[7] Yānīdha bhūtāni samāgatāni
bhummāni vā yāni va antalikkhe.
Sabbeva bhūtā sumanā bhavantu
athopi sakkacca suṇantu bhāsitaṁ
tasmā hi bhūtā nisāmetha sabbe
mettaṁ karotha mānusiyā pajāya.
Divā ca ratto ca haranti ye baliṁ
tasmā hi ne rakkhatha appamattā.
Yaṁ kiñci vittaṁ idha vā huraṁ vā
saggesu vā yaṁ ratanaṁ paṇītaṁ
na no samaṁ atthi tathāgatena
idampi buddhe ratanaṁ paṇītaṁ.
Etena saccena suvatthi hotu.
Khayaṁ virāgaṁ amataṁ paṇītaṁ
yadajjhagā sakyamunī samāhito
na tena dhammena samatthi kiñci
idampi dhamme ratanaṁ paṇītaṁ.
Etena saccena suvatthi hotu.
Yambuddhaseṭṭho parivaṇṇayī suciṁ
samādhimānantarikaññamāhu
samādhinā tena samo na vijjati
idampi dhamme ratanaṁ paṇītaṁ.
Etena saccena suvatthi hotu.
Ye puggalā aṭṭha sataṁ pasaṭṭhā
cattāri etāni yugāni honti
te dakkhiṇeyyā sugatassa sāvakā
etesu dinnāni mahapphalāni
idampi saṅghe ratanaṁ paṇītaṁ.
Etena saccena suvatthi hotu.
Ye suppayuttā manasā daḷhena
nikkāmino gotamasāsanamhi
te pattipattā amataṁ vigayha
laddhā mudhā nibbutiṁ bhuñjamānā
idampi saṅghe ratanaṁ paṇītaṁ.
Etena saccena suvatthi hotu.
Yathindakhīlo paṭhaviṁ sito siyā
catubbhi vātebhi asampakampiyo
tathūpamaṁ sappurisaṁ vadāmi
Yo ariyasaccāni avecca passati
idampi saṅghe ratanaṁ paṇītaṁ.
Etena saccena suvatthi hotu.
Yerīyasaccāni 1 vibhāvayanti
gambhīrapaññena sudesitāni
kiñcāpi te honti bhusappamattā
na te bhavaṁ aṭṭhamamādiyanti
idampi saṅghe ratanaṁ paṇītaṁ.
Etena saccena suvatthi hotu.
Sahāvassa dassanasampadāya
tayassu dhammā jahitā bhavanti
sakkāyadiṭṭhi vicikicchitañca
sīlabbataṁ vāpi yadatthi kiñci
catūhapāyehi ca vippamutto
cha cābhiṭhānāni abhabbo kātuṁ
idampi saṅghe ratanaṁ paṇītaṁ.
Etena saccena suvatthi hotu.
Kiñcāpi so kammaṁ karoti pāpakaṁ
kāyena vācāyuda cetasā vā
abhabbo so tassa paṭicchadāya
1 idāni pāyato paṭhanti "ye ariyasaccāni vibhāvayantīti ."
Abhabbatā diṭṭhapadassa vuttā
idampi saṅghe ratanaṁ paṇītaṁ.
Etena saccena suvatthi hotu.
Vanappagumbe yathā phussitagge
gimhānamāse paṭhamasmiṁ gimhe
tathūpamaṁ dhammavaraṁ adesayi
nibbānagāmiṁ paramaṁ hitāya
idampi buddhe ratanaṁ paṇītaṁ.
Etena saccena suvatthi hotu.
Varo varaññū varado varāharo
anuttaro dhammavaraṁ adesayi
idampi buddhe ratanaṁ paṇītaṁ.
Etena saccena suvatthi hotu.
Khīṇaṁ purāṇaṁ navaṁ natthi sambhavaṁ
virattacittāyatike bhavasmiṁ
te khīṇabījā aviruḷhichandā
nibbanti dhīrā yathāyampadīpo
idampi saṅghe ratanaṁ paṇītaṁ.
