[13] Sattahi bhikkhave aṅgehi samannāgataṁ kulaṁ anupagantvā
vā nālaṁ upagantuṁ upagantvā vā nālaṁ nisīdituṁ 1 . Katamehi sattahi
na manāpena paccuṭṭhenti na manāpena abhivādenti na manāpena āsanaṁ
denti santamassa parigūhanti bahukamhi 2 thokaṁ denti paṇītamhi 3 lūkhaṁ
denti asakkaccaṁ denti no sakkaccaṁ imehi kho bhikkhave sattahi
aṅgehi samannāgataṁ kulaṁ anupagantvā vā nālaṁ upagantuṁ upagantvā
1 Ma. upanisīdituṁ. evamuparipi. 2 Ma. bahukampi. evamuparipi.
3 Ma. paṇītampi. evamuparipi.
Vā nālaṁ nisīdituṁ. Sattahi bhikkhave aṅgehi samannāgataṁ kulaṁ anupagantvā
vā alaṁ upagantuṁ upagantvā vā alaṁ nisīdituṁ. Katamehi
sattahi manāpena paccuṭṭhenti manāpena abhivādenti manāpena
āsanaṁ denti santamassa na parigūhanti bahukamhi bahukaṁ denti paṇītamhi
paṇītaṁ denti sakkaccaṁ denti no asakkaccaṁ imehi kho bhikkhave
sattahi aṅgehi samannāgataṁ kulaṁ anupagantvā vā alaṁ upagantuṁ
upagantvā vā alaṁ nisīditunti.

[14] Sattime bhikkhave puggalā āhuneyyā pāhuneyyā
dakkhiṇeyyā añjalikaraṇīyā anuttaraṁ puññakkhettaṁ lokassa.
Katame satta ubhatobhāgavimutto paññāvimutto kāyasakkhi
diṭṭhippatto saddhāvimutto dhammānusārī saddhānusārī ime kho bhikkhave
satta puggalā āhuneyyā pāhuneyyā dakkhiṇeyyā añjalikaraṇīyā
anuttaraṁ puññakkhettaṁ lokassāti.

