timiṅgalo timitimiṅgalo asurā nāgā gandhabbā
santi mahāsamudde yojanasatikāpi attabhāvā dviyojanasatikāpi
attabhāvā tiyojanasatikāpi attabhāvā catuyojanasatikāpi attabhāvā
pañcayojanasatikāpi attabhāvā evameva kho bhikkhave ayaṁ dhammavinayo
mahataṁ bhūtānaṁ āvāso tatrīme bhūtā sotāpanno sotāpattiphalasacchikiriyāya
paṭipanno sakadāgāmī sakadāgāmiphalasacchikiriyāya
paṭipanno anāgāmī anāgāmiphalasacchikiriyāya paṭipanno arahā
arahattāya paṭipanno yampi bhikkhave ayaṁ dhammavinayo mahataṁ bhūtānaṁ
āvāso tatrīme bhūtā sotāpanno sotāpattiphalasacchikiriyāya
paṭipanno sakadāgāmī sakadāgāmiphalasacchikiriyāya paṭipanno anāgāmī
anāgāmiphalasacchikiriyāya paṭipanno arahā arahattāya paṭipanno
ayampi bhikkhave imasmiṁ dhammavinaye aṭṭhamo acchariyo abbhūtadhammo
yaṁ disvā disvā bhikkhū imasmiṁ dhammavinaye abhiramanti.
Ime kho bhikkhave imasmiṁ dhammavinaye aṭṭha acchariyā abbhūtadhammā
yaṁ disvā disvā bhikkhū imasmiṁ dhammavinaye abhiramantīti.
Atha kho bhagavā etamatthaṁ viditvā tāyaṁ velāyaṁ imaṁ udānaṁ
udānesi
channamativassati vivaṭaṁ nātivassati
tasmā channaṁ vivaretha evantaṁ nātivassatīti. Pañcamaṁ.

[119] 6 Evamme sutaṁ. Ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Tena kho pana samayena
āyasmā mahākaccāno avantīsu viharati kururaghare 1 pavatte
pabbate. Tena kho pana samayena soṇo upāsako koṭikaṇṇo 2 āyasmato
mahākaccānassa upaṭṭhāko hoti. Atha kho soṇassa upāsakassa
koṭikaṇṇassa rahogatassa paṭisallīnassa evaṁ cetaso parivitakko
udapādi yathā yathā kho ayyo mahākaccāno dhammaṁ deseti nayidaṁ
sukaraṁ agāraṁ ajjhāvasatā ekantaparipuṇṇaṁ ekantaparisuddhaṁ saṅkhalikhitaṁ
brahmacariyaṁ carituṁ yannūnāhaṁ kesamassuṁ ohāretvā kāsāyāni
vatthāni acchādetvā agārasmā anagāriyaṁ pabbajeyyanti.
Atha kho soṇo upāsako koṭikaṇṇo yenāyasmā mahākaccāno
tenupasaṅkami upasaṅkamitvā āyasmantaṁ mahākaccānaṁ abhivādetvā
ekamantaṁ nisīdi. Ekamantaṁ nisinno kho soṇo upāsako
koṭikaṇṇo āyasmantaṁ mahākaccānaṁ etadavoca idha mayhaṁ bhante
rahogatassa paṭisallīnassa evaṁ cetaso parivitakko udapādi yathā
yathā kho ayyo mahākaccāno dhammaṁ deseti nayidaṁ sukaraṁ agāraṁ
ajjhāvasatā ekantaparipuṇṇaṁ ekantaparisuddhaṁ saṅkhalikhitaṁ brahmacariyaṁ
carituṁ yannūnāhaṁ kesamassuṁ ohāretvā kāsāyāni vatthāni
acchādetvā agārasmā anagāriyaṁ pabbajeyyanti pabbājetu maṁ
1 Ma. Yu. kuraraghare 2 kuṭikaṇṇotipi.
Bhante ayyo mahākaccānoti.

