[209] 2 Sīlavato bhikkhave sīlasampannassa na cetanāya karaṇīyaṁ
avippaṭisāro me uppajjatūti dhammatā esā bhikkhave yaṁ sīlavato
sīlasampannassa avippaṭisāro uppajjati avippaṭisārissa 1 bhikkhave na
cetasā karaṇīyaṁ pāmujjaṁ me uppajjatūti dhammatā esā bhikkhave
yaṁ avippaṭisārissa pāmujjaṁ uppajjati pamuditassa bhikkhave na cetanāya
karaṇīyaṁ pīti me uppajjatūti dhammatā esā bhikkhave yaṁ pamuditassa
pīti uppajjati pītimanassa bhikkhave na cetanāya karaṇīyaṁ kāyo
1 Po. Ma. avippaṭisārassa.
Me passambhatūti dhammatā esā bhikkhave yaṁ pītimanassa kāyo
passambhati passaddhakāyassa 1 bhikkhave na cetanāya karaṇīyaṁ sukhaṁ
vediyāmīti dhammatā esā bhikkhave yaṁ passaddhakāyo sukhaṁ vediyati
sukhino bhikkhave na cetanāya karaṇīyaṁ cittaṁ me samādhiyatūti dhammatā
esā bhikkhave yaṁ sukhino cittaṁ samādhiyati samāhitassa bhikkhave
na cetanāya karaṇīyaṁ yathābhūtaṁ pajānāmi passāmīti dhammatā esā
bhikkhave yaṁ samāhito yathābhūtaṁ pajānāti passati yathābhūtaṁ bhikkhave
jānato 2 passato na cetanāya karaṇīyaṁ nibbindāmīti dhammatā esā
bhikkhave yaṁ yathābhūtaṁ jānaṁ passaṁ nibbindati nibbinnassa bhikkhave
na cetanāya karaṇīyaṁ virajjāmīti dhammatā esā bhikkhave yaṁ nibbinno
virajjati virattassa bhikkhave na cetanāya karaṇīyaṁ vimuttiñāṇadassanaṁ
sacchikaromīti dhammatā esā bhikkhave yaṁ viratto vimuttiñāṇadassanaṁ
sacchikaroti iti kho bhikkhave virāgo vimuttiñāṇadassanattho
vimuttiñāṇadassanānisaṁso nibbidā virāgatthā virāgānisaṁsā yathābhūtañāṇadassanaṁ
nibbidatthaṁ nibbidānisaṁsaṁ samādhi yathābhūtañāṇadassanattho
yathābhūtañāṇadassanānisaṁso sukhaṁ samādhatthaṁ samādhānisaṁsaṁ passaddhi
sukhatthā sukhānisaṁsā pīti passaddhatthā 3 passaddhānisaṁsā pāmujjaṁ pītatthaṁ
pītānisaṁsaṁ avippaṭisāro pāmujjattho pāmujjānisaṁso kusalāni sīlāni
avippaṭisāratthāni avippaṭisārānisaṁsāni iti kho bhikkhave dhammā [4]-
1 Po. passaddhikāyassa. 2 Po. jānatā passatā. 3 Po. passaddhitthā.
4 Yu. casaddo atthi.
Dhamme abhisandenti 1 dhammā [2]- dhamme paripūrenti apārā
pāragamanāyāti.

[210] 3 Dussīlassa bhikkhave sīlavipannassa hatūpaniso hoti
avippaṭisāro avippaṭisāre asati avippaṭisāravipannassa hatūpanisaṁ
hoti pāmujjaṁ pāmujje asati pāmujjavipannassa hatūpanisā hoti
pīti pītiyā asati pītivipannassa hatūpanisā hoti passaddhi passaddhiyā
asati passaddhivipannassa hatūpanisaṁ hoti sukhaṁ sukhe asati sukhavipannassa
hatūpaniso hoti sammāsamādhi sammāsamādhimhi asati sammāsamādhivipannassa
hatūpanisaṁ hoti yathābhūtañāṇadassanaṁ yathābhūtañāṇadassane
asati yathābhūtañāṇadassanavipannassa hatūpanisā hoti nibbidā nibbidāya
asati nibbidāvipannassa hatūpaniso hoti virāgo virāge asati
virāgavipannassa hatūpanisaṁ hoti vimuttiñāṇadassanaṁ seyyathāpi bhikkhave
rukkho sākhāpalāsavipanno tassa pappaṭikāpi 3 na pāripūriṁ gacchati
tacopi pheggupi sāropi na pāripūriṁ gacchati evameva kho bhikkhave
dussīlassa sīlavipannassa hatūpaniso hoti avippaṭisāro avippaṭisāre
asati avippaṭisāravipannassa hatūpanisaṁ hoti .pe. Vimuttiñāṇadassanaṁ 4 .
Sīlavato bhikkhave sīlasampannassa upanisasampanno hoti avippaṭisāro
avippaṭisāre sati avippaṭisārasampannassa upanisasampannaṁ hoti pāmujjaṁ
pāmujje sati pāmujjasampannassa upanisasampannā hoti pīti pītiyā
sati pītisampannassa upanisasampannā hoti passaddhi passaddhiyā sati
passaddhisampannassa upanisasampannaṁ hoti sukhaṁ sukhe sati sukhasampannassa
1 Po. abhisaṅkhāpavādenti. 2 Yu. casaddo atthi. 3 Ma. Yu. sabbattha papaṭikāpīti
dissati. 4 Po. vimuttiñāṇadassananti.
Upanisasampanno hoti sammāsamādhi sammāsamādhimhi sati sammāsamādhisampannassa
upanisasampannaṁ hoti yathābhūtañāṇadassanaṁ yathābhūtañāṇadassane
sati yathābhūtañāṇadassanasampannassa upanisasampannā hoti
nibbidā nibbidāya sati nibbidāsampannassa upanisasampanno hoti
virāgo virāge sati virāgasampannassa upanisasampannaṁ hoti vimuttiñāṇadassanaṁ
seyyathāpi bhikkhave rukkho sākhāpalāsasampanno tassa
pappaṭikāpi pāripūriṁ gacchati tacopi pheggupi sāropi pāripūriṁ gacchati
evameva kho bhikkhave sīlavato sīlasampannassa upanisasampanno hoti
avippaṭisāro avippaṭisāre sati avippaṭisārasampannassa upanisasampannaṁ
hoti .pe. Vimuttiñāṇadassananti.