[15] Sattime bhikkhave udakūpamā puggalā santo saṁvijjamānā
lokasmiṁ. Katame satta idha bhikkhave ekacco puggalo sakiṁ nimuggo
nimuggo va hoti idha pana bhikkhave ekacco puggalo ummujjitvā
nimujjati idha pana bhikkhave ekacco puggalo ummujjitvā ṭhito
hoti idha pana bhikkhave ekacco puggalo ummujjitvā vipassati
viloketi idha pana bhikkhave ekacco puggalo ummujjitvā patarati
idha pana bhikkhave ekacco puggalo ummujjitvā patigādhappatto hoti
Idha pana bhikkhave ekacco puggalo ummujjitvā tiṇṇo hoti pāragato 1
thale tiṭṭhati brāhmaṇo. Kathañca bhikkhave puggalo sakiṁ nimuggo
nimuggo va hoti idha bhikkhave ekacco puggalo samannāgato hoti
ekantakāḷakehi akusalehi dhammehi evaṁ kho bhikkhave puggalo sakiṁ
nimuggo nimuggo va hoti. Kathañca bhikkhave puggalo ummujjitvā
nimujjati idha bhikkhave ekacco puggalo ummujjati sādhu saddhā
kusalesu dhammesu sādhu hirī sādhu ottappaṁ sādhu viriyaṁ sādhu paññā
kusalesu dhammesūti tassa sā saddhā neva tiṭṭhati no vaḍḍhati
hāyatiyeva tassa sā hirī tassa taṁ ottappaṁ tassa taṁ viriyaṁ tassa
sā paññā neva tiṭṭhati no vaḍḍhati hāyatiyeva evaṁ kho bhikkhave
puggalo ummujjitvā nimujjati. Kathañca bhikkhave puggalo ummujjitvā
ṭhito hoti idha bhikkhave ekacco puggalo ummujjati sādhu saddhā
kusalesu dhammesu sādhu hirī sādhu ottappaṁ sādhu viriyaṁ sādhu paññā
kusalesu dhammesūti tassa sā saddhā neva hāyati no vaḍḍhati ṭhitā
hoti tassa sā hirī tassa taṁ ottappaṁ tassa taṁ viriyaṁ tassa
sā paññā neva hāyati no vaḍḍhati ṭhitā hoti evaṁ kho bhikkhave
puggalo ummujjitvā ṭhito hoti. Kathañca bhikkhave puggalo
ummujjitvā vipassati viloketi idha bhikkhave ekacco puggalo ummujjati
sādhu saddhā kusalesu dhammesu sādhu hirī sādhu ottappaṁ sādhu viriyaṁ
sādhu paññā kusalesu dhammesūti so tiṇṇaṁ saññojanānaṁ parikkhayā
1 Ma. pāraṅgato. evamuparipi.
Sotāpanno hoti avinipātadhammo niyato sambodhiparāyano evaṁ kho
bhikkhave puggalo ummujjitvā vipassati viloketi. Kathañca bhikkhave
puggalo ummujjitvā patarati idha bhikkhave ekacco puggalo ummujjati
sādhu saddhā kusalesu dhammesu sādhu hirī sādhu ottappaṁ sādhu viriyaṁ
sādhu paññā kusalesu dhammesūti so tiṇṇaṁ saññojanānaṁ parikkhayā
rāgadosamohānaṁ tanuttā sakadāgāmī hoti sakideva imaṁ lokaṁ āgantvā
dukkhassantaṁ karoti evaṁ kho bhikkhave puggalo ummujjitvā patarati.
Kathañca bhikkhave puggalo ummujjitvā patigādhappatto hoti idha
bhikkhave ekacco puggalo ummujjati sādhu saddhā kusalesu dhammesu
sādhu hirī sādhu ottappaṁ sādhu viriyaṁ sādhu paññā kusalesu dhammesūti
so pañcannaṁ orambhāgiyānaṁ saññojanānaṁ parikkhayā opapātiko hoti
tattha parinibbāyī anāvattidhammo tasmā lokā ayaṁ kho bhikkhave
puggalo ummujjitvā patigādhappatto hoti. Kathañca bhikkhave puggalo
ummujjitvā tiṇṇo hoti pāragato thale tiṭṭhati brāhmaṇo idha
bhikkhave ekacco puggalo ummujjati sādhu saddhā kusalesu dhammesu
sādhu hirī sādhu ottappaṁ sādhu viriyaṁ sādhu paññā kusalesu dhammesūti
so āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme
sayaṁ abhiññā sacchikatvā upasampajja viharati evaṁ kho bhikkhave
puggalo ummujjitvā tiṇṇo hoti pāragato thale tiṭṭhati brāhmaṇo.
Ime kho bhikkhave satta udakūpamā puggalā santo saṁvijjamānā
lokasminti.

[16] Sattime bhikkhave puggalā āhuneyyā pāhuneyyā
dakkhiṇeyyā añjalikaraṇīyā anuttaraṁ puññakkhettaṁ lokassa. Katame
satta idha bhikkhave ekacco puggalo sabbasaṅkhāresu aniccānupassī
viharati aniccasaññī aniccapaṭisaṁvedī satataṁ samitaṁ abbokiṇṇaṁ cetasā
adhimuccamāno paññāya pariyogāhamāno so āsavānaṁ khayā .pe.