[120] Evaṁ vutte āyasmā mahākaccāno soṇaṁ upāsakaṁ
koṭikaṇṇaṁ etadavoca dukkaraṁ kho soṇa yāvajīvaṁ ekabhattaṁ ekaseyyaṁ
brahmacariyaṁ iṅgha tvaṁ soṇa tattheva agārikabhūto samāno
buddhānaṁ sāsanaṁ anuyuñja kālayuttaṁ ekabhattaṁ ekaseyyaṁ brahmacariyanti.
Atha kho soṇassa upāsakassa koṭikaṇṇassa yo ahosi
pabbajjābhisaṅkhāro so paṭipassambhi. Dutiyampi kho soṇassa
upāsakassa koṭikaṇṇassa rahogatassa paṭisallīnassa evaṁ cetaso
parivitakko udapādi yathā yathā kho ayyo mahākaccāno dhammaṁ
deseti nayidaṁ sukaraṁ agāraṁ ajjhāvasatā ekantaparipuṇṇaṁ
ekantaparisuddhaṁ saṅkhalikhitaṁ brahmacariyaṁ carituṁ yannūnāhaṁ kesamassuṁ
ohāretvā kāsāyāni vatthāni acchādetvā agārasmā anagāriyaṁ
pabbajeyyanti. Dutiyampi kho soṇo upāsako koṭikaṇṇo
yenāyasmā mahākaccāno tenupasaṅkami upasaṅkamitvā āyasmantaṁ
mahākaccānaṁ abhivādetvā ekamantaṁ nisīdi. Ekamantaṁ
nisinno kho soṇo upāsako koṭikaṇṇo āyasmantaṁ mahākaccānaṁ
etadavoca idha mayhaṁ bhante rahogatassa paṭisallīnassa evaṁ cetaso
parivitakko udapādi yathā yathā kho ayyo mahākaccāno dhammaṁ
deseti nayidaṁ sukaraṁ agāraṁ ajjhāvasatā ekantaparipuṇṇaṁ ekantaparisuddhaṁ
saṅkhalikhitaṁ brahmacariyaṁ carituṁ yannūnāhaṁ kesamassuṁ
Ohāretvā kāsāyāni vatthāni acchādetvā agārasmā anagāriyaṁ
pabbajeyyanti pabbājetu maṁ bhante ayyo mahākaccānoti.
Dutiyampi kho āyasmā mahākaccāno soṇaṁ upāsakaṁ koṭikaṇṇaṁ
etadavoca dukkaraṁ kho soṇa yāvajīvaṁ ekabhattaṁ ekaseyyaṁ brahmacariyaṁ
iṅgha tvaṁ soṇa tattheva agārikabhūto samāno buddhānaṁ sāsanaṁ
anuyuñja kālayuttaṁ ekabhattaṁ ekaseyyaṁ brahmacariyanti. Dutiyampi
kho soṇassa upāsakassa koṭikaṇṇassa yo ahosi pabbajjābhisaṅkhāro
so paṭipassambhi. Tatiyampi kho soṇassa upāsakassa
koṭikaṇṇassa rahogatassa paṭisallīnassa evaṁ cetaso parivitakko
udapādi yathā yathā kho ayyo mahākaccāno dhammaṁ deseti nayidaṁ
sukaraṁ agāraṁ ajjhāvasatā ekantaparipuṇṇaṁ ekantaparisuddhaṁ saṅkhalikhitaṁ
brahmacariyaṁ carituṁ yannūnāhaṁ kesamassuṁ ohāretvā
kāsāyāni vatthāni acchādetvā agārasmā anagāriyaṁ pabbajeyyanti.