Etena saccena suvatthi hotu.
Yānīdha bhūtāni samāgatāni
Bhummāni vā yāniva antalikkhe
tathāgataṁ devamanussapūjitaṁ
buddhaṁ namassāma suvatthi hotu.
Yānīdha bhūtāni samāgatāni
bhummāni vā yāniva antalikkhe
tathāgataṁ devamanussapūjitaṁ
dhammaṁ namassāma suvatthi hotu.
Yānīdha bhūtāni samāgatāni
bhummāni vā yāniva antalikkhe
tathāgataṁ devamanussapūjitaṁ
saṅghaṁ namassāma suvatthi hotu.
Ratanasuttaṁ niṭṭhitaṁ.
-------
Khuddakapāṭhe tirokuḍḍakaṇḍaṁ

[8] (mattāsukhapariccāgā passe ce vipulaṁ sukhaṁ
caje mattāsukhaṁ dhīro sampassaṁ vipulaṁ sukhaṁ .)
tirokuḍḍesu tiṭṭhanti sandhisiṅghāṭakesu ca
dvārabāhāsu tiṭṭhanti āgantvāna sakaṁ gharaṁ.
Pahute 1 annapānamhi khajjabhojje upaṭṭhite
1 Ma. pahūte.
Na tesaṁ koci sarati sattānaṁ kammapaccayā.
Evaṁ dadanti ñātīnaṁ ye honti anukampakā
suciṁ paṇītaṁ kālena kappiyaṁ pānabhojanaṁ
idaṁ vo ñātīnaṁ hotu sukhitā hontu ñātayo.
Te ca tattha samāgantvā ñātipetā samāgatā
pahute 1 annapānamhi sakkaccaṁ anumodare
ciraṁ jīvantu no ñātī yesaṁ hetu labhāmhase.
Amhākañca katā pūjā dāyakā ca anipphalā.
Na hi tattha kasi atthi gorakkhettha na vijjati
vaṇijjā tādisī natthi hiraññena kayākayaṁ.
Ito dinnena yāpenti petā kālakatā tahiṁ
unnate 2 udakaṁ vuṭṭhaṁ yathā ninnaṁ pavattati
evameva ito dinnaṁ petānaṁ upakappati.
Yathā vārivahā pūrā paripūrenti sāgaraṁ
evameva ito dinnaṁ petānaṁ upakappati.
Adāsi me akāsi me ñātimittā sakhā ca me
petānaṁ dakkhiṇaṁ dajjā pubbe katamanussaraṁ.
Na hi ruṇṇaṁ vā soko vā yāvaññā paridevanā
na taṁ petānamatthāya evaṁ tiṭṭhanti ñātayo.
Ayañca kho dakkhiṇā dinnā saṅghamhi supatiṭṭhitā
1 Ma. pahūte. 2 Ma. unname.
Dīgharattaṁ hitāyassa ṭhānaso upakappati.
So ñātidhammo ca ayaṁ nidassito
petānapūjā ca katā uḷārā
balañca bhikkhūnamanuppadinnaṁ
tumhehi puññaṁ pasutaṁ anappakanti.
Tirokuḍḍakaṇḍaṁ niṭṭhitaṁ.
----------
Khuddakapāṭhe nidhikaṇḍaṁ

[9] Nidhiṁ nidheti puriso gambhīre udakantike
atthe kicce samuppanne atthāya me bhavissati
rājato vā duruttassa corato pīḷitassa vā
iṇassa vā pamokkhāya dubbhikkhe āpadāsu vā
etadatthāya lokasmiṁ nidhi nāma nidhiyyati.
Tāvassunihito santo gambhīre udakantike
na sabbo sabbadā yeva tassa taṁ upakappati
nidhi vā ṭhānā cavati saññā vāssa vimuyhati
nāgā vā apanāmenti yakkhā vāpi haranti naṁ
appiyā vāpi dāyādā uddharanti apassato
yadā puññakkhayo hoti sabbametaṁ vinassati.