Sacchikatvā upasampajja viharati ayaṁ bhikkhave paṭhamo puggalo āhuneyyo
pāhuneyyo dakkhiṇeyyo añjalikaraṇīyo anuttaraṁ puññakkhettaṁ
lokassa. Puna caparaṁ bhikkhave idhekacco puggalo sabbasaṅkhāresu
aniccānupassī viharati aniccasaññī aniccapaṭisaṁvedī satataṁ samitaṁ
abbokiṇṇaṁ cetasā adhimuccamāno paññāya pariyogāhamāno tassa
apubbaṁ acarimaṁ āsavapariyādānañca hoti jīvitapariyādānañca ayaṁ
bhikkhave dutiyo puggalo āhuneyyo .pe. Anuttaraṁ puññakkhettaṁ
lokassa. Puna caparaṁ bhikkhave idhekacco puggalo sabbasaṅkhāresu
aniccānupassī viharati aniccasaññī aniccapaṭisaṁvedī satataṁ samitaṁ
abbokiṇṇaṁ cetasā adhimuccamāno paññāya pariyogāhamāno so
pañcannaṁ orambhāgiyānaṁ saññojanānaṁ parikkhayā antarāparinibbāyī
hoti .pe. Upahaccaparinibbāyī hoti asaṅkhāraparinibbāyī hoti
sasaṅkhāraparinibbāyī hoti uddhaṁsoto hoti akaniṭṭhagāmī ayaṁ bhikkhave
sattamo puggalo āhuneyyo pāhuneyyo dakkhiṇeyyo añjalikaraṇīyo
anuttaraṁ puññakkhettaṁ lokassa. Ime kho bhikkhave satta puggalā
Āhuneyyā pāhuneyyā dakkhiṇeyyā añjalikaraṇīyā anuttaraṁ
puññakkhettaṁ lokassāti

[17] Sattime bhikkhave puggalā āhuneyyā .pe. Anuttaraṁ
puññakkhettaṁ lokassa. Katame satta idha bhikkhave ekacco puggalo
sabbasaṅkhāresu dukkhānupassī viharati .pe. Sabbesu dhammesu anattānupassī
viharati nibbāne sukhānupassī viharati sukhasaññī sukhapaṭisaṁvedī
satataṁ samitaṁ abbokiṇṇaṁ cetasā adhimuccamāno paññāya pariyogāhamāno
so āsavānaṁ khayā .pe. Sacchikatvā upasampajja viharati ayaṁ
bhikkhave paṭhamo puggalo āhuneyyo .pe. Anuttaraṁ puññakkhettaṁ
lokassa. Puna caparaṁ bhikkhave idhekacco puggalo nibbāne sukhānupassī
viharati sukhasaññī sukhapaṭisaṁvedī satataṁ samitaṁ abbokiṇṇaṁ cetasā
adhimuccamāno paññāya pariyogāhamāno tassa apubbaṁ acarimaṁ
āsavapariyādānañca hoti jīvitapariyādānañca ayaṁ bhikkhave dutiyo puggalo
āhuneyyo .pe. Anuttaraṁ puññakkhettaṁ lokassa. Puna caparaṁ
bhikkhave idhekacco puggalo nibbāne sukhānupassī viharati sukhasaññī
sukhapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya
pariyogāhamāno so pañcannaṁ orambhāgiyānaṁ saññojanānaṁ parikkhayā
antarāparinibbāyī hoti .pe. Upahaccaparinibbāyī hoti asaṅkhāraparinibbāyī
hoti sasaṅkhāraparinibbāyī hoti uddhaṁsoto hoti akaniṭṭhagāmī
ayaṁ bhikkhave sattamo puggalo āhuneyyo .pe. Anuttaraṁ puññakkhettaṁ
Lokassa. Ime kho bhikkhave satta puggalā āhuneyyā .pe.
Anuttaraṁ puññakkhettaṁ lokassāti.

[18] Sattimāni bhikkhave niddasavatthūni. Katamāni satta idha
bhikkhave bhikkhu sikkhāsamādāne tibbacchando hoti āyatiṁ ca sikkhāsamādāne
adhigatapemo 1 dhammanisantiyā tibbacchando hoti āyatiṁ ca
dhammanisantiyā adhigatapemo icchāvinaye tibbacchando hoti āyatiṁ ca
icchāvinaye adhigatapemo paṭisallāne tibbacchando hoti āyatiṁ ca
paṭisallāne adhigatapemo viriyārambhe tibbacchando hoti āyatiṁ ca
viriyārambhe adhigatapemo satinepakke tibbacchando hoti āyatiṁ ca
satinepakke adhigatapemo diṭṭhipaṭivedhe tibbacchando hoti āyatiṁ ca
diṭṭhipaṭivedhe adhigatapemo. Imāni kho bhikkhave satta niddasavatthūnīti.
Anusayavaggo dutiyo.
Tassuddānaṁ
dve anusayā kulaṁ puggalaṁ udakūpamaṁ
aniccā dukkhā 2 anattā ca nibbānaṁ niddasavatthūnīti 3 .
----------------
Vajjīvaggo 4 tatiyo

[19] Ekaṁ samayaṁ bhagavā vesāliyaṁ viharati sārandade cetiye.