[211] 4 Tatra kho āyasmā sārīputto bhikkhū āmantesi
āvuso bhikkhavoti. Āvusoti kho te bhikkhū āyasmato sārīputtassa
paccassosuṁ. Āyasmā sārīputto etadavoca dussīlassa āvuso
sīlavipannassa hatūpaniso hoti avippaṭisāro avippaṭisāre asati
avippaṭisāravipannassa hatūpanisaṁ hoti pāmujjaṁ pāmujje asati pāmujjavipannassa
hatūpanisā hoti pīti pītiyā asati pītivipannassa hatūpanisā
hoti passaddhi passaddhiyā asati passaddhivipannassa hatūpanisaṁ hoti sukhaṁ
sukhe asati sukhavipannassa hatūpaniso hoti sammāsamādhi sammāsamādhimhi
asati sammāsamādhivipannassa hatūpanisaṁ hoti yathābhūtañāṇadassanaṁ yathābhūtañāṇadassane
asati yathābhūtañāṇadassanavipannassa hatūpanisā hoti
Nibbidā nibbidāya asati nibbidāvipannassa hatūpaniso hoti virāgo
virāge asati virāgavipannassa hatūpanisaṁ hoti vimuttiñāṇadassanaṁ
seyyathāpi āvuso rukkho sākhāpalāsavipanno tassa pappaṭikāpi na
pāripūriṁ gacchati tacopi pheggupi sāropi na pāripūriṁ gacchati evameva
kho āvuso dussīlassa sīlavipannassa hatūpaniso hoti avippaṭisāro
avippaṭisāre asati avippaṭisāravipannassa hatūpanisaṁ hoti .pe.
Vimuttiñāṇadassanaṁ. Sīlavato āvuso sīlasampannassa upanisasampanno
hoti avippaṭisāro avippaṭisāre sati avippaṭisārasampannassa upanisasampannaṁ
hoti pāmujjaṁ pāmujje sati pamujjasampannassa upanisasampanno
hoti pīti pītiyā sati pītisampannassa upanisasampannā
hoti passaddhi passaddhiyā sati passaddhisampannassa upanisasampannaṁ
hoti sukhaṁ sukhe sati sukhasampannassa upanisasampanno hoti sammāsamādhi
sammāsamādhimhi sati sammāsamādhisampannassa upanisasampannaṁ hoti
yathābhūtañāṇadassanaṁ yathābhūtañāṇadassane sati yathābhūtañāṇadassanasampannassa
upanisasampannā hoti nibbidā nibbidāya sati nibbidāsampannassa
upanisasampanno hoti virāgo virāge sati virāgasampannassa
upanisasampannaṁ hoti vimuttiñāṇadassanaṁ seyyathāpi
āvuso rukkho sākhāpalāsasampanno tassa pappaṭikāpi pāripūriṁ
gacchati tacopi pheggupi sāropi pāripūriṁ gacchati evameva kho
āvuso sīlavato sīlasampannassa upanisasampanno hoti avippaṭisāro
Avippaṭisāre sati avippaṭisārasampannassa upanisasampannaṁ
hoti .pe. Vimuttiñāṇadassananti.

[212] 5 Tatra kho āyasmā ānando bhikkhū āmantesi .pe.
Dussīlassa āvuso sīlavipannassa hatūpaniso hoti avippaṭisāro avippaṭisāre
asati avippaṭisāravipannassa hatūpanisaṁ hoti pāmujjaṁ pāmujje
asati pāmujjavipannassa hatūpanisā hoti pīti pītiyā asati pītivipannassa
hatūpanisā hoti passaddhi passaddhiyā asati passaddhivipannassa hatūpanisaṁ
hoti sukhaṁ sukhe asati sukhavipannassa hatūpaniso hoti sammāsamādhi
sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ
yathābhūtañāṇadassane asati yathābhūtañāṇadassanavipannassa
hatūpanisā hoti nibbidā nibbidāya asati nibbidāvipannassa hatūpaniso
hoti virāgo virāge asati virāgavipannassa hatūpanisaṁ hoti vimuttiñāṇadassanaṁ
seyyathāpi āvuso rukkho sākhāpalāsavipanno tassa
pappaṭikāpi na pāripūriṁ gacchati tacopi pheggupi sāropi na pāripūriṁ
gacchati evameva kho āvuso dussīlassa sīlavipannassa hatūpaniso
hoti avippaṭisāro avippaṭisāre asati avippaṭisāravipannassa hatūpanisaṁ
hoti .pe. Vimuttiñāṇadassanaṁ. Sīlavato āvuso sīlasampannassa
upanisasampanno hoti avippaṭisāro avippaṭisāre sati avippaṭisārasampannassa
upanisasampannaṁ hoti pāmujjaṁ pāmujje sati pāmujjasampannassa
upanisasampannā hoti pīti pītiyā sati pītisampannassa
Upanisasampannā hoti passaddhi passaddhiyā sati passaddhisampannassa
upanisasampannaṁ hoti sukhaṁ sukhe sati sukhasampannassa upanisasampanno
hoti sammāsamādhi sammāsamādhimhi sati sammāsamādhisampannassa upanisasampannaṁ
hoti yabhābhūtañāṇadassanaṁ yathābhūtañāṇadassane sati yathābhūtañāṇadassanasampannassa
upanisasampannā hoti nibbidā nibbidāya
sati nibbidāsampannassa upanisasampanno hoti virāgo virāge sati
virāgasampannassa upanisasampannaṁ hoti vimuttiñāṇadassanaṁ seyyathāpi
[1]- Rukkho sākhāpalāsasampanno tassa pappaṭikāpi pāripūriṁ gacchati
tacopi pheggupi sāropi pāripūriṁ gacchati evameva kho āvuso
sīlavato sīlasampannassa upanisasampanno hoti avippaṭisāro
avippaṭisāre sati avippaṭisārasampannassa upanisasampannaṁ hoti .pe.