Yassa dānena sīlena saññamena damena ca
nidhi sunihito hoti itthiyā purisassa vā
cetiyamhi ca saṅghe vā puggale atithīsu vā
mātari pitari vāpi atho jeṭṭhamhi bhātari
eso nidhi sunihito ajeyyo anugāmiko
pahāya gamanīyesu etaṁ ādāya gacchati.
Asādhāraṇamaññesaṁ acoraharaṇo nidhi.
Kayirātha dhīro puññāni yo nidhi anugāmiko
esa devamanussānaṁ sabbakāmadado nidhi
yaṁ yaṁ devābhipatthenti sabbametena labbhati
suvaṇṇatā susaratā susaṇṭhānaṁ 1 surūpatā
ādhipaccaṁ parivāro sabbametena labbhati.
Padesarajjaṁ issariyaṁ cakkavattisukhaṁ piyaṁ
devarajjampi dibbesu sabbametena labbhati.
Mānussikā ca sampatti devaloke ca yā rati
yā ca nibbānasampatti sabbametena labbhati.
Mittasampadamāgamma yoniso ce payuñjato
vijjāvimuttivasībhāvo sabbametena labbhati.
Paṭisambhidā vimokkhā ca yā ca sāvakapāramī
paccekabodhi buddhabhūmi sabbametena labbhati.
1 Ma. susaṇṭhānā.
Evaṁ mahatthikā esā yadidaṁ puññasampadā
tasmā dhīrā pasaṁsanti paṇḍitā katapuññatanti.
Nidhikaṇḍaṁ niṭṭhitaṁ.
-------
Khuddakapāṭhe karaṇīyamettasuttaṁ

[10] Karaṇīyamatthakusalena yantaṁ santaṁ padaṁ abhisamecca
sakko ujū ca suhujū ca suvaco cassa mudu anatimānī
santussako ca subharo ca appakicco ca sallahukavutti
santindriyo ca nipako ca appagabbho kulesu ananugiddho.
Na ca khuddaṁ samācare kiñci yena viññū pare upavadeyyuṁ.
Sukhino vā khemino hontu sabbe sattā bhavantu sukhitattā
yekeci pāṇabhūtatthi tasā vā thāvarā vā anavasesā
dīghā vā ye mahantā vā majjhimā rassakā aṇukathūlā
diṭṭhā vā ye 1 ca adiṭṭhā ye 1 ca dūre vasanti avidūre
bhūtā vā sambhavesī vā sabbe sattā bhavantu sukhitattā
na paro paraṁ nikubbetha nātimaññetha katthaci naṁ 2 kiñci
byārosanā paṭīghasaññā nāññamaññassa dukkhamiccheyya.
Mātā yathā niyaṁ puttaṁ āyusā ekaputtamanurakkhe
evampi sabbabhūtesu mānasambhāvaye aparimāṇaṁ
1 Ma. ye va. 2 Ma. na kiñci.
Mettañca sabbalokasmiṁ mānasambhāvaye aparimāṇaṁ
uddhaṁ adho ca tiriyañca asambādhaṁ averaṁ asapattaṁ
tiṭṭhañcaraṁ nisinno vā sayāno vā yāva tassa vigatamiddho
etaṁ satiṁ adhiṭṭheyya brahmametaṁ vihāraṁ idhamāhu 1 .
Diṭṭhiñca anupagamma sīlavā dassanena sampanno
kāmesu vineyya 2 gedhaṁ na hi jātu gabbhaseyyaṁ punaretīti.
Mettasuttaṁ niṭṭhitaṁ.
Khuddakapāṭho samatto.
-------
1 Ma. vihāramidhamāhu. 2 Ma. vinaya.
Suttantapiṭake khuddakanikāyassa
dhammapadagāthā
---------
namo tassa bhagavato arahato sammāsambuddhassa.
