[23] Satta vo bhikkhave aparihāniye dhamme desessāmi .pe.
Katame ca bhikkhave satta ca parihāniyā dhammā yāva kīvañca bhikkhave
bhikkhū saddhā bhavissanti vuḍḍhiyeva bhikkhave bhikkhūnaṁ pāṭikaṅkhā no
parihāni. Yāvakīvañca bhikkhave bhikkhū hirimanto bhavissanti .pe.
Ottappino bhavissanti bahussutā bhavissanti āraddhaviriyā bhavissanti
satimanto bhavissanti paññavanto bhavissanti vuḍḍhiyeva bhikkhave
bhikkhūnaṁ pāṭikaṅkhā no parihāni. Yāvakīvañca bhikkhave ime satta
1 Ma. na kammaratā.
Aparihāniyā dhammā bhikkhūsu ṭhassanti imesu ca sattasu aparihāniyesu
dhammesu bhikkhū sandississanti vuḍḍhiyeva bhikkhave bhikkhūnaṁ pāṭikaṅkhā
no parihānīti.

[24] Satta vo bhikkhave aparihāniye dhamme desessāmi .p.
Katame ca bhikkhave satta aparihāniyā dhammā yāvakīvañca bhikkhave
bhikkhū satisambojjhaṅgaṁ bhāvessanti vuḍḍhiyeva bhikkhave bhikkhūnaṁ pāṭikaṅkhā
no parihāni. Yāvakīvañca bhikkhave bhikkhū dhammavicayasambojjhaṅgaṁ
bhāvessanti .pe. Viriyasambojjhaṅgaṁ bhāvessanti pītisambojjhaṅgaṁ
bhāvessanti passaddhisambojjhaṅgaṁ bhāvessanti samādhisambojjhaṅgaṁ
bhāvessanti upekkhāsambojjhaṅgaṁ bhāvessanti vuḍḍhiyeva bhikkhave
bhikkhūnaṁ pāṭikaṅkhā no parihāni. Yāvakīvañca bhikkhave ime satta
aparihāniyā dhammā bhikkhūsu ṭhassanti imesu ca sattasu aparihāniyesu
dhammesu bhikkhū sandississanti vuḍḍhiyeva bhikkhave bhikkhūnaṁ pāṭikaṅkhā
no parihānīti.

[25] Satta vo bhikkhave aparihāniye dhamme desessāmi .pe.
Katame ca bhikkhave satta aparihāniyā dhammā yāvakīvañca bhikkhave
bhikkhū aniccasaññaṁ bhāvessanti vuḍḍhiyeva bhikkhave bhikkhūnaṁ pāṭikaṅkhā
no parihāni. Yāvakīvañca bhikkhave bhikkhū anattasaññaṁ
bhāvessanti .pe. Asubhasaññaṁ bhāvessanti ādīnavasaññaṁ bhāvessanti
pahānasaññaṁ bhāvessanti virāgasaññaṁ bhāvessanti nirodhasaññaṁ
Bhāsessanti vuḍḍhiyeva bhikkhave bhikkhūnaṁ pāṭikaṅkhā no parihāni.
Yāvakīvañca bhikkhave ime satta aparihāniyā dhammā bhikkhūsu ṭhassanti
imesu ca sattasu aparihāniyesu dhammesu bhikkhū sandississanti
vuḍḍhiyeva bhikkhave bhikkhūnaṁ pāṭikaṅkhā no parihānīti.

[26] Sattime bhikkhave dhammā sekhassa bhikkhuno parihānāya
saṁvattanti katame satta kammārāmatā bhassārāmatā niddārāmatā
saṅgaṇikārāmatā indriyesu aguttadvāratā bhojane amattaññutā
santi kho pana saṅghe saṅghakaraṇīyāni tatra [1]- bhikkhu na iti
paṭisañcikkhati santi kho pana saṅghe therā rattaññū cirapabbajitā
bhāravāhino [2]- te tena paññāyissantīti attanā vo 3 yogaṁ āpajjati
ime kho bhikkhave satta dhammā sekhassa bhikkhuno parihānāya
saṁvattantīti 4 . Sattime bhikkhave dhammā sekhassa bhikkhuno
aparihānāya saṁvattanti katame satta na kammārāmatā na
bhassārāmatā na niddārāmatā na saṅgaṇikārāmatā indriyesu
guttadvāratā bhojane mattaññutā santi kho pana saṅghe
saṅghakaraṇīyāni tatra [5]- bhikkhu iti paṭisañcikkhati santi kho pana
saṅghe therā rattaññū cirapabbajitā bhāravāhino te tena
paññāyissantīti attanā na vo 6 yogaṁ āpajjati ime kho bhikkhave
satta dhammā sekhassa bhikkhuno aparihānāya saṁvattantīti.