Vimuttiñāṇadassananti.

[213] 6 Yo so bhikkhave bhikkhu akkosakaparibhāsako ariyūpavādī
sabrahmacārīnaṁ aṭṭhānametaṁ anavakāso yaṁ so ekādasannaṁ byasanānaṁ
aññataraṁ byasanaṁ na nigaccheyya katamesaṁ ekādasannaṁ anadhigataṁ
nādhigacchati adhigatā parihāyati saddhammassa na vodāyati saddhammesu
vā adhimāniko hoti anabhirato vā brahmacariyaṁ carati aññataraṁ
vā saṅkiliṭṭhaṁ āpattiṁ āpajjati sikkhaṁ vā paccakkhāya hīnāyāvattati
gāḷhaṁ vā rogātaṅgaṁ phusati ummādaṁ vā pāpuṇāti cittakkhepaṁ
sammūḷho kālaṁ karoti kāyassa bhedā parammaraṇā apāyaṁ duggatiṁ
1 Po. Ma. āvuso.
Vinipātaṁ nirayaṁ upapajjati yo so bhikkhave bhikkhu akkosakaparibhāsako
ariyūpavādī sabrahmacārīnaṁ aṭṭhānametaṁ anavakāso yaṁ so imesaṁ
ekādasannaṁ byasanānaṁ aññataraṁ byasanaṁ na nigaccheyyāti.

[214] 7 Athakho āyasmā ānando yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi ekamantaṁ nisinno
kho āyasmā ānando bhagavantaṁ etadavoca siyā nu kho bhante
bhikkhuno tathārūpo samādhipaṭilābho yathā neva paṭhaviyaṁ paṭhavīsaññī
assa na āpasmiṁ āposaññī assa na tejasmiṁ tejosaññī
assa na vāyasmiṁ vāyosaññī assa na ākāsānañcāyatane
ākāsānañcāyatanasaññī assa na viññāṇañcāyatane viññāṇañcāyatanasaññī
assa na ākiñcaññāyatane ākiñcaññāyatanasaññī
assa na nevasaññānāsaññāyatane nevasaññānāsaññāyatanasaññī
assa na idhaloke idhalokasaññī assa na paraloke
paralokasaññī assa yamidaṁ 1 diṭṭhaṁ sutaṁ mutaṁ viññātaṁ pattaṁ pariyesitaṁ
anuvicaritaṁ manasā tatrāpi na saññī assa saññī ca pana
assāti. Siyā ānanda bhikkhuno tathārūpo samādhipaṭilābho yathā
neva paṭhaviyaṁ paṭhavīsaññī assa na āpasmiṁ āposaññī assa
na tejasmiṁ tejosaññī assa na vāyasmiṁ vāyosaññī assa na
ākāsānañcāyatane ākāsānañcāyatanasaññī assa na viññāṇañcāyatane
viññāṇañcāyatanasaññī assa na ākiñcaññāyatane ākiñcaññāyatanasaññī
1 Ma. Yu. yampidaṁ. ito paraṁ īdisameva.
Assa na nevasaññānāsaññāyatane nevasaññānāsaññāyatanasaññī
assa na idhaloke idhalokasaññī assa na paraloke
paralokasaññī assa yamidaṁ diṭṭhaṁ sutaṁ mutaṁ viññātaṁ pattaṁ pariyesitaṁ
anuvicaritaṁ manasā tatrāpi na saññī assa saññī ca pana
assāti. Yathākathaṁ pana bhante siyā bhikkhuno tathārūpo samādhipaṭilābho
yathā neva paṭhaviyaṁ paṭhavīsaññī assa na āpasmiṁ āposaññī assa
na tejasmiṁ tejosaññī assa na vāyasmiṁ vāyosaññī assa na
ākāsānañcāyatane ākāsānañcāyatanasaññī assa na viññāṇañcāyatane
viññāṇañcāyatanasaññī assa na ākiñcaññāyatane
ākiñcaññāyatanasaññī assa na nevasaññānāsaññāyatane
nevasaññānāsaññāyatanasaññī assa na idhaloke idhalokasaññī assa
na paraloke paralokasaññī assa yamidaṁ diṭṭhaṁ sutaṁ mutaṁ viññātaṁ
pattaṁ pariyesitaṁ anuvicaritaṁ manasā tatrāpi na saññī assa
saññī ca pana assāti. Idhānanda bhikkhu evaṁsaññī hoti etaṁ
santaṁ etaṁ paṇītaṁ yadidaṁ sabbasaṁkhārasamatho sabbūpadhipaṭinissaggo
taṇhakkhayo virāgo nirodho nibbānanti evaṁ kho ānanda siyā
bhikkhuno tathārūpo samādhipaṭilābho yathā neva paṭhaviyaṁ paṭhavīsaññī
assa na āpasmiṁ āposaññī assa na tejasmiṁ tejosaññī
assa na vāyasmiṁ vāyosaññī assa na ākāsānañcāyatane
ākāsānañcāyatanasaññī assa na viññāṇañcāyatane viññāṇañcāyatanasaññī
Assa na ākiñcaññāyatane ākiñcaññāyatanasaññī
assa na nevasaññānāsaññāyatane nevasaññānāsaññāyatanasaññī
assa na idhaloke idhalokasaññī assa na paraloke
paralokasaññī assa yamidaṁ diṭṭhaṁ sutaṁ mutaṁ viññātaṁ pattaṁ pariyesitaṁ
anuvicaritaṁ manasā tatrāpi na saññī assa saññī ca pana
assāti. Athakho āyasmā ānando bhagavato bhāsitaṁ abhinanditvā
anumoditvā uṭṭhāyāsanā bhagavantaṁ abhivādetvā padakkhiṇaṁ katvā
yenāyasmā sārīputto tenupasaṅkami upasaṅkamitvā āyasmatā
sārīputtena saddhiṁ sammodi sammodanīyaṁ kathaṁ sārāṇīyaṁ vītisāretvā
ekamantaṁ nisīdi ekamantaṁ nisinno kho āyasmā ānando āyasmantaṁ
sārīputtaṁ etadavoca siyā nu kho āvuso sārīputta bhikkhuno tathārūpo
samādhipaṭilābho yathā neva paṭhaviyaṁ paṭhavīsaññī assa .pe. Yamidaṁ
diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi
na saññī assa saññī ca pana assāti. Siyā āvuso ānanda
bhikkhuno tathārūpo samādhipaṭilābho yathā neva paṭhaviyaṁ paṭhavīsaññī
assa .pe. Yamidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ
manasā tatrāpi na saññī assa saññī ca pana assāti.