Dhammapadagāthāya paṭhamo yamakavaggo

[11] 1 Manopubbaṅgamā dhammā manoseṭṭhā manomayā
manasā ce paduṭṭhena bhāsati vā karoti vā
tato naṁ dukkhamanveti cakkaṁva vahato padaṁ.
Manopubbaṅgamā dhammā manoseṭṭhā manomayā
manasā ce pasannena bhāsati vā karoti vā
tato naṁ sukhamanveti chāyāva anupāyinī.
Akkocchi maṁ avadhi maṁ ajini maṁ ahāsi me
ye ca taṁ upanayhanti veraṁ tesaṁ na sammati.
Akkocchi maṁ avadhi maṁ ajini maṁ ahāsi me
ye ca taṁ nūpanayhanti veraṁ tesūpasammati.
Na hi verena verāni sammantīdha kudācanaṁ
averena ca sammanti esa dhammo sanantano.
Pare ca na vijānanti mayamettha yamāmhase
ye ca tattha vijānanti tato sammanti medhagā.
Subhānupassiṁ viharantaṁ indriyesu asaṁvutaṁ
bhojanamhi amattaññuṁ 1 kusītaṁ hīnavīriyaṁ
taṁ ve pasahati māro vāto rukkhaṁva dubbalaṁ.
Asubhānupassiṁ viharantaṁ indriyesu susaṁvutaṁ
bhojanamhi ca mattaññuṁ saddhaṁ āraddhavīriyaṁ
taṁ ve nappasahati māro vāto selaṁva pabbataṁ.
Anikkasāvo kāsāvaṁ yo vatthaṁ paridahessati
apeto damasaccena na so kāsāvamarahati.
Yo ca vantakasāvassa sīlesu susamāhito
upeto damasaccena sa ve kāsāvamarahati.
Asāre sāramatino sāre cāsāradassino
te sāraṁ nādhigacchanti micchāsaṅkappagocarā.
Sārañca sārato ñatvā asārañca asārato
te sāraṁ adhigacchanti sammāsaṅkappagocarā.
Yathā agāraṁ ducchannaṁ vuṭṭhī samativijjhati
evaṁ abhāvitaṁ cittaṁ rāgo samativijjhati.
Yathā agāraṁ succhannaṁ vuṭṭhī na samativijjhati
evaṁ subhāvitaṁ cittaṁ rāgo na samativijjhati.
1 Ma. cāmattaññuṁ.
Idha socati pecca socati pāpakārī ubhayattha socati
so socati so vihaññati disvā kammakiliṭṭhamattano.
Idha modati pecca modati katapuñño ubhayattha modati
so modati so pamodati disvā kammavisuddhimattano.
Idha tappati pecca tappati pāpakārī ubhayattha tappati
pāpaṁ me katanti tappati bhiyyo tappati duggatiṁ gato.
Idha nandati pecca nandati katapuñño ubhayattha nandati
puññaṁ me katanti nandati bhiyyo nandati sugatiṁ gato.
Bahumpi ce sahitaṁ 1 bhāsamāno
na takkaro hoti naro pamatto
gopova gāvo gaṇayaṁ paresaṁ
na bhāgavā sāmaññassa hoti.
Appampi ce sahitaṁ bhāsamāno
dhammassa hoti anudhammacārī
rāgañca dosañca pahāya mohaṁ
sammappajāno suvimuttacitto
anupādiyāno idha vā huraṁ vā
sa bhāgavā sāmaññassa hoti.
Yamakavaggo paṭhamo.
--------------
1 Ma. saṁhita..
Dhammapadagāthāya dutiyo appamādavaggo

[12] 2 Appamādo amataṁ padaṁ pamādo maccuno padaṁ
appamattā na mīyanti ye pamattā yathā matā
etaṁ 1 visesato ñatvā appamādamhi paṇḍitā
appamāde pamodanti ariyānaṁ gocare ratā
te jhāyino sātatikā niccaṁ daḷhaparakkamā
phusanti dhīrā nibbānaṁ yogakkhemaṁ anuttaraṁ.