Tatiyampi kho soṇo upāsako koṭikaṇṇo yenāyasmā
mahākaccāno tenupasaṅkami upasaṅkamitvā āyasmantaṁ mahākaccānaṁ
abhivādetvā ekamantaṁ nisīdi. Ekamantaṁ nisinno kho soṇo
upāsako koṭikaṇṇo āyasmantaṁ mahākaccānaṁ etadavoca idha
mayhaṁ bhante rahogatassa paṭisallīnassa evaṁ cetaso parivitakko
udapādi yathā yathā kho ayyo mahākaccāno dhammaṁ deseti nayidaṁ
sukaraṁ agāraṁ ajjhāvasatā ekantaparipuṇṇaṁ ekantaparisuddhaṁ saṅkhalikhitaṁ
Brahmacariyaṁ carituṁ yannūnāhaṁ kesamassuṁ ohāretvā
kāsāyāni vatthāni acchādetvā agārasmā anagāriyaṁ pabbajeyyanti
pabbājetu maṁ bhante ayyo mahākaccānoti. Atha kho āyasmā
mahākaccāno soṇaṁ upāsakaṁ koṭikaṇṇaṁ pabbājesi.

[121] Tena kho pana samayena avantidakkhiṇāpatho 1 appabhikkhuko
hoti. Atha kho āyasmā mahākaccāno tiṇṇaṁ vassānaṁ
accayena kicchena kasirena tato tato dasavaggaṁ bhikkhusaṅghaṁ
sannipātetvā āyasmantaṁ soṇaṁ upasampādesi. Atha kho āyasmato
soṇassa vassaṁ vuṭṭhassa rahogatassa paṭisallīnassa evaṁ cetaso
parivitakko udapādi na kho me so bhagavā sammukhā diṭṭho
api ca suto yeva me so bhagavā īdiso ca īdiso cāti
sace maṁ upajjhāyo anujāneyya gaccheyyāhaṁ taṁ bhagavantaṁ
dassanāya arahantaṁ sammāsambuddhanti. Atha kho āyasmā soṇo
sāyaṇhasamayaṁ paṭisallānā vuṭṭhito yenāyasmā mahākaccāno
tenupasaṅkami upasaṅkamitvā āyasmantaṁ mahākaccānaṁ abhivādetvā
ekamantaṁ nisīdi. Ekamantaṁ nisinno kho āyasmā soṇo
āyasmantaṁ mahākaccānaṁ etadavoca idha mayhaṁ bhante rahogatassa
paṭisallīnassa evaṁ cetaso parivitakko udapādi na kho me so
bhagavā sammukhā diṭṭho api ca suto yeva me so bhagavā
īdiso ca īdiso cāti sace maṁ upajjhāyo anujāneyya
1 Po. Yu. avantīsu dakkhiṇāpatho
Gaccheyyāhaṁ taṁ bhagavantaṁ dassanāya arahantaṁ sammāsambuddhanti.
Sādhu sādhu soṇa gaccha tvaṁ soṇa taṁ bhagavantaṁ dassanāya
arahantaṁ sammāsambuddhanti 1 dakkhissasi tvaṁ soṇa taṁ bhagavantaṁ
pāsādikaṁ pāsādanīyaṁ santindriyaṁ santamānasaṁ uttamasamathadamathamanupattaṁ
dantaṁ guttaṁ yatindriyaṁ nāgaṁ disvāna mama vacanena bhagavato
pāde sirasā vandāhi appābādhaṁ appātaṅkaṁ lahuṭṭhānaṁ balaṁ
phāsuvihāraṁ pucchāti. Evaṁ bhanteti kho āyasmā soṇo
āyasmato mahākaccānassa bhāsitaṁ abhinanditvā anumoditvā
uṭṭhāyāsanā āyasmantaṁ mahākaccānaṁ abhivādetvā padakkhiṇaṁ katvā
senāsanaṁ saṁsāmetvā pattacīvaramādāya yena sāvatthī tena
cārikaṁ pakkāmi. Anupubbena cārikañcaramāno yena sāvatthī
jetavanaṁ anāthapiṇḍikassa ārāmo yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinno kho āyasmā soṇo bhagavantaṁ etadavoca upajjhāyo
me bhante āyasmā mahākaccāno bhagavato pāde sirasā vandati
appābādhaṁ appātaṅkaṁ lahuṭṭhānaṁ balaṁ phāsuvihāraṁ pucchatīti.