Yathākathaṁ panāvuso sārīputta siyā bhikkhuno tathārūpo samādhipaṭilābho
yathā neva paṭhaviyaṁ paṭhavīsaññī assa .pe. Yamidaṁ diṭṭhaṁ sutaṁ mutaṁ
viññātaṁ pattaṁ pariyesitaṁ anuvicaritaṁ manasā tatrāpi na saññī
Assa saññī ca pana assāti. Idhāvuso ānanda bhikkhu evaṁsaññī
hoti etaṁ santaṁ etaṁ paṇītaṁ yadidaṁ sabbasaṅkhārasamatho sabbūpadhipaṭinissaggo
taṇhakkhayo virāgo nirodho nibbānanti evaṁ kho
āvuso ānanda siyā bhikkhuno tathārūpo samādhipaṭilābho yathā neva
paṭhaviyaṁ paṭhavīsaññī assa .pe. Yamidaṁ diṭṭhaṁ sutaṁ mutaṁ viññātaṁ
pattaṁ pariyesitaṁ anuvicaritaṁ manasā tatrāpi na saññī assa saññī
ca pana assāti. Acchariyaṁ āvuso abbhūtaṁ āvuso yatra hi
nāma satthu ca 1 sāvakassa ca atthena atthaṁ byañjanena byañjanaṁ
saṁsandissati samessati na vigayhissati 2 yadidaṁ aggapadasmiṁ
idānāhaṁ āvuso bhagavantaṁ upasaṅkamitvā etamatthaṁ apucchiṁ bhagavāpi
me [3]- etehi padehi etehi byañjanehi etamatthaṁ byākāsi
seyyathāpi āyasmā sārīputto acchariyaṁ āvuso abbhūtaṁ
āvuso yatra hi nāma satthu ca sāvakassa ca atthena atthaṁ
byañjanena byañjanaṁ saṁsandissati samessati na vigayhissati yadidaṁ
aggapadasminti.

[215] 8 Athakho āyasmā ānando yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi ekamantaṁ
nisinno kho āyasmā ānando bhagavantaṁ etadavoca siyā nu kho
bhante bhikkhuno tathārūpo samādhipaṭilābho yathā na cakkhuṁ manasikareyya
na rūpaṁ manasikareyya na sotaṁ manasikareyya na saddaṁ manasikareyya
1 Ma. ceva. 2 Po. vigaṇhissati. Yu. viggahissati. 3 Ma. etehi akkharehi.
Na ghānaṁ manasikareyya na gandhaṁ manasikareyya na jivhaṁ manasikareyya
na rasaṁ manasikareyya na kāyaṁ manasikareyya na phoṭṭhabbaṁ manasikareyya
na paṭhaviṁ manasikareyya na āpaṁ manasikareyya na tejaṁ manasikareyya
na vāyaṁ manasikareyya na ākāsānañcāyatanaṁ manasikareyya na viññāṇañcāyatanaṁ
manasikareyya na ākiñcaññāyatanaṁ manasikareyya
na nevasaññānāsaññāyatanaṁ manasikareyya na idhalokaṁ manasikareyya
na paralokaṁ manasikareyya yamidaṁ diṭṭhaṁ sutaṁ mutaṁ viññātaṁ pattaṁ
pariyesitaṁ anuvicaritaṁ manasā tampi na manasikareyya manasi ca pana
kareyyāti. Siyā ānanda bhikkhuno tathārūpo samādhipaṭilābho yathā na
cakkhuṁ manasikareyya na rūpaṁ manasikareyya na sotaṁ manasikareyya na
saddaṁ manasikareyya na ghānaṁ manasikareyya na gandhaṁ manasikareyya
na jivhaṁ manasikareyya na rasaṁ manasikareyya na kāyaṁ manasikareyya
na phoṭṭhabbaṁ manasikareyya na paṭhaviṁ manasikareyya na āpaṁ
manasikareyya na tejaṁ manasikareyya na vāyaṁ manasikareyya na ākāsānañcāyatanaṁ
manasikareyya na viññāṇañcāyatanaṁ manasikareyya na
ākiñcaññāyatanaṁ manasikareyya na nevasaññānāsaññāyatanaṁ manasikareyya
na idhalokaṁ manasikareyya na paralokaṁ manasikareyya yamidaṁ
diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tampi
na manasikareyya manasi ca pana kareyyāti. Yathākathaṁ pana bhante
siyā bhikkhuno tathārūpo samādhipaṭilābho yathā na cakkhuṁ manasikareyya na
rūpaṁ manasikareyya .pe. Yamidaṁ diṭṭhaṁ sutaṁ mutaṁ viññātaṁ pattaṁ
Pariyesitaṁ anuvicaritaṁ manasā tampi na manasikareyya manasi ca pana
kareyyāti. Idhānanda bhikkhu evaṁ manasikaroti etaṁ santaṁ etaṁ
paṇītaṁ yadidaṁ sabbasaṅkhārasamatho sabbūpadhipaṭinissaggo taṇhakkhayo
virāgo nirodho nibbānanti evaṁ kho ānanda siyā bhikkhuno tathārūpo
samādhipaṭilābho yathā na cakkhuṁ manasikareyya na rūpaṁ manasikareyya
na sotaṁ manasikareyya na saddaṁ manasikareyya na ghānaṁ manasikareyya
na gandhaṁ manasikareyya na jivhaṁ manasikareyya na rasaṁ manasikareyya
na kāyaṁ manasikareyya na phoṭṭhabbaṁ manasikareyya na paṭhaviṁ manasikareyya
na āpaṁ manasikareyya na tejaṁ manasikareyya na vāyaṁ manasikareyya
na ākāsānañcāyatanaṁ manasikareyya na viññāṇañcāyatanaṁ
manasikareyya na ākiñcaññāyatanaṁ manasikareyya na nevasaññānāsaññāyatanaṁ
manasikareyya na idhalokaṁ manasikareyya na paralokaṁ
manasikareyya yamidaṁ diṭṭhaṁ sutaṁ mutaṁ viññātaṁ pattaṁ pariyesitaṁ
anuvicaritaṁ manasā tampi na manasikareyya manasi ca pana kareyyāti.