Uṭṭhānavato satimato sucikammassa nisammakārino
saññatassa ca dhammajīvino appamattassa yasobhivaḍḍhati.
Uṭṭhānenappamādena saññamena damena ca
dīpaṁ kayirātha medhāvī yaṁ ogho nābhikīrati.
Pamādamanuyuñjanti bālā dummedhino janā
appamādañca medhāvī dhanaṁ seṭṭhaṁva rakkhati.
Mā pamādamanuyuñjetha mā kāmaratisanthavaṁ
appamatto hi jhāyanto pappoti vipulaṁ sukhaṁ.
Pamādaṁ appamādena yadā nudati paṇḍito
paññāpāsādamāruyha asoko sokiniṁ pajaṁ
pabbataṭṭhova bhummaṭṭhe dhīro bāle avekkhati.
Appamatto pamattesu suttesu bahujāgaro
1 Ma. evaṁ.
Abalassaṁva sīghasso hitvā yāti sumedhaso.
Appādena maghavā devānaṁ seṭṭhataṁ gato
appamādaṁ pasaṁsanti pamādo garahito sadā.
Appamādarato bhikkhu pamāde bhayadassi vā
saññojanaṁ aṇuṁ thūlaṁ ḍahaṁ aggīva gacchati.
Appamādarato bhikkhu pamāde bhayadassi vā
abhabbo parihānāya nibbānasseva santike.
Appamādavaggo dutiyo.
--------
Dhammapadagāthāya tatiyo cittavaggo

[13] 3 Phandanaṁ capalaṁ cittaṁ durakkhaṁ dunnivārayaṁ
ujuṁ karoti medhāvī usukārova tejanaṁ
vārijova thale khitto okamokataubbhato
pariphandatidaṁ cittaṁ māradheyyaṁ pahātave.
Dunniggahassa lahuno yattha kāmanipātino
cittassa damatho sādhu cittaṁ dantaṁ sukhāvahaṁ.
Sududdasaṁ sunipuṇaṁ yattha kāmanipātinaṁ
cittaṁ rakkhetha medhāvī cittaṁ guttaṁ sukhāvahaṁ.
Dūraṅgamaṁ ekacaraṁ asarīraṁ guhāsayaṁ
Ye cittaṁ saññamessanti mokkhanti mārabandhanā.
Anavaṭṭhitacittassa saddhammaṁ avijānato
pariplavapasādassa paññā na paripūrati
anavassutacittassa ananvāhatacetaso
puññapāpapahīnassa natthi jāgarato bhayaṁ.
Kumbhūpamaṁ kāyamidaṁ viditvā
nagarūpamaṁ cittamidaṁ thaketvā
yodhetha 1 māraṁ paññāvudhena
jitañca rakkhe anivesino 2 siyā.
Aciraṁ vatayaṁ kāyo paṭhaviṁ adhisessati
chuḍḍo 3 apetaviññāṇo niratthaṁva kaliṅgaraṁ.
Diso disaṁ yantaṁ kayirā verī vā pana verinaṁ
micchāpaṇihitaṁ cittaṁ pāpiyo naṁ tato kare.
Na taṁ mātā pitā kayirā aññe vāpi ca ñātakā
sammāpaṇihitaṁ cittaṁ seyyaso naṁ tato kare.
Cittavaggo tatiyo.
---------
1 Sī. yojetha. 2 sabbapotthakesu anivesanoti dissati. 3 Ma. Yu. chuddho.
Dhammapadagāthāya catuttho pupphavaggo

[14] 4 Ko imaṁ paṭhaviṁ vijessati yamalokañca imaṁ sadevakaṁ
ko dhammapadaṁ sudesitaṁ kusalo pupphamiva pacessati.