[27] Sattime bhikkhave dhammā upāsakassa parihānāya
1-5 Ma. sekho. 2 Ma. na. 3-6 Ma. tesu. 4 Ma. itisaddo natthi.
Saṁvattanti katame satta bhikkhudassanaṁ hāpeti saddhammassavanaṁ
pamajjati adhisīle na sikkhati appasādabahulo hoti bhikkhūsu
theresu ceva navesu ca majjhimesu ca upārambhacitto dhammaṁ suṇāti
randhagavesī ito bahiddhā dakkhiṇeyyaṁ gavesati tattha ca pubbakāraṁ
karoti ime kho bhikkhave satta dhammā upāsakassa parihānāya
saṁvattanti. Sattime bhikkhave dhammā upāsakassa aparihānāya
saṁvattanti katame satta bhikkhudassanaṁ na hāpeti saddhammassavanaṁ
nappamajjati adhisīle sikkhati pasādabahulo hoti bhikkhūsu theresu
ceva navesu ca majjhimesu ca anupārambhacitto dhammaṁ suṇāti na
randhagavesī na ito bahiddhā dakkhiṇeyyaṁ gavesati idha ca
pubbakāraṁ karoti ime kho bhikkhave satta dhammā upāsakassa
aparihānāya saṁvattantīti.
Dassanaṁ bhāvitattānaṁ yo hāpeti upāsako
savanañca ariyadhammānaṁ adhisīle na sikkhati
appasādo ca bhikkhūsu bhiyyo bhiyyo pavaḍḍhati
upārambhakacitto ca saddhammaṁ sotumicchati
ito ca bahiddhā aññaṁ dakkhiṇeyyaṁ gavesati
tattheva ca pubbakāraṁ yo karoti upāsako
ete kho parihānīye 1 satta dhamme sudesite
upāsako sevamāno saddhammā parihāyati.
1 Ma. parihāniye. evamuparipi.
Dassanaṁ bhāvitattānaṁ yo na hāpeti upāsako
savanañca ariyadhammānaṁ adhisīle ca sikkhati
pasādo cassa bhikkhūsu bhiyyo bhiyyo pavaḍḍhati
anupārambhacitto ca saddhammaṁ sotumicchati
na ito bahiddhā aññaṁ dakkhiṇeyyaṁ gavesati
idheva ca pubbakāraṁ yo karoti upāsako
ete kho aparihānīye satta dhamme sudesite
upāsako sevamāno saddhammā na ca hāyatīti 1 .

[28] Sattimā bhikkhave upāsakassa vipattiyo sattimā
bhikkhave upāsakassa sampadā sattime bhikkhave upāsakassa asambhavā 2
sattime bhikkhave upāsakassa sambhavā katame satta bhikkhudassanaṁ
na hāpeti saddhammassavanaṁ nappamajjati adhisīle sikkhati pasādabahulo
hoti bhikkhūsu theresu ceva navesu ca majjhimesu ca anupārambhacitto
dhammaṁ suṇāti na randhagavesī na ito bahiddhā
dakkhiṇeyyaṁ gavesati idha ca pubbakāraṁ karoti ime kho bhikkhave
satta upāsakassa sambhavāti.
Dassanaṁ bhāvitattānaṁ yo hāpeti upāsako
savanañca ariyadhammānaṁ adhisīle na sikkhati
appasādo ca bhikkhūsu bhiyyo bhiyyo pavaḍḍhati
upārambhakacitto ca saddhammaṁ sotumicchati
1 Ma. saddhammā na parihāyatīti. evamuparipi. 2 Ma. parābhavā.
Ito ca bahiddhā aññaṁ dakkhiṇeyyaṁ gavesati
tattheva ca pubbakāraṁ yo karoti upāsako
ete kho parihānīye satta dhamme sudesite
upāsako sevamāno saddhammā parihāyati.
Dassanaṁ bhāvitattānaṁ yo na hāpeti upāsako
savanañca ariyadhammānaṁ adhisīle ca sikkhati
pasādo cassa bhikkhūsu bhiyyo bhiyyo pavaḍḍhati
anupārambhacitto ca saddhammaṁ sotumicchati
na ito bahiddhā aññaṁ dakkhiṇeyyaṁ gavesati
idheva ca pubbakāraṁ yo karoti upāsako
ete kho aparihānīye satta dhamme sudesite
upāsako sevamāno saddhammā na ca hāyatīti.
Vajjīvaggo tatiyo.
Tassuddānaṁ
sārandado 1 vassakāro bhikkhu kammañca saddhiyaṁ
bodhiyasaññaṁ sekho ca hāni vipattayasambhavoti 2 .
------------
Devatāvaggo catuttho

