[355] 84 Chahi bhikkhave dhammehi samannāgatassa bhikkhuno yā
ratti vā divaso vā āgacchati hāni yeva pāṭikaṅkhā kusalesu dhammesu
no vuḍḍhi katamehi chahi idha bhikkhave bhikkhu mahiccho hoti
vighātavā asantuṭṭho itaritaracīvarapiṇḍapātasenāsanagilānapaccaya-
bhesajjaparikkhārena asaddho hoti dussīlo hoti kusīto hoti
muṭṭhassati hoti duppañño hoti imehi kho bhikkhave chahi dhammehi
samannāgatassa bhikkhuno yā ratti vā divaso vā āgacchati hāni
yeva pāṭikaṅkhā kusalesu dhammesu no vuḍḍhi.
Chahi bhikkhave dhammehi samannāgatassa bhikkhuno yā ratti vā
divaso vā āgacchati vuḍḍhi yeva pāṭikaṅkhā kusalesu dhammesu no
parihāni katamehi chahi idha bhikkhave bhikkhu na mahiccho hoti na
vighātavā 1 santuṭṭho itaritaracīvarapiṇḍapātasenāsanagilānapaccaya-
bhesajjaparikkhārena saddho hoti sīlavā hoti āraddhaviriyo hoti satimā
hoti paññavā hoti imehi kho bhikkhave chahi dhammehi samannāgatassa
bhikkhuno yā ratti vā divaso vā āgacchati vuḍḍhi yeva
1 Po. Ma. avighātavā.
Pāṭikaṅkhā kusalesu dhammesu no parihānīti.
Arahattavaggo tatiyo.
Tassuddānaṁ
dukkhaṁ arahattaṁ uttari ca 1 sukhaṁ adhigamena ca
mahattadvayaniraye 2 aggadhammañca rattiyāti 3 .
---------
Sītivaggo catuttho

[356] 85 Chahi bhikkhave dhammehi samannāgato bhikkhu abhabbo anuttaraṁ
sītibhāvaṁ sacchikātuṁ katamehi chahi idha bhikkhave bhikkhu yasmiṁ
samaye cittaṁ niggahetabbaṁ tasmiṁ samaye cittaṁ na niggaṇhāti
yasmiṁ samaye cittaṁ paggahetabbaṁ tasmiṁ samaye cittaṁ na paggaṇhāti
yasmiṁ samaye cittaṁ sampahaṁsitabbaṁ tasmiṁ samaye cittaṁ na sampahaṁsati
yasmiṁ samaye cittaṁ ajjhupekkhitabbaṁ tasmiṁ samaye cittaṁ na ajjhupekkhati
hīnādhimuttiko ca hoti sakkāyābhirato ca imehi kho
bhikkhave chahi dhammehi samannāgato bhikkhu abhabbo anuttaraṁ sītibhāvaṁ
sacchikātuṁ.
Chahi bhikkhave dhammehi samannāgato bhikkhu bhabbo anuttaraṁ sītibhāvaṁ
sacchikātuṁ katamehi chahi idha bhikkhave bhikkhu yasmiṁ samaye cittaṁ
niggahetabbaṁ tasmiṁ samaye cittaṁ niggaṇhāti yasmiṁ samaye cittaṁ
paggahetabbaṁ tasmiṁ samaye cittaṁ paggaṇhāti yasmiṁ samaye cittaṁ
1 Yu. uttariñca. 2 Ma. mahantattaṁ dvayaṁ .... Yu. mahantattaṁ dvayaniraye.
3 Ma. Yu. rattiyoti.
Sampahaṁsitabbaṁ tasmiṁ samaye cittaṁ sampahaṁsati yasmiṁ samaye cittaṁ
ajjhupekkhitabbaṁ tasmiṁ samaye cittaṁ ajjhupekkhati paṇītādhimuttiko
ca hoti nibbānābhirato ca imehi kho bhikkhave chahi dhammehi
samannāgato bhikkhu bhabbo anuttaraṁ sītibhāvaṁ sacchikātunti.