[216] 9 Ekaṁ samayaṁ bhagavā nādike 1 viharati iñjakāvasathe 2 .
Athakho āyasmā sandho 3 yena bhagavā tenupasaṅkami upasaṅkamitvā
bhagavantaṁ abhivādetvā ekamantaṁ nisīdi. Ekamantaṁ nisinnaṁ kho
āyasmantaṁ sandhaṁ bhagavā etadavoca ājānīyajhāyitaṁ kho sandha jhāya 4
mā khaḷuṅgajhāyitaṁ 5 kathañca sandha 6 khaḷuṅgajhāyitaṁ hoti assakhaḷuṅgo
1 Ma. Yu. nātike. 2 Ma. Yu. giñjakāvasathe. 3 Po. Ma. saddho. ito
paraṁ evameva ñātabbaṁ. 4 Po. jhāyitaṁ. Yu. jhāyatha. 5 Ma. Yu. khaḷuṅkajhāyitaṁ.
6 Ma. ayaṁ pāṭho natthi.
Hi sandha doṇiyā bandho 1 yavasassaṁ yavasassanti 2 jhāyati taṁ kissa
hetu na hi sandha assakhaḷuṅgassa doṇiyā bandhassa evaṁ hoti kiṁ
nu kho maṁ ajja assadammasārathi kāraṇaṁ kāressati kimassāhaṁ 3 paṭikaromīti
so doṇiyā bandho yavasassaṁ yavasassanti 2 jhāyati evameva
kho sandha idhekacco purisakhaḷuṅgo araññagatopi rukkhamūlagatopi
suññāgāragatopi kāmarāgapariyuṭṭhitena cetasā viharati kāmarāgaparetena
uppannassa ca kāmarāgassa nissaraṇaṁ yathābhūtaṁ nappajānāti so
kāmarāgaṁ yeva anantaraṁ 4 karitvā jhāyati pajjhāyati nijjhāyati
avajjhāyati byāpādapariyuṭṭhitena cetasā viharati .. Thīnamiddhapariyuṭṭhitena
cetasā viharati ... Uddhaccakukkuccapariyuṭṭhitena cetasā viharati ...
Vicikicchāpariyuṭṭhitena cetasā viharati vicikicchāparetena uppannāya ca
vicikicchāya nissaraṇaṁ yathābhūtaṁ nappajānāti so vicikicchaṁyeva anantaraṁ
karitvā jhāyati pajjhāyati nijjhāyati avajjhāyati so paṭhavimpi
nissāya jhāyati āpampi nissāya jhāyati tejampi nissāya
jhāyati vāyampi nissāya jhāyati ākāsānañcāyatanampi nissāya
jhāyati viññāṇañcāyatanampi nissāya jhāyati ākiñcaññāyatanampi
nissāya jhāyati nevasaññānāsaññāyatanampi nissāya jhāyati
idhalokampi nissāya jhāyati paralokampi nissāya jhāyati yamidaṁ
diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tampi
nissāya jhāyati evaṁ kho sandha purisakhaḷuṅgajhāyitaṁ hoti. Kathañca
1 Po. Ma. Yu. baddho. sabbattha eseva nayo. 2 Po. yavasassaṁ varasassanti ...
Ma. Yu. yavasaṁ yavasanti. 3 Po. katamasasāhaṁ. 4 Ma. Yu. antaraṁ karitvā.
Sandha ājānīyajhāyitaṁ hoti bhadro hi sandha assājānīyo doṇiyā
bandho na yavasassaṁ yavasassanti jhāyati taṁ kissa hetu bhadrassa
hi sandha assājānīyassa doṇiyā bandhassa evaṁ hoti kiṁ nu kho
maṁ ajja assadammasārathi kāraṇaṁ kāressati kimassāhaṁ paṭikaromīti
so doṇiyā bandho na yavasassaṁ yavasassanti jhāyati bhadro hi
sandha assājānīyo yathā iṇaṁ yathābandhaṁ yathā jāni yathā kalī 1 evaṁ
patodassa ajjhoharaṇaṁ samanupassati evameva kho sandha bhadro
purisājānīyo araññagatopi rukkhamūlagatopi suññāgāragatopi na
kāmarāgapariyuṭṭhitena cetasā viharati kāmarāgaparetena uppannassa ca
kāmarāgassa nissaraṇaṁ yathābhūtaṁ pajānāti na byāpādapariyuṭṭhitena
cetasā viharati ... Na thīnamiddhapariyuṭṭhitena cetasā viharati ... Na
uddhaccakukkuccapariyuṭṭhitena cetasā viharati ... Na vicikicchāpariyuṭṭhitena
cetasā viharati na vicikicchāparetena uppannāya ca vicikicchāya nissaraṇaṁ
yathābhūtaṁ pajānāti so neva paṭhaviṁ nissāya jhāyati na āpaṁ
nissāya jhāyati na tejaṁ nissāya jhāyati na vāyaṁ nissāya
jhāyati na ākāsānañcāyatanaṁ nissāya jhāyati na viññāṇañcāyatanaṁ
nissāya jhāyati na ākiñcaññāyatanaṁ nissāya jhāyati na
nevasaññānāsaññāyatanaṁ nissāya jhāyati na idhalokaṁ nissāya jhāyati
na paralokaṁ nissāya jhāyati yamidaṁ diṭṭhaṁ sutaṁ mutaṁ viññātaṁ pattaṁ
pariyesitaṁ anuvicaritaṁ manasā tampi nissāya na jhāyati jhāyati capana
1 Ma. Yu. yathā jāniṁ yathā thaliṁ.
Evaṁjhāyiñcapana sandha bhadraṁ purisājānīyaṁ saindā devā sabrahmakā
sapajāpatikā ārakāva namassanti
namo te purisājañña namo te purisuttama
yassa tenābhijānāma yampi nissāya jhāyatīti 1 .
