[365] 94 Chayimāni bhikkhave abhabbaṭṭhānāni katamāni cha abhabbo
Diṭṭhisampanno puggalo mātaraṁ jīvitā voropetuṁ abhabbo diṭṭhisampanno
puggalo pitaraṁ jīvitā voropetuṁ abhabbo diṭṭhisampanno puggalo
arahantaṁ jīvitā voropetuṁ abhabbo diṭṭhisampanno puggalo tathāgatassa
duṭṭhena cittena lohitaṁ uppādetuṁ abhabbo diṭṭhisampanno
puggalo saṅghaṁ bhindituṁ abhabbo diṭṭhisampanno puggalo aññaṁ satthāraṁ
uddisituṁ imāni kho bhikkhave cha abhabbaṭṭhānānīti.

[366] 95 Chayimāni bhikkhave abhabbaṭṭhānāni katamāni cha
abhabbo diṭṭhisampanno puggalo sayaṁkataṁ sukhadukkhaṁ paccāgantuṁ abhabbo
diṭṭhisampanno puggalo parakataṁ 1 sukhadukkhaṁ paccāgantuṁ abhabbo diṭṭhisampanno
puggalo sayaṁkatañca parakatañca sukhadukkhaṁ paccāgantuṁ abhabbo
diṭṭhisampanno puggalo asayaṁkāraṁ adhiccasamuppannaṁ sukhadukkhaṁ paccāgantuṁ
abhabbo diṭṭhisampanno puggalo aparakāraṁ 2 adhiccasamuppannaṁ sukhadukkhaṁ
paccāgantuṁ abhabbo diṭṭhisampanno puggalo asayaṁkārañca aparakārañca 2
adhiccasamuppannaṁ sukhadukkhaṁ paccāgantuṁ taṁ kissa hetu tathā
hissa bhikkhave diṭṭhisampannassa puggalassa hetu ca sudiṭṭho hetusamuppannā
ca dhammā imāni kho bhikkhave cha abhabbaṭṭhānānīti.
Sītivaggo catuttho.
Tassuddānaṁ
sīti bhabbo āvaraṇatā sussūsā pavuccati
pahātabbaṁ pahīnā me uppādetabbaṁ satthari
kañci saṅkhāraṁ mātari sayaṁkatena vaggoti 3 .
1 Ma. Yu. paraṅkataṁ. 2 Ma. Yu. ..paraṅkāraṁ. 3 Ma. sītibhāvaṁ āvaraṇaṁ voropitā
sussūsati appahāya pahīnābhabbo tatthānā caturopi cāti.
Ānisaṁsavaggo pañcamo

[367] 96 Channaṁ bhikkhave pātubhāvo dullabho lokasmiṁ katamesaṁ
channaṁ tathāgatassa arahato sammāsambuddhassa pātubhāvo dullabho
lokasmiṁ tathāgatappaveditassa dhammavinayassa desetā puggalo dullabho
lokasmiṁ ariyāyatane paccājāto dullabho 1 lokasmiṁ indriyānaṁ
avekallatā dullabhā lokasmiṁ ajaḷatā aneḷamūgatā dullabhā lokasmiṁ
kusaladhammacchando dullabho lokasmiṁ imesaṁ kho bhikkhave channaṁ
pātubhāvo dullabho lokasminti.

[368] 97 Chayime bhikkhave ānisaṁsā sotāpattiphalasacchikiriyāya
katame cha saddhammaniyato hoti aparihānadhammo hoti pariyantakatassa
dukkhaṁ na 2 hoti asādhāraṇena ñāṇena samannāgato hoti hetu
cassa sudiṭṭho hetusamuppannā ca dhammā imehi kho bhikkhave
cha ānisaṁsā sotāpattiphalasacchikiriyāyāti.