[29] Athakho aññatarā devatā abhikkantāya rattiyā
abhikkantavaṇṇā kevalakappaṁ jetavanaṁ obhāsetvā yena bhagavā
1-2 Ma. sārandavassakāro ca tisattakāni bhikkhukā
bodhisaññā dve ca hāni vipatti ca parābhavoti.
Tenupasaṅkami upasaṅkamitvā bhagavantaṁ abhivādetvā ekamantaṁ aṭṭhāsi
ekamantaṁ ṭhitā kho sā devatā bhagavantaṁ etadavoca sattime
bhante dhammā bhikkhuno aparihānāya saṁvattanti katame satta
satthugāravatā dhammagāravatā saṅghagāravatā sikkhāgāravatā samādhigāravatā
appamādagāravatā paṭisanthāragāravatā ime kho bhante satta
dhammā bhikkhuno aparihānāya saṁvattantīti idamavoca sā devatā
samanuñño satthā ahosi. Athakho sā devatā samanuñño me
satthāti bhagavantaṁ abhivādetvā padakkhiṇaṁ katvā tatthevantaradhāyi.
Athakho bhagavā tassā rattiyā accayena bhikkhū āmantesi imaṁ
bhikkhave rattiṁ aññatarā devatā abhikkantāya rattiyā abhikkantavaṇṇā
kevalakappaṁ jetavanaṁ obhāsetvā yenāhaṁ tenupasaṅkami upasaṅkamitvā
maṁ abhivādetvā ekamantaṁ aṭṭhāsi ekamantaṁ ṭhitā kho
bhikkhave sā devatā maṁ etadavoca sattime bhante dhammā bhikkhuno
aparihānāya saṁvattanti katame satta satthugāravatā dhammagāravatā
saṅghagāravatā sikkhāgāravatā samādhigāravatā appamādagāravatā
paṭisanthāragāravatā ime kho bhante satta dhammā bhikkhuno aparihānāya
saṁvattantīti idamavoca bhikkhave sā devatā idaṁ vatvā maṁ
abhivādetvā padakkhiṇaṁ katvā tatthevantaradhāyīti.
Satthugaru dhammagaru saṁghe ca tibbagāravo
samādhigaru ātāpī sikkhāya tibbagāravo
Appamādagaru bhikkhu paṭisanthāragāravo
abhabbo parihānāya nibbānasseva santiketi.

[30] Imaṁ bhikkhave rattiṁ aññatarā devatā abhikkantāya
rattiyā abhikkantavaṇṇā kevalakappaṁ jetavanaṁ obhāsetvā yenāhaṁ
tenupasaṅkami upasaṅkamitvā maṁ abhivādetvā ekamantaṁ aṭṭhāsi
ekamantaṁ ṭhitā kho bhikkhave sā devatā maṁ etadavoca sattime
bhante dhammā bhikkhuno aparihānāya saṁvattanti katame satta
satthugāravatā dhammagāravatā saṅghagāravatā sikkhāgāravatā samādhigāravatā
hirigāravatā ottappagāravatā ime kho bhante satta dhammā
bhikkhuno aparihānāya saṁvattantīti idamavoca bhikkhave sā devatā
idaṁ vatvā maṁ abhivādetvā padakkhiṇaṁ katvā tatthevantaradhāyīti.
Satthugaru dhammagaru saṅghe ca tibbagāravo
samādhigaru ātāpī sikkhāya tibbagāravo
hirīotappasampanno sappatisso sagāravo
abhabbo parihānāya nibbānasseva santiketi.