[2]- Evaṁ vutte āyasmā sandho bhagavantaṁ etadavoca kathaṁ jhāyī
pana bhante bhadro purisājānīyo jhāyati so neva paṭhaviṁ nissāya
jhāyati na āpaṁ nissāya jhāyati na tejaṁ nissāya jhāyati
na vāyaṁ nissāya jhāyati na ākāsānañcāyatanaṁ nissāya jhāyati
na viññāṇañcāyatanaṁ nissāya jhāyati na ākiñcaññāyatanaṁ
nissāya jhāyati na nevasaññānāsaññāyatanaṁ nissāya jhāyati
na idhalokaṁ nissāya jhāyati na paralokaṁ nissāya jhāyati yamidaṁ
diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tampi
nissāya na jhāyati jhāyati capana kathaṁ jhāyiñcapana bhante bhadraṁ
purisājānīyaṁ saindā devā sabrahmakā sapajāpatikā ārakāva
namassanti
namo te purisājañña namo te purisuttama
yassa tenābhijānāma yampi nissāya jhāyatīti 3 .
Idha sandha bhadrassa purisājānīyassa paṭhaviyā paṭhavīsaññā vibhūtā
hoti āpasmiṁ āposaññā vibhūtā hoti tejasmiṁ tejosaññā
vibhūtā hoti vāyasmiṁ vāyosaññā vibhūtā hoti ākāsānañcāyatane
1-3 Ma. Yu. jhāyasīti. 2 Po. evaṁ kho saddha ājānīyajhāyitaṁ hoti.
Ākāsānañcāyatanasaññā vibhūtā hoti viññāṇañcāyatane viññāṇañcāyatanasaññā
vibhūtā hoti ākiñcaññāyatane ākiñcañāyatanasaññā
vibhūtā hoti nevasaññānāsaññāyatane nevasaññānāsaññāyatanasaññā
vibhūtā hoti idhaloke idhalokasaññā vibhūtā
hoti paraloke paralokasaññā vibhūtā hoti yamidaṁ diṭṭhaṁ sutaṁ mutaṁ
viññātaṁ pattaṁ pariyesitaṁ anuvicaritaṁ manasā tatrāpi saññā vibhūtā
hoti evaṁjhāyī kho sandha bhadro purisājānīyo neva paṭhaviṁ nissāya
jhāyati na āpaṁ nissāya jhāyati na tejaṁ nissāya jhāyati na
vāyaṁ nissāya jhāyati na ākāsānañcāyatanaṁ nissāya jhāyati na
viññāṇañcāyatanaṁ nissāya jhāyati na ākiñcaññāyatanaṁ nissāya
jhāyati na nevasaññānāsaññāyatanaṁ nissāya jhāyati na idhalokaṁ
nissāya jhāyati na paralokaṁ nissāya jhāyati yamidaṁ diṭṭhaṁ sutaṁ
mutaṁ viññātaṁ pattaṁ pariyesitaṁ anuvicaritaṁ manasā tampi nissāya na
jhāyati jhāyati capana evaṁjhāyiñcapana sandha bhadraṁ purisājānīyaṁ
saindā devā sabrahmakā sapajāpatikā ārakāva namassanti
namo te purisājañña namo te purisuttama
yassa tenābhijānāma yampi nissāya jhāyatīti 1 .

[217] 10 Ekaṁ samayaṁ bhagavā rājagahe viharati moranivāpe
paribbājakārāme. Tatra kho bhagavā bhikkhū āmantesi bhikkhavoti.
1 Ma. Yu. jhāyasiti.
Bhadanteti te bhikkhū bhagavato paccassosuṁ. Bhagavā etadavoca tīhi
bhikkhave dhammehi samannāgato bhikkhu accantaniṭṭho hoti accantayogakkhemī
accantabrahmacārī accantapariyosāno seṭṭho devamanussānaṁ
katamehi tīhi asekkhena 1 sīlakkhandhena asekkhena samādhikkhandhena
asekkhena paññākkhandhena imehi kho bhikkhave tīhi dhammehi
samannāgato bhikkhu accantaniṭṭho hoti accantayogakkhemī
accantabrahmacārī accantapariyosāno seṭṭho devamanussānaṁ.
Aparehipi bhikkhave tīhi dhammehi samannāgato bhikkhu accantaniṭṭho
hoti accantayogakkhemī accantabrahmacārī accantapariyosāno seṭṭho
devamanussānaṁ katamehi tīhi iddhipāṭihāriyena ādesanāpāṭihāriyena
anusāsanīpāṭihāriyena imehi kho bhikkhave tīhi dhammehi samannāgato
bhikkhu accantaniṭṭho hoti accantayogakkhemī accantabrahmacārī
accantapariyosāno seṭṭho devamanussānaṁ.
Aparehipi bhikkhave tīhi dhammehi samannāgato bhikkhu accantaniṭṭho
hoti accantayogakkhemī accantabrahmacārī accantapariyosāno seṭṭho
devamanussānaṁ katamehi tīhi sammādiṭṭhiyā sammāñāṇena
sammāvimuttiyā imehi kho bhikkhave tīhi dhammehi samannāgato bhikkhu
accantaniṭṭho hoti accantayogakkhemī accantabrahmacārī
accantapariyosāno seṭṭho devamanussānaṁ.
1 Ma. Yu. sabbattha vāresu asekhena.
Dvīhi bhikkhave dhammehi samannāgato bhikkhu accantaniṭṭho hoti
accantayogakkhemī accantabrahmacārī accantapariyosāno seṭṭho
devamanussānaṁ katamehi dvīhi vijjāya caraṇena imehi kho bhikkhave
dvīhi dhammehi samannāgato bhikkhu accantaniṭṭho hoti accantayogakkhemī
accantabrahmacārī accantapariyosāno seṭṭho devamanussānaṁ
brahmunāpesā bhikkhave sanaṅkumārena gāthā bhāsitā
khattiyo seṭṭho janetasmiṁ ye gottapaṭisārino
vijjācaraṇasampanno so seṭṭho devamānuseti.