Athakho sambahulā licchavī yena bhagavā tenupasaṅkamiṁsu upasaṅkamitvā
bhagavantaṁ abhivādetvā ekamantaṁ nisīdiṁsu ekamantaṁ nisinne kho te
1 Ma. avigatapemo. evamuparipi. 2 Ma. aniccaṁ dukkhaṁ. 3 Ma. niddasavatthu cāti.
4 Ma. vajjīsattakavaggo.
Licchavī bhagavā etadavoca satta vo licchavī aparihāniye dhamme
desessāmi taṁ suṇātha sādhukaṁ manasikarotha bhāsissāmīti. Evaṁ bhanteti
kho te licchavī bhagavato paccassosuṁ. Bhagavā etadavoca katame ca
licchavī satta aparihāniyā dhammā yāvakīvañca licchavī vajjī abhiṇhasannipātā 1
bhavissanti sannipātabahulā vuḍḍhiyeva licchavī vajjīnaṁ
pāṭikaṅkhā no parihāni. Yāvakīvañca licchavī vajjī samaggā
sannipatissanti samaggā vuṭṭhahissanti samaggā vajjikaraṇīyāni karissanti
vuḍḍhiyeva licchavī vajjīnaṁ pāṭikaṅkhā no parihāni. Yāvakīvañca licchavī
vajjī appaññattaṁ na paññāpessanti paññattaṁ na samucchindissanti
yathāpaññatte porāṇe vajjidhamme samādāya vattissanti vuḍḍhiyeva
licchavī vajjīnaṁ pāṭikaṅkhā no parihāni. Yāvakīvañca licchavī vajjī
ye te vajjīnaṁ vajjimahallakā te sakkarissanti garukarissanti mānessanti
pūjessanti tesañca sotabbaṁ maññissanti vuḍḍhiyeva licchavī
vajjīnaṁ pāṭikaṅkhā no parihāni. Yāvakīvañca licchavī vajjī yā tā
kulitthiyo kulakumāriyo tā na okkassa pasayha vāsessanti vuḍḍhiyeva
licchavī vajjīnaṁ pāṭikaṅkhā no parihāni. Yāvakīvañca licchavī
vajjī yāni tāni vajjīnaṁ vajjicetiyāni abbhantarāni ceva bāhirāni ca
tāni sakkarissanti garukarissanti mānessanti pūjessanti tesañca dinnapubbaṁ
katapubbaṁ dhammikaṁ baliṁ no parihāpessanti vuḍḍhiyeva licchavī
vajjīnaṁ pāṭikaṅkhā no parihāni. Yāvakīvañca licchavī vajjīnaṁ arahantesu
1 Ma. abhiṇhaṁ sannipātā. evamuparipi.
Dhammikārakkhāvaraṇagutti susaṁvihitā bhavissati kinti anāgatā ca arahanto
vijitaṁ āgaccheyyuṁ āgatā ca arahanto vijite phāsuṁ vihareyyunti
vuḍḍhiyeva licchavī vajjīnaṁ pāṭikaṅkhā no parihāni. Yāvakīvañca licchavī
ime satta aparihāniyā dhammā vajjīsu ṭhassanti imesu ca sattasu
aparihāniyesu dhammesu vajjī sandississanti vuḍḍhiyeva licchavī vajjīnaṁ
paṭikaṅkhā no parihānīti.

[20] Ekaṁ samayaṁ bhagavā rājagahe viharati gijjhakūṭe pabbate.