[31] Imaṁ bhikkhave rattiṁ aññatarā devatā .pe. Maṁ
etadavoca sattime bhante dhammā bhikkhuno aparihānāya saṁvattanti
katame satta satthugāravatā dhammagāravatā saṅghagāravatā sikkhāgāravatā
samādhigāravatā sovacassatā kalyāṇamittatā ime kho
bhante satta dhammā bhikkhuno aparihānāya saṁvattantīti idamavoca
Bhikkhave sā devatā idaṁ vatvā maṁ abhivādetvā padakkhiṇaṁ katvā
tatthevantaradhāyīti.
Satthugaru dhammagaru saṅghe ca tibbagāravo
samādhigaru ātāpī sikkhāya tibbagāravo
kalyāṇamitto suvaco sappatisso sagāravo
abhabbo parihānāya nibbānasseva santiketi.

[32] Imaṁ bhikkhave rattiṁ aññatarā .pe. Maṁ etadavoca
sattime bhante dhammā bhikkhuno aparihānāya saṁvattanti katame satta
satthugāravatā dhammagāravatā saṅghagāravatā sikkhāgāravatā samādhigāravatā
sovacassatā kalyāṇamittatā ime kho bhante satta dhammā
bhikkhuno aparihānāya saṁvattantīti idamavoca bhikkhave sā devatā
idaṁ vatvā maṁ abhivādetvā padakkhiṇaṁ katvā tatthevantaradhāyīti.
Evaṁ vutte āyasmā sārīputto bhagavantaṁ etadavoca imassa kho
ahaṁ bhante bhagavatā saṅkhittena bhāsitassa evaṁ vitthārena atthaṁ
ājānāmi idha bhante bhikkhu attanā ca satthugāravo hoti
satthugāravatāya ca vaṇṇavādī ye caññe bhikkhū na satthugāravā
te ca satthugāravatāya samādapeti ye caññe bhikkhū satthugāravā
tesañca vaṇṇaṁ bhaṇati bhūtaṁ tacchaṁ kālena attanā ca dhammagāravo
hoti .pe. Saṅghagāravo hoti sikkhāgāravo hoti samādhigāravo
hoti suvaco hoti kalyāṇamitto hoti kalyāṇamittatāya
Ca vaṇṇavādī ye caññe bhikkhū na kalyāṇamittā te ca
kalyāṇamittatāya samādapeti ye caññe bhikkhū kalyāṇamittā
tesañca vaṇṇaṁ bhaṇati bhūtaṁ tacchaṁ kālena 1 imassa kho ahaṁ bhante
bhagavatā saṅkhittena bhāsitassa evaṁ vitthārena atthaṁ ājānāmīti.
Sādhu sādhu sārīputta sādhu kho tvaṁ sārīputta imassa mayā
saṅkhittena bhāsitassa evaṁ vitthārena atthaṁ ājānāsi idha
sārīputta bhikkhu attanā ca satthugāravo hoti satthugāravatāya ca
vaṇṇavādī ye caññe bhikkhū na satthugāravā te ca satthugāravatāya
samādapeti ye caññe bhikkhū satthugāravā tesañca vaṇṇaṁ
bhaṇati bhūtaṁ tacchaṁ kālena attanā ca dhammagāravo hoti .pe.
Saṅghagāravo hoti sikkhāgāravo hoti samādhigāravo hoti suvaco hoti
kalyāṇamitto hoti kalyāṇamittatāya ca vaṇṇavādī ye caññe
bhikkhū na kalyāṇamittā te ca kalyāṇamittatāya samādapeti ye
caññe bhikkhū kalyāṇamittā tesañca vaṇṇaṁ bhaṇati bhūtaṁ tacchaṁ
kālena 2 imassa kho sārīputta mayā saṅkhittena bhāsitassa evaṁ
vitthārena attho daṭṭhabboti.