Sā kho panesā bhikkhave [1]- sanaṅkumārena gāthā sugītā no duggītā
[2]- Subhāsitā no dubbhāsitā atthasañhitā no anatthasañhitā anumatā
mayā ahaṁ bhikkhave evaṁ vadāmi
khattiyo seṭṭho janetasmiṁ ye gottapaṭisārino
vijjācaraṇasampanno so seṭṭho devamānuseti.
Nissāyavaggo 3 paṭhamo.
Tassuddānaṁ 4
kimatthiyā 5 cetanā tayo upanisā byasanena 6 ca
saññāmanasikāro sekkho moranivāpanena ca 7 .
1 Yu. brahmunā. 2 Ma. gāthā bhāsitā .... 3 nissayavaggotipi pāṭho.
4 tatruddānantipi pāṭho. 5 Po. kimatthi. 6 Po. byasane. 7 Ma. dve saññā
manasikāro saddho moranivāpakanti. Yu. saññāmanasikārā sekho moranivāpanena cāti.
Dutiyavaggo dutiyo

[218] 11 Ekaṁ samayaṁ bhagavā sakkesu viharati kapilavatthusmiṁ
nigrodhārāme. Tena kho pana samayena sambahulā bhikkhū bhagavato
cīvarakammaṁ karonti niṭṭhitacīvaro bhagavā temāsaccayena cārikaṁ
pakkamissatīti. Assosi kho mahānāmo sakko sambahulā kira bhikkhū
bhagavato cīvarakammaṁ karonti niṭṭhitacīvaro bhagavā temāsaccayena cārikaṁ
pakkamissatīti athakho mahānāmo sakko yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi ekamantaṁ
nisinno kho mahānāmo sakko bhagavantaṁ etadavoca sutametaṁ bhante
sambahulā kira bhikkhū bhagavato cīvarakammaṁ karonti niṭṭhitacīvaro bhagavā
temāsaccayena cārikaṁ pakkamissatīti tesaṁ no bhante nānāvihārehi
viharataṁ kena vihārena vihātabbanti. Sādhu sādhu mahānāma etaṁ kho
mahānāma tumhākaṁ paṭirūpaṁ kulaputtānaṁ yaṁ tumhe tathāgataṁ
upasaṅkamitvā puccheyyātha tesaṁ no bhante nānāvihārehi viharataṁ kena
vihārena vihātabbanti saddho kho mahānāma ārādhako hoti no
asaddho āraddhaviriyo ārādhako hoti no kusīto upaṭṭhitasati
ārādhako hoti no muṭṭhassati samāhito ārādhako hoti no
asamāhito paññavā ārādhako hoti no duppañño imesu
kho tvaṁ mahānāma pañcasu dhammesu patiṭṭhāya cha dhamme uttariṁ
bhāveyyāsi idha tvaṁ mahānāma tathāgataṁ anussareyyāsi itipi so
Bhagavā arahaṁ sammāsambuddho vijjācaraṇasampanno sugato lokavidū
anuttaro purisadammasārathi satthā devamanussānaṁ buddho bhagavāti yasmiṁ
mahānāma samaye ariyasāvako tathāgataṁ anussarati nevassa tasmiṁ
samaye rāgapariyuṭṭhitaṁ cittaṁ hoti na dosapariyuṭṭhitaṁ cittaṁ hoti
na mohapariyuṭṭhitaṁ cittaṁ hoti ujugatamevassa tasmiṁ samaye cittaṁ
hoti tathāgataṁ ārabbha ujugatacitto kho pana mahānāma ariyasāvako
labhati atthavedaṁ labhati dhammavedaṁ labhati dhammūpasañhitaṁ pāmujjaṁ
pamuditassa pīti jāyati pītimanassa kāyo passambhati passaddhakāyo
sukhaṁ vediyati sukhino cittaṁ samādhiyati ayaṁ vuccati mahānāma
ariyasāvako visamagatāya pajāya samappatto viharati sabyāpajjhāya
pajāya abyāpajjho viharati dhammasotasamāpanno buddhānussatiṁ bhāveti.
Puna caparaṁ tvaṁ mahānāma dhammaṁ anussareyyāsi svākkhāto
bhagavatā dhammo sandiṭṭhiko akāliko ehipassiko opanayiko 1 paccattaṁ
veditabbo viññūhīti yasmiṁ mahānāma samaye ariyasāvako dhammaṁ
anussarati nevassa tasmiṁ samaye rāgapariyuṭṭhitaṁ cittaṁ hoti na
dosapariyuṭṭhitaṁ cittaṁ hoti na mohapariyuṭṭhitaṁ cittaṁ hoti
ujugatamevassa tasmiṁ samaye cittaṁ hoti dhammaṁ ārabbha ujugatacitto kho
pana mahānāma ariyasāvako labhati atthavedaṁ labhati dhammavedaṁ labhati
dhammūpasañhitaṁ pāmujjaṁ pamuditassa pīti jāyati pītimanassa kāyo
passambhati passaddhakāyo sukhaṁ vediyati sukhino cittaṁ samādhiyati
1 Ma. opaneyyiko.
Ayaṁ vuccati mahānāma ariyasāvako visamagatāya pajāya samappatto
viharati sabyāpajjhāya pajāya abyāpajjho viharati dhammasotasamāpanno
dhammānussatiṁ bhāveti.