Tena kho pana samayena rājā māgadho ajātasattu vedehiputto vajjī
abhiyātukāmo hoti so evamāha ahaṁ ime vajjī evaṁmahiddhike
evaṁmahānubhāve ucchejjissāmi 1 vajjī vināsessāmi vajjī anayabyasanaṁ
āpādessāmīti athakho rājā māgadho ajātasattu vedehiputto
vassakāraṁ brāhmaṇaṁ magadhamahāmattaṁ āmantesi ehi tvaṁ brāhmaṇa
yena bhagavā tenupasaṅkami upasaṅkamitvā mama vacanena bhagavato pāde sirasā
vanda appābādhaṁ appātaṅkaṁ lahuṭṭhānaṁ balaṁ phāsuvihāraṁ puccha rājā
bhante māgadho ajātasattu vedehiputto bhagavato pāde sirasā vandati
appābādhaṁ appātaṅkaṁ lahuṭṭhānaṁ balaṁ phāsuvihāraṁ pucchatīti evañca
vadehi rājā bhante māgadho ajātasattu vedehiputto vajjī abhiyātukāmo
so evamāha ahaṁ ime vajjī evaṁmahiddhike evaṁmahānubhāve
ujchejjissāmi vajjī vināsessāmi vajjī anayabyasanaṁ āpādessāmīti
1 Ma. ucchecchāmi. evamuparipi.
Yathā bhagavā byākaroti taṁ sādhukaṁ uggahetvā mama āroceyyāsi na
hi tathāgatā vitathaṁ bhaṇantīti. Evaṁ bhoti kho vassakāro brāhmaṇo
magadhamahāmatto rañño māgadhassa ajātasattussa vedehiputtassa paṭissuṇitvā
yena bhagavā tenupasaṅkami upasaṅkamitvā bhagavatā saddhiṁ
sammodi sammodanīyaṁ kathaṁ sārāṇīyaṁ vītisāretvā ekamantaṁ nisīdi
ekamantaṁ nisinno kho vassakāro brāhmaṇo magadhamahāmatto bhagavantaṁ
etadavoca rājā bho gotama māgadho ajātasattu vedehiputto bhoto
gotamassa pāde sirasā vandati appābādhaṁ appātaṅkaṁ lahuṭṭhānaṁ balaṁ
phāsuvihāraṁ pucchati rājā bho gotama māgadho ajātasattu vedehiputto
vajjī abhiyātukāmo so evamāha ahaṁ ime vajjī evaṁmahiddhike
evaṁmahānubhāve ucchejjissāmi vajjī anayabyasanaṁ āpādessāmīti.
Tena kho pana samayena āyasmā ānando bhagavato piṭṭhito
ṭhito hoti bhagavantaṁ vījamāno 1 . Athakho bhagavā āyasmantaṁ ānandaṁ
āmantesi kinti te ānanda sutaṁ vajjī abhiṇhasannipātā
sannipātabahulāti. Sutaṁ me taṁ bhante vajjī abhiṇhasannipātā
sannipātabahulāti. Yāvakīvañca ānanda vajjī abhiṇhasannipātā bhavissanti
sannipātabahulā vuḍḍhiyeva ānanda vajjīnaṁ pāṭikaṅkhā no parihāni.
Kinti te ānanda sutaṁ vajjī samaggā sannipatanti samaggā
vuṭṭhahanti samaggā vajjikaraṇīyāni karontīti. Sutaṁ me taṁ bhante
vajjī samaggā sannipatanti samaggā vuṭṭhahanti samaggā vajjikaraṇīyāni
1 Ma. bījamāno. evamuparipi.
Karontīti. Yāvakīvañca ānanda vajjī samaggā sannipatissanti samaggā
vuṭṭhahissanti samaggā vajjikaraṇīyāni karissanti vuḍḍhiyeva ānanda
vajjīnaṁ pāṭikaṅkhā no parihāni. Kinti te ānanda sutaṁ vajjī
appaññattaṁ na paññāpenti paññattaṁ na samucchindanti yathāpaññatte
porāṇe vajjidhamme samādāya vattantīti. Sutaṁ me taṁ
bhante vajjī appaññattaṁ na paññāpenti paññattaṁ na samucchindanti
yathāpaññatte porāṇe vajjidhamme samādāya vattantīti.
Yāvakīvañca ānanda vajjī appaññattaṁ na paññāpessanti paññattaṁ
na samucchindissanti yathāpaññatte porāṇe vajjidhamme samādāya
vattissanti vuḍḍhiyeva ānanda vajjīnaṁ pāṭikaṅkhā no parihāni.
Kinti te ānanda sutaṁ vajjī ye te vajjīnaṁ vajjimahallakā te
sakkaronti garukaronti mānenti pūjenti tesañca sotabbaṁ maññantīti.
Sutaṁ me taṁ bhante vajjī ye te vajjīnaṁ vajjimahallakā te
sakkaronti garukaronti mānenti pūjenti tesañca sotabbaṁ maññantīti.
Yāvakīvañca ānanda vajjī ye te vajjīnaṁ vajjimahallakā te
sakkarissanti garukarissanti mānessanti pūjessanti tesañca sotabbaṁ
maññissanti vuḍḍhiyeva ānanda vajjīnaṁ pāṭikaṅkhā no parihāni.