Sekho paṭhaviṁ vijessati yamalokañca imaṁ sadevakaṁ
sekho dhammapadaṁ sudesitaṁ kusalo pupphamiva pacessati.
Pheṇūpamaṁ kāyamimaṁ viditvā
marīcidhammaṁ abhisambudhāno
chetvāna mārassa papupphakāni
adassanaṁ maccurājassa gacche.
Pupphāni heva pacinantaṁ byāsattamanasaṁ naraṁ
suttaṁ gāmaṁ mahoghova maccu ādāya gacchati.
Pupphāni heva pacinantaṁ byāsattamanasaṁ naraṁ
atittaṁ yeva kāmesu antako kurute vasaṁ.
Yathāpi bhamaro pupphaṁ vaṇṇavantaṁ 1 aheṭhayaṁ
paleti rasamādāya evaṁ gāme munī care.
Na paresaṁ vilomāni na paresaṁ katākataṁ
attano va avekkheyya katāni akatāni ca.
Yathāpi ruciraṁ pupphaṁ vaṇṇavantaṁ agandhakaṁ
evaṁ subhāsitā vācā aphalā hoti akubbato.
1 Po. Ma. Yu. vaṇṇagandhaṁ.
Yathāpi ruciraṁ pupphaṁ vaṇṇavantaṁ sagandhakaṁ 1
evaṁ subhāsitā vācā saphalā hoti sukubbato.
Yathāpi puppharāsimhā kayirā mālāguḷe 2 bahū
evaṁ jātena maccena kattabbaṁ kusalaṁ bahuṁ.
Na pupphagandho paṭivātameti
na candanaṁ tagaramallikā vā
satañca gandho paṭivātameti
sabbā disā sappuriso pavāyati.
Candanaṁ tagaraṁ vāpi uppalaṁ atha vassikī
etesaṁ gandhajātānaṁ sīlagandho anuttaro.
Appamatto ayaṁ gandho yvāyaṁ tagaracandanī
yo ca sīlavataṁ gandho vāti devesu uttamo.
Tesaṁ sampannasīlānaṁ appamādavihārinaṁ
sammadaññā vimuttānaṁ māro maggaṁ na vindati.
Yathā saṅkāradhānasmiṁ ujjhitasmiṁ mahāpathe
padumaṁ tattha jāyetha sucigandhaṁ manoramaṁ
evaṁ saṅkārabhūtesu andhabhūte puthujjane
atirocati paññāya sammāsambuddhasāvako.
Pupphavaggo catuttho.
1 Po. Ma. sugandhakaṁ. 2 Po. Ma. Yu. mālāguṇe.
Dhammapadagāthāya pañcamo bālavaggo

[15] 5 Dīghā jāgarato ratti dīghaṁ santassa yojanaṁ
dīgho bālāna saṁsāro saddhammaṁ avijānataṁ.
Carañce nādhigaccheyya seyyaṁ sadisamattano
ekacariyaṁ daḷhaṁ kayirā natthi bāle sahāyatā.
Puttā matthi dhanamatthi iti bālo vihaññati
attā hi attano natthi kuto puttā kuto dhanaṁ.
Yo bālo maññatī bālyaṁ paṇḍito vāpi tena so
bālo ca paṇḍitamānī sa ve bāloti vuccati.
Yāvajīvampi ce bālo paṇḍitaṁ payirupāsati
na so dhammaṁ vijānāti dabbī sūparasaṁ yathā.
Muhuttamapi ce viññū paṇḍitaṁ payirupāsati
khippaṁ dhammaṁ vijānāti jivhā sūparasaṁ yathā.
Caranti bālā dummedhā amitteneva attanā
karontā pāpakaṁ kammaṁ yaṁ hoti kaṭukapphalaṁ.
Na taṁ kammaṁ kataṁ sādhu yaṁ katvā anutappati
yassa assumukho rodaṁ vipākaṁ paṭisevati.
Tañca kammaṁ kataṁ sādhu yaṁ katvā nānutappati
yassa patīto sumano vipākaṁ paṭisevati.