Kacci bhikkhu khamanīyaṁ kacci yāpanīyaṁ kaccipi appakilamathena addhānaṁ
āgato na ca piṇḍakena kilantosīti. Khamanīyaṁ bhagavā yāpanīyaṁ
bhagavā appakilamathena cāhaṁ bhante addhānaṁ āgato na ca
piṇḍakena kilantomhīti.
1 Ma. itisaddo natthi.

[122] Atha kho bhagavā āyasmantaṁ ānandaṁ āmantesi
imassānanda āgantukassa bhikkhuno senāsanaṁ paññāpehīti.
Atha kho āyasmato ānandassa etadahosi yassa kho maṁ bhagavā
āṇāpeti imassa ānanda āgantukassa bhikkhuno senāsanaṁ
paññāpehīti icchati bhagavā tena bhikkhunā saddhiṁ ekavihāre vatthuṁ
icchati bhagavā āyasmatā soṇena saddhiṁ ekavihāre vatthunti.
Yasmiṁ vihāre bhagavā viharati tasmiṁ vihāre āyasmato soṇassa
senāsanaṁ paññāpesi. Atha kho bhagavā bahudeva rattiṁ abbhokāse
nipajjāya 1 vītināmetvā pāde pakkhāletvā vihāraṁ pāvisi.
Āyasmāpi kho soṇo bahudeva rattiṁ abbhokāse nipajjāya
vītināmetvā pāde pakkhāletvā vihāraṁ pāvisi. Atha kho bhagavā
rattiyā paccūsasamayaṁ paccuṭṭhāya āyasmantaṁ mahāsoṇaṁ ajjhesi
paṭibhātu taṁ bhikkhu dhammaṁ bhāsitunti. Evaṁ bhanteti kho āyasmā
soṇo bhagavato paṭissutvā soḷasa aṭṭhakavaggikāni sabbāneva
sarena abhaṇi. Atha kho bhagavā āyasmato soṇasassa sarabhaññapariyosāne
abbhānumodi sādhu sādhu bhikkhu suggahitāni bhikkhu
aṭṭhakavaggikāni sumanasikatāni supadhāritāni kalyāṇiyāsi vācāya
samannāgato visaṭṭhāya anelāya 2 atthassa viññāpaniyā
kativassosi tvaṁ bhikkhūti. Ekavasso ahaṁ bhagavāti. Kissa pana
1 Po. Ma. Yu. nissajjāya. 2 Ma. anelagalāya.
Tvaṁ bhikkhu evaṁ ciraṁ akāsīti. Ciraṁ diṭṭho me bhante kāmesu
ādīnavo api ca sambādho gharāvāso bahukicco bahukaraṇīyoti.
Atha kho bhagavā etamatthaṁ viditvā tāyaṁ velāyaṁ imaṁ udānaṁ
udānesi
disvā ādīnavaṁ loke ñatvā dhammaṁ nirūpadhi 1
ariyo na ramati pāpe pāpe na ramatī sucīti. Chaṭṭhaṁ.

[123] 7 Evamme sutaṁ. Ekaṁ samayaṁ bhagavā sāvatthiyaṁ
viharati jetavane anāthapiṇḍikassa ārāme. Tena kho pana samayena
āyasmā kaṅkhārevato bhagavato avidūre nisinno hoti pallaṅkaṁ
ābhujitvā ujuṁ kāyaṁ paṇidhāya attano kaṅkhāvitaraṇavisuddhiṁ
paccavekkhamāno. Addasā kho bhagavā āyasmantaṁ kaṅkhārevataṁ
avidūre nisinnaṁ pallaṅkaṁ ābhujitvā ujuṁ kāyaṁ paṇidhāya attano
kaṅkhāvitaraṇavisuddhiṁ paccavekkhamānaṁ. Atha kho bhagavā etamatthaṁ
viditvā tāyaṁ velāyaṁ imaṁ udānaṁ udānesi
yā kāci kaṅkhā idha vā huraṁ vā
sakavediyā vā paravediyā vā
jhāyino 2 tā pajahanti sabbā
ātāpino brahmacariyaṁ carantāti. Sattamaṁ.