Kinti te ānanda sutaṁ vajjī yā tā kulitthiyo kulakumāriyo tā
na okkassa pasayha vāsentīti. Sutaṁ me taṁ bhante vajjī yā
tā kulitthiyo kulakumāriyo tā na okkassa pasayha vāsentīti.
Yāvakīvañca ānanda vajjī yā tā kulitthiyo kulakumāriyo tā na
okkassa pasayha vāsessanti vuḍḍhiyeva ānanda vajjīnaṁ pāṭikaṅkhā
no parihāni. Kinti te ānanda sutaṁ vajjī yāni tāni
vajjīnaṁ vajjicetiyāni abbhantarāni ceva bāhirāni ca tāni sakkaronti
garukaronti mānenti pūjenti tesañca dinnapubbaṁ katapubbaṁ dhammikaṁ
baliṁ no parihāpentīti. Sutaṁ me taṁ bhante vajjī yāni tāni
vajjīnaṁ vajjicetiyāni abbhantarāni ceva bāhirāni ca tāni sakkaronti
garukaronti mānenti pūjenti tesañca dinnapubbaṁ katapubbaṁ dhammikaṁ baliṁ
no parihāpentīti. Yāvakīvañca ānanda vajjī yāni tāni vajjīnaṁ
vajjicetiyāni abbhantarāni ceva bāhirāni ca tāni sakkarissanti garukarissanti
mānessanti pūjessanti tesañca dinnapubbaṁ katapubbaṁ dhammikaṁ
baliṁ no parihāpessanti vuḍḍhiyeva ānanda vajjīnaṁ pāṭikaṅkhā
no parihāni. Kinti te ānanda sutaṁ vajjīnaṁ arahantesu dhammikārakkhāvaraṇagutti
susaṁvihitā [1]- kinti anāgatā ca arahanto vijitaṁ
āgaccheyyuṁ āgatā ca arahanto vijite phāsuṁ vihareyyunti. Sutaṁ me
taṁ bhante vajjīnaṁ arahantesu dhammikārakkhāvaraṇagutti susaṁvihitā [1]- kinti
anāgatā ca arahanto vijitaṁ āgaccheyyuṁ āgatā ca arahanto vijite
phāsuṁ vihareyyunti. Yāvakīvañca ānanda vajjīnaṁ arahantesu
dhammikārakkhāvaraṇagutti susaṁvihitā bhavissati kinti anāgatā ca arahanto vijitaṁ
āgaccheyyuṁ āgatā ca arahanto vijite phāsuṁ vihareyyunti vuḍḍhiyeva
1 Ma. bhavissati.
Ānanda vajjīnaṁ pāṭikaṅkhā no parihānīti.
Atha kho bhagavā vassakāraṁ brāhmaṇaṁ magadhamahāmattaṁ āmantesi
ekamidāhaṁ brāhmaṇa samayaṁ vesāliyaṁ viharāmi sārandade cetiye
tatrāhaṁ [1]- vajjīnaṁ ime satta aparihāniye dhamme desemi 2 yāvakīvañca
brāhmaṇa ime satta aparihāniyā dhammā vajjīsu ṭhassanti imesu
ca sattasu aparihāniyesu dhammesu vajjī sandississanti vuḍḍhiyeva
brāhmaṇa vajjīnaṁ pāṭikaṅkhā no parihānīti. Ekamekenapi bho gotama
aparihāniyena dhammena samannāgatānaṁ vajjīnaṁ vuḍḍhiyeva pāṭikaṅkhā no
parihāni ko pana vādo sattahi aparihāniyehi dhammehi akaraṇīyā
ca bho gotama vajjī raññā māgadhena ajātasattunā vedehiputtena
yadidaṁ yuddhassa aññatra upalāpanāya aññatra mithubhedā handa
ca dāni mayaṁ bho gotama gacchāma bahukiccā mayaṁ bahukaraṇīyāti.
Yassadāni tvaṁ brāhmaṇa kālaṁ maññasīti. Athakho vassakāro brāhmaṇo
magadhamahāmatto bhagavato bhāsitaṁ abhinanditvā anumoditvā uṭṭhāyāsanā
pakkāmīti.