Madhuvā maññatī bālo yāva pāpaṁ na paccati
yadā ca paccati pāpaṁ atha (bālo) dukkhaṁ nigacchati.
Māse māse kusaggena bālo bhuñjetha bhojanaṁ
na so saṅkhātadhammānaṁ kalaṁ agghati soḷasiṁ.
Na hi pāpaṁ kataṁ kammaṁ sajjukhīraṁva muccati
ḍahantaṁ bālamanveti bhasmācchannova pāvako.
Yāvadeva anatthāya ñattaṁ bālassa jāyati
hanti bālassa sukkaṁsaṁ muddhaṁ assa vipātayaṁ.
Asantaṁ bhāvamiccheyya 1 purekkhārañca bhikkhusu
āvāsesu ca issariyaṁ pūjā parakulesu ca
mameva katamaññantu gihī pabbajitā ubho
mameva ativasā assu kiccākiccesu kismici
iti bālassa saṅkappo issā māno ca vaḍḍhati.
Aññā hi lābhūpanisā aññā nibbānagāminī
evametaṁ abhiññāya bhikkhu buddhassa sāvako
sakkāraṁ nābhinandeyya vivekamanubrūhaye.
Bālavaggo pañcamo.
---------
1 Po. Ma. Yu. bhāvanamiccheyya.
Dhammapadagāthāya chaṭṭho paṇḍitavaggo

[16] 6 Nidhīnaṁva pavattāraṁ yaṁ passe vajjadassinaṁ
niggayhavādiṁ medhāviṁ tādisaṁ paṇḍitaṁ bhaje
tādisaṁ bhajamānassa seyyo hoti na pāpiyo.
Ovadeyyānusāseyya asabbhā ca nivāraye
sataṁ hi so piyo hoti asataṁ hoti appiyo.
Na bhaje pāpake mitte na bhaje purisādhame
bhajetha mitte kalyāṇe bhajetha purisuttame.
Dhammapīti sukhaṁ seti vippasannena cetasā
ariyappavedite dhamme sadā ramati paṇḍito.
Udakañhi nayanti nettikā
usukārā namayanti tejanaṁ
dāruṁ namayanti tacchakā
attānaṁ damayanti paṇḍitā.
Selo yathā ekaghano vātena na samīrati
evaṁ nindāpasaṁsāsu na sammiñjanti 1 paṇḍitā.
Yathāpi rahado gambhīro vippasanno anāvilo
evaṁ dhammāni sutvāna vippasīdanti paṇḍitā.
Sabbattha ve sappurisā vajanti 2
1 Ma. Yu. samiñjanti. 2 Ma. Yu. cajanti.
Na kāmakāmā lapayanti santo
sukhena phuṭṭhā athavā dukkhena
na uccāvacaṁ paṇḍitā dassayanti.
Na attahetu na parassa hetu
na puttamicche na dhanaṁ na raṭṭhaṁ
na iccheyya adhammena samiddhimattano
sa sīlavā paññavā dhammiko siyā.
Appakā te manussesu ye janā pāragāmino
athāyaṁ itarā pajā tīramevānudhāvati.
Ye ca kho sammadakkhāte dhamme dhammānuvattino
te janā pāramessanti maccudheyyaṁ suduttaraṁ.
Kaṇhaṁ dhammaṁ vippahāya sukkaṁ bhāvetha paṇḍito
okā anokamāgamma viveke yattha dūramaṁ
tatrābhiratimiccheyya hitvā kāme akiñcano
pariyodapeyya attānaṁ cittaklesehi paṇḍito.
Yesaṁ sambodhiyaṅgesu sammā cittaṁ subhāvitaṁ
ādānapaṭinissagge anupādāya ye ratā
khīṇāsavā jutimanto te loke parinibbutā.
Paṇḍitavaggo chaṭṭho.
-----------
Dhammapadagāthāya sattamo arahantavaggo