[124] 8 Evamme sutaṁ. Ekaṁ samayaṁ bhagavā rājagahe
1 Po. Ma. nirūpadhiṁ. 2 Ma. ye jhāyino.
Viharati veḷuvane kalandakanivāpe. Tena kho pana samayena āyasmā
ānando tadahuposathe pubbaṇhasamayaṁ nivāsetvā pattacīvaramādāya
rājagahaṁ piṇḍāya pāvisi. Addasā kho devadatto āyasmantaṁ
ānandaṁ rājagahe piṇḍāya carantaṁ disvāna yena āyasmā
ānando tenupasaṅkami upasaṅkamitvā āyasmantaṁ ānandaṁ
etadavoca ajjataggedānāhaṁ āvuso ānanda aññatreva bhagavatā
aññatra bhikkhusaṅghā uposathaṁ karissāmi saṅghakammāni cāti.
Atha kho āyasmā ānando rājagahe piṇḍāya caritvā
pacchābhattaṁ piṇḍapātapaṭikkanto yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinno kho āyasmā ānando bhagavantaṁ etadavoca idhāhaṁ bhante
pubbaṇhasamayaṁ nivāsetvā pattacīvaramādāya rājagahaṁ piṇḍāya
pāvisiṁ addasā kho maṁ bhante devadatto rājagahaṁ piṇḍāya
carantaṁ disvāna yenāhaṁ tenupasaṅkami upasaṅkamitvā maṁ
etadavoca ajjataggedānāhaṁ āvuso ānanda aññatreva bhagavatā
aññatra bhikkhusaṅghā uposathaṁ karissāmi saṅghakammāni cāti ajja
bhante devadatto saṅghaṁ bhindissati uposathañca karissati
saṅghakammāni cāti. Atha kho bhagavā etamatthaṁ viditvā tāyaṁ
velāyaṁ imaṁ udānaṁ udānesi
sukaraṁ sādhunā sādhu sādhu pāpena dukkaraṁ
Pāpaṁ pāpena sukaraṁ pāpamariyehi dukkaranti. Aṭṭhamaṁ.

[125] 9 Evamme sutaṁ. Ekaṁ samayaṁ bhagavā kosalesu
cārikaṁ carati mahatā bhikkhusaṅghena saddhiṁ. Tena kho pana samayena
sambahulā māṇavakā bhagavato avidūre saddāyamānarūpā 1 atikkamanti.
Addasā kho bhagavā sambahule māṇavake avidūre saddāyamānarūpe
atikkamante. Atha kho bhagavā etamatthaṁ viditvā tāyaṁ velāyaṁ
imaṁ udānaṁ udānesi
parimuṭṭhā paṇḍitā bhāsā vācāgocarabhāṇino
yāvicchanti mukhāyāmaṁ yena nītā na taṁ vidūti. Navamaṁ.

[126] 10 Evamme sutaṁ. Ekaṁ samayaṁ bhagavā sāvatthiyaṁ
viharati jetavane anāthapiṇḍikassa ārāme. Tena kho pana samayena
āyasmā cūḷapanthako bhagavato avidūre nisinno hoti pallaṅkaṁ
ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā. Addasā
kho bhagavā āyasmantaṁ cūḷapanthakaṁ avidūre nisinnaṁ pallaṅkaṁ
ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā. Atha
kho bhagavā etamatthaṁ viditvā tāyaṁ velāyaṁ imaṁ udānaṁ udānesi
ṭhitena kāyena ṭhitena cetasā
tiṭṭhaṁ nisinno uda vā sayāno
etaṁ satiṁ bhikkhu adhiṭṭhahāno
1 Po. saddhāyamānarūpā. Ma. sadhāyamānarūpā.
Labhetha pubbāpariyaṁ visesaṁ
laddhāna pubbāpariyaṁ visesaṁ
adassanaṁ maccurājassa gaccheti.
Soṇattheravaggo pañcamo.
Tassuddānaṁ
rājā appāyukā kuṭṭhī kumārakā ca uposatho
soṇo ca revato nando saddāyamānā panthakena cāti.
----------
Udāne chaṭṭho jaccandhavaggo