[21] Ekaṁ samayaṁ bhagavā rājagahe viharati gijjhakūṭe pabbate.
Tatra kho bhagavā bhikkhū āmantesi satta vo bhikkhave aparihāniye
dhamme desessāmi taṁ suṇātha sādhukaṁ manasikarotha bhāsissāmīti.
Evaṁ bhanteti kho te bhikkhū bhagavato paccassosuṁ. Bhagavā etadavoca
katame ca bhikkhave satta aparihāniyā dhammā yāvakīvañca bhikkhave
1 Ma. brāhmaṇa. 2 Ma. desesiṁ.
Bhikkhū abhiṇhasannipātā bhavissanti sannipātabahulā vuḍḍhiyeva bhikkhave
bhikkhūnaṁ pāṭikaṅkhā no parihāni. Yāvakīvañca bhikkhave bhikkhū samaggā
sannipatissanti samaggā vuṭṭhahissanti samaggā saṅghakaraṇīyāni karissanti
vuḍḍhiyeva bhikkhave bhikkhūnaṁ pāṭikaṅkhā no parihāni. Yāvakīvañca
bhikkhave bhikkhū appaññattaṁ na paññāpessanti paññattaṁ na samucchindissanti
yathāpaññattesu sikkhāpadesu samādāya vattissanti vuḍḍhiyeva
bhikkhave bhikkhūnaṁ pāṭikaṅkhā no parihāni. Yāvakīvañca bhikkhave
bhikkhū ye te bhikkhū therā rattaññū cirapabbajitā saṅghapitaro saṅghaparināyakā
te sakkarissanti garukarissanti mānessanti pūjessanti
tesañca sotabbaṁ maññissanti vuḍḍhiyeva bhikkhave bhikkhūnaṁ pāṭikaṅkhā
no parihāni. Yāvakīvañca bhikkhave bhikkhū uppannāya taṇhāya
ponobbhavikāya no 1 vasaṁ gacchissanti vuḍḍhiyeva bhikkhave bhikkhūnaṁ
pāṭikaṅkhā no parihāni. Yāvakīvañca bhikkhave bhikkhū āraññakesu
senāsanesu sāpekkhā bhavissanti vuḍḍhiyeva bhikkhave bhikkhūnaṁ pāṭikaṅkhā
no parihāni. Yāvakīvañca bhikkhave bhikkhū paccattaññeva satiṁ
upaṭṭhapessanti kinti anāgatā ca pesalā sabrahmacārī āgaccheyyuṁ
āgatā ca pesalā sabrahmacārī phāsuṁ vihareyyunti vuḍḍhiyeva
bhikkhave bhikkhūnaṁ pāṭikaṅkhā no parihāni. Yāvakīvañca bhikkhave
ime satta aparihāniyā dhammā bhikkhūsu ṭhassanti imesu ca sattasu
aparihāniyesu dhammesu bhikkhū sandississanti vuḍḍhiyeva bhikkhave
1 Ma. na.
Bhikkhūnaṁ pāṭikaṅkhā no parihānīti.

[22] Satta vo bhikkhave aparihāniye dhamme desessāmi .pe.
Katame ca bhikkhave satta aparihāniyā dhammā yāvakīvañca bhikkhave
bhikkhū na kammārāmā bhavissanti [1]- na kammārāmataṁ anuyuttā vuḍḍhiyeva
bhikkhave bhikkhūnaṁ pāṭikaṅkhā no parihāni. Yāvakīvañca bhikkhave
bhikkhū na bhassārāmā bhavissanti .pe. Na niddārāmā bhavissanti
na saṅgaṇikārāmā bhavissanti na pāpicchā bhavissanti na pāpikānaṁ
icchānaṁ vasaṁ gatā na pāpamittā bhavissanti na pāpasahāyā
na pāpasampavaṅkā na oramattakena visesādhigamena antarā vosānaṁ
āpajjissanti vuḍḍhiyeva bhikkhave bhikkhūnaṁ pāṭikaṅkhā no parihāni.
Yāvakīvañca bhikkhave ime satta aparihāniyā dhammā bhikkhūsu ṭhassanti
imesu ca sattasu aparihāniyesu dhammesu bhikkhū sandississanti
vuḍḍhiyeva bhikkhave bhikkhūnaṁ pāṭikaṅkhā no parihānīti.