[229] 22 Ekādasahi bhikkhave aṅgehi samannāgato gopālako abhabbo
gogaṇaṁ pariharituṁ phātikātuṁ katamehi ekādasahi idha bhikkhave gopālako
na rūpaññū hoti na lakkhaṇakusalo hoti na āsāṭikaṁ sāṭetā
hoti na vaṇaṁ paṭicchādetā hoti na dhūmaṁ kattā hoti na
titthaṁ jānāti na pītaṁ jānāti na vithiṁ jānāti na gocarakusalo
hoti anavasesadohī hoti ye te usabhā gopitaro goparināyakā
te na atirekapūjāya pūjetā hoti imehi kho bhikkhave ekādasahi
aṅgehi samannāgato gopālako abhabbo gogaṇaṁ pariharituṁ phātikātuṁ
evameva kho bhikkhave ekādasahi dhammehi samannāgato bhikkhu abhabbo
cakkhusmiṁ aniccānupassī viharituṁ .pe. Abhabbo cakkhusmiṁ dukkhānupassī
viharituṁ abhabbo cakkhusmiṁ anattānupassī viharituṁ abhabbo cakkhusmiṁ
khayānupassī viharituṁ abhabbo cakkhusmiṁ vayānupassī viharituṁ abhabbo
cakkhusmiṁ virāgānupassī viharituṁ abhabbo cakkhusmiṁ nirodhānupassī
viharituṁ abhabbo cakkhusmiṁ paṭinissaggānupassī viharituṁ abhabbo
sotasmiṁ ghānasmiṁ jivhāya kāyasmiṁ manasmiṁ rūpesu saddesu
gandhesu rasesu phoṭṭhabbesu dhammesu cakkhuviññāṇe sotaviññāṇe
ghānaviññāṇe jivhāviññāṇe kāyaviññāṇe
manoviññāṇe cakkhusamphasse sotasamphasse ghānasamphasse
Jivhāsamphasse kāyasamphasse manosamphasse cakkhusamphassajāya
vedanāya sotasamphassajāya vedanāya ghānasamphassajāya vedanāya
jivhāsamphassajāya vedanāya kāyasamphassajāya vedanāya
manosamphassajāya vedanāya rūpasaññāya saddasaññāya gandhasaññāya
rasasaññāya phoṭṭhabbasaññāya dhammasaññāya rūpasañcetanāya
saddasañcetanāya gandhasañcetanāya rasasañcetanāya phoṭṭhabbasañcetanāya
dhammasañcetanāya rūpataṇhāya saddataṇhāya gandhataṇhāya
rasataṇhāya phoṭṭhabbataṇhāya dhammataṇhāya
rūpavitakke saddavitakke gandhavitakke rasavitakke phoṭṭhabbavitakke
dhammavitakke rūpavicāre saddavicāre gandhavicāre rasavicāre
phoṭṭhabbavicāre dhammavicāre aniccānupassī viharituṁ dukkhānupassī
viharituṁ anattānupassī viharituṁ khayānupassī viharituṁ vayānupassī
viharituṁ virāgānupassī viharituṁ nirodhānupassī viharituṁ paṭinissaggānupassī
viharitunti.

[230] 23 Ekādasahi bhikkhave aṅgehi samannāgato gopālako bhabbo
gogaṇaṁ pariharituṁ phātikātuṁ katamehi ekādasahi idha bhikkhave gopālako
rūpaññū hoti .pe. Evameva kho bhikkhave ekādasahi dhammehi
samannāgato bhikkhu bhabbova cakkhusmiṁ aniccānupassī viharituṁ .pe.
Paṭinissaggānupassī viharitunti. Rāgassa bhikkhave abhiññāya ekādasa
dhammā bhāvetabbā katame ekādasa paṭhamajjhānaṁ dutiyajjhānaṁ
Tatiyajjhānaṁ catutthajjhānaṁ mettācetovimutti karuṇācetovimutti
muditācetovimutti upekkhācetovimutti ākāsānañcāyatanaṁ
viññāṇañcāyatanaṁ ākiñcaññāyatanaṁ rāgassa bhikkhave abhiññāya
ime ekādasa dhammā bhāvetabbāti 1 .

[231] 24 Rāgassa bhikkhave abhiññāya 2 pariññāya parikkhayāya
pahānāya khayāya vayāya virāgāya nirodhāya cāgāya paṭinissaggāya ime
ekādasa dhammā bhāvetabbā dosassa mohassa kodhassa upanāhassa
makkhassa paḷāsassa issāya macchariyassa māyāya sāṭheyyassa thambhassa
sārambhassa mānassa madassa pamādassa abhiññāya pariññāya parikkhayāya
pahānāya khayāya vayāya virāgāya nirodhāya cāgāya paṭinissaggāya
ime ekādasa dhammā bhāvetabbāti idamavoca bhagavā. Attamanā
te bhikkhū bhagavato bhāsitaṁ abhinandunti.
Navasuttasahassāni bhiyyo pañcasatāni ca
sattapaññāsasuttantā aṅguttarasamāyutāti.
Ekādasakanipāto niṭṭhito.
-----------
1 Ma. itisaddo natthi. 2 Ma. ayaṁ pāṭho natthi.