[357] 86 Chahi bhikkhave dhammehi samannāgato suṇantopi saddhammaṁ
abhabbo niyāmaṁ okkamituṁ kusalesu dhammesu sammattaṁ katamehi chahi
kammāvaraṇatāya samannāgato hoti kilesāvaraṇatāya samannāgato
hoti vipākāvaraṇatāya samannāgato hoti assaddho ca hoti
acchandiko ca duppañño ca imehi kho bhikkhave chahi dhammehi
samannāgato suṇantopi saddhammaṁ abhabbo niyāmaṁ okkamituṁ kusalesu
dhammesu sammattaṁ.
Chahi bhikkhave dhammehi samannāgato suṇantopi 1 saddhammaṁ bhabbo
niyāmaṁ okkamituṁ kusalesu dhammesu sammattaṁ katamehi chahi na
kammāvaraṇatāya samannāgato hoti na kilesāvaraṇatāya samannāgato
hoti na vipākāvaraṇatāya samannāgato hoti saddho ca hoti
chandiko ca paññavā ca imehi kho bhikkhave chahi dhammehi
samannāgato suṇantopi 1 saddhammaṁ bhabbo niyāmaṁ okkamituṁ kusalesu
dhammesu sammattanti.

[358] 87 Chahi bhikkhave dhammehi samannāgato suṇantopi saddhammaṁ
abhabbo niyāmaṁ okkamituṁ kusalesu dhammesu sammattaṁ katamehi chahi
1 Ma. pisaddo natthi.
Mātā jīvitā voropitā hoti pitā jīvitā voropito hoti arahā 1
jīvitā voropito hoti tathāgatassa duṭṭhena cittena lohitaṁ
uppāditaṁ hoti saṅgho bhinno hoti duppañño hoti jaḷo eḷamūgo
imehi kho bhikkhave chahi dhammehi samannāgato suṇantopi saddhammaṁ
abhabbo niyāmaṁ okkamituṁ kusalesu dhammesu sammattaṁ.
Chahi bhikkhave dhammehi samannāgato suṇantopi 2 saddhammaṁ bhabbo
niyāmaṁ okkamituṁ kusalesu dhammesu sammattaṁ katamehi chahi na
mātā jīvitā voropitā hoti na pitā jīvitā voropito hoti na
arahā 1 jīvitā voropito hoti na tathāgatassa duṭṭhena cittena
lohitaṁ uppāditaṁ hoti na saṅgho bhinno hoti paññavā hoti
ajaḷo aneḷamūgo imehi kho bhikkhave chahi dhammehi samannāgato
suṇantopi 2 saddhammaṁ bhabbo niyāmaṁ okkamituṁ kusalesu dhammesu
sammattanti

[359] 88 Chahi bhikkhave dhammehi samannāgato suṇantopi saddhammaṁ
abhabbo niyāmaṁ okkamituṁ kusalesu dhammesu sammattaṁ katamehi chahi
tathāgatappavedite dhammavinaye desiyamāne na sussūsati na sotaṁ
odahati na aññācittaṁ upaṭṭhapeti 3 anatthaṁ gaṇhāti atthaṁ
riñcati ananulomikāya khantiyā samannāgato hoti imehi kho
bhikkhave chahi dhammehi samannāgato suṇantopi saddhammaṁ abhabbo niyāmaṁ
okkamituṁ kusalesu dhammesu sammattaṁ.
1 Ma. arahaṁ. 2 Ma. pisaddo natthi. 3 Ma. upaṭṭhāpeti.
Chahi bhikkhave dhammehi samannāgato suṇantopi 1 saddhammaṁ bhabbo
niyāmaṁ okkamituṁ kusalesu dhammesu sammattaṁ katamehi chahi tathāgatappavedite
dhammavinaye desiyamāne sussūsati sotaṁ odahati aññācittaṁ
upaṭṭhapeti 2 atthaṁ gaṇhāti anatthaṁ riñcati anulomikāya
khantiyā samannāgato hoti imehi kho bhikkhave chahi dhammehi samannāgato
suṇantopi 1 saddhammaṁ bhabbo niyāmaṁ okkamituṁ kusalesu dhammesu
sammattanti.