[369] 98 So vata bhikkhave bhikkhu kañci saṅkhāraṁ niccato samanupassanto
anulomikāya khantiyā samannāgato bhavissatīti netaṁ ṭhānaṁ
vijjati anulomikāya khantiyā asamannāgato sammattaniyāmaṁ okkamissatīti
netaṁ ṭhānaṁ vijjati sammattaniyāmaṁ anokkamamāno sotāpattiphalaṁ
vā sakadāgāmiphalaṁ vā anāgāmiphalaṁ vā arahattaṁ vā sacchikarissatīti
1 Ma. Yu. paccājāti dullabhā. 2 Ma. nasaddo natthi.
Netaṁ ṭhānaṁ vijjati.
So vata bhikkhave bhikkhu sabbasaṅkhāre 1 aniccato samanupassanto
anulomikāya khantiyā samannāgato bhavissatīti ṭhānametaṁ vijjati anulomikāya
khantiyā samannāgato sammattaniyāmaṁ okkamissatīti ṭhānametaṁ
vijjati sammattaniyāmaṁ okkamamāno sotāpattiphalaṁ vā sakadāgāmiphalaṁ
vā anāgāmiphalaṁ vā arahattaṁ vā sacchikarissatīti ṭhānametaṁ vijjatīti.

[370] 99 So vata bhikkhave bhikkhu kañci saṅkhāraṁ sukhato
samanupassanto .pe. Sabbasaṅkhāre 1 dukkhato samanupassanto .pe.

[371] 100 So vata bhikkhave bhikkhu kañci dhammaṁ attato samanupassanto
.pe. Sabbadhamme 2 anattato samanupassanto .pe.

[372] 101 So vata bhikkhave bhikkhu nibbānaṁ dukkhato samanupassanto
anulomikāya khantiyā samannāgato bhavissatīti netaṁ ṭhānaṁ vijjati anulomikāya
khantiyā asamannāgato sammattaniyāmaṁ okkamissatīti netaṁ
ṭhānaṁ vijjati sammattaniyāmaṁ anokkamamāno sotāpattiphalaṁ vā sakadāgāmiphalaṁ
vā anāgāmiphalaṁ vā arahattaṁ vā sacchikarissatīti netaṁ
ṭhānaṁ vijjati.
So vata bhikkhave bhikkhu nibbānaṁ sukhato samanupassanto anulomikāya
khantiyā samannāgato bhavissatīti ṭhānametaṁ vijjati anulomikāya
khantiyā samannāgato sammattaniyāmaṁ okkamissatīti ṭhānametaṁ vijjati
1 Ma. Yu. sabbasaṅkhāraṁ. 2 Yu. sabbadhammaṁ.
Sammattaniyāmaṁ okkamamāno sotāpattiphalaṁ vā sakadāgāmiphalaṁ vā
anāgāmiphalaṁ vā arahattaṁ vā sacchikarissatīti ṭhānametaṁ vijjatīti.

[373] 102 Cha bhikkhave ānisaṁse sampassamānena alameva bhikkhunā
sabbasaṅkhāresu anodhiṁ karitvā aniccasaññaṁ upaṭṭhapetuṁ katame cha
sabbasaṅkhārā ca anavaṭṭhitato 1 khāyissanti sabbaloke ca me mano
nābhiramissati sabbalokā ca me mano vuhiṭṭhassati nibbānapoṇañca
me mānasaṁ bhavissati saññojanā ca me pahānaṁ gacchanti 2 paramena
ca sāmaññena samannāgato bhavissāmīti ime kho bhikkhave cha ānisaṁse
sampassamānena alameva bhikkhunā sabbasaṅkhāresu anodhiṁ karitvā aniccasaññaṁ
upaṭṭhapetunti.

[374] 103 Cha bhikkhave ānisaṁse sampassamānena alameva bhikkhunā
sabbasaṅkhāresu anodhiṁ karitvā dukkhasaññaṁ upaṭṭhapetuṁ katame cha
sabbasaṅkhāresu ca me nibbānasaññā 3 paccupaṭṭhitā bhavissati seyyathāpi
ukkhittāsike vadhake sabbalokā ca me mano vuṭṭhahissati nibbāne
ca santidassāvī bhavissāmi anusayā ca me samugghātaṁ gacchissanti
kiccakārī ca bhavissāmi satthā ca pariciṇṇo bhavissati mettāvatāyāti
ime kho bhikkhave cha ānisaṁse sampassamānena alameva
bhikkhunā sabbasaṅkhāresu anodhiṁ karitvā dukkhasaññaṁ upaṭṭhapetunti.