Suttantapiṭake khuddakanikāyassa
khuddakapāṭho
---------
namo tassa bhagavato arahato sammāsambuddhassa.
Khuddakapāṭhe saraṇagamanaṁ

[1] Buddhaṁ saraṇaṁ gacchāmi dhammaṁ saraṇaṁ gacchāmi saṅghaṁ
saraṇaṁ gacchāmi. Dutiyampi buddhaṁ saraṇaṁ gacchāmi dutiyampi dhammaṁ
saraṇaṁ gacchāmi dutiyampi saṅghaṁ saraṇaṁ gacchāmi. Tatiyampi buddhaṁ
saraṇaṁ gacchāmi tatiyampi dhammaṁ saraṇaṁ gacchāmi tatiyampi saṅghaṁ
saraṇaṁ gacchāmi.
Saraṇagamanaṁ 1 niṭṭhitaṁ.
--------
Khuddakapāṭhe dasasikkhāpadaṁ

[2] Pāṇātipātā veramaṇī sikkhāpadaṁ samādiyāmi.
Adinnādānā veramaṇī sikkhāpadaṁ samādiyāmi. Abrahmacariyā
veramaṇī sikkhāpadaṁ samādiyāmi. Musāvādā veramaṇī sikkhāpadaṁ
samādiyāmi. Surāmerayamajjapamādaṭṭhānā veramaṇī sikkhāpadaṁ
1 Sī. Ma. saraṇattayaṁ.
Samādiyāmi. Vikālabhojanā veramaṇī sikkhāpadaṁ samādiyāmi.
Naccagītavāditavisūkadassanā veramaṇī sikkhāpadaṁ samādiyāmi.
Mālāgandhavilepanadhāraṇamaṇḍanavibhūsanaṭṭhānā veramaṇī sikkhāpadaṁ
samādiyāmi. Uccāsayanamahāsayanā veramaṇī sikkhāpadaṁ samādiyāmi.
Jātarūparajaṭapaṭiggahaṇā veramaṇī sikkhāpadaṁ samādiyāmi.
Dasasikkhāpadaṁ niṭṭhitaṁ.
---------
Khuddakapāṭhe dvattiṁsākāro

[3] Atthi imasmiṁ kāye kesā lomā nakhā dantā taco
maṁsaṁ nhārū aṭṭhī aṭṭhimiñjaṁ vakkaṁ hadayaṁ yakanaṁ kilomakaṁ pihakaṁ
papphāsaṁ antaṁ antaguṇaṁ udariyaṁ karīsaṁ [1]- pittaṁ semhaṁ pubbo
lohitaṁ sedo medo assu vasā khelo siṁghānikā lasikā muttaṁ
matthake matthaluṅganti.
Dvattiṁsākāro niṭṭhito.
-----------
Khuddakapāṭhe sāmaṇerapañhā

[4] Ekannāma kiṁ sabbe sattā āhāraṭṭhitikā. Dve
nāma kiṁ nāmañca rūpañca. Tīṇi nāma kiṁ tisso vedanā.
1 Ma. matthaluṅgaṁ.
Cattāri nāma kiṁ cattāri ariyasaccāni. Pañca nāma kiṁ
pañcupādānakkhandhā. Cha nāma kiṁ cha ajjhattikāni āyatanāni.
Satta nāma kiṁ satta bojjhaṅgā. Aṭṭha nāma kiṁ ariyo
aṭṭhaṅgiko maggo. Nava nāma kiṁ nava sattāvāsā. Dasa
nāma kiṁ dasahaṅgehi samannāgato arahāti vuccatīti.
Sāmaṇerapañhā 1 niṭṭhitā.
-----------
Khuddakapāṭhe maṅgalasuttaṁ

[5] Evamme sutaṁ. Ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho aññatarā devatā
abhikkantāya rattiyā abhikkantavaṇṇā kevalakappaṁ jetavanaṁ
obhāsetvā yena bhagavā tenupasaṅkami upasaṅkamitvā bhagavantaṁ
abhivādetvā ekamantaṁ aṭṭhāsi ekamantaṁ ṭhitā kho sā devatā
bhagavantaṁ gāthāya ajjhabhāsi.

[6] Bahū devā manussā ca maṅgalāni acintayuṁ
ākaṅkhamānā sotthānaṁ brūhi maṅgalamuttamaṁ.
Asevanā ca bālānaṁ paṇḍitānañca sevanā
pūjā ca pūjanīyānaṁ 2 etammaṅgalamuttamaṁ.
Paṭirūpadesavāso ca pubbe ca katapuññatā
1 Ma. kumārapañhā. 2 Ma. pūjaneyyānaṁ.
Attasammāpaṇidhi ca etammaṅgalamuttamaṁ.
Bāhusaccañca sippañca vinayo ca susikkhito
subhāsitā ca yā vācā etammaṅgalamuttamaṁ.
Mātāpitūpaṭṭhānaṁ puttadārassa saṅgaho
anākulā ca kammantā etammaṅgalamuttamaṁ.
Dānañca dhammacariyā ca ñātakānañca saṅgaho
anavajjāni kammāni etammaṅgalamuttamaṁ.
Āratī viratī pāpā majjapānā ca saññamo
appamādo ca dhammesu etammaṅgalamuttamaṁ.
Gāravo ca nivāto ca santuṭṭhī ca kataññutā
kālena dhammassavanaṁ etammaṅgalamuttamaṁ.
Khantī ca sovacassatā samaṇānañca dassanaṁ
kālena dhammasākacchā etammaṅgalamuttamaṁ.
Tapo ca brahmacariyañca ariyasaccānadassanaṁ
nibbānasacchikiriyā ca etammaṅgalamuttamaṁ.
Phuṭṭhassa lokadhammehi cittaṁ yassa na kampati
asokaṁ virajaṁ khemaṁ etammaṅgalamuttamaṁ.
Etādisāni katvāna sabbatthamaparājitā
sabbattha sotthiṁ gacchanti tantesaṁ maṅgalamuttamanti.
Maṅgalasuttaṁ niṭṭhitaṁ.
Khuddakapāṭhe ratanasuttaṁ