[360] 89 Cha bhikkhave dhamme appahāya abhabbo diṭṭhisampadaṁ
sacchikātuṁ katame cha sakkāyadiṭṭhiṁ vicikicchaṁ sīlabbataparāmāsaṁ
apāyagamaniyaṁ rāgaṁ apāyagamaniyaṁ dosaṁ apāyagamaniyaṁ mohaṁ ime
kho bhikkhave cha dhamme appahāya abhabbo diṭṭhisampadaṁ sacchikātuṁ.
Cha bhikkhave dhamme pahāya bhabbo diṭṭhisampadaṁ sacchikātuṁ katame
cha sakkāyadiṭṭhiṁ vicikicchaṁ sīlabbataparāmāsaṁ apāyagamaniyaṁ rāgaṁ
apāyagamaniyaṁ dosaṁ apāyagamaniyaṁ mohaṁ ime kho bhikkhave cha
dhamme pahāya bhabbo diṭṭhisampadaṁ sacchikātunti.

[361] 90 Chayime bhikkhave dhammā diṭṭhisampannassa puggalassa pahīnā
katame cha sakkāyadiṭṭhi vicikicchā sīlabbataparāmāso apāyagamaniyo
rāgo apāyagamaniyo doso apāyagamaniyo moho ime
kho bhikkhave cha dhammā diṭṭhisampannassa puggalassa pahīnāti.

[362] 91 Cha bhikkhave dhamme abhabbo diṭṭhisampanno puggalo
1 Ma. pisaddo natthi. 2 Ma. upaṭṭhāpeti.
Uppādetuṁ katame cha sakkāyadiṭṭhiṁ vicikicchaṁ sīlabbataparāmāsaṁ
apāyagamaniyaṁ rāgaṁ apāyagamaniyaṁ dosaṁ apāyagamaniyaṁ mohaṁ ime
kho bhikkhave cha dhamme abhabbo diṭṭhisampanno puggalo uppādetunti.

[363] 92 Chayimāni bhikkhave abhabbaṭṭhānāni katamāni cha abhabbo
diṭṭhisampanno puggalo satthari agāravo viharituṁ appatisso abhabbo
diṭṭhisampanno puggalo dhamme agāravo viharituṁ appatisso abhabbo
diṭṭhisampanno puggalo saṅghe agāravo viharituṁ appatisso abhabbo
diṭṭhisampanno puggalo sikkhāya agāravo viharituṁ appatisso abhabbo
diṭṭhisampanno puggalo anāgamanīyavatthuṁ paccāgantuṁ abhabbo diṭṭhisampanno
puggalo aṭṭhamaṁ bhavaṁ nibbattetuṁ imāni kho bhikkhave
abhabbaṭṭhānānīti.

[364] 93 Chayimāni bhikkhave abhabbaṭṭhānāni katamāni cha abhabbo
diṭṭhisampanno puggalo kañci saṅkhāraṁ niccato upagantuṁ abhabbo
diṭṭhisampanno puggalo kañci saṅkhāraṁ sukhato upagantuṁ abhabbo
diṭṭhisampanno puggalo kañci dhammaṁ attato upagantuṁ abhabbo
diṭṭhisampanno puggalo anantariyakammaṁ kātuṁ abhabbo diṭṭhisampanno
puggalo kotuhalamaṅgalena suddhiṁ paccāgantuṁ abhabbo diṭṭhisampanno
puggalo ito bahiddhā dakkhiṇeyyaṁ gavesituṁ imāni kho bhikkhave cha
abhabbaṭṭhānānīti.