Puna caparaṁ tvaṁ mahānāma saṅghaṁ anussareyyāsi supaṭipanno
bhagavato sāvakasaṅgho ujupaṭipanno bhagavato sāvakasaṅgho ñāyapaṭipanno
bhagavato sāvakasaṅgho sāmīcipaṭipanno bhagavato sāvakasaṅgho yadidaṁ cattāri
purisayugāni aṭṭha purisapuggalā esa bhagavato sāvakasaṅgho āhuneyyo
pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassāti
yasmiṁ mahānāma samaye ariyasāvako saṅghaṁ anussarati nevassa
tasmiṁ samaye rāgapariyuṭṭhitaṁ cittaṁ hoti na dosapariyuṭṭhitaṁ cittaṁ
hoti na mohapariyuṭṭhitaṁ cittaṁ hoti ujugatamevassa tasmiṁ samaye
cittaṁ hoti saṅghaṁ ārabbha ujugatacitto kho pana mahānāma ariyasāvako
labhati atthavedaṁ labhati dhammavedaṁ labhati dhammūpasañhitaṁ pāmujjaṁ
pamuditassa pīti jāyati pītimanassa kāyo passambhati passaddhakāyo
sukhaṁ vediyati sukhino cittaṁ samādhiyati ayaṁ vuccati mahānāma
ariyasāvako visamagatāya pajāya samappatto viharati sabyāpajjhāya
pajāya abyāpajjho viharati dhammasotasamāpanno saṅghānussatiṁ bhāveti.
Puna caparaṁ tvaṁ mahānāma attano sīlāni anussareyyāsi akhaṇḍāni
acchiddāni asabalāni akammāsāni bhujissāni viññūpasaṭṭhāni aparāmaṭṭhāni
samādhisaṁvattanikānīti 1 yasmiṁ mahānāma samaye ariyasāvako sīlaṁ anussarati
1 Ma. itisaddo natthi.
Nevassa tasmiṁ samaye rāgapariyuṭṭhitaṁ cittaṁ hoti na dosapariyuṭṭhitaṁ
cittaṁ hoti na mohapariyuṭṭhitaṁ cittaṁ hoti ujugatamevassa tasmiṁ
samaye cittaṁ hoti sīlaṁ ārabbha ujugatacitto kho pana mahānāma
ariyasāvako labhati atthavedaṁ labhati dhammavedaṁ labhati dhammūpasañhitaṁ
pāmujjaṁ pamuditassa pīti jāyati pītimanassa kāyo passambhati
passaddhakāyo sukhaṁ vediyati sukhino cittaṁ samādhiyati ayaṁ vuccati mahānāma
ariyasāvako visamagatāya pajāya samappatto viharati sabyāpajjhāya
pajāya abyāpajjho viharati dhammasotasamāpanno sīlānussatiṁ bhāveti.
Puna caparaṁ tvaṁ mahānāma attano cāgaṁ anussareyyāsi lābhā
vata me suladdhaṁ vata me yohaṁ maccheramalapariyuṭṭhitāya pajāya
vigatamalamaccherena cetasā agāraṁ ajjhāvasāmi muttacāgo payatapāṇī 1
vossaggarato yācayogo dānasaṁvibhāgaratoti yasmiṁ mahānāma samaye
ariyasāvako cāgaṁ anussarati nevassa tasmiṁ samaye rāgapariyuṭṭhitaṁ cittaṁ
hoti na dosapariyuṭṭhitaṁ cittaṁ hoti na mohapariyuṭṭhitaṁ cittaṁ hoti
ujugatamevassa tasmiṁ samaye cittaṁ hoti cāgaṁ ārabbha ujugatacitto kho
pana mahānāma ariyasāvako labhati atthavedaṁ labhati dhammavedaṁ labhati
dhammūpasañhitaṁ pāmujjaṁ pamuditassa pīti jāyati pītimanassa kāyo
passambhati passaddhakāyo sukhaṁ vediyati sukhino cittaṁ samādhiyati ayaṁ
vuccati mahānāma ariyasāvako visamagatāya pajāya samappatto viharati
sabyāpajjhāya pajāya abyāpajjho viharati dhammasotasamāpanno
1 Po. Ma. payatapāṇi.
Cāgānussatiṁ bhāveti.
Puna caparaṁ tvaṁ mahānāma devatā anussareyyāsi santi devā
cātummahārājikā santi devā tāvatiṁsā santi devā yāmā santi
devā tusitā santi devā nimmānaratino santi devā paranimmitavasavattino
santi devā brahmakāyikā santi devā taduttari 1 yathārūpāya saddhāya
samannāgatā tā devatā ito cutā tattha uppannā 2 mayhampi tathārūpā
saddhā saṁvijjati yathārūpena sīlena samannāgatā tā devatā ito cutā tattha
uppannā mayhampi tathārūpaṁ sīlaṁ saṁvijjati yathārūpena sutena samannāgatā
tā devatā ito cutā tattha uppannā mayhampi tathārūpaṁ sutaṁ
saṁvijjati yathārūpena cāgena samannāgatā tā devatā ito cutā
tattha uppannā mayhampi tathārūpo cāgo saṁvijjati yathārūpāya
paññāya samannāgatā tā devatā ito cutā tattha uppannā
mayhampi tathārūpā paññā saṁvijjatīti yasmiṁ mahānāma samaye
ariyasāvako attano ca tāsañca devatānaṁ saddhañca sīlañca sutañca
cāgañca paññañca anussarati nevassa tasmiṁ samaye rāgapariyuṭṭhitaṁ cittaṁ
hoti na dosapariyuṭṭhitaṁ cittaṁ hoti na mohapariyuṭṭhitaṁ cittaṁ hoti
ujugatamevassa tasmiṁ samaye cittaṁ hoti devatā ārabbha ujugatacitto
kho pana mahānāma ariyasāvako labhati atthavedaṁ labhati dhammavedaṁ
labhati dhammūpasañhitaṁ pāmujjaṁ pamuditassa pīti jāyati pītimanassa
kāyo passambhati passaddhakāyo sukhaṁ vediyati sukhino cittaṁ samādhiyati
1 Po. Ma. Yu. tatuttari. 2 Po. Yu. upapannā. Ma. tatthūpapannā. sabbattha
evaṁ ñātabbaṁ.
Ayaṁ vuccati mahānāma ariyasāvako visamagatāya pajāya samappatto
viharati sabyāpajjhāya pajāya abyāpajjho viharati dhammasotasamāpanno
devatānussatiṁ bhāvetīti.